Día a Día

A directora Xeral de Turismo da Xunta confirmou esta mañá ao concelleiro de Deportes de Tui a declaración do Descenso Internacional do Miño coma Festa de Interese Turístico Galego. Así o avanzou o propio Andrés Urseira á Radio Municipal de Tui congratulándose deste recoñecemento.

O próximo luns comeza na Aula da UNED de Tui o curso “Cómo mirar un cadro. Unha viaxe pola historia da pintura e os seus secretos”. Esta actividade correrá a cargo da tudense Sara Quintana. Celebrarase os martes de 18 a 19.30h ata o 6 de febreiro cun total de 20 horas lectivas. O prezo da matrícula é de 40€.

A actriz e presentadora tudense Nieves Rodríguez acaba de ser elixida como nova presidenta da Asociación de Actores e Actrices de Galicia, cargo no que sucederá a Ernesto Chao. Esta mañá estivemos a conversar con ela sobre a responsabilidade que supón facerse cargo dunha asociación que agrupa a máis de 300 profesionais. Amais falounos das prioridades da Asociación e dos seus proxectos actuais.

A Biblioteca Pública Municipal de Tui entregou esta semana aos “Mellores Lectores do Ano” na categoría infantil e de adultos, diplomas que recaeron en Xenxo Paramos Freiría de 7 anos, estudante de 2º Primaria, que levou en empréstito este ano 78 libros, e Mª Rosario Alfaya Fernández de 70 anos e xubilada que levou emprestados 86 libros no que vai de ano. Cada un deles levou un diplomas e un lote de libros.

Esta semana dá comezo na Guarda a proposta Diálogos en Educación, que este ano cambia as súas datas para celebrarse no outono. Será este venres ás 20.30h coa intervención de Joana Pereira, psicóloga no Centro San Xerome Emiliani.

O seu faladoiro desenvolverá un enfoque da educación baixo o título “Educación consciente baseada en Mindfulness”, e con ela estivemos a conversas sobre este concepto e as súas aplicacións.

O IFEVI acolle dende hoxe Finde.U a Feira Internacional do Emprego Universitario nas que están a participar 60 empresa. Daba todos os detalles Alejandro Martínez, responsable da área de emprego da Uvigo.

A cantante tomiñesa Andrea Pousa estreará o seu primeiro traballo como solista despois de 15 anos de carreira baixo o título “Respirar”. Será este xoves, 26 de outubro no Teatro A Fundación a partir das 21h cun repertorio que reúne temas en Galego, Castelán e Portugués.

Esta mañá tivemos ocasión de conversar con ela na Radio Municipal de Tui sobre este disco.

Despois dos incendios forestais acontecidos nos últimos días a empresa tomiñesa Veraleza decidiu colaborar na recuperación dos bosques queimados a través do lanzamento de “Súmate al verde”.

Para esta campaña Veraleza doará un total de 1000 árbores destinadas á reforestación das zonas afectadas, amais teñen habilitada na súa páxina web unha plataforma de donativos.

Falamos sobre esta iniciativa con Tati Corbacho.

Unha das citas no Teatro Municipal desta fin de semana é o espectáculo musical “Aire”, da man de María Fumaça.

A locomotora musical de María Fumaça chega a Tui coa súa nova proposta. Desta volta presentan novas latitudes musicais, acompañadas pola ilusión de sempre e cheos de entusiasmo.

De "Aire" e do proxecto de María Fumaça falamos con Uxía Senlle.

Unha fin de semana mçáis a música chega á rúa CUenca da man da Asociación Cutural Betún. Hoxe permanecerán pechados, pero mañá sábado o cuarteto instrumental FrekBeat porá ritmo a unha noite da que nos falou Jorge Aldir.