Día a Día

O Festival Internacional de Documentais Play-Doc vén de ser nominado pola Feira das Industrais Culturais Culturgal, na categoría do Premio do Público.

Esta mañá tivemos ocasión de falar sobre esta nominación con Ángel Sánchez, un dos directores de Play-Doc.

A raíz da morte dun veciño do Porriño tras un ataque de vespas velutinas falamos con Jesús Asorey, presidente da Asociación de Apicultores de Galicia, sobre como actuar nunha situación semellante.

O vindeiro venres 24 de novembro o paseo da Corredoira será escenario dun fashmob solidario levado a cabo polo CEIP Nº1. Todos os nenos e profesores participarán nunha cita á que están invitadas tanto as familias dos alumnos coma todos os tudenses e que ten por obxectivo recoller auga potable para o Concello das Neves.

Tivemos ocasión de falar con Nina Méndez e Alba Estévez, dúas nenas de 3º e 6º respectivamente, e con Nuria Feijoo, unha das súas profesoras, sobre esta iniciativa solidaria.

O Espazo Xove de Tui acolle esta semana a primeira xornada presencial do proxecto Lidera, pero amais está preparando outras propostas de técnicas de estudo e de expresión oral e escrita de cara ás vindeiras semanas. Deunos conta de todas as novidades a directora do Espazo Xove, Mónica Bugarín.

María Jesús da Silva, concelleira de Urbanismo do Concello de Tui, e que foi recentemente expulsada de APTUI, deu conta hoxe da súa postura tras esta expulsión da que non recibiu notificación formal nin puido formular alegación. Explicou que tivo coñecemento da mesma polo escrito presentado no concello. Considera que esa expulsión non é formal mentres non se confirme, e nese senso sinalou que a secretaria municipal remitiu un requirimento a APTUI.

A Asociación de Comerciantes de Tui vén de presenter unha nova campaña para impulsar o comercio local. A campaña, organizada dentro da FESURGA, sera válida ata o vindeiro 7 de xaneiro, centrándose así na campaña de nadal.

Estivemos a falar con Juan Carlos Blanco, presidente de ACITUI, que nos explicou en que consiste esta iniciativa.

Esta mañá José Manuel Sousa, presidente de APTui falaba na RMT sobre os motivos para a expulsión de Mº Jesús da Silva, reiterando que a actual concelleira de urbanismo incumpriu dous artigos dos estatutos do partido e que non tiveron noticias sobre as súas decisións dende o mes de xullo. Por outra banda, con respecto á integración de APTui no PP Sousa quixo destacar que se trata dun acordo que existe, pero que non será efectivo se o PP non cumpre certos acordos, e preguntado sobre porque non se levou a cabo a expulsión antes da moción de censura recoñece que quizais foi un erro.

Laureano Alonso, concelleiro de Son de Tui e membro do grupo Mixto na corporación municipal de Tui, saiu ao paso das declaracións realizadas onte polo alcalde, Carlos Vázquez Padín, onde apuntaba que podería ter o edil certo interese na expulsión de Mª Jesús da Silva de APTUI e membro até o de agora do grupo Mixto.

No seu parecer o alcalde debería pedir a dimisión da edil coma concelleira.

Como cada fin de semana na Asociación Cultural Betún teñen oferta musical. Hoxe para todos os que queiran pinchar a súa música haberá unha nova sesión Disco Beta. Xa mañá contarán con un concerto a cargo das improvisacións de cuarteto de corda Suelen Estar Quartet. Deunos todos os detalles Sergio ALonso, que tamén nos avanzou algunha cousiña de cara á vindeira semana.

Este domingo 12 de novembro no Centro Cultural San Fins de Rebordáns organiza a Festa do Porco ao Espeto. Unha cita gastronómica que contará amais con exposicións, exhibicións e música en directo.

Estivemos a falar sobre esta iniciativa con Manuel Domínguez, da directiva da Asociación San Fins, que tamén que o Nadal Cultural de Rebordáns xa ten a súa programación pechada con teatro, música e monólogos.