De Döschkassen

By Heiko KrollComedy Society & Culture News News Commentary

De Döschkassen episodes

April 18, 2020 Jedet Johr in Mai
Jedet
Johr in Mai...

Bald is
je Mai, ne. De Maifüüers künnt wi düssed Johr je so tehmli vergeeten. Overs dat
gifft noch wat, dat jümmers in Mai kümmt. In de Norichten ward doröver
bericht‘: Zecken. So bummeli twee Weeken lang Zecken hier, Zecken dor. Jümmers
in Mai. Jedet Johr.
Nu sünd
wi je overs in ’n recht spezielle Tied. Dat is ’n Tied in de all ’n beten mehr
an’nanner dinkt un mehr op’nanner oppasst as sünst, so schull dat tominst ween.
Overs dat kann man je veellicht ook op Tiern betrecken. Dorüm heff ick mol
versöcht, mi in so’n Zecke rintodinken. Dat gifft Zecken, de kümmt fief Johr
ohn‘ wat to eeten ut. Fief Johr! Ick warr no fief Stünnen al zappeli. Af un to
sogor al no fief Minuten.
Overs
irgendwann mutt also ook so’n Zecke wat eeten. An leevsten mach se dat, wat wi
as Swatsuuer kinnt. Un ehr is annerlei, wonehm se ehr Eeten herkriegt. Vun ’n
Koh, vun ’n Hund, vun ’n Katt oder ook vun ’n Minsch. Dor mokt se keen
Ünnerscheed. „Dat Oog itt mit“, dat gült för ehr ni. Se bruukt keen Dischdeek
un ’n Kändelleit-Dinner un sowat. Blots satt will se warrn.
Nu hebbt
Zecken overs ’n recht dösige Oart to
eeten. Se steekt nömli glieks den ganzen Kopp in dat rin, wat se eeten wüllt.
Un dor is ook de Hooken an de Sook.
De, in de Zecken ehrn
Kopp rinsteekt, möögt jüst dat in de Regel nömli överhaupt ni hebben –
besünners Minschen verstoht dor keen Spoß. Overs nu stellt sick mol vör, dat
Jüm sülms Zecken weern. Ju weern jüst bi’t Eeten
un mitmol kümmt dor so’n Minsch, gniedelt an Ju’n Hals rüm un ritt Jüm, wenn
dat ganz slimm kümmt, den Mors direkt achter’n Kopp af. Tscha. Denn – wurr ick
seggen – weer de Dag versaut.
Dorüm:
Wenn ick in Mai mol weller ’n Zecke an mi oder an een vun uns Katten wies warr,
denn riet ick ehr ni eenfach rut. Ick warr erstmol ’n beten över dat lütte Tier
nodinken. Overs denn warr ick de Zecke wohrschienli doch den Dag versau’n. Ick
deel mien Eeeten twor gern, overs ni, wenn dat al in mi bin is. Wat to veel is, is
to veel. Dat mutt man ook as Zecke verstohn...

In
düssen Sinn

4 min
April 11, 2020 Wat schall man warrn?
Kinnt
Jüm dat noch: Wenn man lütt is, denn frogt de Grooten je gern: „Na, wat wullt
du denn loter mol warrn?“
Jo, ick
geev dat to: Ook ick heff Kinner düsse Froog bilütten al mol stellt. Un de
hebbt mi denn jüst so dösig ankeeken, as ick keeken heff, as ick noch ’n lütten
Stackel weer.
Irgendwann
heff ick denn overs anfungen, mi ’n Antwoord op düsse leidige Froog to
överleggen.
Veele
vun mien Kumpels wulln Astronaut warrn oder Lokomotivföhrer.
Astronaut,
jo, dat hett sick spannend anheuert. Mit’n Raket‘ no Mond henfleegen oder so,
dat weer al wat.
Overs
wat schall man as Astronaut moken, wenn man jüst ni op’n Mond is? Un överhaupt:
Wat gifft dat op den Mond denn grootoarti to holn? Blots Sand un Steen. As op’n
riesiege Buusteed, blots dat dor nix buut ward. Nä. Astronaut is doch ni so dat
Geele vun’t Ei. Un Lokomotivföhrer, dat heff ick mi jümmers al bannig langwieli
vörstellt. Dor kann man ni mol no Stüüerbord oder Backbord afbeugen, wenn dor
wat Interessanted to sehn is. Blots Gas geeven un Bremsen un sick vun de
Fohrgäst anheuern, dat man al weller to loot an Bohnhoff is. Nä. Dat weer ook
nix.
Dor funn
ick dat, wat mien Vadder dohn hett doch al veel scheuner. De is blangbi nömli
oftmols Reisebus fohrt. Un ick heff mitfohrn dörfst. Dor keem man jümmers
ümsünst dorhen, wonehm anner lüüd för veel Geld in Urlaub fohrt sünd. Ick heff
vöör op den Sitz för’t Begleitpersonol sitten dörfst un kunn mi ut dat
Köhlschapp, dat dor ook weer af un to ’n Bruus nehm. Jo. Dat weer ni slecht.
Also heff
ick seggt, wenn de Grooten mol weller frogen dehn: „Ick warr Reisebusfohrer, un
wenn du in Urlaub wullt, muttst du mi dorför betohln.“
Jo, so
weer dat. Overs eegentli finn ick dat würkli schodt, dat ick jüst nu kenn Kind
ween kann. Wurr mi nömli hüüt as lütten lütten Jung een frogen, wat ick mol
warrn wull, denn keem dat as ut de Pistol schooten: „Ick warr Fabrikant för
Schiethuuspoppier, is doch klor!“ Un jedet mol, wenn de Dorsten op Tante Meier
leepen, wurrn se an mi dinken...

In
düssen Sinn

3 min
April 04, 2020 Risikogruppen an jede Eck
Risikogruppen
an jede Eck

Veele
Lüüd sünd düsse Doog je alleent, ne. Se sünd alleent, weil se to ’n
Risikogrupp‘ heuert. Dat mutt man sick mol vörstelln: Dor heuert man to Gruppe
un liekers is keeneen to’n Snacken dor - ’n feine Grupp‘ is mi dat.
Overs ni
blots wat den dorsten Virus anheiht – ick segg den Noom nu mol ni, den heuert
man je oft genog – hebbt wi Risikogruppen bi uns in’t Land. To de gröttse
Risikogrupp, de al siet Johrn dör de Gegend geistert, heuert de, de jümmers op
den Apparot kieken doht, den se in de Hand hebbt, op ehr Smartfoon.
Wenn se
dor eenfach blots so mit op’n Börgerstieg löppt, denn geiht dat je noch.
Dat
gifft overs ook wülk, de fohrt op‘t Rad meern op de Stroot un kiekt op ehr’n
Ackersnacker. Mennige stoht dorbi sogor op so’n elektrisched Rullbrett. Dat is
twor ’n zirkusriepe Leistung overs verstohn kann ick dat ni. Wenn man so’n Akrobat
nömli mit‘ Auto breedmangelt, denn kann man seeker ween, dat man ook de Schuld
dorför kriegt.
De mööt
gor ni krank ween, üm sick den Mors to breeken oder sick dat Licht ut to
knipsen. Op de anner Sied: So ganz gesund kümmt mi de Dorsten ook ni vör.
Na jo.
Annerlei. Dat is jedenfalls ook ’n Risikogrupp. Un wenn man in de Oarntied op’t
Dörp wohnt, so as ick, denn heuert man automatisch to’n anner Risikogrupp. Wenn
dor nömli de gewaltigen Treckers üm de Eck prescht kümmt, op de de oftmols
jungen Fohrers ook gern op ehrn Ackersnacker kiekt, denn kann een gau mol dat
Hart stohnblieven.
So kann
man ook in verscheedne Risikogruppen togliek ween.
Wenn man
to’n Bispill över 80 is, in de Oarn gern op sien Händie kiekt, dorbi op’n
elektrisched Rullbrett op de Stroot fohrt, Asthma hett overs liekers noch gern
smökt, Beer drinkt, sick to fett ernährt un sick bi osten Wind keen Mütz
opsett, denn kriegt man wohrschienli de goldene Klubkoart bi’n Bestatter.
Un so
heuert man – ook wenn man sick alleent föhlt – jümmers irgendwo to, sülms wenn
dat blots ’n Risikogrupp is. Overs de Hauptsook is, man blifft gesund...

In
düssen Sinn

3 min
March 28, 2020 Mol sehn wat Sinn mokt
Tscha,
in Oogenblick hebbt wi – also de Mehrsten vun uns – je ’n Barg Tied, ne. To
Anfang is dat je gor ni so slecht. Man kann mit de Kinner speeln, wenn man wülk
in’t Huus hett, den Goorn kann schier moken, wenn een dor is un de Bood‘ kann
man ganz kommodig oprüüm un saubermoken. Mit de Tied hett man dat overs allns
dör un in’t Fernsehn kümmt blots slimme Norichen, dor mach man ook nix mehr vun
heuern.
Wat kann
man also moken, wenn een eenfach nix mehr infallt un een langwieli ward?
Dor heff
ick mi mol Gedanken över mokt. Ick heff ook sülms utprobeert, wat mi so infulln
is. To’n Bispeel dat hier: Mi hett jümmers al mol interesseert, wo veel
Boorsten an so’n Tähnböss an sünd. Dor stoht je jümmers so lütte Bünnels vun de
dorsten Plastik-Hoor tosom. Bi mien Tähnböss sünd dat 21 Bünnel un een Bünnel
hett 19 Boorsten. Dat mokt 399 Stück. 209 dorvun sünd witt, de annern blau. Aha.
So, de
ersten fief Minuten sünd rüm. Nu stoht dor je noch mehr Tähnbössen. De vun mien
Madam hett mehr Boorsten as mien, 420 nömli. De vun de Kinner, dat sünd
elektrische – also de Tähnbössen, ni de Kinner –, de hebbt veel weniger. Kiek: Twindig
Minuten sünd rüm. Wat nu? Schull ick mol kieken, wo so’n Fernsehapparot vun
binn‘ utsüht? Och nä, leever ni. Dat gifft blots Arger. Veellicht kunn ick je
mol ’n Rull Tolettenpoppier nehm, all de Zeddels, de doran sünd, afrieten, ehr
stärken un plätten un in’t Schapp leggen. Dat Tüch is je richti begehrt worrn
in de letzte Tied. Pass man op, Schiethuuspoppier löst den Euro noch as Währung
af.
Na jo,
all sowat kann man in Momang moken. Dat is twor ni besünners sinnhafti, overs
dorför dat allns Sinn mokt, wat he deiht, is de Minsch je noch nie bekannt
ween.
Veellicht
is dat je ganz good, dat mol allns ’n Tied lang still steiht. Stiegt man mol
ut‘ Hamsterrad ut – hamstern künnt wi je al – denn kann een Menniged klor warrn
un man kann wat verännern.
Dat is
also ni blots ’n Krise, dat is ook ’n Schangs. Mol kieken, wat wi all tosom ut
düsse Schangs mokt...
3 min
March 20, 2020 Tied för anner Sooken
Mehrmols
an Dag rummelt dat bi mi in de Büx. Dat is mien Smartfoon, dat vibreert, wenn
ick ’n Noricht krieg. Tomeist is dat denn so’n Wottsäpp-Noricht. Mol is dat ’n
lütten Text, to’n Bispeel: „Kannst du vun ünnerwegens Botter mitbring‘?“ Ick
schriev den trüch – „jo“ oder „nä“ – dat is ganz praktisch.
Af un to
krieg ick ook so lütte Videos oder Biller. To 99 Perzent sünd dat Sooken, de
lusti ween schüllt. Fief Perzent dorvun finn ick ook würkli lusti, overs dat
Mehrste lösch ick glieks weller. Wenn man dor mol över nodinkt: An Dag bruuk
ick veellicht dree Minuten, üm Tüünkrom vun mien Ackersnacker to löschen. Dat
mokt meist 1100 Minuten in’t Johr. Över 20 Johr tosomreekend sünd dat ganze 15
Doog, över twee Weeken, de ick blots dormit beschäfti bün, Bleudsinn vun mien
Telefoon to löschen. Wenn ick dat so seh, denn much ick an düsse Steed mol all,
de jüst vörhebbt, mi lustige Videos to schicken, seggen: Lot‘ dat bidde no!
So. Dat
hebbt wi. Nu is dor overs noch ’n anner Sook, bi de ick de Wand hochgohn kann:
Sprooknorichen op’t Händie. Wenn dat wat korted is as „morn gifft dat graue
Arfen“, denn heff ick dor je nix gegen. Overs wat biddescheun schüllt düsse
Sprooknorichen, bi de man sick fief Minuten anheuern mutt, wat de Afsenner
vertellt hett? Erstmol mutt man sick ’n ruhige Eck sööken dormit man dat heuern
kann un denn töövt man de ganze Tied dorop, dat dor wat Wichtiged kümmt.
Mennigmol
kümmt wat Wichtiged. Tomeist overs ni. Un denn gifft dat je ook de Dorsten, de
in so’n Sprooknoricht 20 Froogen stellt. Wat dinkt de sick? Dat man sick all de
Froogen opschrifft un afarbeiden deiht? Veellicht doh ick dat würkli bi’t näste
Mol. Un denn kümmt mien Antwoord as Sprooknoricht: „Jo, nä, jo, veerteihn,
eeg’ntli ni, de steiht bi mien Kumpel, Knackwuss, de hett Heuneroogen, weet ick
ni, nä, jo, veellicht, viddel no acht, bi ’n Putzbüddel, nä...“ So wurr dat
denn noch ’n ganze Tied wiedergohn. Un veellicht hölt de Lüüd denn op, mi so’n
Norichen to schicken un ick heff recht ’n poor Weeken mehr Tied för anner
Sooken...

In
düssen Sinn

4 min
March 13, 2020 Dösige Krise
Also ick
kann mi ni hölpen – dat mit de Panik wegen dat Corona-Virus kann ick eenfach ni
begriepen.
De ganze
Week heff ick allns leest, wat ick to düsse Angelegenheit mang de Fingers
kreegen heff.
Rutfunnen
heff ick overs blots, dat an un för sick keeneen so ganz genau weet, wat dat
mit dat dorste Virus op sick hett. Woröver sick de Experten eenig sünd, is, dat
Corona wiet wech vun de Gefohr is, de vun Ebola oder so utgeiht.
Wenn man
vun Corona krank ward, bewegt sick dat mehr in den Beriek vun ’n lichten
Snööben bet hen to’n Lung’entzünnung. Wegen de Grippe to’n Bispeel ward overs
lang ni so’n Theoter mokt. Wat also is dor los, frog ick mi? Wat is dat för’n
dösige Krise? Güstern hett ’n Experte in’t Radio vun ’n „Naturkatastrophe“
snackt, gegen de wi mit alle Middel kämpfen mööt. Genau desülbige Experte hett
vörige Week noch seggt, dat wi uns keen Gedanken moken un eenfach so wiedermoken
schüllt, as jümmers. Gediegen, ne.
Mi kümmt
allns, wat sick nu op de Welt wegen Corona deiht, vör, as harr sick de Minschheit
över Nacht in Lemminge verwannelt. Lemminge de in Panik wechlöppt, weil de
annern ook rennt, overs gor ni weet, worüm se eeg’ntli rennt.
Nu kümmt
vör mi blots twee Möglichkeiten in Froog: To’n een, dat dor würkli blots Panik
mokt ward, weil de annern ook in Panik sünd – to’n annern, dat achter dat Virus
wat ganz anners steekt, dat uns overs ni vertellt ward.
Ick
meen, Zucker un Alkohol un Nikotin bringt veel mehr Lüüd üm as Corona. Dat
steiht mol fast. Dor ward overs ni gegen kämpft, dor ward Reklame för mokt.
Tscha,
an Enn ward Corona wohrschienli jüst so to de Akten leggt as BSE un EHEC un so,
dor snackt ook keeneen mehr vun.
Dat Eenzig
Goode, dat ick an de ganze Sook finnen kann, is, dat nu anschien’d to’n ersten
Mol för all de Regeerung‘ op de Welt de Gesundheit vun de Minschen wichtiger
is, as dat de Wirtschop brummt. Dat heff ick so noch ni beleevt.
Süht man
dat so, denn een Corona meist ’n beten Sümpatisch warrn...
In
düssen Sinn
3 min
March 06, 2020 Goodet Bispeel
Annerletzt
seet ick an Disch un för mi leeg ’n ganzen Schwung Krom. Ick tell mol op: Een
dörsichtigen Büddel, so 25 mol 35 Zentimeter groot, een Stück dörsichtiged,
stieved Plastik, dat utseh, as de Flünken vun ’n Wüps un noch ’n längered Stück
ut datsülbige Materiol, dat to’n Kring opdreiht weer. Denn ’n Stück Papp, jüst
so opdreiht, noch ’n Pappstück, 35 mol 20 Zentimeter groot, twee dörsichtige
Plastikklammern un veer blanke Klammern ut Metall. Nu noch twee Stück Poppier,
so ganz dünned Seidenpoppier, tosom ’n halven Quadrotmeter groot. Denn weern
dor noch twee dicke Pappstücken, as Visitenkoarten seh’n de ut, een mit’n dicke
Kordel, dat annere mit ’n dünned Plastikband doran. Dat weer’t. Un nu dörft Ju
mol roden, worüm de ganze Krom vör mi op’n Disch leeg. Na, hebbt Ju ’n Idee?
Nä? Na denn pass op:
Ick heff
jüst mien niedet Hemd utpackt. Dat Hemd treck ick an, overs all den annern
Krom, de op’n Disch leeg, heff ick wechsmeeten. Bi’t Wechsmieten heff ick mi
würkli schomt vun wegen Natuurschutz un so. Overs wat schall ick moken – nokelt
mach ick je ook ni to mien Termine loopen.
Nu heff
ick mi overs frogt, worüm dat Hemd so dull inwickelt weer. Büxen, Jacken un
Kleeder för Fruunslüüd hangt in‘ Loden eenfach so op’n Bügel. Worüm dat ni ook mit
Hemm’ geiht, dat verstoh ick ni. Dösig ne.
Un denn
mitmol heff ick an’t EU-Parlament dinken musst oder an‘ Bunnesdag. Dor löppt je
ook veele Mannslüüd mit Hemm‘ rüm un vun de Dorsten jett wohrschienli jedeneen
teihn oder mehr Hemm‘ in’t Schapp.
Nu stellt
sick mol den Barg Müll vör, de allent ehr Hemm‘ afsmeeten hebbt. Snacken doht
se overs doröver, dat „Plastikbüddels“ un „Kunststoffbekers“ verboden warrn
schüllt. Dor staunt de Fachmann un de Laie wunnert sick. Steekt de an Enn
veellicht mit de Verpackungsindustrie ünner de Deek, de mit allns, wat se
annerwegens ni mehr afsetten kann, nu Hemm‘ inwickelt? Na jo, veellicht is dat
je eenfach blots so, dat man ni süht, wat an Müll achter een op de Streck‘
blifft, wenn man as „goodet Bispeel“ vörangeiht...
In
düssen Sinn
3 min
February 28, 2020 Keeneen weet wat los is
Fröher
heff ick je dacht, Corona is ’n Zigarrnmarke oder ’n Beer ut Mexiko. Intwüschen
heff ick overs dortolehrt.
As dat mit
den Virus in China losgung un glieks vun Pandemie un sowat snackt wurr, dor
heff ick mi würkli so’n lütt beten Sorgen mokt.
Denn
keem overs all de Experten togang un de Mehrsten vun de hebbt seggt, wat dat
allns gor ni so wild is un dat veel mehr Lüüd an Grippe dootblifft.
Na jo.
Mi is dat je annerlei woan ick dootbliff, doot is man achteran so oder so.
Veellicht,
heff ick mi överleggt, hett dor je ook blots ’n Pharma-Konzern Lunte rooken un is
anfungen, mit Hochdruck ’n Middel gegen dat Virus tosomtokleihn. Un dormit se de
Medizin denn ook düüer ünnert Volk bringen kunnen, hebbt se ehr eegen‘ Experten
vör de Kameras stellt, üm de Lüüd bang to moken.
Nu kruupt
dat dorste Corona-Schiet je overs ook al bi uns rüm. In Italien geiht keeneen
mehr vör de Döör, as man heuert, in NRW fangt se ook al an de Kinnergoorns un
Schooln dichttomoken un so wieder.
Un ick?
Jo, ick weet ook ni mehr, wat ick noch glööven schall. Mann schall anner Lüüd
ni mehr de Hand geeven, sick sülms ni mehr in de Snut foten un küssen schall
man ook ni. Och, mi will so un so keeneen mehr küssen. Dor bün ick al mol op de
seekere Sied. Un doch mok ick mi Gedanken. In de Norichen seggt se mol dat un
mol düt, so no dat Motto: „Bliev ganz ruhi sitten un loop gau wech! Is gor nix
los, overs slimm is dat...“
Wat
schall man dorvun holn. Normolerwies, wenn lüüd sick so wellerspreeken doht, is
dat ’n ganz seekered Teeken dorför, dat se Politikers sünd – oder keen Ohnung
hebbt, wat würkli los is – oder beides op mol.“
Schall
ick nu jedeneen frogen, wat he jüst ut China, Italien oder NRW kümmt? Ach wat,
ick mok eenfach so wieder as jümmers un pass ’n beten op. Man kann je ook jeden
Dag vör’n Bus loopen, wenn man ni vörsichti is. Ach nä, düsse Week je ni, de
Busfohrers weern je in Streik. Overs näste Week is dat ook weller vörbi.
Tscha. Ick segg
denn eenfach mol, goode Gesundheit, ne...
In
düssen Sinn
3 min
February 21, 2020 Tant‘ Meiers Geheemnis
Dat
gifft je Sooken, de Mannslüüd doht un de Fruunslüüd ni verstohn künnt, jüst so,
as dat Sooken bi Fruun gifft, de man as Mann ni begriepen kann. Dat is genau de
Beriek, de Gletschersplate, an de de Gliekmokerie mang de Geschlechter dat
„Gender Mainstreaming“, as dat op Düütsch heet, sien Grenzen hett.
Un een
vun düsse Grenzen deiht sick op Tant‘ Meier op. Ni to Huus. Dor gebruukt man de
Boodstuuv je tomeist Geschlechterövergriepend. In Dörpskrog oder in Restaurant
to’n Bispeel, also in öffentlichen Ruum, is dat ganz anners.
Dor sünd
de Tant‘ Meiers för Fruuns- un Mannslüüd trennt. Un achter de Döörn vun de
Tant‘ Meiers för Fruunslüüd, fangt för mi as Kirl dat groote Geheemnis an.
Wenn
Mannslüüd nömli in Krog oder so op Tant‘ Meier goht, denn goht se dor ganz
alleent hen, mokt ehr Geschäft un kümmt weller trüch. Ferti. Bi Fruunslüüd is
dat anners.
De goht jümmers to tweet oder to drütt op ehr Tant‘ Meier. Ganz opgereegt sünd se, wenn se
dor hengoht. Un wenn se denn no’n Tied mang dree un 20 Minuten wellerkümmt,
denn sünd se an Gluttern as de Heuner op de Stang‘ un freut sick, as wenn se
jüst vun’n Weltreis trüchkeem‘.
Dat heff
ick al vör meist 40 Johr in de School beobacht‘.
Wat ist
dor los, op de Fruuns-Toletten? Is dor ’n Kino mit inbuut oder ’n Theoter?
Steiht dor jümmers ’n Komiker parot, de ehr so dull to’n Lachen bringt?
Un wenn
man as Mann ’n Fruu frogt, wat se mit de annern Deerns dor op Schiethuus
veranstalt‘, denn is de Antwoord: „Och, nix...“
Ick
glööv dat ni, denn to Huus „striedt“ se sick mit ehr Mannslüüd över „nix“. Is
dat veellicht ’n anner’d Nix? Nix is doch jümmers nix. Un nix is ni besünners
veel, wat ick weet.
Overs
tööv, ick krieg dat rut. Bald besorg ick mi ’n Överlevensutrüstung as Rambo un
’n Helm mit ’n Lamp boben an. Veellicht ook ’n Gasmaske – man kann je ni
weeten. Dormit goh ick denn bi de Fruunslüüd op Tant‘ Meier. Un wenn ick
rutfunnen heff, wat dor löppt, denn lot ick Jüm dat an düsse Steed weeten...

In
düssen Sinn
3 min
February 14, 2020 De Gooden un de Annern
So, nu
is dat amtli. Ut Annegret Kramp-Karrenbuuer ward keen AKKanzler mehr. Dat weer
je ook keen eenfachen Posten, den se as CDU-Chefin övernohm hett.
Un dat
Frie’ch Merz, Armin Laschet oder Jens Spahn dat beter mokt, is lang noch ni rut.
Op’t
letzt‘ weer dat je de Landdagswohl in Thüringen un wat dor so anhung, de AKK
dorto bröcht hett ehr’n Hoot to nehm.
Dorbi
gifft dat dor je an un för sick keen Partei, de sick un de Demokratie dor ni
blameert hett. De CDU hett dor twor de mehrsten Stimm‘ overs glieks dorachter
kümmt de Linken un de Rechten. Un mit de will man sick as CDU ni afgeeven,
annerlei wat dat Volk wählt hett.
Demokratie
heet bi uns anschien’d, dat dat veer oder beter geseggt fief Partei’n gifft, de
in Bund regeern dörft. De Greunen, de FDP un natüürli de SPD, de CDU un de CSU.
Dat blangbi de CDU un de CSU bi Bunnesdags-Wohln as een‘ Partei optreden doht,
üm möglichst veele Stimmen aftogriepen, ansünsten overs jümmers ehr eegen Supp
an kooken sünd, dat heff ick vör 30 Johr jüst so weni verstohn as hüüt. Liekers
nööm ick düsse veer, fief Partei’n mol de „Gooden“.
De
annern Partei’n kann man twor wähln, overs se dörft ni mitregeern, weil de
Gooden dat ni toloten doht.
Bi de
Rechten kann man dat verstohn, dor hebbt wi keen goode Erfohrung‘ mit mokt. Un
de Linken hebbt je den Sozialismus in ehr Parteiprogramm stohn. Un vun
Sozialismus wüllt de Gooden nix weeten. Ick wunner mi blots, dat de Gooden
överhaupt keen Kummer mit den chinesischen Kommunismus hebbt. Mit de
kommunistischen Chinesen lött sick je so fein Geschäfte moken.
Liekers:
Wat dat Volk wählt hett, dat mutt man as CDU-Chef eenfach mol locker
wechignoreern. Dat – un veele annere Sooken, de een dösig vörkom‘ künnt, mutt
man dor utholn un eenfach wiederhen seggen, dat man politisch inne Meern steiht.
Dat is ni no jeden sien Gesmack.
Overs
lot man, AKK, in so’n verdreihted Versteekspeel, much ick ook keen Kanzler
ween...
In
düssen Sinn
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…