De Döschkassen

Sünd Ju ook al mol in’t Auto mit bummeli 40 Kilometer de Stünn achter 30 anner Autos över de Landstroot kruupt?

Twüschendör kümmt denn jümmmers mol ’n ganz Kloogen vun achter un överholt fief Fohrtüüch, as weer he Nikki Lauda persöönli, üm sick weller mang de annern to drücken, wenn wat vun vöör kümmt.

Ick dink denn jedet mol blots, wat dat glieks knalln ward.

Fröher weer klor: An‘ Anfang vun de Autoslang‘ is’n Trecker. Un weil man je Melk un Stuten op’n Disch hebben will, hölt man dat ut, ook, wenn man’t hilt hett. Intwüschen is dat Hinnernis vör so’n Autoslang‘ op de Landstroot overs jümmers öfter so’n lüttet 45-km/h-Auto. Overs, wat hett dat eegentli op sick, mit düsse Stau-Generator’n op veer Rööd?

Erfunnen hett man de Autos, de rein rechtli as Mopeds gült, dormit öllere Lüüd oder Minschen mit Behinnerung‘ mobil ween künnt. Nu dörft man de Dingers overs mit de Föhrerschien-Klass AM fohrn, un de kann man mit 15 Johr moken. Un nu keem twee Partei’n tosom: Junge Lüüd mit spendable Öllern un finnige Verkööpers, de ’n goodet Geschäft wittert hebbt. För so’n niedet Moped-Auto sünd nömli mol even mang veer- un twölfduusend Euro fälli. Un dat geiht wiss noch düürer.

Nu fohrt de mehrsten vun de lütten Autos je mit Diesel. Un weil se as Mopeds gült, mööt se ni no de Afgasünnersöökung. Domit kann man sick licht dinken, wat bi de Knatterkisten ut’n Utpuff kümmt, denn düsse Diesels bruukt keen Kat un keen Schummelsoftware. Dor harr VW mol op kom‘ schullt. De harrn sick ’n Barg Arger spoort.

Denn wüllt wi dat mol tosomfoten: Anstatt mit 15 Rad oder Moped to fohrn, dörft man also ’n Auto fohrn, dat veels to düüer is för sien Grötte un dat de Luft düller verpesten dörft, as jedet richtige Diesel-Auto.

Hmm. So’n richtigen Sinn kann ick mi dor ni rutkieken. Overs ick bün je ook keen 15 mehr.

Na jo, weenstern künnt de jungen Lüüd so warm un dröög no de näste Klima-Demo knattern…

In düssen Sinn

Bi uns in Düütschland kann man je erst Kanzler warrn, wenn man 40 Johr oder öller is.

Dat is bi uns also de eenzige Job, bi den man in’t Vörstellungsgrspäch ni vertellt kriegt, wat man al to old is.

De Österrieker sünd dor anners. De ehrn letzten Bunneskanzler weer erst 35, dor harrn se em al to’n tweeten Mol rutsmeeten. Dormit is de Kurz Sebastian een vun de ganz wenigen Ex-Ex-Staatschefs op de Welt.

Blots Silvio Berlusconi kann em över, de is sogor Ex-Ex-Ex-Staatschef. Twüschendör hett he Bunga-Bunga speelt. Dor is Kurz je ook noch ni to old för. Overs den Kniff mit de Medien, de em schmuckschreeven hebbt, den hett he noch ni so rut as Berlusconi. Anners harr he de Medien nöömli ni betohlt, sünnern köfft un eenfach bestimmt, wat se över em schrievt oder sennd‘.

In Kreml ward dat nochmol anners regelt. Dor ward eenmol scheev keeken, un denn danzt de Reporters al ni mehr ganz so wiet ut de Reeg.

Bet ut Kurz overs ’n richtigen Alpen-Putin ward, mutt he noch ’n beten ööven. Un wenn he mol weller op’n Stüüerstand kümmt, denn kunn he je Italien annekteern, so as Putin de Krim. Dat kann man moken. Eenfach so. De Weltgemeenschop empört sick denn twor un dat gifft ook’n poor Sanktschoon. Overs sick so’n Stück Land to klaun is ansünsten ni slimmer, as mit’n Benziner op’n Parkplatz för E-Autos to stohn.

Mit Italien in‘ Sack harr Österriek je ook Togang to’n Middelmeer. Fehlt blots noch ’n Marine. Vellicht hett Kurz je overs noch ’n poor U-Boote in Traunsee versteekt. Man weet dat ni.

Jedenfalls wurr mi dat ni wunnern, wenn Kurz över kurz – äh – kort oder lang weller op’n Chefsessel sitt.

Und denn ward he weller mit militärische Ehr’n in anner länner begrööt, un all de annern Staatsföhrer doht so, as wenn dat mit sien Maleschen allns blots ’n grooten Irrtum ween is. Dorüm wulln ook bi uns so veele Kanzler warrn. Dat is ’n seekere Sook. Dor kann man moken wat man will.

Un ick freu mi dat ick hier noch schrieven kann, wat ick will. Denn unse Zeidung hett sick ni vun den Kurz Sebastian betohln loten...

In düssen Sinn

Wenn man mol allns op de Kernsubstanz rünnerbreeken deiht un sick ni op unnödi geföhrte Disksschoon‘ inlött, de je veelmols ook gor ni richtungswiesend sünd, denn kann as Quintessenz postuleern, dat de Basis an un för sick je de Gundloog‘ vun dat Fundament is, ne.

Meent Ju ni ook? Doch, ne? Jo natüürli. Wat ook sünst? Dat liggt doch op de Hand.

Un wenn wat op de Hand liggt, denn mutt man dat doch ook mol seggen! In alle Düütlichkeit mutt man dat seggen! Helau!

Tscha, so oder so ähnli drückt sick all de Lüüd in’t Fernsehn ut, de nu versöcht ’n frische Regeerung tosomtoklabüstern. So’n Jo oder Nä heuert man vun de ni. Jümmers blots lange Schachtelsätze, bi de man an Enn ni schlauer is as vörher.

SPD, CDU, Greune un FDP, de „snackt“ je ook ni tosom, de „sondeert“.

Wenn man irgendeen vun de Politikers nu froogt: „Wo wüllt wi lang?“, denn seggt he: „Se froogt mi no de Richtung. Dat, üm dat hier mol ganz klor to seggen, is’n würkli berechtigte Froog, denn üm de Richtung geiht je allns. Un wenn man so’n Richtungsentscheedung dreepen will, denn mutt man dat demokratisch un in Demoot moken.“ Aha. Un denn geiht wieder: „Nu gifft dat je veele, de möögt den Noorn. Overs man mutt ook de in Blick beholn, de dat eher no Süden treckt. Tscha un Ost un West, dat is je de wichtigste düütsche Froog överhaupt. Veeln Dank för dat Gespräch.“

Un denn sünd se wech.

Mi wunnert, dat mennige Politikers dat överhaupt schafft, in annere Länner op Staatsbesöök to reisen. Mi wurr dat nömli ni wunnern, wenn se sick al an‘ Schalter op’n Flooghoben fastsabbeln dehn.

Na jo. Dat mutt man wohschienli ni verstohn as nomoln Börger.

De Volksvertreders ward dat al regeln, denn se vertreed‘ uns je, also dat Volk.

Un as so’n ganz eenfachen Minsch oder ook as eenfache Minschin langt dat ganz bestimmt, wenn man weet, dat de Basis de Gundloog‘ vun dat Fundament is...

In düssen Sinn

Kinnt Ju „Chufu“? Na jo, he is al lang doot. Overs weet Ju wokeen Chufu ween is? Nä? Dat weer de Pharao, also de König vun Ägüpten, den man hüüt bi uns ünner sien griechischen Noom kinnt. Cheops nömli.

Overs worüm is dat so? Worüm kriegt so veele Lüüd is ünnerscheedliche Länner ünnerscheedliche Noom?

Chufu, as de dorste König op Ägyptisch heeten hett, heuert sick je ni mol an as Cheops.

Un hüüt ward dat jümmers noch so mokt. Walter to’n Bispeel ward op Ingelsch ook Walter schreeven, unsnackt ward dat overs „Uolter“. Un wat man to Walter op Franzöösch seggt, is noch mol ganz anners. Dor ward ut Walter Gaultier, wat overs „Goutjee“ utsnackt ward.

Mit Hans ist dat noch wilder. Ut Hans ward op Dänisch Jens, op Ingelsch Jack, Hank oder Johnny, op Finnisch Janne oder Jukka oder Jussi, op Franzöösch‘ Jean, op Rumänisch Ionel op Spanisch Juan un so wieder.

Un reist ’n Minsch ut Ingland no Wien, den fohrt he no Vienna. Fohrt he no München, den geiht dat för em no Munich, wat man Mjunik utsnackt.

Kümmt ’n Chines‘ no München, denn meent he, dat he in „Mu-ni-hää“ is.

Gediegen ne.

Un ook, wenn de Bayern dat veellicht anners süht, liggt München je doch in Düütschland. Oha, dor fallt mi wat op: Blots Plattdüütsche seggt to Düütschland Düütschland. De mehrsten annern Düütschen seggt Deutschland. Hmm.

Un Lüüd ut annere Länner seggt to Düütschland Doitsu, Tyskland, Germany, Alemagne, Elmanya un so.

Overs bi uns is dat ook ni beter. Keeneen seggt bi uns, dat he no „Froocee“ will, wenn de Urlaub no Frankriek geiht. Un fohrt een vun uns in de „Elliniki Dimokratia“, denn geiht de Tour no Griechenland, wat in Griechenland keen Minsch seggt.

Oh Lüüd. Dat geiht op unsen lütten Globus slimmer to as in Babylon.

Keen Wunner, dat sick de halve Welt in de Flicken hett. De Minschen verstoht sick eenfach ni. Ick meen, de verstoht sick würli ni – allent wat de Sprooken angeiht. De schulln man all Platt lehrn, denn kunn wi ennli in den Freeden leeven vun den sünst överall blots snackt ward...

In düssen Sinn

Dat gifft je jümmers weller mol Wöörd, de ’n Tiedlang modern sünd. So weer all dat, wat wunnerbor weer ünner junge Lüüd vör 60 Johr „knorke“, vör 40 Johr weer datsülbige „geil“, denn „cool“ un hüüt seggt de Teenies dorto „wyld“ oder „de luxe“.

Overs ook ünner Lüüd, de öller as 15 sünd kümmt jümmers weller Wöör oder Redewennungen in Mood‘.

Vör’n poor Johr fung mol een dormit an „am Ende des Tages...“ to seggen, wenn he utdrücken wull, wo sick düt un dat op’t Letzt‘ verhölt. Mitmol hebbt denn jümmers mehr „am Ende des Tages“ seggt.

Bi klooge Lüüd oder wülk, de kloog würken wulln, wurr överflüssi oder ni mehr aktuell to „obsolet“.

Bilütten ward overs ook ole Wöörd mol weller modern. So is dat jüst bi mennige Politikers.

Ick glööv Olaf Scholz hett dor in  sien Wohlkampf mit anfungen.

He fung an to seggen, dat he sien Arbeid mit „Demut“ mokt.

Demoot, dat funnen ook annere Fruuns- un Mannslüüd ut alle möglichen Patei’n schick.

Mit mol hett dat bi veele Demoot hier un Demoot dor heeten. Demoot in jeden tweeten Satz: „Jungedi, wat bün ick hüüt weller demöödi...“

Dor fung ick an mi to froogen, wat de Dorsten överhaupt weet, wat dat Woord bedüüden deiht?

Dor wurr de een‘ oder annere wohrschienli erstmol över nodinken mööten: „Ääh, sick as lütten Deel vun’n gröttered Ganzed to sehn? Oder in Moot to deenen?“

Jo, so steiht dat in’t Nokixel. Frie’ch Nietsche hett dat anners sehn. För em weer Demoot gefährli, weil se no sien Ansehn ’n Teeken för „Feigheit“ un „Schwäche“ weer. Oha!

Na jo, Nietsche hett ook seggt, dat Gott doot is. Un nu is Nietsche doot.

Ick wurr seggen, wat dat blots to hoopen blifft, dat all de, de dat noplappert hebbt in de tokom‘ veer johr würkli mit Demoot an de Arbeid goht, un dat ehr Demoot ni in Hochmoot ümsleiht.

Denn wenn se uns in Demoot in Bunnesdag vertreden wurrn, denn weer dat för uns Land „an‘ Enn vun‘ Dag“ nömli de luxe, wyld, cool, geil, super, klasse, knorke un würkli ganz, ganz wunnerbor...

In düssen Sinn

Tscha, nu sünd dat keen 40 Stünnen mehr, bet wi ennli to’n Ankrüüzen loopen dörft.

Un wenn all, de to’n Wähln goht, ehr twee Krüüze mokt hebbt, gifft dat een‘, de dree Krüüze moken kunn: Angela Merkel nömli.

De kann sick in Tokunft mit Achim Sauer op’t Sofa setten, veellicht ’n poor Puttlappens häkeln un sick in’t Fernsehn bekieken, wo sick de, de no ehr kümmt, mit den ganzen Snurrkrom afargert.

Merkel hett dat je ook würkli plietsch mokt. Bi de Energiewenn‘ to’n Bispeel. De hett se je 2011 infädelt. Wegen Fokushima un de Landdagswohln in NRW weer dat. Dorbi harr se je erst ’n poor Johr vörher de Looptiden för de Atomkraftwerke weller verlängert.

Ut den Atomutstieg vun Raud-Greun is se fuurts utsteegen, üm denn no Fokushima un kort vör de NRW-Wohl ut ehr’n eegenen‘ Utstieg uttostiegen.

Kiek an, af un to bruukt dat anschien’d blots ’n Landdagswohl, dormit sick wat ännert.

So keem dat jedenfalls to de Energiewenn‘, de nu overs de näste Kanzler oder de näste Kanzlerin erst richti dörsetten mutt.

Jo, un all de Löckers in‘ Huushalt, de dör Corona reeten wurrn, dörft nu ook de näste Regeerung weller dichtkitten un mit dat opfüll’n, wat se uns ut de Tasch trecken ward.

Ick glööv, so lusti ward dat in de nästen Johrn also gor ni, op de Regeerungsbank to sitten.

Liekers gifft dat je overs tominst dree Anwärters op Posten as Kanzlerin oder Kanzler. Keen dat overs toletzt ward, dor much ick keen Wetten op afslüüten. Dor hol ick dat mit Wolfgang Schäuble, de mol seggt hett: „Mit Vörhersogen hol ick mi trüch, besünners wenn se sick üm de Tokunft dreiht.“

Liekers will ick dat wogen, hier een Prognos‘ aftogeeven, wat de Bunnesdagswohl angeiht:

To de ganz grooten Gewinners ward op jeden Fall de Taschendook-Industrie heuern.

Denn de Dronen, ward man sick op alle Sieden ut‘ Gesich wischen: De een‘ weil se verlorn hebbt un de annern, weil ehr klor ward, wat nu allns vör ehr liggt…

In düssen Sinn

Wenn ick mit mien Madam irgendwo in’t Lokol, in’t Restorang oder so eeten goh, denn studeert wi erstmol beide de Koart, eher wi uns wat bestellt. So mokt man dat je. Un tomeist bestellt wi denn wat Ünnerscheedliched.

Wenn uns‘ Eeten denn overs vör uns op’n Disch steiht, denn will mien Seute mitmol veel leever mien Eeten hebben, as dat, wat se sülms bestellt hett. An un för sick mutt se gor nix bestelln, weil se je so un so op mien Töller dohlgeiht.

Overs jüst so is dat je intwüschen ook in de Politik. Jüst nu vör de Wohl bringt een dat tehmli dör’nanner.

De Greun‘ klaut de Sozialdemokraten de Them‘, de Unionspartei’n räubert bi de Greun‘, bi de Linke gifft dat mennige Programmpunkte, de dat jüst so bi de AfD gifft un so wieder.

Un wi stoht Sünndag in een Week dor mit’n Wohlzeddel so lang as de Autobohn Hamborg-Lübeck un weet ni, wonehm wi de twee Krüüze moken schüllt. Dat is bi’t Lotto 6 ut 49 eenfacher.

Ick heff mi je ook dör den Wahl-o-Mat in’t Internet hangelt. Dorno kunn ick ’n ganzen Schwung vun Partei’n wähln. Besünners Partei’n de gor ni un Bunnesdag sitt un dor wohrschienli ook nie rinkümmt. De erste Partei, de aktuell in Reichsdag sitt, kümmt bi mi erst op Platz twölf. Un denn ward de prozentual’n Ünnerscheede lütter. Wat schall man dormit anfang‘?

Wohlplakote hebbt mi je noch nie övertüücht. Un Triells, Veerells oder Achtells al tweemol ni, denn blots weil een slagferti is, heet dat je lang ni, dat he oder se un de Partei dorachter ook anstänni regeern ward.

Denn mutt ick de Parteiprogramme anschien’d doch noch mol ’n beten genauer studeern. Dor heff ick nu noch bummeli ’n Week Tied för.

Is je tüpisch, all de Partei’n drückt sick in de Meern rüm, so dat dor al gor keen Platz mehr is un räubert op de Töllers vun de annern un wokeen dörft dat mol weller utboden? Wi!

Un? Geiht Ju dat jüst so? Wüllt Ju sick ook nochmol dör de Programme wöhln? Denn büddelt sick man leever al mol ’n grooten Putt Kaffee dör. Den Kaffe ward Ju nömli bruuken, denn dat ward ’n anstreng’de Week...

In düssen Sinn

Nu bün ick je würkli ni eitel. Liekers dreept mi morns vör’n Speegel doch af un to so’n lütt beten de Slag.

De Falten ward jümmers mehr un de poor Hoor, de noch an mi sitt, goht al langsom vun grau in witt över. Ick meen – ick bün noch keen Föffti, un ick kinn Lüüd, de twindi Johr öller sünd as ick un noch richti vulled Hoor hebbt. Mennige sogor noch in de originole Farv.

Wat schall man dorvun holn? Ganz boben op’n Kopp bün ick al blank as’n Kinnermors, blots oh’n Morslock. Bi’n Kinnermors freut sick de Fruunslüüd je as wenn Wiehnachen weer, wenn se em seht. Seht se overs mien kohln Kopp, hölt sick ehr Freud‘ in ganz düütliche Grenzen, wat ick je ook verstohn kann.

Liekers lot ick mi ni dorto henrieten, Hoorwussmiddel un –Tinktuurn to kööpen. De bringt so un so nix.

Overs wat is mit Huusmiddels? Ick heff mol heuert, dat rohe Heunereier sick in ganz wunnerbore Wies op de Hoor utwürken schüllt. Na jo, Eier sünd je de eenzigen Zell’n de man ohn‘ Mikroskop sehn kann – Stammzelln sotoseggen. Un smecken doht se ook noch.

Nu finn ick den Gedanken, mi so’n glibberiged Ei över’n Kopp to haun overs gor ni so verlockend, ook wenn dat de Locken good deiht.

Langt dat ni, wenn man de Eier vun‘ binnen würken lött? De Idee keem mi annerletzt in de Iesdeel. Dor harr ick nömli ’n Ies mit Eierlikeur.

Un in Eierlikeur is je ook noch Alkohol bin. Dor wurr man doch glieks twee Flegen mit een Klapp in Dutt haun. Denn Alkohol is doch ook good, üm Wunnen to desinfizeern.

Un wenn man sick jeden Dag so’n halven Liter Eierlieur wechneiht, denn kann man sick ruhi bi’t Ünnerbüxen bügeln an’t Plättiesen verbrenn‘. De Brandwunn ward denn fuurts vun binn‘ desinfizeert. Un wenn de Hoor denn ook beter utsehn oder sogor noch wassen doht... Wat will man denn noch mehr?

Jo, ick weet, in Eierlikeur sitt ook ’n Barg Kalorien bin, un de dorsten Kalorien mokt dick. Overs dor wurr ick dat op ankom‘ loten, wenn dat an’t Enn doch de Frisuur good deiht.

Man weet je nömli: Keen scheun ween will, mutt lieden...

In düssen Sinn

Hebbt Ju fröher de Sesomstroot sehn? Dor geev dat ’n Rubrik, de kunn man „klööger warrn mit Grobi“ nööm. Grobi, düssed dösige Stoffdings hett dor to’n bispeel verkloart, wat „dicht bi“ un „wiet wech“ is. He is denn jümmers dicht an rankom‘, üm denn wiet wech to loopen un vun dor to winken, jümmers hen un trüch, bet he all ganz ut de Pust‘ weer.

As Kind kunn ick mi dor kringeli över gluttern. Overs ick heff even ook wat lehrt. Nu kiek ick ni allto veel Fernsehn. Un al gor ni de Senners, op de de Programme alle Viddelstünn dör Reklame ünnerbroken ward.

Besünners wegen de Oart un Wies, wo de Reklame ankünnigt ward. Dor krieg ick jedet Mol 200 Puls.

Dat heet op de Privotsenners nömli jümmers vör irgendeen Sennung: „Sehen sie Düt un Dat. ‚Jetzt‘ op unsen Senner!“ Overs direkt achter dat Woord „Jetzt“ kümmt ni de dulle Sennung, sünnern Reklame un noch mehr Reklame. Un mit ’n beten Glück kümmt denn ennli dat, wat „jetzt“ vör fief Minuten kom‘ schull. Seggt hebbt se also jetzt, meent hebbt se overs „glieks“.

Wat schall dat? De mokt allns in Dutt, wat Grobi uns mit so veel Engaschemang bibröcht hett. Dor kann ick mi richti över argern.

Wenn ick bi de Füüerwehr ween wurr un dat Sennegebüüd vun Kabel söben oder Pro24 wurr brennen, un in de erste Etoosch stunn de Dorste, de för de Reklame verantwoordli weer an’t Finster to winken un to jauln – jo, denn wurr ick ganz kommodig no’t Füüerwehrauto schlurfen un dat Sprungdook utpacken. Un wenn de Reklameapostel in’t Finster grööln wurr: „Wann schall ick springen?“, denn wurr ick roopen: „Jetzt!“

Un bummeli fief Minuten loter wurr ick dat Sprungdook so langsom mol opspann‘, ook wenn dat ni mehr veel Zweck harr.

Un wenn de Reklameminsch denn mit krumme Knooken blaarn wurr: „Worüm harrn ju dat Dook noch ni spannt as ju ‚jetzt‘ seggt hebbt?“, denn wurr ick seggen: „Tscha, harrst je mol frogen kunnt, wat wi ünner ‚Jetzt‘ datsülbige verstoht as du bi de Reklame vör’n Film.“

Denn keen ni froogt, blifft dumm...

 In düssen Sinn

Dösig. Fröher heff ick mit mien Kumpels över Mopeds un Deerns un all sowat snackt. Hüüt sabbelt wi mehr un mehr över Krankheiten – nu ook mit de Deerns. Bi de een‘ kniept dat hier bi de annern piert dat dor.

Dat is meist as’n Wettbewerb dorbin, wokeen denn de besten Maleschen hett oder de gröttsten OP-Narven.

Overs man mutt sick doch wunnern, wat de Dokters intwüschen allns moken künnt. Ick to’n Bispeel heff jüst erst ’n frisched Hüftgelenk kreegen. Dat kümmt mi jümmers noch vör as ’n wohred Wunner.

De ersten Doog heff ick noch in’t Krankenhuus leegen. Denn overs gung dat op Reha. No St. Peter.

Oha, heff ick dor erst dacht. Ick as Dithmarscher ganz alleent no Eiderstedt un denn ook noch mit’n verletzte Hüft?

Weer overs gor ni slimm. In Gegendeel, richti scheun weer dat. Un alleent weer ick dor ook ni. Dor weern ’n ganzen Schwung Dithmarschers.

Een vun mien Leidensgenossen keem ut Lieth - ick nööm em eenfach mol Wolfgang Kruus‘. Wolfgang harr dat in’t Krüüz.

Un vun dat Malleur in’ Puckel harr he keen Geföhl mehr in de Been‘. „Dor hebbt se mi de Wirbelsüül mit’n Dremel opbohrt. Un so langsom mark ick weller, dat ick ook noch Been‘ heff“, hett he mi vertellt.

An un för sick mach man dor gor ni över nodinken. Ook ni, dat se mi den Mors opsneeden hebbt, üm dor ’n frisched Hüftgelenk rintoklabüstern. Dat ole Gelenk hebbt se wechsmeeten. Dat hett je ook nix mehr döcht.

Tscha, nu seeten wi tosom in St. Peter un hebbt doröver sinneert, wat wi mit unse nieden Frieheiten allns anfangen kunnen.

Weller beter loopen, Rad fohrn, schwümmen un so wieder.

Mi geiht dat intwüschen weller richti good. Un so ganz langsom over seeker bün ick sogor al sowiet, dat ick anner Lüüd weller mit Schwung in Mors patten kunn.

Dat kann mien Kolleg‘ Wolfgang nu ook weller. Un dat Beste is: He kann dat nu sogor weller föhln, wenn he anner Lüüd in Mors patten deiht.

Jo, dat is doch good, wat dat Mediziners geeven deiht...

 In düssen Sinn