Dentro da programación de Nadal, o Teatro Municipal de Tui acollerá o próximo luns, ás 12 h, o concerto dos coros infantís dos CEIP’s de Guillarei, Nº1, Nº2, Pazos de Reis, Randufe e Rebordáns. Hoxe coñecemos os detalles coa concelleira de Ensino e Cultura, Sonsoles Vicente; José Manuel Solleiro, da Coral Ponte das Febres; e con sete alumnas que participarán.

Dende hoxe está aberto o prazo de inscrición para os 5 obradoiros de Nadal que organiza a Biblioteca Municipal de Tui. Serán o 23, o 26 e o 27 de decembro e o 2 e 3 de xaneiro de 11:30 a 13:30 horas. Rafael Sánchez Bargiela, director da biblioteca, deu os detalles desta actividade e do Mercadiño Solidario de Libros que onte abriu na Sala Municipal de Exposicións.

O Club Bádminton Tui celebra este vernes o seu tradicional Torneo de Nadal na súa novena edición. Será no pavillón do IES San Paio a partir das 16.00 horas. Marisa Giráldez e Marisa Araujo convidaron ás familias a participar e fixeron balance do que foi este ano a nivel deportivo.

Galiclown, pallasos de hospital, vén de editar o seu calendario de 2025 que está xa á venda. En Tui pódense adquirir en TCopias e Bordahilo, e no bar O Descansiño, en Guillarei, ao prezo 5€

Cada mes se ilustra con fotografías dos pallasos e pallasas de Galiclown cos nenos e nenas do Hospital Álvaro Cunqueiro. Os fondos recadados irán destinados á actividade diaria que realizan, tal e coma explicaba Javier Argüelles de Galiclown.

Caldelas continúa esta fin de semana coa programación do seu Nadal Cultural. Este sábado 14 a cita é cunha andaina pola parroquia, visitando as casas participantes no concurso de decoración, para o que está aberto prazo de inscrición até o venres. Ao remate haberá música e chocolate. Mentres para o domingo organizan unha excursión a Priscos (Braga), para a que aínda hai prazas. Deunos os detalles Vicky Méndez, da Asociación Cultural A Insua.

A barbería Blackbird Concept de Tui obtivo tres estrelas na sexta edición dos premios SOYBARBUDO, celebrados o pasado 1 de decembro. Hoxe falamos cun dos seus fundadores, Igor Drozdov, que tamén foi recoñecido nese certame co primeiro premio ao Mellor Traballo Realizado.

Mañá mércores ás 20 h o Conservatorio de Música e a Escola de Música de Tui celebra o seu tradicional Concerto de Nadal no Teatro Municipal. Será solidario en favor de SOS Tomiño Baixo Miño, polo que a entrada será un quilo de alimentos non perecedoiros.

Rubén López, director do Conservatorio, presentou amais os tres concertos que ofrecerán no novo edificio da rúa Camilo José Cela, a próxima semana.

Este domingo 15 de decembro Andatui organiza a XI Andaina Solidaria en favor de SOS Tomiño Baixo Miño. Partirá ás 10 h ES dende a praza da Inmaculada e será preciso doar un quilo de alimentos non perecedoiros para participar. José Martínez Tato, presidente de Andatui, explicou que hai que inscribirse previamente porque haberá chocolate ao remate da camiñada.

Mañá temos nova cita no Cineclub Tui coa proxección da película "Dhogs", de Andrés Goteira. Haberá dúas sesións, a primeira ás 18.30 h e a segunda ás 20.45 h na aula da UNED.

Javier Argüelles, do Cineclub, deunos hoxe os detalles desta película. A entrada ten un prezo de 2 euros para os socios e 4,50 euros para o público xeral. Amais avanzou as novidades que chegan neste mes de Nadal.

Hoxe é o Día Internacional dos Voluntarios. Por este motivo coñecemos o labor que realiza a Agrupación de Voluntarios de Protección Civil de Tui, que precisamente nestes momentos ten en marcha unha campaña de captación de novas persoas voluntarias. Para falar da mesma estiveron no programa Día a Día, Juan González, presidente de Protección Civil de Tui, Óscar Rovira e Cristina Pazo, dous dos voluntarios.