Hannde neɗanke faamii wonnde, ɓamtaare waawaa laataade e hoore leydi ndin, si tawii o waylaani noone no o wuuriri e dow mayri. Ngam yo o waawu foolude mbayliigu weeyo, caɗeele taariindi, nguleendi e kokke, ko maa o wayla noone ngurdam makko. Awa ko wi’ide tan neɗɗanke no humii e hunndaari mum sabu ko e mayri o ittata kala ko o wuuri. Tedduɓe on bi'aama bisimilla mon e taskaram Kiwal Taarindi. Wano woowiri non lewru kala, e oo ɗoo taskaram en yewtay fii darnde rewɓe afriknaaɓe ko yowitii e mbayliigu weeyo walla reenude taarindi men. Ko foti wonde darnde maɓɓe? Ko holɗe e pehe woɓɓe e maɓɓe woni e ƴettude ngam haɓude mbayliigu weeyo? Ngam yewtuɗe ɗee toɓɓe en bismoto hannde Hadiyatu Jallo, wiɗtotooɗo e jannginoowo ka duɗal mawngal ngal Dalaba ko faati e taarindi e no daaɓeeji reenirtee. Kono ko adii ɗum en heɗoto miijooji addaaɗi e tongoode men WhatsApp yowitiiɗi e ndee toɓɓere. Ka joofingol e jaɓɓoto Fatimata Kaan, moritanaajo, ardiiɗo "RIMART deco recyclage" ko faggorgal jawdi woni wayloowal kuurujuru woɓɓe no wi’a tuuɗe.