De Döschkassen

By Heiko KrollComedy Society & Culture News News Commentary

De Döschkassen episodes

December 31, 2020 Keen Minut‘ to fröh
Jungedi.
So liesen as dat hüüt Obend ward, sünd wi wohrschienli noch nie in’ niedet Johr
rutscht, denn liekers dat an so veele Steeden knallt un ballert hett, kümmt dat
näste Johr ohn‘ grooted Füüerwark.
Ick wull
mi je an un för sick erst 2021 trüchmellen, overs nu will ick doch noch mol
so’n poor Wöörd in’t ole Johr loten – in düssed dösige Johr, in dat man morns
oftmols ni wusst hett, wat man obends noch dörft. Blots een Sook is siet April
gliek bleeven: Jümmers an Mondag hett man uns vertellt, dat de Tohln vun de
Infektschoon‘ sieder weern, weil an’t Weekenenn ni so veel test‘ un ook ni
allns övermiddelt worrn is. Jeden Mondag. Siet April. 39 Mol. Jümmers desülbige
Satz – so opseggt, as weer dat dat erste Mol. De mokt Sesamstroot mit uns!
De
Bunneskanzler, Fruu Merkel, freut sick wiss ook al dorop, dat se in‘ nästen
Harvst ennli ehrn Schrievdisch utrüüm dörft.
Un bet dorhen
striedt sick ’n poor annere doröver, wat man veellicht ook as Mann
BunneskanzlerIN warrn kann, vun wegen de Fruunquote in Föhrungspositschoon un
so. Dor weer doch mol wat...
Na jo,
weenstern op’n Chefsessel vun Merkel ehr Partei sitt je noch’n Fruu: AKK. Och
nä, de is je ook bald wech.
Veellicht
kunnen Frie’ch Merz un Armin Laschet sick je as Fruunslüüd verkleeden, so as
Harald Juhnke un Eddie Arent fröher. Un Söder, Scholz, Habeck, Gauland un
Lindner glieks dorto. Overs lot man, de Jungs ward dat mit de Fruunquote al trechbeugen.
Weenstern dor, wo se sülms ni in Vörstand wüllt.
Tominst
hett ’n Fruu de erste Sprütt mit den Impstoff in Arm kreegen. Edith Kwoizalla
ut Sachsen-Anhalt.
Dat is
overs ook weller verkehrt ween. Spahn, unsen Gesundheits-Jens is meist de
Feller ut’n Hoot flogen. He hett seggt, dat weer „to fröh“ ween, mit dat dorste
Impen.
Also nu hol overs mol op, Herr Spahn, Fruu Kwoizalla is 101 Johr old. Mi dücht, dat se de Sprütt keen
Minut’ to fröh kreegen hett!
Muttst
di wunnern, op wat de Lüüd so kümmt, ne. Mol sehn, wat ehr nästed Johr noch allns
infallt.
Un bet
wi dat to sehn kriegt, wünsch ick Jüm erstmol ’n gooden Rutsch...

In
düssen Sinn
4 min
December 01, 2020 Wat schall man blots dinken?
To mi
hett mol een seggt, dat ick ’n „Querdinker“ weer. Dor heff ick mi bannig to
freut, ’n gröttered Kompliment kunn man mi meist ni moken.
Wenn man
düsse Doog overs as Querdinker beteekend ward, denn is dormit wat ganz anners
meent. Een vun de Demonstranten, de in Momang op de Strooten goht, is je op de
Idee kom‘, sick un sien Frünnen as Querdinkers to beteeken. Dor harr he overs
vörher mol bi Wikipedia oder so nokieken schullt, üm ruttofinnen, wat
querdinken eegentli heet, eher he dat scheune Woord kaputt mokt hett.
Dat wat
vun de Kritikers an de Corona-Regeln seggt ward, hett je gor nix mit Querdinken
to kriegen, sünnern blots mit „Dorgegen ween“. Ick heff je gor nix gegen Lüüd,
de gegen düt un dat sünd.
Overs nu
ward all, de gegen de Corona-Regeln sünd un dorgegen, dat anduuernd wat an’t
Parlament vörbi entscheed ward mit all de annern de gegen wat anners sünd, in
een Putt smeeten. De, de gegen de Regeerung sünd to’n Bispeel un de, de gegen
Utlänners sünd un dösiged Tüch vertellt, weil se in de School ni oppasst hebbt,
jüst so. Un all tosom fot‘ man nu mehr oder minner ünner „Querdinkers“ tosom.
Dat is ’n Frechheit! De schüllt uns dat Woord trüchgeeven.
Wat
schall man denn nu to de echten Querdinkers seggen? Dat fangt al bi König
Salomon in de Bibel an. De mit de beiden Fruunslüüd, de sick üm ’n Kind an
strieden weern. De König harr je ook ’n Indizienprozess ingang bringen kunnt,
de no dree Johr opwiest harr, wülk vun de beiden wohrschienli de Mudder weer.
Dör sien Vörslag dat Kind dörtosnieden un optodeeln, hett sick dat in twee
Minuten ohn‘ Ünnersöökungsutschuss opklort. Jo, Salomon harr den Bogen mit dat
Querdinken würkli rut!
Overs för
dat Querdinken mööt wi uns nu anschiend ’n frisched Woord utklabüstern. Ick bün
nu al gespannt, wat wi in Tokunft to dat seggen ward, to dat wi fröher
Querdinken seggt hebbt.
Liekers
is dat schodt üm dat Woord. Un jüst nu kunnen wi würkli ’n poor „echte“
Querdinkers bruuken...

In
düssen Sinn
3 min
October 12, 2020 Hoorige Angelegenheit
Wenn man
de Weetenschop glööven dörft, denn hebbt unse Vörfohrn, de je so ähnli as
Schimpansen utsehn hebbt, noch överall Fell hatt. In de wiedere Entwicklung, de
man je ook Evolutschoon nöömt, hebbt wi dat Fell overs verlorn. Blots ni
överall. Dat smiet Frogen op: Worüm hebbt wi Wimpern un de Hoor över de Oogen?
Worüm wasst uns in de Jugend Hoor ünner de Arms un mang de Been, un worüm
kriegt Mannslüüd ’n Boart in’t Gesicht un Hoor op de Bost? Man weet dat ni.
Mit de
Hoor op’n Kopp is de Entwicklung overs anschiend noch ni ganz afsloten. Bi mi
jedenfalls noch ni. Dor entwickel ick mi noch düchti wieder. Wenn ick mi hüüt
vör’n Speegel stell, denn heff ick dat Geföhl, dat ick mi dat Speegelbild vun
mien eegen‘ Opa bekiek.
Lockenwicklers
kann man mi ni mehr andreihn, un ’n Kamm bruuk ick ook ni mehr. Schampuh? Bruuk
ick ni.
Wat ick overs
bruuk, dat heff ick al lang funnen. Un dat is mien Mütz, weil mi de Hoor, de mi
den Kopp fröher warmt hebbt, ni mehr dor sünd. Mennig een seggt je, mien Mütz
weer mien Markenteeken. Dat dörft ook gern wieder vertellt warrn. De Wohrheit
overs is, dat ick mien Mütz bruuk, weil ick mi sünst verköhl, wenn’t buten kold
is.
Un
wenn’t buten hitt is, denn sorgt mien Mütz dorför, dat ick keen Sünn’brand op’n
Dööz krieg. Mien Mütz is so’n richtigen Multifuktschoons-Apparot.
Nu
vergeet ick overs af un to, wenn ick no Huus kom, mien Mütz aftonehm. Wenn dat
so is, denn seggt mien Fruu: „Hebbt wi in’t Huus nu Helmplicht? Nehm de Mütz
af!“
Un wenn
se dat seggt, denn hett se sülms tomeist ’n Schol üm Hals.
Nu frog
ick mi, worüm mien Madam ehrn Schol dreegen dörft, ick mien Mütz overs ni.
De
Antwoord liggt op de Hand: Wohschienli harrn Fruunslüüd fröher in de
Evolutschoon Hoor an Hals, de wichtiger weern, as de Hoor op’n Kopp. Liekers
mokt se sick üm ehr Frisuur mehr Gedanken, as ick dat mokt heff, eher mien
Frisuur verschütt gohn is. Tscha. Mi dücht, dat mit de Evolutschoon is ’n
würkli hoorige Angelegenheit...

In
düssen Sinn
3 min
September 29, 2020 Tokunft is annerwegens
Digitaliseerung.
Dat is je anschien’d ’n Woord, mit dat man as Politiker wiesen kann, dat man
mit de Tied geiht, ne. Overs dat Woord fallt ut veele Politikers eenfach so rut
un denn is dat wech.
Nu ward
je ook veel vun de Digitaliseerung an Schooln snackt. In der ersten Monot‘ vun
de Corona-Krise, in de meist keen Kind no School gohn is, weer je genog Tied de
Schoolgebüüd digitaler to moken. Geld weer ook genog dor. Blots togreepen hett
dor meist keen School op – op’t Land erst recht ni. De Verantwordlichen harrn
wohrschienli Wichtigered to tohn.
As ick
no Schooln gung, as dat noch ni mol Internet geev, dor hebbt wi al Programmeern
lehrt. Dat hebbt wi overs blots lehrt, weil een vun uns‘ Schoolmasters dor sien
Frietied för opwenn’d hett. He hett nömli meent, dat wi dat in Tokunft bruuken wurrn.
Weil de
Schoolleitung em overs blots mitleidig ankeeken hett, kreeg he so weni Geld för
sien Idee, dat wi op Reekners programmeert hebbt, de dormols al in’t Museum
heuert harrn.
Kannst
mol sehn, de goode ole Herr Schmidt hett dat vör över 30 Johrn al wusst.
Dörsett hett sick sien Ansicht bet hüüt overs ni so recht.
In de
School schüllt de Kinner je wat för de Tokunft lehrn. De Schooln sülms doht
sick mit dat Lehrn för de Tokunft overs recht wat schwörer.
Klor
gifft dat Schooln, de to’n Bispeel Tablet-Reekners insett, un de düüer vun de
Öllern betohln lött.
Regelmäßi
insett ward de Dingers overs lang ni, un funktschoneern deiht dat Ganze ook
oftmols ni so richti. De Schuld doran hebbt denn natüürli jümmers anner Lüüd.
Schier!
Overs
dormit, mol ’n anstänniged Machtwoord to spreeken, doht sick de Kultusministers
schwor.
Tscha.
Schient so, as wenn sick de Tokunft annerwegens afspeelt. Veellicht kann man mit
de Technik je weenstern den Tofeldeenst organiseern. Denn so as dat utsüht,
ward de Schölers bi uns noch lang mit Kritt un Tofel to dohn hebben.
Vellicht
kunnen de Schoolleiters je eenfach mol in’t Internet nokieken, wo dat mit de
Digitaliseerung löppt. De Schöölers künnt ehr wiss wiesen, wo man mit‘ Internet
ümgeiht...

In
düssen Sinn
3 min
September 22, 2020 Middel-Eer in’t Middel-Meer
Middel-Eer
in’t Middel-Meer

Moria. Moria
hett man fröher je blots ut de Book-Reeg „Herr der Ringe“ vun Tolkien kinnt.
Dor weer Moria je de düstere Ünnerwelt, so’n Labyrinth, wo man sick leever ni
opholn schull.
In düsse
düstere Ünnerwelt harr de „Balrog“ dat seggen. Dat weer ’n gruselige Gestalt,
de jeden mit sien Füüer verbrenn‘ deh, de to dicht an em rankeem.
Un hüüt?
Hüüt is’n annered Moria in Griechenland veel bekannter. Düssed Moria in’t
Middel-Meer leeg för veele Lüüd op ehr’n langen Weg in ’n betere Tokunft. Un
ook dor wurr dat so lang slimmer, bet dat brennt hett.
Dösig,
bi Tolkien in Middel-Eer weer dat ni veel anners, dor weer je ook ’n Schwung
Lüüd ünnerwegens, üm de Tokunft beter to moken. Moria schull op ehr’n Weg ’n
Afkörtung warrn. Is dat overs ni worrn.
In Moria
weer dat ganz fürchterli. Un as se ennli ut Moria rutfunnen hebbt, sünd dat
weniger as to Anfang ween. Un ook de Lustigsten ünner de Reisenden hebbt dor ni
mehr so recht wat to Lachen hatt.
As wenn
Tolkien ohnt harr, wat sick in dat echte Moria mol afspeeln schull. Overs dor
sünd de Gemeensomkeiten ook vörbi. De Reisenden in dat echte Loger Moria sünd
nömli keen lütte tofreedene Hobbits mit groote Fööt, de duernd an eeten sünd.
De echten Reisenden sünd nömli al siet veele Johrn ni mehr tofreeden ween. Un
to eeten hebbt se meist gor nix.
Se kümmt
ook ni ut dat Auenland. Velleicht hebbt se dacht, dat dat dor, wo se henwulln
as in’t Auenland ween wurr.
Also
hier bi uns. Overs in uns Land un ook in de annern Länner de to de Europäische
Union heuert, de 2012 den Freedensnobelpries kreegen hett, ward över de mehr as
10000 Lüüd in Moria al siet veer Johr schachert un verhannelt as wurr sick dat
üm Tiern hanneln. Nä, dat Auenland mutt annerwegens ween. Mi fallt op’n Slag
overs ook ni in, wonehm op de Welt dat ween kunn.
Veellicht
schull de EU langsom mol den Freedensnobelpries trüchgeeven oder se fangt an
sick so to verholn as man sick dat vun Nobelpriesdräger vörstellt. Irgendeen
mutt dor mol mit anfang‘ wenn’t beter warrn schall...

In
düssen Sinn

3 min
September 05, 2020 Platt is hügienisch
Op Platt
heuert sick Menniged je veel fründlicher an, as op Hochdüütsch, ne. Besünners,
wenn twee sick in de Flicken hebbt un sick gegensiedi anpöbelt un utschellt,
denn heuert sick dat an, as wenn de beiden sick an un för sick doch gern hebbt.
Wenn een
dat to’n Bispeel ni so genau mit de Wohrheit nehm‘ deiht, denn is se oder he ’n
„Tüünbüddel“. Un wenn een ni stillsitten kann un een op’n Geist geiht, is dat
’n „Jiddelbüddel“. Söcht een jümmers blots Stried un kann anner Lüüd ni tofreeden
losten, is dat ’n „Stenkerbüddel“. Un löppt een anduuernd rin un rut, is dat ’n
„Köterbüddel“.
Op Platt
is man interessanterwies oftmols irgendeen „Büddel“. Dat mutt overs ni jümmers
böös meent ween.
So hett
mien Madam, as unsen Lütten noch recht wat lütter as hüüt weer, mol ganz leev
to em seggt, as he morns bi uns ünner de Deek kroopen is: „Na mien lütten
Schietbüddel.“
Do keek
he ehr mit ’n ganz kruused Gesicht an un säh: „Was? Kleiner Scheißbeutel?“
Tscha,
Platt is no Hochdüütsch even ni jümmers afwartskompatibel. Veele plattdüütsche
Snacks kann man ook gor ni op Hochdüütsch översetten, op jeden Fall ni mit so
weni Wöörd.
„Dor
sitt keen Arg bin“ is so Snack. Wenn man all dat, wat dormit meent is, op
Hochdüütsch to’n Utdruck bring‘ will, denn mutt man sich ’n beten mehr Tied
nehm‘.
Overs
trüch no‘t Pöbeln. Wenn man sick mit ’n annern richti dull vertörnt hett, denn
kann man sick dorto henrieten loten, „kleih‘ mi an Mors“ do gröln. Dor seggt
man op Hochdüütsch je ganz wat anners to, wat sick veel schabbiger anheuert.
Overs de
Vörgang, to den dorbi op Hochdüütsch opfordert ward, is je ook ’n annern. Dat
hett wat mit de Tung un den Achtersten to dohn. Fürchterli. Op Platt schall de
anner een je an Mors „kleihn“, wat man mit de Hand moken kann. Un wenn man dat
will, kann man sick dorto je sogor Handschen antrecken.
Sick op
Platt to strieden, is also ni blots fründlicher, sünnern, besünners wat de
dorste Pandemie angeiht, ook veel hügienischer...
3 min
August 28, 2020 Wat ’n Drama in‘ Reichsdag
Nä, wat
hackt de Kommentator’n un de Oppositschoon nu op de Regeerung rüm. Se hett dat je
ni trechkreegen, ’n anstännige Reform vun dat Wohlrecht torecht to klabüstern.
De Bunnesdag schall lütter warrn, de Tohl vun de Afgeordneten schall rünner.
Overs
mol Hand op’t Hart, Lüüd: Wulln Jüm as Afgeordnete dorför verantwoordli ween,
dat Jüm sülms oder Ju’n Frünnen nästed Johr den Schrievdisch utrüüm mööt? Un
dat bi ’n Arbeid, de weenstern 15000 Euro in Monot op’t Konto spöölt? Allns tosom
kost‘ uns jeden Afgeordneten in Bunnesdag sogor meist 38000 Euro in Monot oder,
as de Stüüertohler-Bund vörreekend, good 450000 Euro in’t Johr, wat blots de
Ünnerkant ohn‘ all de Sünnertologen, Reisekosten un so wieder dorstellt.
Dat
schall overs an düsse Steed gor ni interesseern. Wi wüllt uns mol dat
minschliche Drama achter de Reform, de keen is, bekieken.
Wi hebbt
nu 709 Afgeordnete in Bunnesdag. An un för sick schulln dat blots 598 ween.
Nästed Johr ward dat overs erstmol blots so bummeli 20 weniger. Den Rest hett düsse
Regeerung de näste Regeerung in de Steebeln schooven. Schlau, ne?
Ick
dink, de Gedanken dorachter sünd de: Wurr man sülms sien Posten loswarrn, weer
dat grooten Mist. Behölt man sien Posten overs un kann denn de ehemoligen
Kollegen towinken, de sick de Nees an de Schieven vun Reichsdag plattdrückt,
denn ward dat keddeli.
Ünner de
Lüüd, de denn dor buten stohn wurrn, weer nömli wohrschienli ’n bestimmten
Perzentsatz, de irgendwat över all de, de in’t Amt bleeven sünd, weet. Irgendwat,
dat op gor keen Fall an de Öffentlichkeit schull.
Un wenn över
hunnert Lüüd op’n Mol rutfleegen dehn, de allns vertelln wurrn, wat se so an
Geheemnisse över de annern in petto harrn, denn weer de Reichsdag wohrschienli bald
tehmli leeri.
So finn
ick ook ni scheun, wat de Regeerung besloten hett, overs so’n lütt beten
verstohn kann ick dat doch: Een Kreih kippt dat Fatt even ni tosom mit de Flint
ut, solang se Gold in Mund hett – oder so ähnli...

In
düssen Sinn
3 min
August 21, 2020 In Harz is dat ook scheun...
Wat
hebbt se Markus Söder un sien Gesundheitsministerin Huml an Kanthoken wegen de
Corona-Tests bi de Urlaubers. Vörige Week an Middeweeken harrn 44000 Utlandsreiselustige
un dorünner 900 Corona-Positive noch keen Bescheed över ehr Ergeevnis. Bet nästen
Dag schulln je tominst de Positiven bescheed kriegen. Dat wurr overs nix, un över
40 Positive ward gor keen Bescheed mehr kriegen.
Dat dor
so veel Alarm üm mokt ward, kann ick je verstohn. Intwüschen sünd dat je noch
mehr.
Wat ick
overs ni verstohn kann, is, dat dor keeneen so richti op de Infektschoonstohln
ingohn is. Dithmarschen schull annerletzt al meist Risikogebiet warrn, as
bummeli 50 Lüüd in Heid‘ infizeert weern.
Af 50
Lüüd op Hunnertduusend gült een Regioon je as Risiko.
Wenn man
sick nu overs mit’n Dreesatz utkinnt, denn sünd 900 Positive op 44000 ni 50,
sünnern mehr as 2000 op Hunnertduusend oder good twee Perzent. Dat finn ick
persönlich je noch veel bediklicher as de „Panne“ mit de Toordnung vun de
positiven Tests. Wenn mi een frogen wurr, denn wurr erstmol keeneen mehr in’t
Utlant Urlaub moken, bet sick de ganze Krom entspannt hett. Un wenn denn
unbedingt wülk in’t Utland fleegen oder fohrn mööt, denn schulln se dorto
verplicht warrn, vörher een un achteran twee Tests to moken, de se denn overs sülms
betohlt un twor al vör den Urlaub.
Bi uns
kann man sick jümmers noch meist keen Konzert un keen Theoterstück bekieken,
weil dat „to gefähli“ is, un de Schoolünnerricht un privote Fiern sünd
problematisch. Op Gran Canaria mit Duusende anner Lüüd dicht an dicht an Strand
rümtoliggen un dicht an dicht in Fleeger to sitten is overs in Ordnung?
Dorbi
kann man je ook bi uns Urlaub moken. An de Ostsee, in Harz oder in Swattwald is
dat doch ook scheun.
Mutt dat
denn so wiet wech gohn? För mennige anschiend jo, wohrschienli üm bi de Novers
dormit antogeeven, wo düüer de Urlaub weer. Un wenn man krank ward un annere
ansteekt – annerlei, dat betohlt je de Staat. Richti, man mutt ook mol
Prioriteeten setten...
In
düssen Sinn
3 min
August 14, 2020 Betohlten Tüünkrom
Annerletzt
wull ick de L173 langfohrn. Dat gung overs gor ni, tominnst ni op den
nördlichen Deel mang de B5 un de L142. Op de L173 ward an verscheedene Steeden
buut, dorüm is se dicht.
Overs
dat gifft je ook noch veele annere scheune Strooten. De L25 lohnt sick to’n
Bispeel. Besünners dor, wo man so scheun op de Schlei kieken kann. De L305 is
ook scheun un de L56 mutt sick achter de annern Strooten wiss ni versteeken.
Wat? Jüm
weet gor ni wonehm all de L-Strooten, also de Lanndesstrooten längsgoht? Un Jüm
weet ni mol, dat de L173 vun Barlt bet meist no Brunsbüttel-Ort geiht, wo se
weller op de B5 dreept?
Tscha
Lüüd, ick heff dat ook ni wusst. Wenn man overs op de L138 kort achter’n
Bohnövergang ünnerwegens is mutt man sowat weeten. De L138 geiht dör St.
Michaelisdonn. Un kort achter de Iesenbohnpohls steiht ’n grooted Schild. Un op
dat Schild is to leesen: „L173 gesperrt. Umleitung über L138/L142.“ Wieder nix.
Segg mi
mol, wat för ’n Genie kümmt dorop, Schiller as dat vör veel Geld drucken to
loten. Ick heff twee Stünnen söcht, bet ick ’n Koart tofot harr, wonehm de
Lannesstrooten överhaupt mit Noom instoht. In de mehrsten Navi-Apparote un in
de Routenploners in’t Internet finnd‘ man düsse Beteeknung‘ nömli ni.
Un wenn
man an de Kant‘ vun de Stroot no de Kilometersteens söcht, wo opsteiht, wat för
’n Nummer de Lannesstroot hett, denn hölt man je ook blots den Verkehr op. Harr
man ni eenfach schrieven kunnt, „De Stroot mang Barlt un Volsemenhusen is
dicht“? Dat gifft doch ook so schmucke schematische Schiller as in St.
Margarethen, wo man op een Blick sehn kann, dat man nu anners no Brookdörp
fohrn mutt as sünst. Dat is doch keen Hexenwark.
De
Schillermoler in St. Michel süht dat anschien’d anners. De sitt wohrschienli
bet loot in de Nacht wook, üm Strooten-Nummern utwenni to lehrn. De schull man
mol de K22 langfohrn. An de Stroot bün ick nömli to Huus. Denn kunn‘ wi uns
uttuuschen. Wi sünd je gor ni so verscheeden – wi schrievt beide Tüünkrom un
ward dorför ook noch betohlt...

In
düssen Sinn
3 min
August 08, 2020 Ick will ni Koarten speeln!
„Hebbt se Päibäck? Sammelt se Punkte?“ Tscha. Oftmols wenn ick inkööpen goh oder an de Tanksteed betohln will, frogt mi de Kasseerer oder de Minsch achtern Verkoopstresen so dösige Frogen.
Wenn dat so kümmt, denn segg ick jümmers: „Nä. Ick heff keen Päibäck un sammel keen Punkte. Un üm dat glieks vörut to schuuven: So’n Düütschlandkoart un wo dat allns heet, heff ick ook ni. Dörf ick nu bidde eenfach blots betohln?“
Mennig een seggt denn to mi: „Worüm sammelst du denn keen Punkte? Dat lohnt sick doch. Dat mutt man doch mitnehm!“
Na jo. Mach ween, dat sick dat lohnt. Overs lohnt sick dat würkli för mi, oder doch eher för de Dorsten, de düsse Koarten op’n Mart smieten doht? Dat dörft man sick doch mol frogen oder ni?
Mi is dat mien Levdag noch ni ünnerkom‘, dat irgendeen wat to verschinken hett, bet op mien Omas veellicht. Un wenn dat mit düsse Koarten billiger ward oder man mit de dorsten Plastikdingers Geld trüchkriegt, worüm nehmt de Kooplüüd denn ni eenfach so weniger Geld för dat, wat se verköfft un lot‘ düsse Koarten eenfach wech?
Na jo. Wat dor achter steekt, is je ganz eenfach verkloart. De Lüüd de düsse Koarten utgeevt, wüllt weeten, wat wi inköfft, wo oft un wonehm. Un wat se dorbi rutfinnen doht, dat verköfft se denn wieder an den Hannel. Un de Hannel kann sien Angebot denn dorno utrichen.
Dor is je erstmol nix wieder gegen to seggen. Overs in de gooden oln Tante-Emma-Lodens hebbt de Verkööpers ganz ohn‘ düsse Koarten wusst, dat Oma Möller op jeden Fall de Zeidung, teihn Eier un ’n Liter Melk hebben will, wenn se kümmt. Un den Rest, den se hebben will, ward se denn al vertelln. Dorno hett de Loden denn sien Angebot utricht.
Dat hett allns ganz wunnerbor klappt. Nu overs schient dat anners to ween.
Dösig ne. Blangbi hett dat ole Süstem ni duusende vun Plastikkoarten pruduzeert, de de Ümwelt verpesten doht. Un dat Moken vun de Koarten kost je ook weller wat.
Nä, leeve Lüüd. Mit mi speelt Jüm keen Koarten...

In düssen Sinn

3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…