Chikhalidwe komanso Tanthauzo la Mgonero wa Ambuye

Tikumbukile nthawi imene timakamba za masakalamenti pamene tidanena kuti alipo awiri: ubatizo komanso mgonero wa Ambuye.

Masakalamenti amenewa adakhazikitsidwa ndi cholinga choti aonetsele poyera chikhulupiliro chathu cha uthenga wabwino. Pamene tikondwelera mu mgonero wa Ambuye komanso kutenga mbali pa ubatizo, zonsezi zimatipatsa mwayi oti tionetsele chikhulupiliro chathu poyera.

Anthu atatipeza natifusa kuti kodi ndi chifukwa chiyani mukuchita izi. Yankho lake ndi lakuti, chifukwa cha chimene Yesu Khristu ali komanso zimene adachita. St. Augustine pokamba za masakalamenti adanena kuti: “zizindikilo zakunja komanso zooneka ndi maso za chisomo chauzimu cha mkati mwa munthu.”

Kutanthauza kunena kuti, mbali zonse ma sakalamenti amakhala chizindikilo chimene chimalozela ku chinthu china chosiyana komanso chofunikila kuposa ilo.

Ndingoyelekeza motele, patha kukhala chikwangwani pa msewu chopita ku Lilongwe. Mutha kuchidziwa chikwangwanicho. Mwina mudayimako pafupi ndi chikwangwanicho. Mwinanso mudalozelako anthu ena chikwangwanicho. Ndipo chikwangwanicho mutha kuchidziwa kwambiri ngakhale simudafike malo amene chikulozela. Mukudziwa kuti pali malo otchedwa Lilongwe chifukwa cha chikwangwani. Ndizotheka kuti kuli anthu kumeneko koma simukudziwa chifukwa choti simudapiteko. Pamenepa titha kuona kuti pali kuthekela kodziwa chikwangwani kapena chizindikilo cholozela kanthu kamene inu simudakaone.

Ndi chimodzimodzinso mgonero wa Ambuye. Ndi zotheka ngakhale chimakhala chinthu chovetsa chisoni, koma ndi zotheka kutenga nawo mbali kudya mgonero koma osazindikila chimene umayimila kapena kutionetsela. Ndi chifukwa chake ndi chinthu chofunikila ngati anthu patokha komanso m’mipingo mwathumu kuti tikhale chidwi ndi zinthu zimenezi.

Chimene tikuchiona mu Chipangano Chatsopano chokhudzana ndi ubatizo komanso mgonero ndi chakuti, miyambo imeneyi siyidabwele chifukwa choti anthu adakhala pamodzi nkuyamba kulingalira za mwambo kapena ka bungwe, koma chimene tikuona ndi chakuti zidakhazikitsidwa ndi Mulungu.

LERO TIKUFUNA TIONE KUTI KODI TIPEMBEDZE MOTANI NDI MPINGO WATHU?

Tikudziwa chifukwa chimene mpingo ukuyenelera kukumana pamodzi. Koma ndi zinthu ziti zimene zingapangitse anthu kulephela kukumana ndi anzawo nthawi ya chipembedzo?

Pali zifukwa zingapo zimene zingapelekedwe zolepheletsa anthu kukumana ndi anzawo nthawi ya chipembedzo. Ena amanena kuti iwo amaonetsela chikhulupiliro chawo mu njira zina. Ena amanena kuti sadapeze mpingo owasangalatsa. Ena amanena kuti sasangalatsidwa ndi ulaliki wa abusa awo. Ena amanena kuti samva kulandilidwa ku mpingo kwawo. Ena mukawafusa nthawi zonse amangoti ndi nadwala ndiye nkumadabwa kuti kodi abale muzingodwala pasabata pokhapokha?

Ena amanena kuti alibe nthawi yopita ku tchalitchi. Ali ndi nthawi yochita china chilichonse koma ikafika nthawi yak u tchalitchi akuti alibe nthawi. Ndiye nkumati, Mulungu adakupatsani masiku 6 oti mutha kugwila ntchito zanu zonse. Ndipo adalamulira kuti mupatule tsiku limodzi lokha kumupembedza iye. Tsono mukufuna tsiku la Mulungulo mugwilenso ntchito zanu, zoona?

Ngati anthu okhulupilira, tikuyenela kuti tisakhale opanda chidziwitso komanso tisanyozele malamulo a Mulungu pa nkhani yokumana pamodzi ngati mpingo nkumapeza zifukwa zosaveka bwino kuti tisapite ku tchalitchi.

Tiyeni tione zinthu zina zimene anthu amawiringula kapena sazikonda zokhudzana ndi nthawi ya chipembedzo.

Ndinakamba kale kuti mwina anthu sangakondwele ndi ulaliki. Mwina amaona ma ulaliki kukhala otopetsa. Ena mwina kayimbidwe ka nyimbo, nyimbo zimene zimasankhidwa, machitidwe ena kapena kayankhulidwe kena kooneka kachikalekale mwina, mwina nthawi ya chipembedzo kumene ndi zinthu zimene anthu amakonda kuwiringula.

Tikufuna tione zinthu zimenezi mosabisa chifukwa choti sizidzakhala zinthu zophweka kusonkhanitsa anthu pamodzi tsiku la chipembedzo, komanso palibe mpingo umene umachita bwino pa nkhani imeneyi. Tonse ndife anthu ochimwa mu dziko limene lasokonezedwa ndi tembelero la uchimo, ndi chifukwa chake nkhani ya chipembedzo singalephele kukhala ngati phili la nkhondo nthawi zina. Tiyitenge kuti imeneyi ndi nkhondo ya uzimu.

Mpingo wopanda mavuto ndi okhawo umene uli kumwamba.

Ndi chifukwa chake nkoyenelera kuti tiphuzile kuti kodi chipembedzo ndi chani, komanso tionetsetse kuti sitikulolera tchimo lathu kapena zolakalaka zathu zitisokoneze pa nkhani ya chipembedzo. Ndi chifukwa chake lero tikufuna tiyankhe funso limeneli la kuti kodi tipembedze motani ndi mpingo wathu?

LERO TIKUFUNA TIONE KUTI KODI NDI CHIFUKWA CHIYANI MPINGO UMAKUMANA PAMODZI.

Pali zinthu zambiri zimene titha kunena zokhudzana ndi chifukwa chimene mpingo umakumanila pamodzi – kupemphera, kukhala pa chiyanjano, kuphuzitsidwa, kupembedza Mulungu, ndi zina.

Lero tikhazikika pa ndime imene imatiuza chifukwa chimodzi chimene chimapangitsa mpingo kuti uzikumana pamodzi komanso tiona chifukwa chimene kukumana kumeneku ndi ntchito yofunikila kwambiri pa mpingo.

TIYENI TIWERENGE AHEBERI 10:19-25

“Ndipo tsono abale, molimba mtima timalowa mʼMalo Opatulika kwambiri chifukwa cha magazi a Yesu. 20Iye anatitsekulira njira yatsopano ndi yamoyo kudutsa chinsalu chotchinga, chimene ndi thupi lake. 21Ndiponso tili ndi wansembe wamkulu woyangʼanira nyumba ya Mulungu. 22Tsono tiyeni tiyandikire kwa Mulungu ndi mtima woona ndi wodzaza ndi chikhulupiriro. Popeza mitima yathu yayeretsedwa, ndi yopanda chikumbumtima chotitsutsa, ndiponso matupi athu asambitsidwa ndi madzi woyera. 23Tiyeni tigwiritsitse mosagwedezeka zimene timaziyembekezera ndi kuzivomereza, pakuti amene anatilonjezayo ndi wokhulupirika. 24Tiziganizira mmene tingalimbikitsirane wina ndi mnzake pokondana ndi kuchita ntchito zabwino. 25Tiyeni tisaleke kusonkhana kwathu pamodzi monga mmene ena amachitira, koma tizilimbikitsana makamaka poona kuti tsiku la Ambuye layandikira.”

Monga mwa ndime imeneyi, tiyeni tigawane zimene tikuphuzila mu fundo ziwiri:

Fundo yoyamba, patokha timagwedezeka m’chikhulupiliro chathu.

Ndime imeneyi ikutilimbikitsa kuti “tigwiritse chibvomerezo cha chiyembekezo chathu osagwedezeka.” Kutanthauza kunena kuti sititalikilana kugwedezeka pa chikhulupiliro chathu, ndipo tikuyenela kukumbutsidwa kuti tigwilitsitse. Pamene tasiya kusonkhana pamodzi, timataya chilimbikitso chotele kuchokela kwa anzathu.

Tiyeni tione zimene zikuchitika pa ndime imeneyi polingalira buku lonse la Aheberi. Mu buku lonseli la Aheberi, tikupatsidwa machenjezo osiyanasiyana zokhudzana ndi tchimo ndi kubwelera m’mbuyo.

Tiyeni tiwerenge Aheberi 3:12-13

“Abale samalani, kuti pasapezeke wina aliyense mwa inu wokhala ndi mtima woyipa ndi wosakhulupirira, womulekanitsa ndi Mulungu wamoyo. Koma muzilimbikitsana tsiku ndi tsiku, ikanalipo nthawi imene imatchedwa kuti “Lero” kuti aliyense wa inu mtima wake usawumitsidwe ndi chinyengo cha tchimo.”

Ndime imeneyi ikutichenjeza za mtima osakhulupilira. Tikuyenela tikhale chidwi kuti mitima yathu isaumitsidwe ndi chinyengo cha tchimo.

Ndiye mawu oti “chinyengo cha tchimo” akutanthauzanji? Tchimo mwa chikhalidwe chake limatha kutinyenga. Limatipusitsa, ndipo sitidziwa kuti tapusitsidwa. Zimene zimapangitsa kuti chikhale chinthu choopsya kwambiri.

Tiyeni tingoganizila m’mene zimaonekela kuti munthu wanamizidwa ndi tchimo. Munthu ali pabanja bwinobwino koma chifukwa chonamizidwa ndi tchimo amayamba kuona akazi ake kapena amuna ake kuti ndi osakwanila. Zotsatila zake amayamba kuyenda njira za mseli ndi akazi ena kapena amuna ena nkumaona ngati ndilo yankho loyenelera. Pamenepa ndiye kuti tchimo lamupusitsa munthu ameneyu.

Ndiye tikaona pa ndime imeneyi, ikutiphuzitsa kuti tizilimbikitsana wina ndi mnzake pafupipafupi ndi cholinga choti tipewe kuumitsidwa mtima ndi chinyengo cha tchimo. Ngati ndanyengedwa ineyo, ndikusowekela munthu wina kuti andithandize ndidziwe pamene ndanyengedwapo chifukwa choti sindingathe kuona kuti ndanyengedwa. Ndikusowekela choonadi komanso maganizidwe ena kuchokela kwa anthu ena kundikumbutsa choonadi cha Mulungu.

Patokha, timagwedezeka m’chikhulupiliro chathu, mitima yathu imaumitsidwa, ndipo timanyengedwa ndi tchimo lathu. Ndi chifukwa chake tikuyenela kumakumana pamodzi ndi azathu kuti tipeze thandizo kuchokela kwa azathuwo.

LERO TIKUFUNA TIONE ZA UDINDO WA AZIMAYI MU MPINGO

Genesis 1:26-27; 2:19-25

1 Timothy 2:8-15

Chiphuzitso cha mpingo ndicho chimene tikulondola.

Mongokumbutsana tizindikile kunena kuti ulamuliro wathu pa china chilichonse chimene tifuna kuphuzila umachokela m’Baibulo. Ndi chifukwa chake pamene timayamba program imeneyi ya Chuma Mzikho Zadothi, tidayamba kuona kuti kodi Baibulo ndi chani. Cholinga chake chinali cha kuti tidzipatse poyambila kuti china chilichonse chokambidwa pa program imeneyi chichokele m’Mawu a Mulungu.

POYAMBA TIYENI TIONE MTSUTSO UMENE UMAKHALAPO PA NKHANI YA UDINDO WA AMAYI MU MPINGO.

Ayuda ena anali kuphuzitsa kunena kuti mkwabwino kutentha Mawu a Mulungu kusiyana ndi kuphuzitsa mzimayi. Ndineneletu kuti palibe munthu wowerenga Mawu a Mulungu ndi chidziwitso amene angakhulupilire fundo imeneyi. Chifukwa chiyani? Yesu anali kuphuzitsa azimayi mwaufulu komanso mokondwera ndipo anali kugwila nawo ntchito mnjira zosiyanasiyana.

VUTO LIMENE LILIPO LERO LINO PA MTSUTSO UMENEWU WA UDINDO WA AZIMAYI MU MPINGO NDI KUSOKONEKELA KWA ANTHU KOMANSO KUSOWEKELA CHITSIMIKIZO CHA MAWU A MULUNGU.

Anthu masiku ano angofika potsutsa china chilichonse chimene sakuchivetsa bwino m’Mawu a Mulungu. Chimene Mulungu adafotokozela m’Mawu ake pa dongosolo la udindo wa azimayi mu mpingo zangofika pooneka zopanda pake. Anthu asokonekela.

Kuonjezela pamenepo, mpingo nawo uli kakasi pa nkhani imeneyi. M’malo moyankha nkhani imeneyi ndi ulamuliro komanso mosakayika, mpingo wakhala ngati gulu la nkhondo losowa chochita. Mpingo wangofika pokana kukhala ngati nkhani imeneyi sikutikhudza.

Vuto linanso litha kukhala kuti mwina mpingo ulibe chidziwitso chokwanila kapena suli okonzeka kugwada pansi pa ulamuliro wa Baibulo. Anthu asokonekela.

Chimenechi chinayenela kuchitika ndi kuzindikila ulamuliro wathu kuti ukuchokela pa Baibulo kenako ndi kuyankhula mopanda mantha komanso moveka bwino. Kusokonekela kumene kulipo kwapezanaso ndi kusatsimikizika kwa mpingo pa chiphuzitso cha Mawu a Mulungu pa za udindo wa azimayi mu mpingo.

Tisalore dziko lapansi kuti lisinthe chikhulupiliro chathu pa Mawu a Mulungu. Ena akumanena kuti mpingo tikuyenela kumayenda ndi dziko chimene ndi chinthu chamanyazi. Mpingo sukuyenela kumayenda ndi dziko, tikuyenela tiziyenda monga mwa Mawu a Mulungu. Nkhani za gender zisasinthe chikhulupiliro chathu.

ZINTHU ZITATU ZOFUNIKILA NDIKAMBE PA NKHANI IMENEYI

Ndikudziwa kuti pali mabuku ambiri amene alembedwa osemphana ndi zimene Baibulo limakamba za udindo wa azimayi mu mpingo. Ndikudziwanso kuti nkhani imeneyi imatengedwa yopepuka ndi anthu ena. Ndipo zimenezi zitha kundipangitsa kuti nanenso ndingovomeleza zimene ena akuchita kutaya Mawu a Mulungu.

Koma ngakhale mabuku ambiri alembedwa otsutsana ndi chimene Baibulo limatiphuzitsa pa nkhani imeneyi, palibe umboni okwanila kuti anthu apeza katanthauzidwe kena katsopano kokhudzana ndi nkhani imeneyi kupatula kunena kuti chimene akuchita anthuwo ndi kunyozela Baibulo.

Nkhondo yaikulu sikukhudzana ndi kufanana kwa azibambo ndi azimayi. Nkhani yaikulu ndi ulamuliro wa Baibulo. Ndipo ngati titsimikizika mtima pamenepo tidzakhala ndi mphamvu, chikondi komanso chilimbikitso. Azitsogoleri ambiri lero lino ayesedwa kwakukulu pa nkhani ya ulamuliro wa Baibulo. Kodi timakhulupilira kuti Baibulo ndi Mawu a Mulungu kapena muli Mawu a Mulungu? Iwo amene amakhulupilira kuti Baibulo ndi Mawu a Mulungu sangatsutsane ndi chimene Baibulo likukamba pa nkhani imeneyi. Koma iwo amene amakhulupilila kuti mu Baibulo muli Mawu a Mulungu ndi amene akubweletsa chisokonezo mu mpingo wa Khristu.

Khristu ndiye mutu wa mpingo. Akolose 1:18 akunena kuti: Iye ndiyenso mutu wa thupi, limene ndi mpingo. Iye ndiye chiyambi chake, woyamba kuuka kwa akufa, kuti Iyeyo akhale wopambana zonse.

Nanga izi zikutanthauzanji pa zochitika za pa mpingo? Zikutanthauza kuti mpingo ukuyenela kumvera Mawu a Khristu pa china chilichonse chimene mpingo umachita. Pamapeto pa zonse, Khristu ndiye amene “amayendetsa” mpingo osati abusa anu kapena akuluampingo anu. Abusa ndi akuluampingo akuyenela kutsogolera mpingo momvera Mawu ake a Khristu basi. Mpingo ukuyenela kutsatila cholinga cha Khristu, osati zina.

Ndiye funso lina nkumati, ngati Khristu ndi mutu wa mpingo, ndi chifukwa chiyani tili ndi anthu amene amasankhidwa ngati azitsogoleri m’mipingo mwathumu?

Kuyankha kwake tinene kuti: tili ndi azitsogoleri chifukwa choti Mulungu adatipatsa chitsanzo m’Malemba Opatulika za m’mene mipingo ikuyenela kuyendetsedwela. Makamaka, Mulungu akutiuza m’Mawu ake kuti tikhale ndi akulu komanso ma deacon osankhidwa m’mipingo mwathumu.

1 Akorinto 12:12-26

Thupi Limodzi Ziwalo Zambiri

12Thupi ndi limodzi, ngakhale kuti lapangidwa ndi ziwalo zambiri. Ndipo ngakhale ziwalo zake zonse ndi zambiri, zimapanga thupi limodzi. Momwemonso ndi mmene alili Khristu. 13Pakuti tonse tinabatizidwa ndi Mzimu mmodzi mʼthupi limodzi. Myuda kapena Mgriki, kapolo kapena mfulu tonse tinapatsidwa kuti timwe Mzimu mmodzi yemweyo. 14Tsopano thupi silinapangidwe ndi chiwalo chimodzi koma ndi ziwalo zambiri.

15Ngati phazi litanena kuti, “Pakuti sindine dzanja, sindine chiwalo cha thupi.” Chifukwa chimenechi sichingachititse phazi kuti lisakhale chiwalo cha thupi. 16Ndipo ngati khutu litanena kuti, “Pakuti sindine diso, sindine chiwalo cha thupi.” Chifukwa chimenechi sichingachititse khutu kuti lisakhale chiwalo cha thupi. 17Kodi thupi lonse likanakhala diso, tikanamamva bwanji? Nanga thupi lonse likanakhala khutu, tikanamanunkhiza bwanji? 18Koma zoona nʼzakuti, Mulungu anayika ziwalo mʼthupi, chilichonse monga momwe Iye anafunira. 19Nanga zonse zikanakhala chiwalo chimodzi, ndiye thupi likanakhala lotani? 20Mmene zililimu, pali ziwalo zambiri koma thupi ndi limodzi lokha.

21Diso silingawuze dzanja kuti, “Iwe sindikukufuna!” Ndipo mutu sungawuze phazi kuti “Iwe sindikukufuna!” 22Mʼmalo mwake, ziwalo zathupi zimene zimaoneka ngati zofowoka ndizo zili zofunikira kwambiri, 23ndipo ziwalo zathupi zimene timaziyesa zopanda ulemu, ndizo timazilemekeza kwambiri. Ndipo ziwalo zosaoneka bwino ndizo zimalandira ulemu wapadera. 24Koma ziwalo zooneka bwino, nʼkosafunika kuti tizisamalire mwapadera. Mulungu polumikiza ziwalo zathupi, anapereka ulemu wopambana kwa ziwalo zimene zimafunadi ulemuwo 25kuti pasakhale kugawikana mʼthupi koma kuti ziwalo zonse zisamalirane. 26Ngati chiwalo chimodzi chikumva kuwawa, ziwalo zonse zimamvanso kuwawa. Ngati chiwalo chimodzi chilandira ulemu, ziwalo zonse zimakondwera nawo.

Lero tikufuna tione chimene chimapangitsa mpingo kukhala opambana. Ndiye poyamba tiyeni tione kuti kodi ndi chiyani chimene chimapanga mpingo kukhala osiyana ndi mabungwe ena achikhristu?

Poyankha funso limeneli ndiwelenge mutu 29 wa Chivomelezo cha ku Belgium chimene chidalembedwa m’chaka cha 1567 ndi Guido de Bres amene adali m’laliki m’mipingo ya chikonzedwe ku Netherlands ndipo adaphedwa chifukwa cha chikhulupiliro chake m’chaka chomwecho.

Chimene chidachitika ndi chakuti, nthawi imeneyi mipingo yak u Netherland inali pa chizuzo choopsya ndi utsogoleri wa boma wa chiroma. Ndiye ngati gawo limodzi lolimbana ndi kuzuzidwa kwawoko, komanso kuonetsela kwa owazuzawo kuti mipingo ya chikozedwe si anthu ogalukila, monga m’mene amawayimbila mlandu, koma kuti iwo anali nzika zotsatila malamulo a dziko amene amatsatila chiphuzitso cha chikhristu choona monga mwa Mawu a Mulungu, nkulu ameneyu de Bres adakoza chivomelezo chimenechi m’chaka cha 1561.

Mawu ochokera ku chivomelezo cha ku Belgium, mutu 29:

“Mpingo woona utha kudziwika ngati uli ndi zizindikilo izi: mpingowo umakangalira nkulalikila kwa mawu kwenikweni; umagwilitsa ntchito masakaramenti moyenelera monga m’mene Khristu adawakhazikitsila; komanso umachita chidzudzulo cha pa mpingo kukoza zolakwika.”

Ndiye monga chivomelezo chakale cha chikozedwe chimenechi, pali zinthu zitatu zimene zimaonetsela mpingo woona. Zizindikilo zimenezi sikuti zimationetsela zinthu zonse zimene mpingo umasowekela kuti ukhale ndi umoyo wabwino, koma zimationetsela kuti kodi gulu limene likudziwika ndi dzina limeneli nkowayeneladi kugwilitsa ntchito dzinali. Ndiye tiyeni tione chizindikilo chilichonse pachokhapachokha.

Sabata ino tikuyamba kuona zokhudzana ndi mpingo

Palibe chinthu chopambana kuposa kukhala pa mpingo. Mpingo ngati banja la ana a Mulungu, limakhala ndi udindo waukulu pa wina ndi mnzake.

Alipo anthu ena lero amene sazindikila bwinobwino udindo wa mpingo pa moyo wawo. Amaona ngati kulumikizana ndi Mulungu pawokha ndi bwino kusiyana ndi kukhazikika pa mpingo. Mwina kumayika patsogolo zinthu ngati mpira, kugona kapena maphuzilo pamwamba pa mpingo. Kuonjezela pamenepo, nthawi zina kumapezeka kuti timautumiki tina tikufuna kukhala pamwamba pa mpingo mpaka kupangila ma membala atchalitchi kumadzipeleka kwakukulu ku utumiki uja kusiyana ndi ku mpingo kwawo.

Pamene tikuyamba gawo ili, ndikuyembekezela kuti mukhala ndi mwayi ovetsetsa kuti kodi mpingo ndi chani, m’mene umayendela, koma kufunikila kwake m’moyo mwathu. Mulungu adayika mpingo kuti ukhale chilimbikitso kwa ife komanso kuti tikule limodzi mwa Khristu, anthu ena ndi kumayang’anila moyo wanu wa uzimu, kumva uthenga wabwino kulalikidwa, kukondwela ndi anthu osiyanasiyana, kuyenda limodzi m’moyo komanso kudutsa mzowawa pamodzi. Mpingo ndi chinthu chimene Mulungu adapeleka mwa chisomo komanso chikondi chake kwa anthu ake.

Tikawelenga Machitidwe 9, Saulo akuzuza mpingo, ndipo Yesu akumufusa kuti, “Saulo, Saulo, ndi chifukwa chiyani ukundizuza ine?” kuonetsela kuti chimene tikuchitila mpingo ndi chimene tikuchitila Khristu. Tikuyenela tikonde mpingo ngati timakonda Yesu. Pemphero langa ndi lakuti pamene tizidzamaliza chiphuzitso ichi tidzazidwa ndi nzeru komanso chikondi pa mpingo wake wa Mulungu, ndi kubweletsa ulemelero wochuluka kwa Yesu. Tikule m’chikondi chathu cha pa mpingo pamene tikukula m’chikondi chake pa Yesu, amene adatikonda poyamba.

Lero tiyambe ndi funso lakuti, kodi mpingo ndi chani?

Mawu amene amatanthauzidwa “mpingo” m’Baibulo akuchokela ku mawu ena a chiGreek amene amatanthauza “msonkhano” kapena “nkumano.”

Nthawi zina timagwilitsa ntchito mawu oti “mpingo” kuyimila mpingo onse wa dziko lapansi – amene ndi anthu onse a Mulungu pa dziko lonse lapansi. Nthawi zinanso timagwilitsa ntchito mawu oti “mpingo” kuyimila anthu osonkhana pa dela, kusonkhana ndi okhulupilira ena.

Mwina mudavako kuti mpingo si nyumba yopempheleramo. Mpingo ndi anthu. Ndiye anthu amene ndi mamembala a kudela kwanuko ndiwo mpingo wanu. Ndiye mpingo wakudela uli gawo la mpingo onse wa okhulupilira pa dziko lonse lapansi.

Tsopano tafika gawo lathu lomaliza. Ndikhulupilira kuti pofika pano muli ndi chidziwitso chozama komanso kuvetsetsa kwabwino pa zimene Mawu a Mulungu ali. Mu njira ina, kuvetsetsa kwabwino kumeneku kwa Mawu a Mulungu kutha kutifoketsanso. Kutanthauza kuti, tavetsa bwino za kuzama kwa Baibulo komanso m’mene anthu ophuzila akangalika m’moyo wawo kulisanthula; pa chifukwa ichi, kuwerenga Baibulo itha kuoneka ntchito yovuta zedi. Lero tikufuna tione pamene tingayambile.

Tiyambe ndi nkhani yapemphero

Ndiye ndineneletu kuti sititenga nthawi yaitali kukamba nkhani ya pemphero, chifukwa phuzilo lathu la 7 tidakamba kale zambiri zambiri. Tidaona kunena kuti tipemphere kuti tikhale ndi mtima wodzichepetsa, kuti tigonjele Mawu a Mulungu. Komanso tidaona kuti tipemphelere kuti Mulungu atiteteze, atitsogolere, atipatse nzeru, atithanzize, komanso aonetsele ulemelero wake.

Ø Koma ngakhale sititenga nthawi yaitali kukamba za pemphero, tikuyenela kukumbuka kuti pemphero likuyenela lisasowekele pamene tikuwerenga Baibulo. Ndi lofunikila kwambiri.

Ø Pempherani musadayambe kuwerenga Baibulo, “Mulungu, chonde tsekulani maso anga.” Pempherani pamene mukuwerenga kuti maganizo anu akhazikike komanso muvetsetse, “Mulungu, ndithandizeni kuti ndikhazikike ndi kuvetsa mawu anu.” Pempherani mukamaliza, “Mulungu, ndithandizeni kuti ndiyende ndi kugwilitsa ntchito Mawu anu m’moyo wanga.”

Ø Mulungu alibe malire. Inu ndi ine tili ndi malire. Tikusowekela thandizo lake.

Ndiye ndi chifukwa chiyani tili ndi ma translation ambiri?

Monga ndinanena kale, Monga ndinanena kale, anthu ena amaganiza kunena kuti kupezeka kwa ma translation ambiri kumatsimikizila kuti Baibulo lili ndi zolakwika zambiri, koma tiyeni tione nkhani imeneyi mozama. Ndiyambe ndi kufusa funso ili, kodi Mose amawerenga translation yanji ya Baibulo? Yankho ake ndi lakuti, padalibe Baibulo la Mose. Timadziwa kuti Mose adalemba mabuku asanu oyambilira a Baibulo amene amatchedwanso Pentatuku, adalemba atatuluka ku Egypt ndipo pa gawo lalikulu la moyo wake adalibe mabuku asanu amenewa. Adali ndi timagawo, koma osati monga tili nalo lero lino. Imfa yake ikulembedwa pa Deuteronomy 34, zimene zikuonetsa kuti sakadalemba chapter chomaliza cha Pentatuku. Ambiri amakhulupilira kuti Yoswa ndiye adalemba chapter chomalizachi.

➢ Tidaonapo za kagawidwe kena ka Baibulo mu phuzilo lathu la m’mbuyo koma mabuku 66 amene ali mu Baibulo kudalibe nthawi ya Mose ngakhale Yesu. Kuchokela nthawi imene Genesis adalembedwa kudzafika nthawi imene Chivumbulutso amalembedwa padadutsa zaka pafupifupi 1,500.

➢ Tikumbukile Baibulo lidalembedwa ndi Mulungu, ndipo Mulunguyo adagwilitsa ntchito anthu pafupifupi 40 kulemba Baibulo.

➢ Chipangano chakale chidalembedwa m’chiheberi komanso Aramaic pang’ono mu buku la Daniel komanso Ezara. Chipangano chatsopano chidalembedwa mu chi Greek.

➢ Kuonjezela pamenepo, Baibulo m’mene limalembedwa lidalibe ma chapter, ma vesi, mau otsogolera ndi ena oonjezeledwa ndi anthu litalembedwa kale.

➢ Ndiye tiyeni tibwelere ku funso lathu loyamba, potengela zinthu zimene ndafotokozazi, kodi mukuganiza kuti tingaliyankhe motani – ndi chifukwa chiyani tili ndi ma translation ambiri?

➢ Poyamba titha kunena kuti, popeza anthu ambiri lero lino salankhula chiheberi, Aramaic kapena Greek, amene amadziwa zilankhulo zimenezi adatanthauzila.

➢ Chimene mukuyenela kudziwa ndi chakuti Baibulo tili nalo lero lino lidatanthauzilidwa bwino komanso modalilika zimene zidasungidwa bwino mu nkhani ndi m’zolemba zosiyanasiyana.

➢ Koma, zilipo nthawi zimene tikalingalira m’mene Baibulo lidalembedwela zimene zitha kutipangitsa kulikayikila. Poyamba, mukuyenela kutsimikizika kuti Baibulo Mawu enieni a Mulungu, ndipo kuti Mulungu adzasamalira Mawu ake. Kupezeka kwa ma Baibulo lero lino ndi umboni wa chisamaliro cha Mulungu mwa chisomo.

➢ Kachiwiri, pali umboni waukulu mu mbiri yotsimikizila za kulunjika komanso kudalilika kwa Baibulo. Si buku limene tingalikayikile. Pali ma umboni akuluakulu mu mbiri komanso ngakhale archaeology zimene zitipangitse kuchita nalo chidwi Baibulo.