De Döschkassen

By Heiko KrollComedy Society & Culture News News Commentary

De Döschkassen episodes

February 05 Bidde lächeln
„Man kriegt je ni mol mehr’n Platz bi’n Tähnarzt“, hett Frie’ch Merz in September 2023 noch seggt, weil dor to veel Asylbewerbers rümsitten doht, de op Stootskosten ’n niedet Gebiss kriegt.
Na jo, so as dat utsüht, entspannt sick dat bald weller mit de Tähnarzt-Termine. Tominst, wenn de Vörsläge vun‘ CDU-Wirtschopsrot ümsett ward. Dorno schüllt Behannlung‘ bi’n Tähnarzt ni mehr vun de Krankenkassen betohlt warrn. Dor schall man sick sülms üm kümmern, privot ’n Tosatzverseekerung‘ afslüten oder den Kusenknacker veellicht direkt in bor betohln.
Dat lött sick mit de Gehälter, de man kriegt, wenn man in Wirtschopsrot sitt, wiss licht moken. Jo, wenn een sülms wat ni swor fallt, denn mööt de annern dat doch ook köön‘, ne.
Un wenn dat so kümmt, denn kann man bald ook weller an’t Lächeln afleesen, wat de Lüüd verdeent.
„Mut zur Lücke“, heet dat denn.
Overs dat hett ook Vördeele: Wenn man Piep schmöökt, kann man de Piep scheun in so’n Tähnlücke klemm‘. Denn fallt se ni rünner un dat Brandrisiko geiht dohl.
Jo, un to Wiehnachen kann sick de ganze Famielje ’n Teelicht in’t Muul stelln, dat smitt dör de Tähnlücken denn schmucke Musters an de Wand. Dor kümmt de Spoß för Jung un Old ganz vun alleent.
Mol sehn, wo kann man den Raudstift noch ansetten? Och jo, bi Organtransplantatschoon veellicht. Wenn man to’n Bispeel ’n frische Niere bruukt, denn mutt man de Oparatschoon tokünfti sülms betohn. De niede Niere mutt man natüüli ook sülms mit no’t Krankenhuus bringen. Dat spoort ’n Barg Stüüern.
Un dor finnd sick wiss noch veel mehr, wo man den Stoot op Kosten vun de lütten Stootsbörgers düchti entlasten kann. Wo scheun weer dat doch, ’n Land to regeern, wenn de Börgers ni dor weern, ne.
Overs op een’t köönt wi uns verloten: Op de Erhöhung vun de Diäten ward man in’t Parlament ook düt Johr wiss ni verzichen. Dor sünd sick all vun blau bet swatt denn mitmol weller greun. Kiek, Eenigkeit is doch so eenfach, wenn man blots över’t richtige Thema snackt…
In düssen Sinn
3 min
January 29 Richti, wichti un gesmackvull
„Över Gesmack lött sick strieden“, heet ’n oln Snack. Man seggt overs ook: „Över Gesmack schall man ni strieden.“ Jo, wat denn nu? Dat is so as „Gliek un gliek gesellt sick gern“ un „Gegensätze treckt sick an.“
Overs de Gesmacksfroog is je ’n ganz gefährliched Ploster. Dor sünd al Fründschopen över in Dutt gohn.
Noch mehr över de Froog, wat man wichti un richti finnd un wat ni.
Wenn ick dor mol bi uns to Huus kiek, denn kann ick seggen, dat mien Madam to’n Bispeel ganz annerlei is, wat för ’n Auto se fohrt. Se will vun A no B kom un ’n beten wat mitnehm köön‘. Dat langt. Bi mi is dat anners. Wenn ick mit‘ Auto ünnerwegens bün, denn schall dat kommodig ween un Seekerheit vermiddeln. Dor mutt ook ’n anstänniged Radio bin ween, dat sick no wat anheuert, so’n Stern vöör an finn ick ook ni övel.
Overs ick bün ni so verrückt dorno, dat ick dor Spoilers anbuu oder dat Auto jeden Sünndag poleer un so.
Technisch in Ordnung mutt dat overs ween. Un wenn ick mien Seute froog: „Hest Du bi Dien Auto in de letzte Tied mol no Öl keeken?“, denn seggt se: „Mien Auto is blau!“ Mehr weet se dor ni över. Mehr will se dor ook gor ni över weeten. Na good.
Bi Kaffe is dat genau annersrüm. Kaffe hett bi mi blots een Zweck: De schall mi wook moken un wook holn. An un för sick mach ick Kaffe gor ni, also dat is keen Genussmiddel för mi.
Mien Madam mutt de Kaffe smecken. Un wenn se ’n Putt Kaffe tofot hett, de ehr richti good gefallt, denn kann se sick dor ook mol ’n halve Stünn mit befoten. „Oooh, de Kaffe smeckt. Finnst ni ook?“ „Hmm“, seggt ick denn, „is Kaffe ne.“ Un wenn mien Kaffeputt al is, tööv ick noch 25 Minuten bet se ehrn uthett.
Beer overs mach mien Madam överhaupt ni. Dor vertreckt se blots de Snut, annerlei wat för ’n Sort dat is. Ick dorgegen drink gern mol ’n Buddel Beer un dor mok ick ook Ünnerscheede. Overs ni so dull as dat Wienkinners bi ehrn Truubensaft mokt. Bi Wien gifft dat för mi blots seut un suuer. Ick bün mehr för suuer, mien Madam mehr för seut.
Tscha, ünnern Streek sünd wi ganz scheun ünnerscheedli. Overs to’n Glück treckt Gegensätze sick je an…
In düssen Sinn
3 min
January 22 Beter leven mit ’n „Digi-Schien“
Na, freut Ju sick ook al so dull as ick? Also op den nieden digital’n Föhrerschien meen ick.
De digitale Föhrerschien schall je „unsen Alldag erleichtern“, as man heuert. Jo, denn man nix as her dormit. Wat kann de Digi-Schien denn allns? Rosen meihn, Wäsche tosomleggen, Koken backen, de Stüüer moken un veellicht för mi to Arbeid gohn? Oh, wat freu ick mi. Ick krieg mi meist gor ni mehr in.
Wi schulln je jüst erst all unse Föhrerschiene in den nieden EU-Koartenföhrerschien ümtuuschen. Bi Androhung vun ’n Ordnungsgeld.
Overs lot‘ mi mol överleggen, wo dull hett dat Föhrerschien-Dokument, sick betlang överhaupt op mien Alldag utwürkt? Hmm…
Ick heff erst den rosarauden Schien hatt. Denn keem de Scheckkoart. Dor harrn öllere Semesters jümmers noch den grau’n „Lappen“, op denn man oftmols al gor nix mehr leesen kunn.
Vun de Koartenschiene heff ick nu al mien drütten, weil dor jedet Mol mehr opstunn as vörher.
Also: Veer Föhrerschiene, heet, dreemol ’n Stünn bi’n Kreis tööven, bet ick oproopen wurr. Den ersten, rauden Schien heff ick direkt no de Pröövungsfohrt kreegen.
Denn heff ick mien Föhrerschien in all de Johrn dreemol de Polizei bi Kontrulln wiesen musst. Mokt tosom, wenn’t hoch kümmt, 30 Minuten.
So. Dree’nhalf Stünnen in 30 Johr, dat hett an un för sick nix mit mien Alldag to kriegen, mutt ick seggen.
Wo schall uns de niede Digi-Schien denn nu hölpen? Dat ward sick wohrschienli noch rutstelln.
Kann man den Koartenschien, denn wechsmieten, wenn man ’n Digi-Schien hett? Nnnnä…, weil den digital’n Schien kann man blots anständi vörwiesen, wenn man ’n goode Mobilfunk-Afdeekung hett. Dat is je so’n Sook bi uns op’t Land. Un denn gült de digitale Schien ook fröhestens af 2030 in’t EU-Utland. Wenn man wieder wechfohrn will, kannst dat Dings so un so vergeeten.
Dat mit ’n Alldag erleichtern ward also erstmol nix. Schodt.
Un unsen oln Föhrerschien ward denn Sowat as unsen Reisepass to’n Autofohrn. Tscha, mitünner freut man sick eenfach ’n beten to fröh…

In düssen Sinn
3 min
January 15 Gott un de Welt un van Gogh
Wenn man sick de Natuur bekieken deiht, denn kann man je ganz scheun in’t Staun‘ kom‘, ne. All de Planten, all de Tiern, de so rümschnurrt – wo kümmt dat blots allns her?
Mennige Forschers seggt je, wat dat Leven huckepack mit Kometen op de Eer kom‘ is. Blots, wenn dat so weer: Wie is dat entstohn, bevör dat op de Kometen krabbelt is? Froogen över Froogen, wat Genaued weet man ni.
Un wat deiht de Minsch, wenn he wat ni weet? He glöövt. Dat’s je ook in Ordnung. Dat gifft Lüüd, de glöövt, dat de Eer 6000 Johr old is, un dat allns mitmol dor weer. Fix un ferti.
Dor kann man erstmol ook nix gegenan seggen. Ick tominst weer vör 6000 Johr noch ni op de Welt. Dat is je dat je mit dat Glööven. Man kann dat Gegendeel ni mol even bewiesen. Mutt man je ook ni. Vun mi ut kann jedeneen glööven, wat he oder se will. Liekers dink ick bilütten över den „leeven“ Gott no.
Wenn de Gott allmächti is, wenn he de Eer mit allns drüm an dran würkli ut nix in söben Doog trechzaubert hett, denn is dat je würkli allerhand.
Blots mit de Minschen hett he sick anschiend so’n lütt beten verhext. De sünd em ni so recht glückt. Dorüm hett he ehr je ook al mol mit de Sintfloot wechspöölt. Un in Sodom un Gomorrha hett he ehr mit Füüer dat Licht utknipst.
Dorno hett he dat overs noloten. Veellicht hett Gott sick dacht: „Och, goh mi af mit de dammeligen Minschen. Harr ick ehr blots ni mokt. Ick kümmer mi dor ni mehr üm, lot se doch moken, wat se wüllt.“
So hebbt de Minschen mokt, wat se even mokt. Un se hebbt sick alle Nees lang gegensiedig dat Fell över de Ohrn trocken. Dorför hebbt se jümmers al ’n Grund funnen.
Overs wat schall dat? Wi künnt doch ook anners. Veellicht „is“ Gott je gor ni leev – oder dat gifft em gor ni.
Veellicht harr overs ook de Moler van Gogh Recht hat, as he mol seggt hett, dat man Gott ni no de Welt beurdeeln schall. Se weer blots ’n Versöch un de is em ni gelungen. Overs dat mutt ’n Meister ween, de so’n Schnitzers mokt.
Jo, mi dücht, van Gogh weer ’n tehmli kloogen Kopp. Liekers hett he sick dat Ohr ansneeden…

In düssen Sinn
3 min
January 08 Oha, wi passt in’t Schema
Kann man Donald Trump ni ennli mol den Freedensnobelpries geeven? Eenfach so, ut de Reeg? Ick meen, Barack Obama hebbt se sien Freedensnobelpries je ook för warme Luft un nette Wöörd an’t Revers nogelt, weil he de Afsicht harr Guantanamo dicht to moken. Bi de „Afsicht“ is dat denn je ook bleeven. Worüm also ni so’n Pries för Trump.
He hett sogor al ’n Nobelpries-Stuuv in sien Huus in Florida inricht. Würkli. Jo, de Mann ward langom wunnerli.
Vörigen Sünnobend he hett he je Niclás Maduro ut Venezuela entföhrn loten. Un Fruu Maduro glieks mit. Trump wull den „Drogenterrorismus“ den Saft afdreihn, hett he seggt. Bi Drogen dink ick je an sowat as Kokain, Heroin, Haschisch un veellicht noch an Eiergrog. Overs kort no dat bi Maduro de Handschelln klickt hebbt, weer Trump blots noch vun Öl an snacken. Dösig, ne…
Un nu, wo he dat mit Venezuela trech hett, fallt em weller in, dat he je ook noch Grönland hebben will. Wenn he al den Freedensnobelpries ni kriegt, denn will he weenstern ’n Ieswüste mit Öl in Grund sien Eegen nööm‘. Dor is he ’n beten so, as ’n lütt‘ Kind, dat an de Kass‘ in Supermart no ’n Stück Schokolod‘ jault.
Overs – Oogenblick mol – Ieswüste mit Öl in Grund? Och du leeve Tied! In Momang is Dithmarschen je ganz genau dat: Siet Johrn hebbt wi dat erste mol weller ’n richtigen Winter. Bi uns süht dat ut as an Nordpol.
Jo, un wat hebbt wi vör Frie’chskoog? Genau, ’n Bohrinsel! De Mittelplate.
Ohaueha. Dithmarschen, also wi, passt genau in sien Schema. Hoffentli kriegt Trump dat ni spitz. Anners entföhrt he unse Kreispräsidentin un unsen Landrot un Mascheert hier in.
Also bidde, geevt em gau den Pries, ’n dubbelten Freedensnobelpries, nä, ’n Dreefachen. Mit Lorbeerkranz un Lametta op de Schullern, dormit he wat hett, wat för em noch nie een‘ kreegen hett un wat no em ook nie weller een‘ kriegen ward.
Veellicht wurr Trump, denn ennli Roh‘ geeven, un nix wieder ween as ’n wunnerlichen ölleren Mann. Un dat Beste: Dithmarschen weer weller vör em seeker…
In düssen Sinn
3 min
January 01 De Tokunft vun fröher
Prost Niejohr, leeve Lüüd. Un zack, hebbt wi 2026. Dösig, ne. In mien Schooltied in de 1980er Johrn, wurr noch doröver phantaseert, wat dat in’t Johr 2000 allns geeven wurr.
Sogor Damp an de Ostsee hett sick dormols Damp 2000 nöömt.
Jo, dat Johr 2000 stunn för de Tokunft, so, as se in de Seins-Fiktschn beschreeven wurr. Fleegende Autos weern dor noch de Ünnerkant. Sülms in de 1990er Johrn hett man je noch an sowat glöövt, as dat 2000 jedeneen in’t Weltall fleegen un Urlaub op’n Mond oder op’n Mars moken kunn. Wenn dormols över dat Johr 2000 snackt wurr, denn weer glieks so’n besünnere Opbruchs-Stimmung dor.
Tscha, un nu is dat Johr 2000 al mehr as ’n Viddeljohrhunnert her. Overs de Autos flücht jümmers noch ni. In’t Weltall reist ook blots wenige Privotlüüd, un würkli kommodig sünd de dorsten Reisen wiss ni.
Op’n Mond is siet 1972 keen Minschn mehr ween un op’n Mars – na jo, lot‘ wi dat. Dorför kiekt de mehrsten Lüüd duuernd op ehrn Smartfoon-Minikompjuter. De Dingers weern 1990 würkli noch ünner Seins-Fiktschn wechgohn.
Un wat de Medizin hüüt allns kann, dat harr sick vör 40 Johr ni mol ’n Arzt vörstelln kunnt.
Allgemein is dat Leven bi uns recht komfortabel worrn. Liekers ward de Kluft mang Arm un Riek ümmer grötter un deeper. De Minschen sünd sick ünnernanner ni mehr so greun.
Jo, man kann meist seggen, dat de ganze Welt ’n Fall för ’n Psüchater worrn is. Ich weet ook ni, wat ick dorvun holn schall. Jedenfalls heff ick mi den ganzen Krom no dat Johr 2000 ’n beten anners vörstellt.
Mien Tipp: De mächtigsten 20 Lüüd op de Welt schulln tosom för fief Weeken bi so’n Anti-Aggresschoons-Träining mitmoken, un dat Internet schull för ’n halved Johr afstellt warrn. Eenfach mol ’n beten Tempo rutnehm‘. Ick glööv, denn weern wi al ’n ganzed Enn wieder.
Man dörft je nochmol dröömen, denn de Gedanken sünd ook in’t Johr 2026 noch frie. Un veellicht kriegt uns je doch nochmol de Opbruch-Stimmung bi’n Mors. Ick wünsch Ju jedenfalls vör düt Johr alles Goode…
In düssen Sinn
3 min
December 23, 2025 Abstrakte Kunst un Nostalgie
Bald is dat sowiet. Hüüt Obend geiht dat an’t Geschinke utpacken. Dor ward de een oder anner wiss al so’n lütt beten opgereegt ween. Dat heuert dor je overs ook to.
Buten kann man in Düstern ’n Barg Hüüs bewunnern, de vun Duusende Lichters erstrohlt. Bi mennige Hüüs kann man würkli Kunst to dat seggen, wat dor ut all de lütten Lampen entstohn is.
Na jo, mitünner is dat sogor abstrakte Kunst. Dor bruukt man denn ’n beten, üm to begriepen wat dat schall. Mokt overs nix.
De Kinner hebbt nu al ’n poor Doog Ferien un freut sick doröver. Ick dink rund üm Wiehnachen overs gern mol an mien Grundschooltied trüch. Toerst weer ick in Bookholt, in de ole School an‘ Sportplatz, denn keem ick in Borg no de Grundschool weil wi ümtrocken sünd. Dor weer Fruu Dohrn mien Klassenlehrerin. Un Fruu Dohrn hett uns för de Ferien wiehnachtliche Geschichen vörleest. Dor weer overs noch wat Besünnered bi: Wi Kinner hebbt all vun to Huus ’n Tallilicht un Rietsteeken mitbringen dörfst, dormit vör jedet Kind ’n Licht brennt hett, wiel wi de Geschicht toheuert hebbt. Buten weer’t in de erste Schoolstünn je noch düster.
Un wenn ick dor in mien Licht keeken heff, wurr de Geschicht noch veel lebenniger. Dat weer veellicht scheun. Ick glööv, hüüt is dat gor ni mehr dinkbor: Kinner, de Kerzen un Rietsteeken mit no School bringt. Dor keem wohrschienli glieks de Polizei, de Füüerwehr un dat Ordnungsamt.
Dat is dormols overs allns good gohn. Dat Schoolgebüüd in de Bookholter Stroot steiht hüüt noch – ook wenn dor keen Schoolünnericht mehr in stattfinnen deiht.
Un mi ward nu noch ganz warm üm’t Hart, wenn ick an de scheun‘ Geschichen bi den Schien vun de Tallilichter trüchdink.
Dorüm wünsch ick nu all de Kinner, wat se ni blots Geschinke to’n Utpacken kriegt, sünnern, dat se ook mol wat beleevt, bi dat ehr de Harten warm ward, wenn se in övers veerdig Johr doran trüchdinkt.
Un all tosom wünsch ick nu ’n scheuned un besinnliched Wiehnachsfest un ’n gooden Rutsch in’t niede Johr…
In düssen Sinn
3 min
December 18, 2025 Tööven op Wiehnachen
Advent, Advent, Advent un noch mol Advent. Övermorn hebbt wi all de Lichter op’n Kranz togang. Jo.
Overs wo kümmt de Traditschoon mit den Adventskranz eegentli her? Dat wull ick mol weeten. Also heff ick noforscht un sogor wat rutfunnen.
Op de Idee is de Hambörger Theologe Johann Hinrich Wichern in’t Johr 1839 kom‘. Jo, genau de, no den dat Huus blang den Meldörper Dom an No’ermart nöömt is.
Dat is keen Tofall, denn Wichern hett de Diakonie op’n Weg bröcht. Dat weer overs lang ni allns. De patente Mann weer ook noch Sozialpädagoge, un he hett dorför sorgt, wat dat „preußische Gefängniswesen“ reformeert wurr. De Knastbröder schulln ni mehr in Eenzelhaft sitten, dormit se ni verrückt in Kopp wurrn.
As denn twee un mehr Spitzbooven tosom brummt hebbt, kunnen se sick al mol överleggen, wat se utfreeten wulln, wenn se weller frieloten wurrn. Tscha, allns hett twee Sieden, ne.
Un denn weer Wichern ook noch de drievende Kraft bi de Grünnung vun’t Ruuge Huus in Hamborg-Horn. Dat weer ’n Reddungshuus för arme Kinner. Un dat weer jümmers noch ni allns, wat he mokt hett. Jo, Wichern weer würkli ’n fixen Dutt.
Overs bi de Kinner sünd wi al op de richtige Spoor, wat den Adventskranz angeiht. Wichern wull de Kinner nömli dat Tööven op Wiehnachen lichter moken. Ick weet gor ni, wat de Kinner Jehann oder Hinne to em seggt hebbt. Jedenfalls hett he ’n Kutschrad nohm un dor veer groote Talliglichter op fastmokt – een’t för jeden Adventssünndag – un veele lütte – jümmers een’t för de Doog dormang. Un wenn all de Lichter brennt hebbt, denn weer Wiehnachen un dat Tööven weer vörbi.
Vun de veeln Lichter sünd noher blots noch de veer Grooten överbleeven, overs op de veer Lichter wüllt all, de Wiehnachen fiert, ni mehr verzichen.
Körter ward de Adventstied dör den Kranz twor ni, overs schmücker.
Un näste Week hett de Kranz sien Deenst för düt Johr weller dohn.
Dat is meist so as mit mien Deenst, denn an Heiligobend ick meld mi an düsse Steed to’n letzten Mol in düssed Johr. Un bet dorhen wünsch ick Ju ’n scheunde Tied…
In düssen Sinn
3 min
December 11, 2025 Nix in Büddel
Advent, Advent, Advent – Sünndag brennt al dat drütte Talliglicht op’n Kranz. Duuert also ni mehr lang, bet de Wiehnachsman kümmt.
Un de Wiehnachsmann, as he bi uns bekannt is, de kümmt ut de USA. Vun dor keem in Westdüütschland je veel no’n Tweeten Weltkrieg. Cola, Zigaretten, un noch so veel mehr. Dormols sünd de Amerikoners bi uns as de Retters fiert worrn.
Dor hett sick so’n lütt beten wat an ännert, dücht mi. Dor bringt in Oogenblick ’n oln witten Mann mit ’n orangschen Kopp tehmli veel dör’nanner. Donald Trump.
In Osten vun Düütschland, dor, wonehm 40 Johr lang de DDR ween is, harr Russland dat seggen. Genauer geseggt, de Sowjetunjon. Un jüst düsse Sowjetunion wünscht sick de ole witte Mann trüch, de dor dat seggen hett un de noch mehr dör’nanner bringt. Wladimir Putin. Noch leever weer he wohrschienli de Zar vun Russland un op’t Letzt‘ vun ganz Eurasien. Un dorto, de Kaiser vun‘ amerikanischen Kontinent to ween, wurr Trump ook ni nä seggen.
Egol. In Russland kümmt ni de Wiehnachsmann. Dor kümmt in de Niejohrsnacht „Väterchen Frost“.
Jo, un bi dat wat nu in Kreml vör sick geiht, löppt een dat ook würkli kold un frosti den Rüüch hendohl.
Na jo, de Wiehnachsmann, also de ut de USA, hett sick in Russland siet de 90er Johrn ook mehr un mehr dörsett. Dormit hett Putin vöriged Johr sluss mokt. He hett ’n Werbefilm dreihn loten, in den Väterchen Frost mit’n Panzer ünnerwegens is un den Santa Klooß mit all sien Rentiern un sien Sledden, mit ’n Raket meern bi’t Fleegen in de Luft jogt.
Dor fallt di echt nix mehr to in. Overs dat harr ook vun Trump kom‘ kunnt. Twee vun de mächtigsten Lüüd vun de Welt föhrt sick mitünner op as twee opfällige Göörn ut de Regenbogengrupp‘ in Kinnergoorn. Blots de Folgen sünd veel slimmer wenn Wladimir un Donald ehr drullige fief Minuten hebbt. Dor ward di Angst un Bang bi.
Dorüm wurr dat ook düssed Johr ni so dull mit Geschinke för de beiden utsehn. För ehr harr de Wiehnachsmann jüst so wenig in Büddel as Väterchen Frost…
In düssen Sinn
3 min
December 04, 2025 Weeten, wo dat längs geiht
Advent, Advent – un zack, sünd wi meern in de Wiehnachstied. De Tied in de veele Lüüd Besöch vun ehr Verwandschop kriegt.
Un wenn de Besöökers sülms fohrt, overs ni oder ni mehr weet, wo se langfohrn mööt, denn hett dat fröher heeten: Strootenkoarten studeern.
Dat weer ni för jedeneen wat. Un dat hett ook för veel Ehekrach sorgt.
Hüüt is dat anners, hüüt hebbt an un för sick all ’n Navi, so’n Navigatschoonsgerät. Dor gifft man in, wonehm man hen will un denn geiht de Reis‘ los. Ick heff je ook so’n Dings ne. So’n ganz spezielled, wo man ingeeven kann, wo lang un breed un swor mien Föhrtüüch is, un dat schickt mi denn ook blots dor lang, wo ick langfohrn kann un dörf.
Overs dat is je noch ni allns. De Apparot ännert mitünner eenfach de Streck, de ick fohrn schull. To’n Bispeel, weil irgendwo ’n Stau entstohn is oder so.
Un nochwat: Ünnen an de Kant steiht de aktuelle Klockentied un boben an de Kant steiht de Tied, to de ick dor ween schall, wonehm ick hen will.
Un wat schall ick seggen: Dat stimm jümmers op de Minut genau. Wo kann dat Dings weeten, wo lang dat duuert in Fierobendverkehr vun‘ Hambörger Fischmart no’n Heider Martplatz to fohrn? Dat is doch Hexenwark. Dat gifft dat doch gor ni.
Funktschoneert overs. Un dorüm lot ick dat Dings ümmer mitloopen – ook, wenn ick ganz genau weet, wo ick an mien Ziel kom.
Stellt sick vör, dat op’n Meldörper Martplatz een‘ no ’n Weg to’n Bohnhoff froogt ward un de Dorste seggt: „Dör de Kampstroot duuert dat negen Minuten, dör de Spreet- un Zingelstroot söben – eegentli – overs dor is hüüt Flohmart, dorüm bruukst Du dor nu twölf Minuten. Un mit Dien Schoh kannst Du bi beide Strecken twee Minuten toreeken.“ Dor wurr man overs kieken, ne.
Un genau dat kann so’n Navi. Dat is würkli phänomenol. Overs een Utreed‘ funktschoneert nu ni mehr, nömli: „Ick wurr di je würkli gern besööken, overs ick weet ni, wo man no Di henkümmt.“ Wenn Ju also noch keen Navi hebbt, överleggt sick genau, wat Ju sick so’n Dings to Wiehnachten wünscht…
In düssen Sinn
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…