De Döschkassen

By Heiko KrollComedy Society & Culture News News Commentary

De Döschkassen episodes

August 01, 2020 Dösige Entwicklung’ in’t Muul
Dösige Entwicklung’ in’t Muul

Dat gifft je kuum twee Fraktschoon, de sick so dull vertörnt hebbt as de Darwinisten un de Kreatschoonisten.
De een seggt, dat allns, wat op de Welt so rümkruupt, schwümmt un flücht, dat Ergeevnis vun Mutaschoon över Milliarden vun Johr un vun dat Överleven vun de Stärksten is. Wenn man dat mol genau nehm‘ deiht, denn sünd wi allns Mutanten. Dat lot ick eenfach mol so stohn.
De annere Fraktschoon seggt, dat is allns Tüünkrom. No de ehr Övertüügung is de Eer man jüst ’n poor Duusend Johr old un de Planten, Tiern un Minschen sünd all tosom vun leeven Gott mokt worrn.
Ick weet ni wat dorvun stimmt. Wenn ick mi overs in Speegel bekiek, fallt mi dat licht, dat mit de Mutatschoon to glööven. Un wenn ick vun‘ leeven Gott mokt worrn bün, denn hett de anschien’d ’n ganzen Barg Humor.
Overs annerlei wat nu de Wohrheit is, över een Sook, de dorbi rutkom‘ is, kann ick mi mitünner den ganzen Dag argern. Un dat sünd de Tähn. Wenn Darwin Recht hatt hett, worüm hett sick bi dat ganze Muteern nix vernünftiged to’n Kaun‘ entwickelt?
Wenn man Lütt is, fallt een‘ de Tähn erstmol ganz un gor ut. Dor kümmt denn twor frische, overs mit de hebbt de Mehrsten so lang Arger un Wehdoog, bet ook de utfull’n sünd.
Wenn man blots noch ’n poor Tähn hett, denn kann man sick to Wiehnachen veellicht ’n Teelicht in’t Muul stelln un so in Düüstern interessante Lichteffekte an de Wand smieten, ansünsten overs is de Natuur no mien Ansehn op’n Holtweg, wat de Tähn angeiht. Sülms wenn man dor jeden Dag as’n Verrückten op rümputzt, is man vör Löcker un Parodontdingsbums ni seeker. Veellicht entwickelt sick dor je noch wat anners in de nästen poor Millioon Johr. Dor ward wi all tosom overs nix mehr vun hebben. So mööt wi uns wohrschienli wiederhen mit Tähnweh un all dat ut’neensetten.
Wenn nu overs de Kreatschoonisten recht hebbt, denn verstoh ick överhaupt nix mehr. Wull uns de leeve Gott dormit bestrofen oder argern, dat he uns de Dinger in’t Muul sett hett? Wenn dat ni so is, denn gifft dat blots noch een Möglichkeit: Gott is ’n Tähnarzt...

In düssen Sinn

3 min
July 25, 2020 Tööv mol even...
Tööv mol even...

Wenn man no’n Dokter mutt oder no’t Amt oder so, denn mutt man je tomeist erstmol tööven, eher man mit de Lüüd snacken kann, wegen de man kom’ is, ne. Bilütten töövt man bi düsse Gelegenheiten ’n ganze Stünn oder noch länger.
Wenn dat overs bi mi an de Huusdöör kloppt oder an’t Telefoon bimmelt, denn schall ick jümmers sofort Tied för de hebben, de wat vun mi wüllt.
Mennigmol geiht dat Telefoon teihnmol in de Reeg, eher dat glieks achteran an de Döör kloppt un dor twee Lüüd stoht, de mi wat vun’t Enn vun de Welt vertelln wüllt. An so’n Doog kümmt man eenfach to nix.
Un so keem ick op de Idee, dat ick mi to Huus veellicht ook so’n Beriek to’n Tööven inrichen schull, so’n „Wartezimmer“, ’n Töövkommer also.
So’n ganz lütten Ruum, ni allto kommodig mit twee, dree Stöhl dorbin, de overs veels to hart sünd, üm dor lang op to sitten.
Wat to Leesen kümmt dor overs ni rin, heuchstens veellicht ’n Putt mit koln Kaffe.
Un wenn denn mol weller een an de Döör kloppt, de mi vertelln will, dat dat Enn bald dor is oder wat anners, dat ick jüst ni unbedingt weeten mutt, denn segg ick eenfach: „Vergeet‘ se ni, wat se mi seggen wulln, un nehmt se doch ’n Oogenblick in de Töövkommer Platz. Ick kümmer mi glieks üm se...“
No ’n Stünn oder twee, verleert de ganz vun alleent de Lust an’t Vertelln un suust weller af, wiel ick scheun wiederarbeinen kann.
Un för’t Telefoon gifft dat doch so schöne Musik, de man inspeel’n kann un so’n Stimm de seggt, wat man noch ’n beten tööven schall.
Jo. Över düsse Idee schull ick würkli noch mol gernauer nodinken.
Dor hett man eenmol ’n beten Arbeid vun, overs denn hett man sien Roh‘.
Op de anner Sied ünnerhol‘ ick mi overs ook ganz gern mit Lüüd. Anners wurr ick je gor ni an all veele vun mien Geschichen kom‘. Op mennige dorvun kom‘ ick sogor, wenn ick sülms irgendwo mit anner Lüüd to Tööven sitt.
Dorüm lot‘ dat erstmol so, as dat is. Overs ick behol de Idee in‘ Achterkopp. Man weet je ni, wat noch allns kümmt...

In düssen Sinn

3 min
July 18, 2020 To kloog för de Welt
To kloog för de Welt

Man mutt sick je jümmers weller mol wunnern, wo se all de Lüüd herkriegt, de uns in de Medien as „Experten“ vörstellt ward.
To jedet, overs ook würkli jedet Thema gifft dat Experten. Un mennige vun düsse Experten, doht mitünner ganz scheun schlau. Düsse besünners kloogen Experten-Expemplare doht so, as wenn blots se wat vun ehr Thema verstoht un dat all de annern veels to dumm sünd. Overs se versöcht denn jümmers doch noch een letzted Mol, all de Dummen to vertelln, wat se so un so ni begriepen ward.
Un een vun genau düsse extra kloogen Experten schient mi Christian Danner to ween, de in’t Fernsehn de Formel een kommenteert. Sogor sien Kommentator-Kolleg‘ Heiko Waßer schient em op’n Geist to gohn, wenn Chrischan den Dorsten mol weller vertelln mutt, dat een vun de Autos in’t Renn‘ gegen de Wand ballert is, weil de Fohrer ni rechtiedig op de Brems patt hett. Dorbi snackt he denn gern Ingelsch, weil sick dat no mehr anheuert. He sabbelt denn wat vun „Grip“ un „Downforce“ un wat ni allns. Danner is je dorüm Experte, weil he sülms mol Formel een fohrt is, wobi man in de Formel een je keen Fohrer, sünnern „Pilot“ is. Aha.
Nu wull ick overs doch mol weeten, wo Chrischan Danner bi all sien Weeten kom‘ is. Dorüm heff ick mol rescherscheert. So as he snackt, is he ja weenstern teihnmol Weltmeister in de Formel een ween.
Weer he overs gor ni. Mang 1985 un 1989 is he ganze 36 Rennen fohrt, overs wunnen hett he gor keen dorvun. Ni mol Tweeter oder Drütter is he ween. He is överhaupt blots 15 Mol in’t Ziel ankom‘.
So. Un worüm is Chrischan nu Experte un deiht so schlau? Veellicht, weil he so genau weet, wo man dat in de Formel een „ni“ moken schull. Ick glööv, dat weet wohrschienli de Mehrsten – ook, wenn se noch nie in so’n Rennauto seeten hebbt.
Tscha, in Tokunft warr ick jedenfalls ’n beten skeptischer ween, wenn mi een as „Experte“ vörstellt ward.
Un eher ick ’n Experten üm sien Meenung beed‘, wenn ick wat ick weeten will, frog‘ ick leever een, de sick dormit utkinnt...

In düssen Sinn

3 min
July 11, 2020 Wonehm is dat Steak bleeven?
Ordnung
is je dat halve Leven, seggt man. Mach ween, wat dat sogor stimmt. Nu is Overs
Ordnung un Ordnung lang ni datsülbige. För den een heet Ordnung, allns, wat he
hett, gliekmäßi op’n Footborrn to verdeeln, för den annern heet dat, allns
akroot aftoheften un wechtorüüm.
Dat
gifft dor ook Mischform‘ vun. Bi Mennige süht dat op’n ersten Blick allns
schier un oprüümt ut, wenn man dor overs de Schappen opmokt, finn’d man dor
datsülbige Dörnanner as bi de annern op’n Footborrn.
Na jo, Hauptsook,
man weet wo allns is, wenn man’t bruukt.
Keddeli
ward dat blots, wenn Lüüd mit ünnerscheedliche Oarten vun Ordnungssinn
tosomkümmt. Dat beleev ick to Huus jümmers mol weller: Wenn ick mi obends wat
op’n Köökentresen legg, dat ick nästen Morn bruuk, denn kann ick mi meist dorop
verloten, wat dat an nästen Dag ni mehr dor is.
Dat hett
miem Madam denn nömli wechsorteert. Un wenn ick ehr denn froog, wonehm se dat
henpackt hett, denn seggt se oftmols: „Weet ick ni.“
Mennigmol
kann se sick overs doch dorop besinn, wo se wat henpackt hett. Annerletzt to’n
Bispeel weer ick an Eeten moken. Dat schull Steak geeven. Dree Stück Fleesch
harr ick al ferti broodt. Nu schull blots noch mien Steak in de Pann – dat harr
ick op’n Köökentresen packt, un ’n Stück Poppier doröver leggt, dormit de
Fleegen dor ni bikeem‘. Overs as ick no dat Fleesch langen wull, weer dat wech.
Ick harr glieks mien Fruu in Verdacht un heff ehr frogt: „Hest du dat Steak
hier wechnohm?“ „Och“, säh se dor, „weer dor Fleesch mang dat Poppier.“ Mi wurr
al ganz schwummeri. „Weetst du denn, wo du dormit afbleeven büst“, heff ick ehr
frogt. „Jo“, säh se, „dat is in de Aschtünn.“ Wech weer dat. Un ick harr doch
so’n Hunger.
Wenn ick
mol ’n Liek verschwinnen loten mutt, denn pack ick de ook eenfach op’n Köökentresen
un denn is se an nästen Dag wech, as wenn ehr dat nie geeven hett.
Man mutt
sick eenfach ni an dat argern, wat man ni ännern kann, sünnern dat to sien
Vördeel nutzen. Overs dat näste Mol, wenn ick mi ’n Steak köff, pack ick mi dat
in de Breeftasch, bet ick dat eeten will...
3 min
July 04, 2020 Man mutt blots reeken köön‘
So. Nu
is dat sowiet. De Mehrwertstüüer is senkt worrn. Denn ward nu je allns weller
good.
Overs
tööv mol. Wat seggt denn veele Lüüd ut’n Hannel över de Idee mit de Minnerung
vun de Mehrwertstüüer? De seggt doch all datsülbige, nömli wat düsse Senkung
över ’n halved Johr nix overs ook gor nix bringt. För de, de weni Geld hebbt al
gor ni. Olaf Scholz overs reekend vör, dat man vör ’n Auto, dat betlang 30000
Euro kost hett, nu över 750 Euro weniger betohlt. Dat is richti. Un wenn man
mang Anfang Juli un Enn Dezember dusend Autos köfft, denn hett man’n dreeviddel
Millioon spoort.
Dor kann
man nix gegen seggen. De Reeken stimmt. Olaf hett in Mathe je ook wiss
good oppasst.
Dat
Probleem overs is, dat no de Monot‘ de nu achter uns liggt, sick blots de Wenigsten
dusend Autos kööpen ward. Bi de Mehrsten langt dat ni mol för ’n frisched
Fohrrad.
De
Eenzelhannel overs, in de Supermärte un so, kann de Ännerung vun teihnduusende
Artikels gor ni ümsetten, ward seggt. Dor blifft de Priese to’n gröttsten Deel
as se sünd.
Dat
overs is ut mien Sicht man blots de halve Wohrheit.
In
Januar vun’t näste Johr, ward de Stüüersatz nömli weller ropsett. Un denn
schüllt Jüm mol sehn, wo scheun de Hannel teihnduusende Artikels ümettiketteern
kann.
Dat nu also
so good as nix billiger ward för de lütten Lüüd un dat de Rieken spoort, dat
steit al fast. Un ick wurr mien Mors dorop verwetten dat Anfang 2021 allns
düürer ward.
Wat also
schall uns dat seggen, wat Olaf ut Hamborg, de Finanzminister, dor deiht.
He kann
je düchti reeken. Un he weet ook, dat sien Partei, de SPD, blots noch bummeli
20 Perzent vun de Wählerstimm‘ afkriegt. To’n Kanzler warrn reckt dat ni.
Wenn man
mi frogt, denn wurr ick seggen, dat Maneuver mit de Mehrwertstüüer is Scholz
sien Versöch, bi de CDU opnohm to warrn. Man weet gor ni, wo man al de Luft
herkriegen schall, üm doröver to lachen. Wenn wi uns bet Niejohr overs noch ni
kaputtlacht hebbt, denn kriegt wi dat je to sehn...

In
düssen Sinn
3 min
June 27, 2020 Keen Elektroonik op’n Zeddel
Nu, wo
je in Momang ni so veel Lüüd in de Büros sitten dörft, ward weller düchti no de
Digitaliseerung gröölt.
Digitaliseerung
– wat weer dat nochmol? Ach jo, dat gung al in de 70er Johrn los, an un för
sick noch fröher. Also ick meen de 70er Johrn vun’t vörige Johrduusend. Dor
keem‘ de ersten Kompjuters op, un mit düsse Reekners schull allns ganz anners
warrn.
Vörher
wurr je allns mit Poppier mokt, un vun allns wat op irgendeen Formular smeert
wurr, sünd denn noch dree Dörsläge mokt worrn. Dat weer ni ganz so scheun vör
de Ümwelt un för de Schappen ook ni, denn dor hebbt sick Aktenordners vull mit
Poppier in stopelt.
So weer
dat dormols. Un nu, föffti Johr loter, is dat noch ganz genau so. Mennige Lüüd
seggt sogor, dat hüüt noch veel mehr mit Poppier hanteert ward. Wo kann dat
angohn? All de Elektroonik is doch ook al ’n halved Johrhunnert old. Ist dor
irgendwat scheev loopen? Dat schient meist so, ne. Wenn ick bi uns to Huus
kiek, mit de veer Lüüd, de dor wohnt, kümmt dor ’n ganzen Barg Elektroonik
tosom: Veer Smartfoons, dree Läptopps, twee Täbletts un een Kompjuter, de all
Internetansluss hebbt. Wenn overs een vun uns wat mit’n Amt to kriegen hett,
denn mööt wi dat op’n Zeddel schrieven. De Stüüerverloorung kann man intwüschen
twor elektroonisch moken, overs utdrucken un ehr no’t Finanzamt sleepen mutt
man ehr liekers. Un denn kriegt man den Stüüerbescheed vun‘ Fiskus ook op
Poppier trüch. Andräge, Mitdeelung‘, Bescheede un so wieder – allns op Poppier.
Un dor wunnert man sick noch doröver, dat de Reegenwald afholt‘ ward.
Overs nu
mitmol besinnt man sick op dat Woord „Digital“. Dor weer doch wat. Lot uns all
den Krom doch mol elektroonisch moken. Jo genau. Overs dat dorbi weniger
Poppier rutkümmt, dat glööv ick erst, wenn ick dat ni mehr in Breefkassen heff.
Veellicht
schulln de Verantwoortlichen mol in’t Internet nokieken, wo dat mit de Digitaliseerung
geiht. Un wenn se dat ni trechkriegt, schüllt se bescheed seggen. Ick wurr ehr
dat utnohmswies‘ sogor utdrucken...

In
düssen Sinn
3 min
June 20, 2020 To lässig to’n Snacken
Veellicht
is Jüm dat al mol opfulln: Wenn twee Busse, annerlei wat dat Linien- oder
Reisebusse sünd, sick op de Stroot entgegen kümmt, denn grööt‘ sick de Fohrers.
Fröher,
as dat noch ganz weni Autos geev, hebbt sick all grööt de mit so’n Auto
ünnerwegens weern.
As dat
overs ümmer mehr Fohrtüüch wurrn, hett dat mit dat Grööten ook afnohm.
Bi de
Busfohrers hett sick dat overs holn. Un wenn mol op’n Parkplatz oder so ’n poor
Busse tosomstoht, denn ünnerholt sick de Fohrerin‘ un Fohrers oftmols. Se
snackt denn över den Verkehr, över de Busse, de se fohrt, över ehr Chefs un all
sowat. So kümmt Lüüd ut ganz ünnerscheedliche Region‘ in’t Snacken. Dat is al
sowat as ’n Traditschoon.
Nu gifft
dat overs noch ’n Grupp‘ in Strootenverkehr, de sick grööten deiht, un dat sünd
de Motorrad-Fohrers. Dor heuer ick ook mit to.
Blots
hier verstoh ick dat mit dat Grööten ümmer weniger.
Mi
dücht, de mehrsten Motorrad-Fohrers grööt‘ annere Fohrers blots dorüm, weil se
bi de Fohrt so gern den linken Arm vun’t Stüüer nehmt üm bi’t Grööten möglichst
lässi un „cool“ to würken.
Wenn man
as Motorrad-Fohrer overs annere Motorrad-Fohrers dreept, an de Tanksteed to’n
Bispeel, denn kriegt veele vun de Dorsten ni mol ’n „Moin“ rut. De ölleren jo,
mit de kann man ook mol twee, dree Wöörd snacken. Overs de jünger’n Deerns un
Jungs, schient ni mehr snacken to könen, so bald se ’n Helm opsett‘.
Veellicht
ward se denn je „to cool to’n snacken“. Richti ulki is dat an Bohnövergang,
wenn op beide Sieden vun de geslotenen Schranken ’n Fohrer mit sien Moschien
steiht. De beiden ward denn ganz unruhi, weil se ni so recht weet, wat se nu al
grööten schüllt, erst wenn de Schranken hochgoht un se wiederfohrt oder eenfach
mol gor ni.
Veellicht
schull man düssed Phänomen mol vun ’n Psychologen ünnersööken loten.
Intwüschen
kann ick all de Motorrad-Fohrers dor buuten seggen: Ick grööt Jüm ni blots, wi
künnt ook gern mol tosom snacken...

In
düssen Sinn
3 min
June 12, 2020 Gau weller langsom warrn
In dat
Viddeljohr, dat nu achter uns liggt, gung Politik bi uns je so gau, as ick dat
noch ni beleevt heff.
Keen
Schoolünnerricht, keen Kino un Theoter mehr, Kneipen un Restaurangs dicht,
blots noch so un so veel Lüüd hebbt sick in de Öffentlichkeit dreepen dörfst –
erst ohn‘ Masken, weil de je so un so nix döcht, denn mit Masken, weil de je
ganz veel döcht – no de Bunnesgrenzen wurrn ook fuurts de Lannesgrnzen
dichtmokt, denn wurr mit Millioon un Milliarden rümsmeeten as mit Söötkrom op’n
Karneval un noch’n ganzen Barg mehr wurr meist in Minutentakt besloten. De
Afgeordneten in de Parlamente harrn al meist Tennisarms vun dat ganze Afstimm‘.
Intwüschen
ward je all de Verbote so langsom weller trüchfohrt. Man snackt sogor al vun de
„Nach-Corona-Zeit“, dorbi is dat in Afrika un in Noord- un Südamerika to’n
Bispeel allns annere as vörbi. Dösig ne. Overs so is dat nu mol. De een‘ oder
anner‘ in de Politik snackt sogor al dorvun, dat man bald no de „Tagesordnung“
trüchkehrn kann. Wat schall dat bedüüden?
Dat no
Corona allns weller so scheun langsom geiht as vörher? Man bruukt gor keen
Bispeele as den Floogplatz Berlin-Brandenborg rantotrecken. Dat langt, wenn man
eenfach mol bi uns vör de Döör kiekt. So schall mang St. Michaelisdonn un Qickborn
al siet 20 Johr oder so ’n Radweg buut warrn. Dat steiht alle poor Johr mol in
de Zeidung un denn ist dat weller vergeeten, bet de näste Radfohrer op de
Streck‘ breedmangelt ward.
In so’n
Törn ward denn de Schuld an dat Malleuer vun een‘ to’n nästen schooven, denn
ward seggt, wat keen Geld dor is, un dat weer’t denn erstmol weller. Stellt
sick mol vör, mit de Corona-Entscheedung‘ harr dat jüst so lang duuert. Dor
weer hüüt noch nix besloten. Overs jeden Dag wurr uns vertellt, wat för Lüüd
schuld an den ganzen Schiet sünd, jüst as bi den Radweg no St. Michel.
Un nu de
Master-Froog: Worüm geiht dat hier so gau un dor so langsom?
Veellicht
weet de Virologen je ’n Antwoort dorop. Wenn ick wat in de Richtung rutkrieg,
lot ick Jüm dat jedenfalls an düsse Steed weeten...

In
düssen Sinn
3 min
June 05, 2020 Scheune Dinkblockade
Tscha,
ick warr ook ni jünger. Un mennigmol ertapp‘ ick mi sogor dorbi, dat ick mit
so’n anstännige Portschoon Nostalgie an fröher dink.
Dorbi
ward mi klor, dat ick mi düchti verännert heff. Ni blots dat Utsehn is anners,
ook de Hormone sünd ni mehr dat, wat se mol weern.
As ick
so mang 15 un 20 Johr jung weer, kunn ick an mennige Doog an nix anners dinken
as an ’n Deern in de ick mi jüst verkeeken harr. Düsse Gedanken hebbt alls
annere blockeert, as wenn dor ’n Feller uthokt weer.
Un wenn
dat Fröhjohr keem un de Plünn‘ vun de Deerns körter wurrn, weer dat ganz un gor
vörbi mit dat Dinken. Dor hung mi blots noch de Tung rut un ick heff mi tiert
as so’n Hohn op’n Misthuupen, de Indruck op de Heuner moken wull.
Intwüschen
is dat recht wat weniger worrn. Dat is op de een Sied good, denn mit dat Dinken
klappt dat recht wat beter. Op de anner Sied weer dat overs doch ’n scheuned
Geföhl, wenn dat Bloot so richti togang keem.
Dor heff
ick annerletzt ook mit ’n Kumpel över snackt.
Bi em
weer dat jüst so, un as he noch in de Lehr‘ ween is, dor is he jümmers mit sien
Mofa no de Berufsschool fohrt. Un an een vun düsse Doog stunnen jüst all de
schmucken Deerns vör de School, de Putzbüddel lehrn wulln.
Mien
Kolleg – ick nööm em eenfach mol Sönke – hett de Deerns al vun wieden sehn. Un
nu wull he ganz elegant mit sien Mofa üm de Eck un an ehr vörbi fohrn. „Cool“
schull dat natüürli utsehn.
Nu weer
overs bi sien Mofa jüst dat Pedol ünnen, dat op de Binnensied vun de Kurv seet.
De Pedol hett Grundkontakt kreegen un Sönke hett sick düchti op’n Sabbel leggt.
Nu weer seeker, dat he de ganze Opmarksomkeit vun de Deerns op sick trocken
harr. Overs afkreegen hett he keen vun de Dorsten.
No dat
he mi dat vertellt hett, säh Sönke: „Ick harr man leever bi de Krankenswestern
vörbifohrn schullt.“
Jo,
achteran is man jümmers klööger.
Leevde
is doch wat Herrliched, dor hett man erst Hartkloppen un loter ook noch wat to
lachen...

In
düssen Sinn
3 min
May 02, 2020 Kinnt wi uns?
Wwit mibw-wwkm...
Nä, so geiht dat ni. Wenn ick mien „Alldagsmaske“ opheff, denn besleiht mi
jümmers de Brill‘, un richti to verstohn bün ick ook ni. Also wech dormit – in
Oogenblick bün ick je allent.
Siet
Middeweeken mööt wi nu also ook bi uns ganz in Noorn Muulkörf dreegen. In Bus,
in de Iesenbohn, bi’t Inkööpen un so wieder.
Mennige
Weetenschoplers seggt je, wat dat gor nix bringt – wat dat sogor gefährli weer,
weil dat den falschen Indruck ertüügen kunn, dat wi dordör seeker weern.
Annerlei.
Hest‘ den Plünn ni vör de Nees, denn gifft dat ’n Stroof. Dat mutt ick ook ni
hebben.
De
Karnevalsfrünnen ward de Maskenplicht jedenfalls freu’n. Un noch mehr ward de
Bankräubers düsse Entscheedung begrööten oder extreeme Demonstranten – wenn de
denn weller demonstreern dörft.
Nu is
dat je so, dat man de Masken oder den Schutz över Mund un Nees je in bestimmte
Situatschoon dreegen „mutt“, op de anner Sied dörft man ehr dreegen, wenn man „will“.
Dor kann man je in’t Nodinken komen: Keen sick in sien eegen’t Auto ni seeker
föhlt, dörft also ook mit sien Alldagsmaske op de Nees fohrn. Un wenn dat all
mokt, denn künnt all de Lüüd mit de Radarfall’n an de Stroot ehr Geschäft je
erstmol vergeeten. So is dat nu mol in düsse swore Tied. Wenn Krögers un
Putzbüddels nix verdeent, hebbt even ook de Blitzer-Minschen dormit to leeven,
dat se sick bilütten no’n anner Arbeid ümkieken mööt.
Ick meen
– ick kunn je so un so nix dorför, wenn ick to gau fohrn deh. Mien Brill
besleiht doch jümmers wegen de Maske un denn kann ick dat Tacho gor ni mehr
sehn.
Figeliensch
is dat mit de Masken in’t Gesicht ook, ruttofinnen, keen to de eegen‘ Famielje
heuert. Op’t Letzt‘ seggt man to sien Fruu, wenn de een in Arm nehm‘ will:
„Kinnt wi uns?“
Dor kann
ick blots all roden, in de näste Tied ’n besten nosichti to ween. Ni, dat de Scheedungsanwälte
noher noch Hochkonjuktur kriegt wegen de dorsten Plünn in’t Gesicht. Tscha. Mol
sehn, wat dor noch so allns kümmt. Ick sett jedenfalls erstmol weller mien
Alldagsmaske op un segg...

Im bwüffm
Wimm!
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…