Dal jazz fin a l'improvisaziun, da la musica populara fin a l'experimental: dals Frars Janett & Caviezel e Szilla als Fränzlis da Tschlin, cun C'est Si B.O.N, Standards of Rumantsch e cun ses frar Domenic.

En il center da l'Artg musical stat Curdin Janett. Il musicist e cumponist oriund da Tschlin ha gist festivà ses 70avel – e nus dain in sguard sin sia carriera musicala e sias staziuns. Da Curdin Janett datti era numerusas cumposiziuns da tut ils geners, da musica populara tradiziunala, da quella plain experiments e surpraisas, tocs da jazz e blers arranschaments per chors, bands e chapellas.

En l'Artg musical raquinta el era da sia uffanza a Tschlin, da ses emprims pass musicals, da ses instruments ed era da ses figl e sias figlias che han ertà sia passiun per la musica. E cler che vus udis er intginas da sias cumposiziuns. Per exempel «La polca da nona», «La mazurca dal Bambus», «La cupicharola nova», il «Blues in F pels giats da Fritz», e la bella mazurca «Davo la lomma». Nus laschain sunar e chantar il Cor da la scola media evangelica Samedan, ils Frars Janett & Caviezel, Satie's Fraktion, Szilla, ils Fränzlis da Tschlin, C'est Si B.O.N, Standards of Rumantsch – e vus udis er co ch'el suna ensemen cun ses frar Domenic.

L'Artg musical porta oz l'emissiun naziunala da la Festa da musica populara a Bellinzona emessa en directa sonda saira, ils 23 da settember 2023 sin la Plazza del Sole. Diversas furmaziuns da l'entira Svizra preschentan divers tocs da lur vast repertori. L'emissiun vegn moderada en tuttas quatter linguas naziunalas.

Sch'i na dess betg els, lura stuess ins fundar els – ils Engadiner Ländlerfründa...

L'Artg musical dad oz è deditgà plainamain als Engadiner Ländlerfründa. La chapella enconuschenta en tut la Svizra datti dapi 55 onns e ses cumponist ed accordeonist Carlo Simonelli po festegiar ses 85 avel. Perquai udis in «Artg musical» cun ils Engadiner Ländlerfründa e cun bleras da lur melodias e sauts enconuschents sco «Am Dorffescht z'Celerina», «Miar Engadiner», «Dr Ohraspitzer», «Maloja Wind», ed il grond semperverd «Im Felsa-Schuss».

Dals 14 fin ils 17 d'avust 2023 han otg giuvens talents da musica populara da l'entira Svizra passentà in'emna d'exercizi intensiv per preparar cuminaivlamain in concert al festival Alpentöne. Patricia Draeger, l'enconuschenta accordeonista ha surpiglià la direcziun artistica ed ha er sunà ensemen cun LES «Jeunes Talents Suisses» - ils giuvens talents svizzers. Tranter quests eran er dus Grischuns: Simon Gabriel da S-chanf ed Andres Flütsch da Tavau.

En sia patria aveva el gia in num sco cumponist cura ch'el ha pudì festivar success internaziunal cun sia retscha da «Danzones» l'entschatta dals onns 1990. En spezial la Danzón nr. 2 ha procurà per attenziun internaziunala. Ozendi vegn la musica da Márquez preschentada sin l'entir mund da numerus orchesters ed ensembles da chombra sco era da solistas e solists. In da quests solists è il trumbettist Pacho Flores che preschenta en l'emissiun il «Concierto de Otoño», in concert per trumbetta en trais parts.

L'ensemble da renum internaziunal po guardar enavos sin ina lunga istorgia da success. L'emprima registraziun è da l'onn 1965 sut il num da gruppa cumplitgà «Scola Cantorum Pro Musica Profana in Cantabridgiense». Questa registraziun è vegnida ad ureglia al dirigent renumà Sir Neville Marriner che ha envidà els ad in concert l'avust 1966. L'emprim concert sut il num «King's Singers» han els dà il prim da matg 1968 en la Queen Elizabeth Hall a Londra. 

L'onn proxim vegnan els a dar concert a Cuira.

Frederick Theodore Albert Delius deriva d'ina veglia famiglia da commerziants e fabricants da textilias oriunda da la Germania. Malgrà ch'el ha gia sco uffant gì instrucziun da clavazin e violina, n'ha ses bab betg giavischà per el ina carriera musicala. Il 1884 ha el survegnì ils daners per sa domiciliar a Florida sco pur (farmer) d'oranschas. Bainbaud ha el però negligì la lavur sin sia farma ed è sa deditgà a la musica. Ina buna decisiun, sco Vus pudais As persvader en quest Artg musical.

Avant 30 onns, l'atun 1993, ha la furmaziun da brass da la Surselva, il Cerchel Musical Sursilvan (pli tard il Cerchel musical dalla Surselva) edì ses emprim disc cumpact «Moviments». Igl è stà l'emprim da blers puncts culminants durant radund 20 onns existenza da l'ensemble da sturs laic. 

L'Artg musical porta l'istorgia da la furmaziun, emprimas emprovas ed emprims success. Er a pled vegn Ignaz Schmed, in dals fundaturs da l'ensemble.

Cun tastas e cordas, cun accordeons, ghitarras, violinas e citras.

Per questa dumengia As less jau proponer in Artg musical cun melodias e chanzuns da l'Europa dal Nord, da quellas popularas e da folk. Da la Svezia, Norvegia, Finlanda e schizunt da la Grönlanda. Suns e tuns per dis da stad lungs e per notgs d'enviern curtas. Jau As less preschentar musicists e chantaduras che fascineschan cun lur vuschs marcantas, intensivas e profundas. Lur melodias èn melancolicas e plain energia – per ballar ed er per giudair. Vus udis la furmaziun Hedningarna, ad Annibjorg Lien, Kimmo Pohjonen e Maria Kalaniemi a l'accordeon – ed er la furmaziun svizra-svedaisa Folk & Co. cun Jürg Nietlispach e Pär Näsbom.

Jazz dal Grischun e da la Svezia. Las registraziuns da dus concerts dal festival da stat da jazz Cuira.

L'emprim'ura da l'Artg musical deditgain nus a la generaziun nova, a talents giuvens da la scena dal jazz. Il festival da stad da Jazz a Cuira ha preschentà in program cun la finamira da promover musicistas e musicists giuvens. Ina da quellas musicistas giuvnas è stada Anna Bläsi cun ses quartet: Anna Bläsi chant, Mario Castelberg, ghitarra, Gianna Sophia Lavarini, saxofon e Vito Cadonau, bass. Er sin il palc: il musicist svedais Otis Sandsjö cun sia band Y-OTIS che sa cumpona dad Otis Sandsjö, saxofon, Petter Eldh, bass, sintetisader, Dan Nicholls, tastas e sintetisader e Tilo Weber, battaria.