De Döschkassen

By Heiko KrollComedy Society & Culture News News Commentary

De Döschkassen episodes

December 04, 2019 Bombenklima op de Welt
Wat hett Angela Merkel vörgüstern noch bi de
Generaldebatte in Reichsdag seggt? Ach jo, wi as groote Instrienatschoon schulln
de annern wiesen, wat man gegen den Klimawannel dohn kann, ook wenn wi blots
een Perzent vun de Weltbevölkerung sünd un gor ni so dull sünnigt, as annere
Länner.
Dor kann man je nix gegen seggen. De ut de Oppositschoon,
de vörher unkt hebbt, wat dat Klimapaket vun de Regeerung veels to lasch weer,
seggt nu, dat düssed lasche Paket veels to streng för de Wirtschop is un ehr
utbremst. Aha... Mutt man ni verstohn, is overs so – oder so ähnli.
Annerlei. Merkel hett je al ’n ganz annern Plon, vun den
man overs blots wat mitkreegen hett, wenn man bi de annern Norichen düsse Week
genau toheuert hett.
W
enn dat nömli so is, dat veele annere Länner veel mehr
för den Klimawannel künnt as wi, denn mutt man kieken, dat de Dorsten dormit
opholn doht dat Klima to versau’n. Intwüschen ward je ook al vun
„Klimanotstand“ snackt.
Nu wüllt de annern overs gor ni mit ehr Klimasünnen
opholn, denn se sünnigt je ook dorför, dat wi genog Rohstoffe för de
Windkraftanlogen un Elektroautos bi uns hebbt. Un nu? Ganz eenfach: Man mutt
den Rest vun de Welt mit so veel Waffen versorgen, dat se sick gegensiedig in
de Steentied trüchballert. Dor mutt man blots een un een tosomtelln könen. Un reeken,
dat kann Angie.
Dütschland hett 2019 nömli al meist dubbelt so veel Waffen
exporteert as in’t gesamte vörige Johr un ook meist so veel as in’t Rekordjohr
2015. Dat weer dree Johr, no dat de EU den Freedensnobelpries kreegen hett. De
EU is je ook ganz freedlich. Se hölpt blots den Rest vun de Welt dorbi weniger
freedlich to ween. Un nu, wo Flinten-Uschi vun de Leyen EU-Chefin ward, also „EUrsula“,
kümmt wohrschienli noch mehr Schwung in de Sook. Schier!
Wi mööt nu blots aftööven, bet de annern sick wechbombt
hebbt un denn künnt wi bi all de Klimasünners Opbuarbeit leisten, wat uns‘
Wirtschop weller in schwung bringt. Dor mutt man erstmol op komen!
Jo. Se is so’n richtiged Slitzohr de Bunneskanzler Fruu
Merkel...
In düssen Sinn
3 min
November 22, 2019 Grien doch mol
Wenn man
grient, also lächelt, mutt man 17 Muskeln in’t Gesicht anspann‘. Kiekt man
gnegeli, mutt man dorför 42 Gesichsmuskeln anspann‘ – twee’nhalv mol so veel!
Nu
stellt sick de Froog, worüm dat Lüüd gifft, de mehr gnegeli as fründli kieken
doht. Dat is je ni blots unscheun för all de Lüüd, de jüst üm so‘ gnegeligen
Minsch rümstoht – ook för den Gnegel sülms is dat anstreng’d un kost veel
Energie. Un to Gnegeln, dat hett je ook noch keeneen op de Welt tofreeden mokt.
Man kann gnegeln, so dull as man will – glückli ward man dorvun ni. Dorüm frog
ick mi al lang, worüm mennige Minschen anschien’d leever gnegeli as tofreeden
sünd. Overs ick krieg dat eefach ni rut.
Wenn man
so’n Gnegel nömli frogt: „Segg mol, worüm büst du eegentli so gnegeli?“, denn
kriegt man as Antwoord: „Kleih mi an Mors“ oder „lot mi tofreden“ oder wat
anners in de Oart.
De wüllt
een gor ni vertelln, worüm se gnegeli sünd. Worüm mokt se dor blots so’n
Geheemnis üm? Weet se wat, wat blots Gnegels weeten dörft?
Wohrschienli
ward man dat ni erst rutfinnen. Wenn man overs blots ’n beten reeken kann, denn
weet man dat man – rein vun Energie-Opwand – för ’n halve Stünn gnegeln ook een
un ’n viddel Stünn‘ grien‘ kunn.
Overs
dat is so’n richtigen Gnegel annerlei. De reegt sick över allns un jeden op.
Wohrschienli reegt se sick sogor doröver op, wat dat mehr Energie kost gnegeli,
statt fründli to ween.
Un de
eenzige Oart, sick mit ’n Gnegel antofünnen, is, sick mit em tosom över allns
opttoreegen. Overs dat will ick gor ni – dorför mokt mi dat Leven veels to veel
Spooß.
Un mi
dücht, dat is veel beter, sick över de scheun‘ Sooken to freun, as sick över
allns annere to argern.
Dat
gifft je ook so veel Falten un för’t Hart is dat ook ni good un so wieder.
Dorüm
grien ick veel leever, freu mi, dat ick dor bün un freu mi doröver, dat dat so
veel gifft, an dat man sick freu’n kann.
Un so,
leeve Gnegels, nehmt mi dat bidde ni övel, wenn wi uns seht un ick grien. Ick
mach dat so gern un ick meen dat würkli blots nett...
In
düssen Sinn
3 min
November 15, 2019 Wat is mien – wat is dien?
Hebbt jüm al mol wat vun „Containern“ heuert?. Bi düssed dösige Woord geiht dat
dorüm, dat Lüüd sick dat ut de Mülltünn‘ achter ’n Supermart holt, wat noch to
bruuken is. Nu schull dat vör ’n poor Weeken je’n Gesetz geeven, dat dat
Containern legal mokt harr – dat is overs ni dörkom‘. In de Aflehnung vun dat
Gesetz gung dat üm Hügjene un Minschwürde un all sowat.
Hmm. Wennt no mi gung, schull dat ni verboden warrn, dat
Lüüd in Mülltünn‘ rinkiekt, dat schull verboden warrn, gooden Krom in Müll to
smieten. Bi’n Sperrmüll is dat je ook in Ordnung, wenn sick dor annere
rutsöcht, wat se noch bruuken künnt.
Nu is in de Aflehnung vun dat Gesetz je overs ook vun
Eegentum de Reed‘. Dat is würkli eegenoartiged Eegentum. Is mien Müll würkli
mien Eegentum – ook wenn ick em gor ni mehr hebben will? Bi uns to Huus is de Müll
op’t Letzt’ je sogor dorför dor, dat he afholt ward. Eenmol de Week kümmt dor
so’n witten Lkw un de Lüüd dorbin holt den Müll af. Jüst so, as in Supermart.
Dor ward denn overs ni över schimpt. Nu stellt sick mi overs de Froog: Wann
genau ward ut mien Eegentum, also ut mien Müll, denn dat Eegentum vun de Lüüd
in den witten Lkw? Un is dat denn würkli de ehr Eegentum oder heuert mien Müll
sofort no dat Afholn dat Entsorgungsünnernehm‘ to? Steiht in den Verdrag mit
den Entsorger överhaupt wat vun Eegentum bin? Ick glööv, dor geiht dat blots üm
dat Affoln as Deenstleistung.
So kunn ick nästen Mondag den witten Lastwoog‘ je trüchwinken,
wenn he al dree Hüüs wieder is un seggen: „ Geevt mi den Müll weller her – ick
heff mi dat anners överleggt un will em nu doch beholn.“ Un denn mussen de Lüüd
in dat orangschene Tüüch mi den Müll je eegentli wellergeeven – un würkli blots
mien Müll, ick will je ni an dat Eegentum vun de Novers ran. Dat is natüürli
allns Bleudsinn. Un an Enn geiht dat dorüm, dat de Wirtschop leever wat
wechsmieten as verschinken deiht.
Liekers, bi uns to Huus dörft jedeneen in de Mülltünn‘
kieken un dor allns rutnehm‘ wat noch to bruuken is...
In düssen Sinn
3 min
November 08, 2019 Muulwörp sünd ni politisch!
Muulwörp sünd ni politisch!
De Muulworp (Maulwurf) is vun de Düütsche Wildtier-Stiftung to’n Tier vu’t Johr 2020 ernennt worrn.
Oogenblick mol – 2020 is je noch gor ni! Hebbt se bi düsse Stiftung keen Kalenner an de Wand?
Dat is je meist so, as wenn man de DDR 1989 to dat beste Land 1990 ernennt harr. Dat Johr hett de DDR je gor ni dörholn.
Dormit, irgendwat to dat Beste vun’t näste Johr to verklorn, schull man also bannig vörsichti ween.
Wenn wi nu overs al mol bi’t Thema sünd: Morn is dat je genau 30 Johr her, dat de Muuer fulln is. Düsse Muuer, de Walter Ulbricht al 1961 opstelln loten hett, liekers je „keeneen de Afsicht“ harr ehr to buun. Mit de Muuern un all den Wierdroht rund üm’t Land weer de DDR seeker vör’t imperialistische Utland. Vör allns is se seeker ween. Vör exotisched Oovt un Autos ut’n Westen, vör Musik ut alle Welt un noch veel mehr.
Jo, man weer dor würkli för allns seeker – blots ni vör Muulwörp! Dor geev dat dormols je ganz ünnerscheedliche Oarten vun.
Dor geev dat to’n een de Muulwörp mit twee Been, de Geheemnisse verroden hebbt mang Ost un West – Spione un Agenten hett man ehr nöömt. Un denn geev dat de lütten Muulwörp mit Fell un veer Been. Beide Oarten weern overs in Ünnergrund togang un af un to hebbt se sick ook mol ünner de Berliner Muuer dörkleiht.
Dat de Ieser’n Vörhang full’n is, liggt dorüm no mien Ansehn blots an de Muulwörp – wohrschienli mehr an de mit twee Been, overs ook dat weet man hüüt ni mehr so genau. Un denn, zack, weer de Grenz open. Veellicht ward dat nu nochmol teihn Johr duuern, bet ut de twee Düütschlands een worrn is. Dat hett je ook 40 Johr duuert ehr ut’neen to klabüstern. Sowat bruukt Tied – in de een‘ Richtung jüst so as in de annere. Annerlei. Ick finn‘ liekers, dat de Muulworp ni dat Tier vun 2020, sünnern trückwürkend un dörgohn’d dat Tier vun 1961 bet 1989 ween schull. 1990 vun mi ut ook noch mit. De Muulwörp is de Politik nömli jümmers al annerlei ween. Un keeneen hett dat markt...
In düssen Sinn
0 min
October 25, 2019 De Welt geiht ni ünner!

Wat ’n Demo an Dingsdag. All de Treckers op’n Dutt. Sowat
kinnt se in de Stadt gor ni. Mennig een hett wohrschienli dacht, de
Marsminschen sünd lannd‘. Dat mokt Indruck. Dummerwies‘ mokt dat overs ni
besünners veel Indruck op de, de wat to entscheeden hebbt. För de is dat blots
’n Demo. „Jung, kiek mol ut‘ Finster. Al weller ’n Demo.“ – „Jo, lot se man. De kriegt bald
Hunger oder Heimweh un denn sünd se weller wech.“ Hmm. Wo weer dat noch mit de
dorste Demokratie?
Och jo: Man dörft af un to mol wähl’n gohn, man dörft so
tehmli allns seggen, wat man will, un ook denonstreern, wenn man vörher
bescheed seggt. Dat is allns wat, wat man in veele annere Länner ni dörft. Un
dor kann man ook dankbor över ween, dor sünd Lüüd för storven.
Wenn sick de in de böberen Etoschen overs de Ohrn vör dat verstoppt,
wat vör de Döör los is un Entscheedungen dreept, de keeneen ut‘ Volk verstohn
kann, denn sünd dor je veellicht Lüüd mit dat verkehrte Verstännis vun ehr
Arbeid op’n verkehtern Arbeidsplatz.
Overs dorför gifft dat je dat Arbeidsamt.
Dat weer doch ook mol ’n Opgoov för so’n
Arbeidsvermittler, wenn dor een in Antoch rinkümmt un seggt: „Gooden Dag, ick
bün Minister in de aktuelle Regeerung, overs ick kann dat an un för sick gor
ni. Hebbt se ni wat anners för mi, wo ick mien Geld mit verdeen‘ kann?“
„Jo, wat künnt se denn sünst noch?“
„Hmm, an un för sick nix wieder.“
„Tscha, se sünd je ook al so fürchterli old. Ick glööv, denn
schickt wi se erstmol no‘t Bewerbungstraining. Mokt se sick man keen Gedanken,
dat geiht veele anner‘ Lüüd jüst so...“
Dormit weern de Dorsten ook ut de Arbeidslosen-Statistik,
un denn keem‘ dor vellicht je ’n poor Lüüd in’t Kabinett de mang dat Volk, de
Banken de Multis, de EU, de UN un överhaupt all vermiddeln kunn‘ – so richtige
Volksvertreders even. De geev dat fröher ook. Fröher harrn wi overs ook noch ’n
Kaiser, un dor hebbt de Lüüd jüst so op schimpt.
Wat is dat figeliensch. No jo, tominst geiht de Welt ni
ünner. De dörft nömli ni ünnergohn, weil dat ni in de Satzung steiht...
In düssen Sinn

4 min
October 18, 2019 Dubbelmorol an jede Eck
Dubbelmorol an jede Eck

De Dubbelmorol, de in Oogenblick dör’t Parlament geistert, mokt Kabarettisten un Satiriker je bald arbeidslos. De Satire mokt de Politik intwüschen je al ganz alleent un veel beter, as man sick dat utdinken kunn. Un wenn man all de Husarenstücke opschrieven wurr, kunn man dormit den ganzen Reichsdag tapezier’n.
To’n Bispill ward je jeden Dag seggt, dat man ennli wat gegen Utlänner- oder Fremmenfiedlichkeit dohn mutt. Aha. Un worüm ward denn nix gegen Erdogan mokt, de in Oogenblick je weller – ook mit düütsche Waffen – an de Endlösung, wat de Kurden angeiht, arbeidt?
Ganz eenfach: Weil he de Utlänners bi sick logert, de man bi uns ni hebben will. Dor ward twor seggt, dat de düütschen Waffenproduzenten leever nix mehr an de Türkei verkööpen schulln, besloten oder verboden ward dat overs ni. Dat is nix anners as ganz opene Fremmenfiedlichkeit op Distanz. De Fremmen ward al fiendlich behannelt, eher se överhaupt hier sünd. So hölt man dat hier mit de Utlänners. Un dor is je ook noch düsse annere Utlännerin – Greta Thunberg – de so veel dör’neen bringt. Dorbi ward bi uns je intwüschen wat gegen den Klimawannel mokt. To’n Bispeel mit de Floogstüüer. Wenn man mit’n Fleeger loswill, denn mutt man bald mehr dorför betohln. De Effekt dorvun schull je eegentli ween, dat weniger Lüüd in de Fleegers stiegt – oder ni? Nä, schall dat ni, denn in densülbigen Rutsch verklort de Politikers, dat se dör düsse Stüüer mit Mehrinnohm‘ vun 740 Million‘ Euro reekend!
Dat geiht also ni üm de Umwelt, sünnern weller blots üm Geld. Noch mehr Geld för de Rieken un över de Armen snackt wi je al gor ni mehr, weil wi de erst gor ni no uns in’t Land rinlött. Man mutt sick je wunnern. De Politik mokt sick meddewieln ni mol mehr de Möh‘ uns antoleegen, de seggt al bi’t beslüten vun de Gesetze, dat se nix gegen de Unminschlichkeit in de Welt un gegen den Klimawannel dohn wüllt. Mi dücht mit den Kampf gegen Rechts un den Klimawannel schull man ni op de Stroot sünnern veellicht erstmol in’t Parlament anfangen...

In düssen Sinn
3 min
October 11, 2019 Speeleobend
„Lot uns
doch mol so’n scheun‘ Speeleobend moken.“ Dat heuert sick je an un för sick
ganz harmlos an.
Een
stellt sien Stuuv to Verfögung un mokt Platz, dormit all sitten künnt, wat to
Knabbern un to drinken ward ransleept – natüürli vun allns veels to veel. Un
denn geiht dat los.
So. Nu
kunn man je wat speeln, wat jedeneen kinnt: Minsch arger di ni, Monopoly, Mau
Mau oder sowat. Dorto kümmt dat overs ni, denn nu besinnt sick de Gastgeevers
op dat Speel, dat se Wiehnachen vör fief Johr verschinkt kreegen hebbt.
Un de
Katong mit düssed Speel dor bin ward nu ganz ünnen ut‘ Schapp wöhlt un to’n
ersten mol opmokt.
„Hier,
dat is ’n ganz dulled Speel! Is ook ganz eenfach.“
Denn
ward dor allns ut den Katong wöhlt, wat dor bin steekt un all fangt sick dat
Wunnerwarken an, wat man mit den ganzen Krom anstelln schall.
Dat
Speelbrett ward henleggt, so’n Plastik-Dings to’n Dreihn kümmt in de Merrn,
denn kriegt jeden Mitspeeler een Speelsteen, süss vun de Koarten, dree vun de
Koarten un fief so bunte Dingers, de utsüht as lütte Knööp ohn‘ Löcker dorbin.
Intwüschen
is de Speelanleitung mit süssti Sieden al tweemol üm Disch langt worrn: „Lot mi
de noch mol sehn, so swor kann dat doch gor ni ween. Aha, dor mööt noch dree
Würfels bi ween – kiek, hier sünd se.“
Langsom
fangt de ersten al an, de Stuuv optorüüm‘,’n annern geiht no Tant‘ Meier üm den
Knabberkrom lostowarrn un all tosom kiekt ümmer weller heimlich no de Klock.
„Wat
mutt man nu denn moken?“ „Weet ick ni – wüllt wi veellicht doch Mau Mau
speeln?“
Overs denn
mööt de ersten ook al langsom weller no Huus. Een leest de Anleitung weller un
weller dör bet em de Oogen brennt: „Töövt doch noch ’n lütten Momang, glieks
heff ick dat begreepen. Hier: De Erste mutt een Koart an den Nover geeven un würfeln
– nä – annersrüm! Oder doch ni?“ Tscha, un no fief Stünn‘ ohn‘ dat man wat
tosom speelt hett, verafscheed‘ sick all fründli un dat dösige Speel kümmt
weller ganz ünnen in’t Schapp rin. Jo, so’n Speeleobend kann doch würkli wat
Scheuned ween...

In
düssen Sinn
3 min
October 04, 2019 Bakterien uttricksen
„Seggt
se mol ‚Aaaah‘, jo, un nu de Tung wieder rut. Oh ha, allns entzünnd. Tscha, wat
schall ick seggen, se hebbt sick düchti een opsackt.“ Sowat heuert düsse Doog
wohrschienli mennig een vun sien Dokter.
Liekers
hoopt man je doch, dat de Medizinmann dütmol wat patot hett, mit dat so’n
dammelige Verköhlung gauer wechgeiht.
Overs
nää – he seggt jedet Mol datsülbige: „Ick schriev se mol ’n beten wat op, dat
nehmt se morns un obends, denn blievt se scheun in’t Bett un veel drinken is wichti
– an leevsten Tee...“ Jo, un denn wurr een dat bald weller beter gohn.
Dat
Dumme bi so’n Krankheit is je, dat se nie to‘n richtigen Oogenblick kümmt. Na
jo, den würkli richtigen Momang to’n krank warrn gifft dat je so un so ni,
overs anschiend weet de Viren un Bakterien ganz genau, wann se een an düllsten
argern künnt.
Mi to’n
Bispill erwischt dat je gern mol, wenn ick jüst ’n poor Doog frie moken will.
Pünktli
twee Doog eher de erste friee Dag dor is, fangt dat in Hals to kribbeln an. Een
Dag vörher ward een denn al so’n beten schwummeri un denn, an sien ersten
frieen Dag sitt man mit ’n dicken Hals bi ’n Dokter un heuert sick an, wat man
even jedet Mol to heuern kriegt.
Nu heff
ick mi överleggt, dat man de Viren un Bakterien doch irgendwie uttricksen könen
mutt: Man dörft eenfach ni doran dinken, dat man frie moken will. Dat Beste is
wohrschienli, dat man dor ook mit keeneen över snackt. Veellicht noch jüst mit
sien Fruu, overs denn blots bi Licht ut ünner de Bettdeek.
So ähnli
mok ick dat nu ook: Liekers ick mi een opsackt heff, weil ick je mol friemoken
wull, doh ick eenfach so, as wenn ick gor ni frie moken wull. Nu sitt ick an
schrieevdisch, as wenn gor nix los weer. Ganz normol’n Arbeidsalldag. Un wat
schall ick seggen: Mi geiht dat nu al beter.
So, un
wenn de dorsten Bakterien un Krom jüst ni no mi henkieken doht, denn griep ick
mi mien Kuffer un fohr gau ’n poor Doog wech.
Dat könt
Ju je ook mol versööken. Un ween‘t ni klappen schull, wünsch ick Jüm liekers ’n
goode Beterung...

In
düssen Sinn

3 min
September 27, 2019 Wat will de Mors uns seggen?
Sooken
gifft dat... Annerletzt weer ick op ’n Beerdigung, un no de Truuerfier in de
Kapell gung dat no de Graffsteed.
Wi weern
so bummeli 50 Lüüd, all in swatt – wat mit uns losweer kunn man also an un för
sick sehn.
Nu weer
direkt an den Weg, den wi loopen sünd, een Fruu borbi Unkruut op ’n Graff
uttorieten.
Se keem
as wi op ehr toloopen sünd mol kort hoch, hett no uns henkeeken, sick den Sweet
vun de Stirn wischt un denn hett se sick weller no vöör bückt, so dat se uns
den Mors todreiht hett. Un ehrn Mors hett se uns wiest, bet wi all, also de
ganzen 50 Lüüd an ehr vörbi weern.
Achteran
bi’n Kaffe wurr noch mehrmols vun düsse Fruu snackt.
Ick heff
mi ook Gedanken mokt. Wat hett se uns dormit seggen wullt, dat se uns ehrn Mors
wiest hett?
Veellicht
wull se to’n Utdruck bring‘, dat wir ehr dor all mol an kleihn kunnen. Dorbi
hett keeneen vun uns de Fruu kinnt. Wi hebbt ehr je ook nix dohn. Un üm sick an
Mors to kleihn, mutt man sick doch tominst ’n beten kinnen.
Dat mach
ook ween, dat se ut’n Kultur keem, in de dat wiesen vun’ Mors ’n Teeken vun
groote Anerkennung is. Ick kinn twor keen Land, wonehm dat so is overs veele
Länner kinn ick so un so ni.
Veellicht
gung ehr dat overs ook ganz eenfach so, as mennige annere Lüüd, de ick al mol
op’n Karkhoff sehn heff, wenn ick dor mit’n Truuergemeend langtrocken bün:
Mennige sünd luud an lachen un an sabbeln, as wenn man Luft weer, annere suust
op Rad mang de Graffsteen lang oder se sünd mit ehr Smartfoons an speeln.
Dat
gifft se overs doch noch, de Lüüd, de noch Respekt vör Truuernde hebbt, de de
Mütz afnehmt, wenn dor jüst ’n Minsch ünner de Eer bröcht ward oder de sick mol
’n Viddelstünn in Achtergrund hölt un mit dat wiedermokt, wat se vörharrn, wenn
de Beerdigung vörbi is.
Ick
glööv, dat gifft in Würklichkeit ook keen Kultur, wonehm dat wiesen vun‘ Mors
wat mit Respekt to kriegen hett. Un wenn ick sowat nochmol beleev un mi een
op’n Beerdigung sien grooten Mors vör de Nees hölt, denn patt ick dor eenfach
rin...
In
düssen Sinn
3 min
September 20, 2019 Keen Swien röppt mi an
„Och
Minsch, good, dat ick di dreepen doh, ick versöch al siet dree Doog di
antoroopen!“
„Jo, dat
hebbt al mehr Lüüd versöcht, overs min Telefoonleitung is in Dutt un de Monteur
kümmt ni in de Puschen...“
Na,
hebbt Ju so’n Klöönsnack ook al mol holn? Kinnt Ju dat Malleur, dat kümmt, wenn
man ’n Malleur mit sien Telefoon hett?
Wenn dat
mol passeert, denn mutt man je bi de „Hotlein“ vun sien Telefoonanbeeder anroopen.
Bi de Mehrsten is dat je desülbige Sellschop. Ick glööv de fangt mit „T“ an
oder so. So as aftööven un Tee drinken.
Allent
dat is je al ’n Treppenwitz: Wenn dat Telefoon in Dutt is, schall man de dorste
Hotlein anroopen – frogt sick blots womit, ne.
Un wenn
man denn vun ’n annern Apparot ut anröppt, denn kann man sick erstmol ’n
Viddelstünn Musik anheuern, eher man mit een an’t Snacken kümmt.
De Fruu
oder de Mann an’t anner Enn frogt denn bilütten sogor: „Rufen sie jetzt von dem
Anschluss aus an, um den es geht?“
Hä? Wo
schall dat denn gohn? Ick segg in so’n Situatschoon den sowat as: „Nä, ick
snack in’n Blickdoos‘ rin mit ’n Kordel doran.“
Na jo,
jedenfalls ward een toletzt sowat seggt as: „Übermorgen kommt ein Monteur zu
ihnen, sein sie bitte zwischen neun und 16 Uhr zu Hause.“ Äh... un keen geiht
denn för mi to Arbeid? Meent de, ick heff nix anners to dohn?
Overs
wat schall man moken. Denn sitt man dor un tellt de Sekunnen. Even för’t
Obendbrot röppt man den weller de dammelige Hotlein an, heuert Musik un lött
sick vertelln, dat de Monteur dat hüüt ni mehr schafft. He wurr den no’t
Weekeneen vörbikomen.
Man kunn
overs in Tokunft fief Euro mehr in Monot betohln, denn wurr man gauer ’n
Monteur in’t Huus hebben. As ick dat to’n ersten Mol heuert heff kunn ick dat
erst gor ni glööven. Dat heet je, dat de Dorsten Ekels een mit Afsicht tööven
lött.
Ick
glööv, ick warr würklich nochmol över de Lösung mit de Blickdoos‘ un de Kordel
nodinken...
In
düssen Sinn

3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…