De Döschkassen

By Heiko KrollComedy Society & Culture News News Commentary

De Döschkassen episodes

February 07, 2020 Dat Immun-Süsteem
Wat weer
dor vörigen Dünnersdag un Friedag los? Dat gung so fix, dat ick dat meist ni
mitkreegen heff un intwüschen snackt dor al keeneen mehr vun. So kann dat ni
blieven!
Also:
Los gung dat mit Alexander Gauland, den se de politische Immunität wechnohm
hebbt. He schall, bi de Stüüer 6000 Euro an Fiskus vörbischummelt hebben. Süssdusend! Ick much ni weeten, wo veel Geld
sien Kollegen vun de CDU, de SPD, de Greun‘ un so wieder al an’t Finanzamt
vörbimogelt hebbt.
Nu bin
ick wiss keen Fründ vun Gauland un mit de AfD heff ick ook nix an Hoot. Overs
mootig finn ick dat je vun de annern Afgeordneten, för de Opheevung vun Gauland
sien Immunität to stimmen. Mi wurr blots mol interesseern, wo veel vun de
Afgeordneten sick vör de Afstimmung noch gau ehr Konto-Utzüge trocken un sick
den Sweet vun de Stirn wischt hebbt. Dorno keem glieks de näste Afstimmung in
Sooken Immunität. Dütmol bi Karin Strenz vun de CDU. Ehr hebbt se de Immunität wegen
Besteekung wechnohm. Aha.
22000
Euro schall se vun Lobbyisten ut Aserbaidschan annohm hebben. Achteran is se
ook noch dör „pro-aserbaidschanisches Verhalten“ opfulln, hebbt se seggt.
Dorvun,
dat Politikers sick besteeken lött, heff ick je noch nie wat heuert. Mutt
anschiend dat erste Mol ween hebben. Ick freu mi, dat dor glieks ’n Riegel
vörschoven ward.
Grund sick to freu’n harr ook Mario Draghi, de ole EZB-Chef. De hett dat Bunnesverdeenstkrüüz
dorför kreegen, dat he dat Geld vun de Sporers in de Taschen vun de Banken un
Konzerne schüffelt hett. Schier.
In Reichsdag
sitt overs een, de all düsse Gaulands, Strenz‘ un Draghis överkann: Wolfgang
Schäuble. De hett nömli al 1994 vun den Waffenhöker Karlheinz Schreiber 100000
Mark insackt. Dat Geld is – simsalabim – verschwunnen un nix dorvun is op’t Finanzamt
ankomen.
Dormit
hett Schäuble sick bet hüüt to’n Finanzminister un to’n Bunnesdagspräsident
qualifizeert. Un wat dat Bunnesverdeenstkrüüz angeiht – dorvun hett Wolfgang al
twee Stück. De hett keen Immunität – de hett ’n Teflon-Beschichtung...
In
düssen Sinn
4 min
January 31, 2020 Den Kaiser sien niede Kleeder
In
Oogenblick löppt in de USA je dat Amtsenthebungsverfohrn gegen Donald Trump as
Präsident, ne. De Medien sünd sick je al vör düssed Verfohrn seeker ween, wat
dat Trump nix anhebben ward, weil in‘ Senat, de in düsse Sook entscheed‘, mehr
Republikaner sünd.
Man harr
dat Ganze also ook eenfach loten kunnt. Overs de Demokraten wulln weenstern
to’n Utdruck bring‘, dat se mit düssen Präsident, de allns so „wunnerbor“ un
„grootoarti“ finn’d, ni tofreeden sünd. Ännern ward dat liekers nix.
Is dat
ni dösig? Worüm is dat so?
Worüm
ward ganz eenfache Lüüd, de Mist mokt, bestroft, wiel de Grooten, de veel
grötter’n un veel slimmerer’n Mist mokt, achteran in de Fernsehkameras grient,
as wenn gor nix losweer?
Tscha.
Dat is an un för sick ganz eenfach. All de Trumps un Putins op de Welt künnt
sick so verholn, weil wi dat so wüllt. Wi wüllt groote Lüüd över uns hebben, de
dat Seggen hebbt. Wi wüllt ’n Kaiser, ’n König, ’n Präsident. Ni blots weil de
uns Regeern doht oder weil wi hopt, dat dör ehr allns beter ward. Nä, wi wüllt
de Kaisers ook dorför hebben, dat wi ehr de Schuld geeven künnt, wenn dat bi
uns ganz privot ni löppt oder wenn de ganze Welt to Schann‘ geiht. So künnt wi
jümmers noch op annere wiesen, wenn wi wat ni trechkreegen hebbt. So eenfach is
dat.
Wi weet
je ook all tosom, dat de hogen Herrschopen, wenn se nokelt sünd ni anners
utseht as wi, se kookt ook blots mit Woter un wenn se op Tant‘ Meier weern,
denn rüükt dat ni anners as bi uns. Liekers lot wi ehr moken, wat se wüllt. Un
so’n Amtsenthebungsverfohrn, dat nix bringt is blots dorför dor, de Moral so’n
lütt beten to heeven.
Wenn wi
all tosom wat anners wulln, denn keem ook wat anners. Overs an un för sick,
hebbt wi uns dat doch ganz kommodig mokt. Dat is in de USA ni anners as bi uns,
un dat blifft wohrschienli ook so, denn al vör hunnert Johr, hett de Ire George
Bernard Shaw schreeven: „Demokratie is ’n Verfohrn, dat garanteert, dat wi ni
beter regeert ward as wi dat verdeent.“
Wo he Recht hett, hett he Recht...
In
düssen Sinn

3 min
January 24, 2020 Wat kümmt no de Tokunft?
Vun „Industrie 4.0“ oder vun de näste industrielle Revolutschoon heuert man je jümmers mol wat in de Norichen un so. Wat dat dormit overs op sick hett, dat mokt veele sick je gor ni so recht klor.
So as de Dampmoschien fröher de Welt ümkrempelt hett, sünd dat nu de Compjuters un allns wat dor mit tosomhangt.
So goht de Spezialisten dorvun ut, dat noch veel mehr as nu automatiseert ward. Lastwogens ward in’ poor teihn Johr sülmsstänni fohrn un överhaupt ward de ganze Verkehr un de Logerhaltung sülmsstänni apfloopen.
De Sachbearbeidung op’t Finanzamt un in annere Behörden ward bald komplett vun Compjuters mokt, jüst so as veele, veele annere Sooken.
Den meehrsten Ünnerricht an den Schooln ward künstliche Intelligenz övernehm‘. Dat hett je ook wat för sick. Keen Schööler fallt mehr dör’t Raster, weil den Schoolmaster de Nees vun’t Kind ni in Kroom passt.
Överall in de Industrie, wonehm nu noch Minschen an’t Band stoht, ward man bald blots noch Roboters sehn.
De süht man hier un dor je ook al bi de Lüüd to Huus: Dat Gras üm de Hüüs ward vun Roboters meiht un de Huulbessens fohrt ook alleent dör de Stuuven. Dor gifft dat bald noch veele annere elektroonische Hölpers.
Dat mach den een gruseli vörkomen un den annern interessant. Overs annerlei, wat wi doröver dinkt, so ward dat komen.
Dat würkt sick natüürli ook op uns ut. Veele Professchoon, also Berufe, ward dat in Tokunft ni mehr geeven. Dörför ward annere Professchoon wichti – to’n Bispeel dat Programmeern vun all de Moschien un dat Wiederentwickeln vun de Roboters un Automaten. Veele klassische Berufe ward utstarven.
Overs annerlei, wat Jüm Kinner in Tokunft berufli mokt, seht to, dat Ju ehr wiest, wo man ohn‘ Rietsteeken (Streichhölzer) Füüer mokt. Wenn nöömli een de Industrie 4.0 den Steeker treckt, denn fallt wi direkt in de Steentied trüch un all de, de Füüer moken oder för Eeten un warmed Tüüch sorgen künnt, ward denn een, twee, dree weller to ganz gefrogte Experten...

In düssen Sinn
3 min
January 17, 2020 Omas hebbt mehr Süsteem
Sünd Ju
al mol in so’n „Schnell-Restaurant“ ween? Dor gifft dat in de Hauptsook je twee
Keeden vun. Bi de eene steiht so’n groote geele Möwe vör de Döör, un denn gifft
dat noch de annere Keed, de heuert anschien’d een Fruu oder Herrn König to,
blots op Ingelsch.
Jedenfalls
gifft dat dor „Fast Food“. Dat is ook Ingelsch un heet översett, glööv ick, „fast
Eeten“, also ni so ganz richtiged Eeten, overs even fast.
Ick weer
nu annerletzt in een vun de Lodens mit de geele Möwe. Un dor keem ick in’t
Nodinken. Tied to’n Nodinken hett man dor nömli riekli, denn schnell oder gau,
as man meen‘ kunn, geiht dor gor nix.
Wenn man
dor rinkümmt, kann man sick utsööken, wat man an Tresen oder an so’n elektroonisched
Törminell bestelln will. Ick heff an’t Törminell bestellt. Un so as all de
annern kreeg ick denn erstmol ’n Zeddel in de Hand, wo ’n Nummer opstunn, jüst
as op’t Verkehrsamt, wenn man ’n Auto anmellen will.
Man mutt
denn ook tööven, bet düsse Nummer op so’n Fernsehn anwiest ward. Mien Zeddel
harr de Nummer 256, un dormit heff ick mi denn to de annern twölf Lüüd stellt,
de ook so’n Zeddel harrn – as op’t Verkehrsamt. Teihn Minuten loter stunnen jümmers
noch meist all vun uns dor. Wi hebbt uns langsom al frogt, wat dat överhaupt
noch wat to Eeten geev. „Dat schall ’n Schnell-Restaurant ween“, hett een
frogt. „Nä“, hett sien Nover seggt, „dat heet nu „System-Gastronomie“. Ach wat,
heff ick dacht. Ünner Gastronomie verstoh ick wat anners, un ’n Süsteem kunn ick mi dor ook ni rutkieken.
Ick weer al meist
toslopen, as mi een antickt hett: „Dor, dien Nummer, Du büst an de Reeg.” Tatsächli.
Över mien Hunger weer ick al meist wech, overs ick heff mi mit den Pappkrom denn
doch an’ Disch sett un dorop rümkaut. Een Disch wieder seet ’n Fruu mit ehr lütte Dochter. De Deern weer ünnern
Disch an rüstern, as ehr Mudder säh: „Du bruukst dien Schoh ni uttrecken, wi
sünd hier ni bi Oma.“
Nä, dat weer ni as bi Oma. Bi Omas steiht dat scheune Oma-Eeten nömli recht wat gauer
op’n Disch as in düssed dösige Süsteem...

In
düssen Sinn

3 min
January 10, 2020 Wat de Tüüch-Hökers meent
Enn
Januar is je weller Winterschlussverkoop, ne. Fröher heff ick mit düssed dösige
Woord nix anfangen kunnt. De Winter weer je man jüst süss Weeken old.
Overs
denn – zack – schull meern in Winter al weller Schluss ween mit den Verkoop vun
de warmen Sooken.
Dat is
je jüst so, as wenn man in Sommer keen Bikinis kööpen kunn. Na jo, ick bün an
un för sick ook keen, de gern Bikinis antreckt. Ick meen je blots – so as
Bispeel.
Ick heff
düchti rescherschiert, in Bööker un in’t Internet. Overs worüm de
Winter-Schlussverkoop op’n halven Winter un ni an’t Enn dorvun, also würkli an
Schluss losgeiht, dor heff ick keen anstännige Antwoord op funnen. Liekers doht
all de Lüüd so, as wenn sick dat so heuert.
Veellicht
wüllt all de annern blots ni togeeven, dat se dor jüst so wenig vun af weet as
ick. Man weet dat ni.
Op’t
Letzt‘ hett dat anschien’d wat dormit to kriegen, dat de Hannel dör düsse
Beteeknung mehr verdeen‘ kann. Na jo, worüm ni. De Tüüch-Hökers un all de
Angestellten in düsse Brangsche mööt je ook wat in de Supp to krömeln hemm. De
verköfft to’n Deel Tieh-Schörts för fief Euro. Wo schall man dorvun leeven
könen? Wenn ick mi overs dorop besinn, wat düsse Week so op’t Thermometer stohn
hett, denn kom ick op ganz annere Ideen.
Vun Mondag
bet hüüt weern dat an Dag so in’t Middel süss bet söben Grod Warms – dat hett
doch nix mit Winter to kriegen! Vöriged Johr weer dat ni veel anners. In de
hunnert Johr dorför weer dat overs düütli kööler. Is dat nu de Klimawannel? De
Een‘ seggt jo, de Annern seggt nä. Is je ook annerlei, wat man sick so
vertellt, warmer ward dat jedenfalls. Dor kann nu würkli keeneen wat gegenan
seggen.
Dorüm
glööv ick, dat de Tüüch-Hökers dat all de Johrn ganz anners meent hebbt. Se
hebbt ni meent, dat de Schluss vun‘ Verkoop to‘n Enn vun‘ Winter losgung – se
hebbt meent, dat mit den Winter an sick bald Schluss weer un dat dat ganze Johr
över warm blifft! So, wenn ick in Tokunft wat över’t Klima weeten will, denn
frog ick keen Meteorologen, denn frog ick mien Herrn-Utstatter...

In
düssen Sinn
3 min
January 03, 2020 Allns Goode för 2020
Moin moin un frohed nieded Johr. Jungedi. 2020. Mi kümmt all de Johrestohl’n de no 1999
keem’ jümmers noch as Seinz Fiktschen för.
Overs
anners, as ick mi dat vör 30 Johr vörstellt heff, flücht jümmers noch keen
Autos dör de Gegend.
Man good
so, wenn man sick blots mol ankiekt, wo veel‘ Maleschen mennige Lüüd alleent
mit dat Inparken hebbt.
Wenn
düsse Talente nu ook noch fleegen schulln, denn wurr ick blots noch mit Helm
vör de Döör gohn. För fleegende Autos mööt wi düssed Johr overs in de Regel
noch keen Bang hebben.
Overs üm
ruttofinnen, wat 2020 so bringt, hebbt wi nu bummeli twölf Monot Tied. Dorför
hebbt wi sogor mehr Tied as 2019, denn 2020 is je ’n Schaltjohr.
So hett
je ook de Papst een Dag mehr, üm doröver notodinken, wat he eegentli will. Jüst
erst hett he seggt, dat man de Fruunslüüd mehr inbinnen schull, weil de op’t Letzt‘
je ook Minschen sünd.
Üm se
in’t Preester-Amt to beropen, dorför sünd se denn overs anschien’d doch ni
Minsch genog.
Un as an
Silvester een‘ vun düsse ominösen Fruunsminschen den Papst an de Hand trocken
hett, weil se den Pontifex Maximus so gern mol anfoten wull, dor hett
Franziskus ehr fuurts op de Fingers haut. So veel to dat Inbinden vun de Fruun.
Tscha.
Wenn ni mol de Stellvertreder vun‘ leeven Gott op de Eer sick an sien eegen‘
Vörsätze holn kann, wo schulln dat denn all de annern ganz eenfachen Lüüd
trechkriegen?
Na jo,
wenn man sick tominst dat Johr över op dat besinn‘ kann, wat man sick vörnohm
hett un so’n lütt beten ook dorno hannelt, denn is dat doch al’n ganzen Barg.
De Papst
hett intwüschen je ook al seggt, dat he mit sien Prügeln keen gooded Vörbild
afgeeven hett. Un so’n Fehler öffentli intogestohn, dat kann lang ni jeder.
Dormit
wünsch ick Jüm, ook wenn mol wat scheev löppt, dat Jüm in de nästen zwölf Monot
so dör de Welt goht, dat an Enn wat Gooded dorbi rukümmt. Dat wünsch ick mi
sülms ook. Un dormit kann dat nu ook för mi losgohn mit dat niede Johr...

In
düssen Sinn
4 min
December 27, 2019 Dat kümmt, as dat kümmt...
So, nu
hebbt wi dat bald achter uns. Dingsdag is düssed Johr vörbi. Un denn kümmt ’n frisched Johr.
Dat ward 2020 heeten – so veel kann man al mol seggen.
Veel
anners as düssed ward dat Johr wohrschienli ook ni. Allns ward weller ’n beten
düürer, as dat so is. De Briten ward sick wieder doröver strieden, wann se ut
de EU uttredeeden wüllt un ansünsten jault all wieder op ’n ganz hoged Niewo.
In
Februar ward klor, dat dat mit de gooden Vörsätze ni klappt hett, in März ward
dat to kold in April to natt, in Mai to hitt un in Juni künnt wi uns al mol
Gedanken över de gooden Vörsätze för 2021 moken.
Trump
blifft Präsident vun de USA oder ook ni. Dat speelt overs ook keen Rull, denn
de Verrückten, de dat op de Welt gifft, hebbt wi noch lang ni opbruukt. Dor
gifft dat noch ’n ganzen Barg vun, de Präsident warrn künnt.
In Juli
kümmt de Wiehnachsdeko denn langsom in de Geschäfte, in August is dat weller to
hitt. De Iesenbohn sett sick wieder mit ehr veer groote Problemen ut’neen:
Fröhjohr, Sommer, Harvs un wat sünst noch so kümmt. De Spreeker vun de Düütsche
Bohn ward uns jedenfalls vertelln, dat de Bohn nix dorför kann, dat se to lot
kümmt, ook wenn de Mehrwertstüüer för ehr senkt worrn is.
Denn
kümmt weller all de Spezialisten un Experten, de över allns seggt, dat se allns
erstmol kritisch gegenöverstoht. Aha.
Wo ick
persönli an mehrsten Bammel vör heff, dat is, dat de Tatort in’t erste Programm
un de Polizeiroop 110 noch dösiger ward un ick mi wat anners överleggen mutt,
mit dat ick de Week afslüten kann.
Ansünsten
lot ick dat allns eenfach op mi tokom. Sick vörher över allns Sorgen to moken,
dat överlot ick de Astrologen. Denn hebbt de ook wat to dohn, ook wenn mien
Horoskope düssed Johr ni eenmol stimmt hebbt.
Man
schull so un so vörsichti mit Vörutsogen ween, besünners, wenn se de Tokunft
bedreepen doht.
Dorüm hol
ick dormit nu ook op, un ick freu mi dorop mit Jüm tosom dör’t näste Johr to
gohn. Un so wünsch ick Jüm ’n gooden Rutsch un schriev to’n letzten Mol in
düssed Johr...
In
düssen Sinn
3 min
December 20, 2019 De autonome Wiehnachsmann
Wat
löppt de Tied, ne. Näste Week is al weller Wiehnachen. Weer dat ni jüst erst? De
Wiehnachsmann is wohrschienli al düchti in Stress. He mutt je allns in sien
Sack kriegen, wat he düt Johr ünner de Dann’bööm packen schall. Dorbi froog ick
mi, wat de Wiehnachsmann ni ook mol mit de Tied gohn will? De kunn doch elektrisch
fohrn. Nohaltig, ümweltfründli, modern, vörbildli.
De Autos
fohrt je bald ook al ganz vun alleent. Dor seggt man blots noch: „Fohr mi mol
dor un dorhen.“ Un zack, geiht dat los.
Över
sülmsfohrn’de Autos heff ick annerletzt ook mit mien Fründ Piet snackt. Piet is
fröher Buuer ween. He hett mi ut sien Erfohrung bericht‘ un dormit hett he mien
Weltbild düchti oprüttelt:
„Dat mit
dat autonome Fohrn“, seggt he, „dat is doch kol’n Kaffe. Dat hett dat för
hunnert Johr al geeven.“
Erstmol wull
ick dat natüürli ni glööven, denn dormit dat vun alleent fohrn kann, bruukt
so’n Fohrtüüch doch Sensor’n un Kameras un all so’n figelienschen, niemodschen
Krom.
Dat mach
ween, hett he seggt, overs liekers gung dat fröher al. Mit Peer un Wogen!
Wenn man
mit sien Kutsch‘ fröher no’n Krog henforht is un dor no’n Stammdisch duun
weller rutkeem, denn hett man sick eenfach op sien Woog‘ sett, „hü“ to de Peer
seggt, un de hebbt een denn ganz vun alleent, ganz autonom, no Huus trocken.
Kameras hebbt se twee Stück in Kopp, Senor’n an de Fööt un an Strom anslüüten
mutt man ehr överhaupt ni. Schull man ook ni. Mit ’n beten Hober un ’n Ammel
Woter sünd de tofreeden. Hmm. Wo Piet Recht hett, hett he Recht.
Denn
kann ick ook verstohn, worüm de Wiehnachsmann jümmers noch op sien Rentiern
sett. De künnt je sogor fleegen. Besopen ut’n Krog kümmt de Wiehnachsmann
wohrschienli eher selten, overs wenn he no de Arbeid trech is mit Jack un Büx
un no’n Nordpol trüch will, denn seggt he seeker ook eenfach „hü“ to sien
Tiern. Na denn wüllt wi dat ook so loten. So hoop ick, dat de Wiehnachsmann un
sien Tiern ook no Jüm henfinnd‘ un wünsch Jüm al mol ’n frohed Fest...

In
düssen Sinn
3 min
December 13, 2019 Düchti verzeddelt
Ju hebbt
dat je wohrschienli mitkreegen, dat bi uns in’t näste Johr Bon-Plicht is.
In
Supermart ward man nu je al frogt, wat man ’n Kassenzeddel hebben will. Dat
ward man no Niejohr ni mehr frogt, dor kriegt man sien Zeddel, annerlei, wat
man em hebben will oder ni.
So’n
Zeddels kriegt man denn overs ook bi’n Friseuer, bi’n Eeiermann an de Stroot, an
jeden Stand op’n Weekenmart, in de Iesdeel, in Imbiss, bi’n Slachter, in‘
Dörpskrog, bi’n Bäcker un so wieder.
Dat kann
man sick denn so vörstelln: „Moin, ick harr gern ’n Stuten.“ Denn seggt de
Bäcker: „Gern, dat mokt sounsoveel Euro.“ Denn ward betohlt un de Bäcker seggt:
„Hier is dien Kassenzeddel.“
Mitmol
fallt den Kunnen in, dat Nomeddags je noch Tant‘ Erna to Besöök kümmt: „Och,
geev mi man noch ’n poor Stück Kooken mit!“ Weller ward inpackt, betohlt, un de
Bäcker seggt: „Hier is dien Kassenzeddel.“
Nu kümmt
noch ’n Kolleg bi’n Bäcker rin. „Moin, na wo geiht? Schüllt wi noch gau ’n
Tass‘ Kaffe hebben?“ „Jo lot uns man.“ „Good – mokst uns noch twee Tassen
Kaffe?“
„Klor.
Mokt dree Euro. Hier is de Kaffe un hier is de Kassenzeddel...“
Achterran
geiht man denn noch to’n Slachter un vun Buernhoff holt man sick noch frische
Melk un so hett man veellicht fief, süss Zeddels in der Tasch, allent för’t
Fröhstück!
Un all
de Zeddels mööt in Restmüll. Dat is keen gewöhnliched Poppier. Dat heet
Thermopoppier. Liekers dörft man dat ni in Oben steeken.
Gewöhnliched
Poppier oder Rießeikling-Poppier is wohrschienli to ümweltfründli oder so.
Stüüersünner
wüllt se mit den Tüünkrom jedenfalls fangen. Aha. Denn schulln se sick mol de
Kassenzeddels vun de Banken in de Schweiz un so utdrucken loten.
Dor
hebbt wiss veele Stüüersünners ehr Geld bunkert. Overs Bäckers un
Martbeschicker sünd dor vermootli ni bi. Na jo. Mol sehn – veellicht föhrt se
je ook de Plastikbüddels weller in, de se jüst afschafft hebbt, dormit wi all
de Kassenzeddels vun’t Inkööpen mit no Huus kriegt...

In
düssen Sinn
3 min
December 06, 2019 All wüllt jümmers wat anners
To’n
Nikolaus wüllt wi hüüt mol ’n lütted Gedankenexperiment moken: Stellt sick vör,
süss Lüüd, dree Fruuns- un dree Mannslüüd, all 30 Johr old, de sick ni kinnt,
schüllt ’n Auto verschinkt kriegen. Eenfach so, egol wat för een. Overs blots
een Auto vör all tosom.
Se mööt
sick nu blots tosom döröver eenig warrn, wat för ’n Auto se hebben wüllt.
So. Nu
geiht los. De erste will ’n Sportwogen, de tweete ’n Bus, de drütte ’n Kombi,
een will ’n lütten Stadtflitzer, een ’n Gelänneauto un een is annerlei, wat för ’n Auto dat
ward – Hauptsook, dat fohrt.
Irgendwann
sünd de süss lüüd sick overs veellicht doch eenig.
Nu geiht
dat üm de Farv; De een seggt direkt „blau“ un denn heuert man noch fief annere
Farven.
Un denn
kümmt wiedere Frogen. Benzin, Diesel oder elektrisch? Stohl oder Alufelgen un
so wieder.
Ick kunn
mi vörstelln, dat düsse poor Lüüd sick so lang över dat dammelige Auto an
strieden sünd, bet dat al gor keen Autos mehr gifft.
Sowiet dat
Gedankenexperiment.
Overs
jüst sowat, künnt wi uns in Oogenblick mol weller jeden Dag in de Norichen
bekieken. Bi de Partei’n in Reichsdag.
De nehmt
sick in Momang je mol weller all sülms ut’neen. Bi de SPD sünd se blots noch
doröver an tüün‘, keen de gröttste Mors in eegen‘ Stall is, un all de annern
mokt dat ook ni beter. Dösig ne.
AKK vun
de CDU seggt to de SPD: Wenn ju uns ni mehr leev hebben wüllt, denn is dat ut
mit de Rente för alle! Hä? Seggt mi mol, is de dorste süss Johr old, oder wat?
Ick weet
gor ni, worüm de överhaupt noch in Partei’n sünd, wenn se sick doch so un so ni
lieden künnt.
De
striedt sick noch so lang mit sick sülms, bet dat gor keen Volk mehr gifft. De
Gesichter much ick mol seh’n, wenn de ut‘ Finster kiekt un seggt: „Lüüd, dor is
gor keen mehr!“
Tscha.
So is de Misch even. Wi künnt ni alleent un tosom erstrecht ni.
Dat weet
de Nikolaus al lang. Dorüm steekt he uns wat in de Schoh, wenn wi noch slöppt
un haut gau weller af, eher wi opwokt un dat Genegeln över de Geschinke
anfangt...

In
düssen Sinn
4 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…