Pertge èn quasi mo schurnalistas da l'Ucraina vegnidas a Lugano e betg schurnalists? Daco turna in schurnalist da la Siria en la guerra en l'Ucraina? Nus raquintain a vus d'inscunters davos las culissas a la Ucraine Recovery Conference a Lugano.

Politichers poetics, schurnalistas stressadas ed in Forum mundial d'economia cun surpraisas. En la nova episoda dal podcast Café federal vulain dar a vus in'invista davos las culissas dal mintgadi a Berna, ma era dal WEF a Tavau.

La cravatta dad Alain Berset, il satgados da Viola Amherd ni lura tuttina la padella e la grattaduira da Simonetta Sommaruga? Tranter auter pertge che quellas chaussas en da cumprar pudais vus tadlar en la episoda da giubileum dal Café federal. 

Per la 20avla giada discuteschan noss correspundents a Berna sur da quai che curra e passa davant e davos las culissas da la politica federala.

Vus vesais adina il product cura chel ès finì. Saja quai ina contribuziun per il radio, in video per la televisiun ni in artitgel online. Mo mintgatant capita il propi interessant davos las culissas. Nus quintain a vus in zic da quai che vus na vegnis normalmain betg a savair.

Guerra en l'Ucraina e tge fa la Svizra? Las decisiuns dal Cussegl federal èn vegnidas crititgadas fermamain ed i ha dà ina communicaziun confusa. E la fin finala è tuttina vegnì decidì auter. L'agir dal Cussegl federal pigliain nus sut la marella en la pli nova episoda dal Café federal.

Ma nus discutain era dals maletgs trists ed incredibels or dal l'Ucraina e tge che quels fan cun nus. Ina guerra entamez l'Europa – ina guerra per quella ch'i mancan ils pleds.

Finì cun homeoffice e quarantina. Il Cussegl federal dat gas e vul bainbaud abolir tuttas mesiras cunter il coronavirus. Per ils ins è quai in di da daletg e per autras in mument da quitads. Nus avain dumandà in psicolog tge tips ch'el ha per puspè chattar la via enavos en la normalitad.

Amez la tschintgavla unda smanatscha ussa era anc ina nova varianta dal coronavirus – omicron. Betg mo la pronunzia correcta procura per testas cotschnas, mabain era la dumonda quant malsegira chella è.

En la novepisoda dal podcast discutain dal num, da las mesiras, da conferenzas da medias hecticas e deffects laterals positivs.

En la mesadad da la legislatura guardainsa pli precis co che la classe politique grischuna ha politisà. Da la provocatura enfin l'outsidera ed il federalist.

In viva pon far in l'auter en Grischun suenter la sessiun a Berna – era l'anteriura cussegliera naziunala Silva Semadeni. Dentant san uss era divers parlamentaris co sa stregliar en territori Rumantsch. Ellas han numnadamain emprais in zic Rumantsch. Tge e co precis discutain en il podcast.

In certificat per mangiar la pizza en il restaurant procura per demonstraziuns e malencletgas. Ina pitschna gruppa è dad aut e la polarisaziun gronda. Tge vul quai dir per la Svizra a lunga vista? Nus discutain.