De Döschkassen

Man seggt je, dat de Möhln vun de Bürokratie langsom mohlt. Vör bummeli teihn Johr kunn man dat op’t Finanzamt in Meldörp sogor sehn: Dor stunn op’n Fluur nömli ’n Cola-Automat. Un dor hett ’n Schild anhungen wo opstunn: „Bitte nur D-Mark-Münzen einwerfen! D-Mark erhalten Sie an der Information.“ Dor hett man sick doch wunnern musst. Mehr as dat halve Europa hett al siet veele Johrn in Euro reekend, blots op’t Finanzamt hett man noch mit Mark betohln musst.

Overs ick will nu gor ni över’t Finanzamt schimpen. Dor sünd nömli ’n Barg nette Lüüd beschäftigt, de ook blots ehr Arbeid mokt. Nu wull ick an Mondag mol weller mit düsse netten Lüüd snacken. Dorüm heff ick op’t Finanzamt in Heid‘ anroopen. Övern dag heff ick üm de twindig Mol de Nummern wählt, de ick vun de ünnerscheedlichen Afdeelung‘ harr. Ick keem overs ni eenmol dör.

Dingsdag heff ick dat kort no Klock acht weller versöcht.

Un tatsächli heff ick ’n fründlichen Mann an de Stripp kreegen. De hett mi vertellt, dat de Telefoonanlog‘ vun’t Finanzamt al siet een Week in Dutt weer. So langsom wurrn eenzelne Nummern overs weller funktschoneern.

He hett mi för dat wat ick wull denn de richtige Dörwohl geeven. Dorto hett he overs seggt: „Dat kann ween, dat dor een rangeiht un dat man se dor ook heuern kann.“ Dorblang kunn  dat overs angohn, dat de Kollegin ni mit mi snacken kunn.

Ick schull leever ’n E-Mail schrieven un de as „Wichti“ markeern.

Denn wull ick persönli vörbikom. Dorför harr ick overs ’n Termin bruukt, un ’n Termin harr ick per Telefoon afmoken musst. Hmm.

Ick heff denn liekers de Nummer wählt un kreeg ook tatsächli ’n nette Fruu an‘ Droht, de mi ook heuern kunn. Overs se kun ni veel för mi moken, denn nu weer bi ehr de EDV in Dutt. So’n beten wat hebbt wi overs doch besnacken kunnt.

Den Rest vun de Week gung mi dat allns ni mehr ut’n Kopp.

Wat meent Ju, schüllt wi tosomsmieten un wat an’t Finanzamt spennen? Denn kunn de armen Lüüd dor ennli weller arbeiden...

In düssen Sinn

Kinnt Jüm Frank Steffel oder Florian Graf? Nä? Wat is mit Jakob Kreidel, Wolfgang Dippel oder Matthias Pröfrock? Ook ni?

Na, pass op, ick heff noch mehr in petto: Silvana Koch-Mehrin, Annette Schavan un Karl-Theodor zu Guttenberg. Jo, de kinnt Jüm ganz bestimmt, tominst ut‘ Fernsehn oder so. Dat sünd allns Politikers, de in Düütschland studeert un ehrn Doktertitel mokt hebbt. Un all tosom hebbt ehrn Doktertitel weller afgeeven musst. Dat gifft sogor noch ’n ganzen Barg mehr Ex-Dokters, de overs ni in de Politik sünd.

Ursula von der Leyen hett ehrn Titel 2016 ook meist trüüchgeeven musst. Se hett em overs beholn kunnt, weil Fruu Dokter von der Leyen no de Opfotung vun de Medizinische Hochschool Hannover – dor hett EUrsula studeert – de „Plagiate ohne Täuschungsabsicht“ in ehr Dokterarbeit ünnerbröcht hett. Dat weer also blots ’n Versehn.

Na denn man to.

Nu hebbt se je Franziska Giffey bi’n Kanthoken. Dor is noch ni ganz rut, wat se ehrn Dokter afgeeven mutt. Vörsichtshalver hett se ehrn Titel overs al mol afleggt un is as Famieljenministerin trüchtreden.

Hmm. Dat allns mokt mi doch tehmli nodinkli. Ni dat de Lüüd bi ehr Dokterarbeid schummelt hebbt, sünnern dat dat so lang ni opfulln is, dat se schummelt hebbt.

Bi’n Politikweetenschopler is dat je gor ni so wild. Overs wat is, wenn ’n Chirurg sien Titel to Unrecht kreegen hett oder ’n Tähnarzt?

Ick meen, mi persönli is erstmol wichti, dat de Lüüd künnt, wat se mokt. Dorüm geiht dat bi de Aferkinnung vun de Titels overs gor ni. Dat geiht blots dorüm, dat se ni kinntli mokt hebbt, wo se wat afschreeven hebbt. Wat se künnt, speelt also gor keen Rull. Un nu frog ick mi, wat sick de Universitäten würkli ’n Gefalln dormit doht, dat se Titels, de se mol rutgeeven hebbt, weller inkasseert.

Dormit sünd de Titels irgendwann nömli jüst so weni wert as de Universitäten, de se rutgifft.

Tscha, veellicht schull man mol’n Dokterarbeit över de Bedüüdung vun Doktertitels schrieven…

In düssen Sinn

Oha, nu war dat gefährli: De Nasa hett je annerletzt ehr Robotter-Auto „Perseverance“ op ’n Mars schoten.

Perseverance, dat kann man gor ni richti utsnacken. Op Plattdüütsch heet dat „Utduuer“ – ook ni veel beter. Un düssed Auto hett je ook ’n Helikopter op unsen Noverplanet‘ bröcht. De heet Ingenuity. Dat lött sick noch weniger utsnacken, heet overs so veel as Scharpsinn.

Na denn. Dat Mars-Auto hett overs noch wat in petto: Dat schall nömli Steen un Sand un all so’n Schiet un Smeer vun‘ Mars insammeln un den ganzen Krom denn mit ’n Raket’ no de Eer jogen.

Un nu geiht dat mit de Gefohr los. Dat gifft nömli Weetenschoplers, de seggt, dat düssed Gramusel vun‘ Mars de Eer „kontamineern“ kunn, weil dat fröher veellicht je mol Leven op den rauden Planet‘ geeven hett. Leven dat dor op’n Grund blots dorop töövt, dat ’n Mars-Sonde vun de Nasa dat no uns henbringt.

Na jo, kann je ween, dat dor irgendwülke Wörms oder so al twee Milliarden Johr op’n Bus no Heid‘ töövt. So lang mööt mennige Lüüd op’t Dörp je ook mitünner op’n Bus no Heid‘ tööven.

Nu hebbt de Gegners vun de Idee, Kies vun Mars no uns to holn, overs Bammel dorför, dat düsse Wörms oder Bakterien oder wat direkt no de Ankunft op de Eer in uns Minschen rinkruupen kunnen un uns krank oder verrückt oder beides mokt. Veellicht kruupt de Marsbakterien je ook in irgendwülke Tiern rin, un denn fangt uns‘ Katt mitmol dat Bell’n an oder de Duuven heuert op mien Auto vulltoschieten. Man weet dat ni.

Un wat is mit de, de dorför sünd Proven vun‘ Mars to holn un de ni doran glöövt, dat de dorste Sand gefährli is? Sünd dat nu „Mars-Querdinkers?“

Un överhaupt: Mööt wi uns nu bald ook gegen Mars-Wörms impen loten? Denn wüllt wi blots hopen, dat de EU dütmol genog Impstoff bestellt.

Noch is de Krömelkrom vun‘ Mars je overs gor ni hier.

Wenn Jüm sick overs in de näste Tied wunnert, dat Jüm greun anloopen sünd as dat Gras in Goorn, wenn Jüm morns in Speegel kiekt, denn weet Jüm, wat los is...

In düssen Sinn

Lüüd, de krativ arbeiden doht, bruukt je tomeist ’n bestimmted Ümfeld, üm kreativ ween to köön‘.

So’n besünnered Ümfeld bruuk ick ook, üm mien Texte to schrieven.

Irgendwann heff ick markt, dat ick ni so recht wat tostann krieg‘, wenn ick to Huus in’t Büro sitt un an de Wand kiek. Dor kümmt mi eenfach keen Ideen. Geiht ni.

Ick bruuk ’n wieden Blick, dormit mit Gedanken in Schwung kümmt. Un weil wi bi uns in Dithmarschen ’n ganzen Barg Ecken hebbt, vun de ut man wiet kieken kann – op’t Woter, över de Wischen un so – stell ick mi gern mit mien Auto in de Gegend, hang mien Klappcompjuter an’t Lenkrad un hau in de Tasten.

Mennigmol kümmt mi, wenn ick dor so rümstoh, ook Lüüd in de Mööt, de mi bilütten op Ideen bringt, wenn se mi ’n scheune Geschicht vertellt.

Dat is mi jüst erst passeert. Ick stunn bi Nindörp in de Feldmark, as ’n Mann so üm de 60 oder 70 Johr op mi tokeem.

He keek mi erstmol so’n beten vergrillt an. Veellicht hett he dacht, wat ick ’n Wilderer oder sowat weer. As ick em denn verkloogfiedelt heff, dat ick dor an schrieven weer, hett he dormit erstmol gor nix antofangen wusst. Denn mitmol hett he overs seggt: „Och, büst du ni de Döschkassen?“ Un denn: „Ja denn pass mol op, ick heff wat för di...“

Denn hett he losleggt: Dreept sick ’n Amerikaner, ’n Franzos‘ un ’n Dithmarscher.

Duuert ni lang, dor fangt de dree sick dat strieden doröver an, wokeen vun ehr den le längste Ahn’folge harr.

De Amerikaner seggt: „Wi hebbt je dör de Englänner so’n lange Geschicht as Volk, dorüm hebbt wi natüürli de längste Ahn’folge.“

De Franzos‘ seggt: „Dumm Tüch! Wi mit uns Lüüd as Karl den Grooten hebbt de längste Ahn’folge.“

Dor seggt de Dithmarscher: „Kinnt Jüm Adam un Eva?“ De annern beiden seggt natüürli „jo“.

He denn wieder: „Na kiek. Un Eva, dat weer ’n gebor’ne Thiessen!“

Tscha, dat heff ick ook noch ni wusst, liekers ick sülms je ’n waschechten Dithmarscher bün.

Kannst mol sehn, man lehrt even doch nie ut...

In düssen Sinn

Minister Spahn, unsen Gesundheits-Jens, hett sick annerletzt je frogt, wat wi in Sleswig-Hulsteen ’n „Zaubertrank“ as bi Asterix un Obelix hebbt, weil de Inzidenzen bi uns so siet sünd.

Tscha. Jüst erst heff ick vör unsen Dörpskroog seeten, ut den nu ’n  „Butengastronomie“ worrn is. 

Nu lött de Warms düt Johr overs op sick tööven. Dorüm is mi meist de Mors affrohrn, as ick dor vör’n Kroog seet‘ un op Afstand mit de Lüüd klöönt heff, vun de ick al gor ni mehr wusst heff, wo se eegentli utsüht. 

Overs wenn man al mol weller mit anner Lüüd tosomsitten dörft, denn sett man ook sien Mors op’t Speel.

An leevsten harr ick mi je mit de annern Gäst‘ tosomkuschelt as op so’n Polarexpeditschoon, so dat wi uns gegensiedi warm‘ kunnt harrn. Overs dat is je verboden. 

Ick krieg intwüschen sogor al ’n slecht‘ Geweeten, wenn ick mien Fruu to Huus mol ’n Seuten geev oder de Kinner in Arm nehm‘ doh.

As ick overs nu düsse Week vör’n Kroog seet, dor full mien Blick jümmers weller dör de Finstern op den Tresen un op de Dische, de in de Gaststuuv stoht. Mang den Tresen un den Utschank sünd je al vörigen Sommer Wannen ut Pexiglas inbuut worrn, jüst as mang de Dische. Liekers dörft man in de warme Gaststuuv ni rin, de wiss seekerer is as jeden Supermart. Man mutt buten sitten, wo man sick ’n düchtige Verköhlung holt oder veellicht sogor ’n Grippe. Dat interesseert overs ni. As Grippe-Virus mutt man sick intwüschen ook dösig vörkom‘, ne – de ward gor ni mehr ernst nohm. 

Na jo. Jedenfalls kiekt wi in Windbargen uns de düüer ümgebuute Gaststuuv nu also so lang vun buten an, bet wi dor weller rin dörft, dormit unse Kröögers ni ook noch pleite goht. Un wenn Jens Spahn dat jümmers noch weeten will: Wi hebbt ni blots een Zaubertrank, mit den wi uns in uns‘ lütted Dörp in Gallien… ääh… Dithmarschen warm holn doht. 

Unse Zaubertränke heet to’n Bispeel Lütt un Lütt. Overs dat Rezept för unse würkliche Geheimwaffe heet: „Rum mutt, Zucker kann, Woter bruukt ni. Un düsse Trank nöömt sick „Stieven Grog“...

In düssen Sinn

Jümmers, wenn ick mit anner Lüüd tosom kom‘, sett ick mi je ganz anstänni ’n Maske op, ne. Bi’t Inkööpen, op de Tanksteed un so wieder. Nu is dat overs anschiend so, dat ick to de Minschen heuer, de ehr Snuten eenfach ni to de dorsten Snutenpullis passen wüllt. Wenn ick mi so’n Maske opsett un denn blots eenmol dat Muul opmok, hangt mi de Lappen direkt an de Ünnerlipp – annerlei wat dat so’n medizinische oder ’n FFP2-Maske is. Mennigmol wünsch ick mi, dat ick so as Michael Schumacher to sien besten Tieden utsehn wurr. Overs so’n gewaltiged Kinn as de, heff ick nu mol ni.

Intwüschen heff ick overs ’n Trick rutfunnen: Wenn ick an beide Sieden an de böbersten Strippen treck, denn treckt sick dormit de ünnerste Kant‘ vun de Maske dohl – jüst as wenn man ’n oled Schipp optokelt. Dat hölpt denn för so twee oder dree Minuten, eher ick de String‘ weller fasttrecken mutt.

Un weil ick jeden Dag mang 20 Minuten un twee Stünn‘ mit’n Maske rümrenn‘, treck ick jeden Dag bummeli 25 mol an de Strippen. Un de schüüert dormit ook jümmers 25 Mol över de Kant‘, an de mien Ohrn an mien Kopp fastmokt sünd.

Jüst dorüm bün ick meddewieln so’n beten bang dorför, dat mi de dorsten Strippen irgendwann de Ohrn afsnieden doht. Un wenn mien Ohrn erstol wech sünd, denn froog ick mi, wonehm ick de Bügels vun mien Brill‘ överhang‘ schall. 

Op’t Letzt‘ kann ick denn nix mehr heuern un ook nix mehr sehn. Un wenn ick nix mehr heuern un sehn kann, denn krieg ick je ook ni mehr mit, wat in de Norichen över de Masken vertellt ward.

Dorüm nu mien Froog: Kunn ick mi Ohr-Prothesen vun‘ Staat finanzeern loten? Un wenn dat gung – kunn ick mi denn ni vörher al so’n Kinn as Schumacher moken loten, dormit de ole Maske dor ünner hangen blifft? Tscha. Wohrschienli ni. 

So warr ick mi de Maske veellicht eenfach in de Snut fasttackern, ganz ohn‘ Strippen, denn ’n Tiedlang warr ick se je wiss noch bruuken, un wenn ick ehr dor fasttackert heff, denn hölt se vernünfti un denn weet ick ook wonehm se is, wenn ick ehr bruuk...

In düssen Sinn

Kiek an, jüst dat Annalena Baerbock as Kanzlerkandidatin vun de Greun‘ opstellt worrn is, fangt bi de annern ook al de Büxen dat flattern an.

Na jo, wat Söder un Laschet sick dor torechtgniedelt hebbt weer je ook ’n zirkusriepe Nummer.

De Mehrsten Unionslüüd wulln je Prinz Markus von Bayern de Kroon opsetten. Overs de hett no Strauß un Stoiber an un för sick weeten musst, wo dat mang de CDU un de CSU löppt. As CSU-Mann ward man keen Kanzler. Dat weer jümmers al so. „Lujah sog‘ i!“

As een vun de CSU kann man Heimatminister warrn – oder even ook Verkehrsminister, so as Andreas Scheuer. Jo, un Scheuer will nu richti Gas geeven, beter geseggt, in de Pedohln patten. He hett nömli vörgüstern ankünnigt, dat he Düütschland to’n „Fohrradland“ moken will. Dat schall he man keen bi Volkswogen, Mercedes und besünners bi BMW heuern loten. De verstoht dor överhaupt keen Spoß. Eher man overs in Wolfsborg, Stuttgart un München vun de SUV- op de Drohteselproduktschoon ümstellt, löppt noch ’n Barg Woter den Mittellandkanol, den Neckar un de Isar dohl.

Dat geiht je overs ook gor ni dorüm, dat sick irgendwat verännert. Andreas Scheuer will in düsse drulligen Tieden för de Unionspartei’n blots ’n  beten an de traditschonell’n Themen vun de Greun‘ rütteln. Wat ’n grootroartiged Aflenkungsmanöver. Dat Ganze is so unopfälli as’n Peerappel op’n witten Teppich. 

Overs mi wurr dat ni wunnern, wenn dat nu in düsse Oart un Wies bet September wiedergohn ward – un dat ni blots vun unsen Verkehrsminister. He hett mit sien schmucked Foto op’t Fohrrad, natürli mit Helm op’n Dööz, blots noch so’n scheuned Bispeel dorför leevert, wo bi uns de Wohlkampf 2021 utsüht, liekers dat je Wichtigered to dohn gifft.

Över de Fohrrad-Idee ward man jedenfalls seeker ook bald bi Markus Lanz un Anne Will snacken.

Dor sitt denn ook weller Karl Lauterbach un warnt vör irgendwat. Man kinnt de Protagonisten je intwüschen.

Jungedi dor harr de Linnenstroot lang ni mitholn kunnt…

In düssen Sinn

Mol hebbt de Lodens de Döörn los, un zack, sünd se weller dicht. Dorüm hett je ook de Hannel in’t Internet so antrocken. Anschien’d hebbt overs ni all de Ünnernehm, de wat in’t Internet verköfft, würkli Lust, Geld to verdeen‘. Dat heff ick jüst beleevt. Ick fohr je gern mol mit mien Motorrad, mit mien Chopper, dör de Landschop. Ick wull dat op dat Moped overs mehr kommodig hebben. Also wull ick mi ’n frischen Lenker kööpen. Dorüm heff ick in’t Internet mol bi een vun de gröttsten Anbeeder vun Motorrad-Tobehör nokeeken, in Hamborg sitt de. Dor heff ick ook wat funnen, wat mi gefulln hett. Bestelln kunn ick dor overs nix. Ick schull erst ’n „Kunnenkonto“ anleggen. Dat heff ick mokt. Allns ingeeven, mien Noom, mien Adresse un wat dor noch so toheuert.

Achteran is’n Finster opploppt wo binstunn, dat ick mol mien E-Mails „checken“ schull.

Keen Probleem. Ick heff also mien E-Mails checkt, as man E-Mails blots checken kann. Dor weer ook ’n Noricht vun dat Ünnernehm, in de stunn: „Ihre Daten werden geprüft, nach erfolgreicher Prüfung wird Ihr Kundenkonto freigeschaltet.“

Denn heff ick töövt. Den ganzen Dag. Un den nästen Dag ook. Denn keem Sünndag. Denn heff ick Mondag jümmers weller nokeeken. Nix, Veellicht wulln se bi de Pröövung vun mien Daten je seekergohn, dat ick mit den frischen Lenker keen Terroranslag ploon.

Intwüschen harr ick mi dat, wat ick hebben wull, al bi so’n ganz lütten Loden in Sachsen bestellt. Dat weer sogor billiger un keem Dingsdag an.

Dingsdag obend keem denn de E-Mail: „Ihr Kundenkonto ist nun aktiv. Herzlich willkommen bei...“, denn keem de Noom vun den Loden.

Dor heff ick denn trüchschreeven, dat ick al allns harr, wat ick bruukt heff. Liekers heff ick mi för den Insatz bedankt, un ick heff ook schreeven, dat ick dat näste mol, wenn ick wat bruuk, erst frogen wurr, wat ick mit mien Opdrag ook ni ungelegen keem.

Un wenn de Geschäfte weller toverlässi ophebbt, denn fohr ick dor ook weller sülms hen. Wenn ick overs in düssen Loden inkööpen will, denn nehm ick ’n Slopsack mit...

In düssen Sinn

Tscha, Feliç Pasqua. Weet Jüm wat dat heet? Dat heet Frohe Ostern op Katalanisch. An un för sick wull ick dat op Mallorquinisch schrieven, wat ’n Dialekt vun’t Katalanische is. Overs op Plattdüütsch heet Frohe Ostern je jüst so as op Bayerisch. So heff ick mi dacht, wat dat dor bi Katalanisch un Mallorquinisch ook keen Ünnerscheed gifft.

Na jo, nu weer je de beste Gelegenheit ruttofinnen wat dat würkli stimmt. Denn dat is je in Ordnung sick nu mit 250 Lüüd, dicht an dicht in‘ Fleeger to quetschen un no Mallorca to suusen üm sick dor weller dicht an dicht an Strand to leggen un dicht an dicht in de Hotelborgen to wohnen.

Un dat Frohe Ostern op Bayerisch jüst so heet, as op Platt, dat mutt man sick as Urlauber erstmol ni marken. Denn sick as Vadder, Mudder, Kind ut een Famielje kommodig to drütt in’t Auto to setten, üm in’t Allgäu oder no Büsum to fohrn, wo man denn alleent dör de Bargen oder op’n Diek löppt, dat geiht nu würkli ni. Dat kann man ook verstohn, wenn man dor blots mol genau doröver nodinkt. Denn wenn man mit twee oder dree Lüüd in‘ Ferienwohnung ünnerkümmt, wo man för sick sülms kookt un keen Kontakt to anner Lüüd hett, denn is dat Risiko sick mit irgendwat antosteeken natürli veel grötter, as in so’n Urlaubsfleeger.

Un man mutt je ook an de Ümwelt dinken. So’n Urlaubsfleeger verbruukt 13 Tünnen Sprit bi so’n Törn no Mallorca, een Tour. Dat heuert sick erstmol veel an, wenn man dat overs dör 250 Lüüd deelt, denn sünd dat hen und trüch blots noch 104 Liter de Nees. Un wenn man dat op dree Lüüd in een Auto ümreekend, markt man, wat dat veel mehr Sinn mokt no Mallorca to fleegen as no Büsum to fohrn, denn mit 312 Liter Benzin kümmt man je ni mol vun Büsum bet no Stinteck. 

Ick freu mi, dat wi so klooge Lüüd hebbt, de plont, wonehm wi Urlaub moken dörft un wo ni. Un all, de de Ferienwohnung‘ bi uns in’t Land vermieten doht, freut sick ook, denn so mokt de dammeligen Urlaubers de Stuuven weenstern ni schieti. 

Also, denn mol Feliç Pasqua, ne...

In düssen Sinn

Erst dinken, denn snacken. Dat hett mien Oma oftmols to mi seggt, wenn ick as lütten Stackel wat Dösiged vertellt heff. Se harr je ook Recht. Wenn man erst nodinkt un denn den Mund opmokt, mutt man sick achteran för nix entschülligen.

Op de anner Sied mutt man je ook erstmol den Mors in de Büx hebben, sick to entschülligen, un Fehlers totogeeven, wenn war scheevgohn is.

Overs ook, wenn uns Bunneskanzler Fruu Merkel nu in Fernsehn anfangt sick to entschülligen, weet ick bald överhaupt mi mehr, wat los is. Un dor bün ick wiss ni de Eenzige.

Se hebbt dor je ’n anstännigen Buck schooten in de Runn vun de Ministerpräsidenten un de Chefin. Erst entscheed se wat vun wegen „Osterruhe“ un jüst dat sick dat ganze Volk so richti in Roosch snackt hett, ward de Osterruhe weller verboden. Dat is so verquer, dat dor ni mol mehr de Querdinkers achterankümmt.

De ward sick wohrschienli düchti argern, weil se all de Plakote för de Demo gegen de Osterruhe al trechmolt harrn. Na jo, veellicht künnt se de anner Sied vun de Plakote je noch för ’n annere Demonstratschoon bruuken.

Overs Oogenblick mol – wat hett Fruu Merkel dor in de Pressemitdeelung an Middeweeken seggt? Se hett seggt, dat se sick dorto entscheed hett de Osterruhe to „stoppen“ – „…weil ich mich dazu entschieden habe…“, hett se seggt. Hä? Se hett de Osterruhe stoppt? Se ganz alleent, oder wat?

Also wenn ’n König oder ’n Königin alleent düt un dat för’t Volk entscheed‘, denn kann ick dat je verstohn. Overs hebbt wi bi uns ni an un för sick noch de parlamentarische Demokratie? Siet wann kann Merkel Fierdoog beslüten un weller utsetten as se lusti is?

Se seggt je ook, dat se ganz alleent vör de Fehlers mit de Osterruhe verantwoordli is. Dor keem sogor ’n poor annere Politikers ut’n Knick, de sick över dat, wat se seggt hett, wunnert hebbt un de ook Schuld hebben wulln. Tscha, mi dücht, ook as Bunneskanzler schull man bilütten erst dinken un denn snacken, denn Dinken is wichti…

In düssen Sinn