De Döschkassen

By Heiko KrollComedy Society & Culture News News Commentary

De Döschkassen episodes

April 14 Is hier ’n Dokter?
Ohaueha. Trump, de Kaiser, ääh, de Präsident vun de USA hett sick nu ook noch mit’n Papst in de Flicken. Dorbi kümmt Papst Leo de Veerteihnste je sülms ut de USA.
Ut Chicago kümmt he, dor wo ook Al Capone herkeem. Na jo, dor hett dat eene wohrschienli erstmol ni so veels mit dat annere to dohn. Overs een Gemeensomkeit gifft dat denn doch: Capone weer wiss keen Bangbüx un Leo is dat jüst so weni. He hett keen Angst vör de US-Regeerung, hett he seggt. Un he hett dat seggt, weil Trump sien geistlichen Landsmann dat Muul verbeeden wull.
De Papst schall Trump ni kritiseern, weil so un so keeneen Trump kritiseern schall. Wat dat angeiht is Donald recht empfindli.
Tscha, de Opgoov vun so’n Papst is dat je overs nu mol, dat to predigen, wat Jesus vör 2000 Johr al predigt hett. Un dat deiht he je ook. Wenn dat Larm un Gewalt un Unrecht in de Welt gifft, denn seggt he dor wat to un röppt to’n Freeden op.
Un Leo hett al wat to Trump sien Migrantenpolitik seggt, to de Entföhrung vun den Präsident ut Venezuela un nu hett he seggt, dat Sluss ween mutt mit dat Ümbringen vun Unschullige Lüüd in un üm Iran.
Dat weer to veel. Dor hett Trump sien Gesichsfarv vun onrangsch no düüsterraud wesselt. De Mann kunn ni mehr an sick holn un hett ruthaut, wat he vun Leo hölt. Nömli genau gor nix. De weer je ohne Trump so un so keen Papst worrn.
So, un üm de Sook mit den leeven Gott ook glieks nochmol trech to rücken hett Donald sien KI ansmeeten un ’n Bild in’t Internet stellt, dat em as Jesus oder Gott persönli wiest. Mit Soldoten as Engels, dorblang Odlers un Kampffleegers un ünnen allerhand Lüüd de em anhimmelt.
Dor hett Trump sülms markt, dat he ’n beten wiet rutschwummen is. He hett dat Blid weller löscht, overs dor harr dat al de Runn mokt. Un he hett seggt, dat he dacht harr, wat dat Bild em as Arzt wiest, weil em dor je ook ’n Krankenswester anhimmelt hett.
Hmm. Ick hol dat echt ni för ’n goode Idee, een to’n Chef vun’t US-Militär to moken, de ni mol Jesus un ’n Dokter ut’neenholn kann…

In düssen Sinn
3 min
April 08 Wokeen betohlt de Reeken?
Wokeen betohlt de Reeken?

Bi de Oart un Wies‘ wo uns‘ Regeerung mit de hogen Spritpriese ümgeiht, mutt ick jümmers an ’n ole Fabel dinken: Dor is ’n Waldbrand, un all de Tiern neiht ut. So rennt ’n ganzen Schwung Tiern no den Fluss, üm sick op de anner Sied in Seekerheit to bringen. Annere rennt kopplos achteran. Ook de giftige Slang kümmt an’t Woter, overs se kann ni schwümmen. Dor kümmt de Biber ansuust un de Slang seggt: „Biber, nehm‘ mi mit över’n Fluss, anners mutt ick in’t Füüer starven!“ De Biber dinkt sick, dat in de Not all tosomholn mööt, lött de Slang op sien Rüüch kruupen un stiegt in’t Woter. In de Meern vun den Fluss bitt de Slang ehrn Retter overs in Hals.
De Biber kann dat gor ni foten un seggt in sien Doodeskampf: „Slang, worüm hest Du mi beeten? Nu mööt wi beide starven. Ick an dien Gift un Du versuupst.“ „Na jo“, kümmt dor vun boben trüch, „wat hest Du denn dacht? Ick bün ’n Slang‘. Bieten liggt in mien Natuur.“ Denn sünd beide doot, un de Geschicht is to Enn.
Jo. Un betrocken op düssed Stück kümmt mi uns‘ Regeerung jüst so naiv vör, as de Biber in de Not. Se hett de Ölmultis, för de Profit allns is, per Gesetz vörschreeven, dat se de Priese blots noch eenmol an Dag, nömli Klock twölf, höger moken dörft.
Dor mutt man sick ni wunnerwarken, dat se de Priese ook würkli jeden Meddag höger mokt. Dat steiht doch so in’t Gesetz. Un Profit to moken liggt nu mol in ehr Natuur. Dor kann de Wald – oder de Nahe Osten – noch so dull brennen. Ut de Konzerne ward keen Sozialisten, blots weil dat ehr Kunnen jüst ni so good geiht.
Overs so’n lütt beten hinkt de Vergliek. Denn de Stoot verdeent je an de hogen Spritpriese mit. Un wenn man Wirtschopsministerin Reiche no Stüüersenkung‘ bi’n Sprit froogt, denn seggt se direkt: „Nä, leeve Lüüd. Dor kümmt nix no!“
De Regeerung is in düssen Fall also mehr de Katteeker, de vun de ganze Sook profiteert: De Biber kann de Bööm op de anner Sied vun Fluss ni mehr afnogen, un de Slang kann em ni mehr bieten. Dat heuert sick no’n tehmli schlau’n Plon an. Un dat de Plon op unse Kosten geiht, dat schient blots uns to argern…

In düssen Sinn
3 min
April 02 Krimis un de Eiers in Australien
Lütt Matten de Hos‘ hett bald weller ’n Barg to dohn, ne.
Un de Kinner ook – bi’t Sööken vun de Ostereiers. An Leevsten hebbt se je de Eiers ut Schokolod. Dorbi mutt man so’n lütt beten oppassen: Ni alle Eiers, de vun Hosen leggt ward, sünd ut Schokolod. Overs dat is je ’n ganz anner Geschicht.
Blangbi: Ostern fiert mann je ni överall so, as bi uns. In Schweden to’n Bispeel mööt de Lütten de Eiers un den annern Söötkrom ni sööken, se mööt sick de Naschis verdeen‘. Dorto treckt se vun Huus to Huus, un wenn ehr opmokt ward, denn tuuscht se sülmsgemolte Koarten gegen wat Seuted. Singen mööt se ni, glööv ick. Un „Seuted oder Suured“ seggt se ook ni. Un je scheuner se molt, je mehr Naschkrom künnt se dorgegen intuuschen – vun nix kümmt nix.
In Norwegen ward to Ostern traditschonell spannende Krimis leest. Worüm weet ick ni.
Overs ick mutt seggen, dat de Skandinaviers mi al ümmer sümpatisch weern.
In Pol’n sprütt man sick an Ostermondag mit Woter natt, un in Australien sammelt man an Ostern Woter ut Flüsse un Bäche för de näste Hochtied de ansteiht, üm dat Bruutpoor dormit no de Truung to besprütten.
Overs ook dor mutt man oppassen: Wenn de Hochtied to lang no Ostern is, hett sick dat Woter veellicht al in ’n Heuopguss verwannelt un de rüükt ni scheun.
In Australien bringt ook ni de Hos‘ de Eiers, sünnern de Bilbys. Dat sünd sowat as lütte Karniggels mit ’n Büddel an, wo de Eiers bin sünd. Un de Bilbys sünd meist ganz un gor vun de Hosen verdrängt worrn, de de Europäers insleept hebbt.
Also: Australiers sünd ni ganz so good op Meister Lampe to snacken.
Overs nochmol no Huus: Dree Perzent vun de Düütschen mang 20 un 29 Johr glöövt, dat Jesus to Ostern heirot hett. Gratuleer ook.
Ostern ward je ni as Wiehnachen op’n bestimmted Dotum sett, sünnern op ’n ersten Sünndag no’n ersten Vullmond in’t Fröhjohr.
Overs man schall de Feste fiern as se fallt. Un dormit wünsch ick Ju all ’n frohe Ostertied…
In düssen Sinn
3 min
March 26 Flink bi’t Patten
An un för sick kann dat je gor ni angohn, overs dat is wohr: Chuck Norris is vörigen Dünnersdag in’t Öller vun 86 Johr storven.
Dorbi gifft dat je den Chuck-Norris-Witz: „De Sensemann hett Bammel vör den Dag, an den Chuck Norris bi em vör de Döör steiht.“
Dat is op’t Letzt‘ anschiend doch anners ween. Schod is dat.
Na jo, ick weer keen würkli grooten Fän vun sien Filme. He harr oftmols so’n Aha-ick-weet-genau-wat-de-Spitzboov-in-Sinn-hett-Blick.
Jo, un denn hett dat in de Regel ni mehr lang duuert, un de Spitzbooven hebbt vun Chuck geheuri wat an de Ohrn kreegen. Gern ook mit sien „Roundhouse-Kick“, also zack, dat Been in de Luft un denn as so’n Brummkreisel dreihn, so dat glieks fief süss böse Lüüd wat an‘ Dassel kreegen hebbt.
Oh jo, Herr Norris weer flink bi’t Patten. Je öller sien Filme, je düller sünd de Fetzen flogen. Toerst sogor noch tosom mit Bruce Lee.
Chuck sien Motto weer wohrschienli: Erst patten, denn frogen, prügeln för Recht un Ordnung.
Bi Bud Spencer un Terrence Hill schull dat je lustig ween, overs Chuck Norris hett dat würkli ernst meent. Un op mi hett jüst dat jümers unfriewilli ulkig würkt. Na jo, is overs ook Geschmackssook.
Liekers hett Norris dat trechkreegen, dat würkli jedeneen em kinnt. Un he kunn över sick sülms lachen. Un för beides hett he mien grooten Respekt.
As dat mit all de Witze över em losgung, hett he de Witze sammelt un ehr noher sogor op sien Internet-Sied öffentli mokt. Hier so’n poor Scheune, dorvun: Chuck Norris hett bet unennli tellt. Tweemol!
Oder: Chuck Norris kann Dreihdöörn dicht kloppen.
Oder: Dat Universum dehnt sick ümmer wieder ut – dat is op de Flucht vör Chuck Norris.
Oder: Chuck Norris kann de Luft anholn. De Ganze!
Un mien leevsten Norris-Witz: Wenn Chuck Norris sien Auto keen Sprit mehr hett, fohrt dat liekers wieder. Ut Respekt!
Oh, wat wurr ick dorvör geeven, dat Autos so veel Respekt vör mi harrn, as se för Chuck Norris hatt hebbt…

In düssen Sinn
3 min
March 18 Sprooktheorie
Dat scheune an Plattdüütsch is je, wat dat so eenfach is. Wi hebbt blots twee Fälle, Nominativ un Akkusativ: Is „de“ Bleudsinn (Nominativ) dat Thema, denn snackt man över „den“ Bleudsinn (Akkusativ).
Mehr gifft dat bi uns ni. Dat de Dativ also den Genitiv sien Doot ween schall, dat is uns annerlei.
Liekers gifft dat in uns Sprook so’n poor Hokens. So is dat ook mit de Eentohl un de Mehrtohl vun mennige Wöörd. Singular un Plural seggt de Theoretiker dorto.
Nehmt wi mol dat Woord „Mors“. Wenn man to’n Bispeel achter dree Lüüd löppt, annerlei wat dat Mannslüüd, Fruunslüüd oder Diverse sünd, un man finnd, dat jedeneen vun de Dorsten för sick ’n smucken Mors hett, denn wurr man op Hochdüütsch seggen, de hebbt scheune „Hintern“ – bi Hintern is Eentohl un Mehrtohl dat sülbige. Weniger elegant kunn man anstatt Hintern ook „Ärsche“ seggen.
Op Platt overs geiht dat ni. To seggen, „de dree hebbt ’n smucken Mors“, dat weer je ni korrekt. De deelt sick je ni een Mors, jedeneen hett ’n eegen‘ Mors.
Wat also is de Mehrtohl vun Mors? Mörse oder Mörße? Mörser veellicht? Och nä, dat is wat anners. Un Morsen geiht ook ni, dat is dat mit kort un lang un S.O.S. un so wieder. Tscha, wat nu? Een Mors twee Achterste. Anners geiht dat erstmol ni.
Overs, „de dree hebbt schmucke Achterste“, is op dat Bispeel betrocken ook keen scheune Lösung.
Na jo, dat is as dat is. Overs dat gifft je noch mehr Hokens. Mennige Wöörd in’t Plattdüütsche sünd gliek, liekers se wat anners meent. Wenn to’n Bispeel güstern een mit ’n Flint „schooten“ hett, denn wurr he dormit hüüt „scheeten“. Overs „scheeten“ is besünners vun de Schrievwies‘ dat Glieke as de Vergang’heitsform vun (Pardon) „schieten“. Wenn man dat dör’neen kriegt, denn kann dat op de Jagd oder bi’t Militär al keddeli warrn.
Overs wat dink ick mi överhaupt hitt över de Theorie? Wi snackt Platt in de Praxis – ook wenn de Sprook ’n poor Ecken un Kanten hett. Un wokeen uns dat vörsmieten will, de kann uns mol fix an Mors kleihn, annerlei, wat dat korrekt is oder ni…

In düssen Sinn

3 min
March 12 Podkassen
3 min
March 05 Heiko alleent to Huus
Ganze 35 Doog oder ümgereekend fief Weeken hett dat duuert, also mehr as ’n Monot. So lang weer ick Strohwitwer. Bet güstern Obend. Mien Madam weer to Kuur in Bayern.
An den Dag, bevör se losfohrt is, weer dat ganz dösig. Op de een Sied weer ick truuri, wat ick mien Seute nu fief Weeken ni sehn wurr. Op de anner Sied harr ick so’n lütt beten düssed keddelige Geföhl in Buuk, as ’n lütten Jung, den sien Öllern obends to Ball goht un de denn de ganze Bood för sick alleent hett.
Overs as ick mien Madam no’n Bohnhoff bröcht harr, heff ick no Arbeid musst. Un as ick an düssen ersten Dag vun de Arbeid keem, stunn ick dor, in dat leerige Huus, blots de Katten keem‘ un wulln wat to freeten hebben.
Ick heff to mi sülms seggt: „Minsch, Heiko, Du hest stormfrie. Stimmung!“ Overs so richti Stimmung wull dor ni opkom. Wat weer denn los mit mi? Fröher harr ick wohrschienli jeden Obend Lüüd to’n Fiern inlodt. Dor weer mi overs ni no. Un ick heff je ook morns twindi vör fief weller opstohn musst.
In de nästen Doog heff ick denn anners mien niede Frieheit fiert: In’t Fernsehn leep blots dat, wat ick kieken wull. Dat Geföhl heff ick würkli lang ni mehr hatt. Overs Fernseh kieken ohn‘ mien Madam, dat weer dösig. Dor kann man gor ni geneeten, wat man dat eegene Wunschprogramm dörsett hett.
To Eeten geev dat tomeist fertigen Krom ut‘ Gefreerschapp. För sick allent Kooken mokt nömli ni besünners veel Spoß.
Ick keem mi richti langwieli vör.
In den Film „Kevin allent to Huus“ is den lütten Jung mehr infulln, wat he in’t Huus anstelln kunn.
Overs to’n op de Betten rümhüppen harr ick keen Lust. Dat weer ook ni lang good gohn.
Tscha, un Koarten speeln mokt alleent jüst so veel Sinn as sick to ünnerholn un to’n Lachen bring‘. So drulli bün ick denn doch noch ni.
Ünnern Streek heff ick rutfunnen, dat mi dat so geiht, as Loriot dat mol seggt hett: „Ein Leben ohne Mops ist möglich aber sinnlos.“ Genau so geiht mi mit mien Madam. Good, dat se weller dor is…
In düssen Sinn
3 min
February 26 Wonehm is de Zob?
Wonehm is de ZOB?
Mitünner nöömt wi Sooken, Orte un Lüüd je anners, as se eegentli heeten doht, ne. Overs jedeneen, de dat kinnt weet, wat dormit meent is.
In Bookholt to’n Bispeel geev dat mol ’n Vivo-Loden. Dat weer so’n richti scheun‘ oln Tant‘-Emma-Loden, de overs vun alle Bookholter blots „Fritz-Ei“ nöömt wurr, un jedeneen weer klor, wat dat lütte Geschäft an de Turnhall‘ meent weer.
Oder de „Sündige Meile“. Veele weet direkt, wat dat üm de Reeperbohn in Hamborg geiht. De heet overs nu mol ni Sündige Meile, sündern Reeperbohn. Se is je ni mol ’n Miel lang, sünnern blots 930 Meters.
Ick dink, nu is klor, worüm mi dat geiht. So. Un ick heff vörigen Friedag mit ’n Reisebus bummeli 45 Lüüd vun‘ „ZOB“ in Nordhastedt afholn schullt. Un de ZOB in Nordhastedt is för mi de Platz bi’n Kreisverkehr an de Heider Stroot.
Dor stunn ick nu. 25 Minuten vör de Tied, overs ick stunn dor alleent. Keen Minsch dor. Denn keem overs doch noch een. De weer ook vun‘ Sozialverband, mit den ick je op ’n Tour övern halven Dag fohrn schull.
Mehr keem overs ni. Wi beiden fungen an uns to wunnerwarken. Op’t Letzt‘ bün ick no de Haltesteed an de School fohrt. Dor stunnen tatsächli all de annern vun mien Reisegruppe.
Un denn gung dat ook los. Weer ’n scheune Tour, hett düchti Spoß mokt.
Nu fung ick overs an mit de Lüüd doröver to klöön‘, wonehm denn de ZOB in Nordhastedt is. Meist all hebbt seggt, de is dor an de School.
Veele Kollegen vun mi seht overs, jüst as ick, de Haltesteed an‘ Kreisverkehr as den ZOB an. Un nu keem ick mit mien Busfohrerweeten: De Haltesteed an de School heet Haltesteed „School“ un de Haltesteed an‘ Kreisverkehr heet Haltesteed „Zentralgarten“. „Un dorüm“, heff ick to mien Lüüd seggt, „hett Nordhasteed överhaupt keen ZOB.“ Oha, dor harr ick wat seggt. Dat kunn je wull ni angohn, de ZOB weer an de School, un een‘ hett seggt: „Man kann sick ook üm Kopp un Krogen snacken!“ Toletzt heff ick dat denn ook insehn. Un ick fohr ook ganz ehrli gern weller mit Lüüd ut Nordhastedt op Tour. Annerlei vun wat för’n ZOB ick ehr afhol…
In düssen Sinn
3 min
February 18 Nogels dör de Mattschieven
In Momang ward je hitt diskuteert, dat „Tiktok“ un annere Internet-Deenste för Kinner un Jugendliche verboden oder tominst reguleert warrn schüllt.
Tscha, wat schall man dorto seggen? Kloar, wat so in’t Internet allns frie togängli is, dat kann een al Angst un Bang moken. Un dat sick de Internet-Wirtschoop an Kinner un junge Lüüd gesundstött, dat is ’n Schann.
Overs allns wat ’n Bildschirm hett, hett uns je jümmers al faszineert.
Af de 1950er Johrn wurrn mitmol ümmer mehr Möbels in ümmer mehr Stuuven no’n Ferseh-Apparot utricht‘.
Jo, un wenn wat in Fernsehn leep, denn hebbt de Lüüd in de Stuuven ni mehr tosom snackt, sünnern blots noch no de Mattschiev keeken.
Gau hett de Wirtschop dat Fernsehn för ehr Reklame entdeckt. Un bald kunn jedeneen nosabbeln, wat in de Reklame vertellt wurr.
Overs dormols geev dat obends noch Sennesluss un vun Meddag bet Klock dree kunn man blots dat Testbild sehn. Dat kunn man doch mol weller inföhrn. Ook för’t Internet. Overs dor harrn wohrschienli sogor de, de Tiktok vör junge Lüüd verbeeden wüllt, wat gegen. Wenn man sick nömli mol ’n Bunnesdagsitzung ankiekt, denn süht man, dat veele Afgeordnete leever mit ehrn Ackersnacker speelt, as sick antoheuern, wat vöör vertellt ward.
Tscha, un wat de Grooten mokt, dat mokt de Kinner nu mol no.
Overs dor fallt mi noch wat in: Ick kinn ’n Meister in’t Holthandwark, de as Utbiller an de Berufschool kaputte Smartfohns in sien Frünneskring sammeln deh. Un de hett he in sien Büro mit 100er Nogels an so’n dicken Balken haut. Meern dör’t Display. Sien Lehrjungs un –Deerns hett he denn jümmers seggt: „Seh‘ ick een vun Ju bi de Arbeid mit‘ Smartfohn, denn nogel ick dat blang de annern an Balken!“ Tscha, dor hett sick keeneen truut, blang de Pausen dat Telefoon ut de Tasch to fummeln.
Veellicht mutt in Bunnesdag ook mol so’n Balken un ’n Schwung 100er Nogels hen. Denn wurrn de Afgeordneten scheun vörmoken, wo man ohne Ackersnacker trechkümmt. Un veellicht wurr sick de Rest denn ganz vun alleent trechloopen…
In düssen Sinn
3 min
February 12 De Fleeger töövt al
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…