Hoxe ás 19:00h a Área Panorámica, acollerá unha mesa redonda “Tui 2020: contribucións á evolución da cidade” coa que se clausura a exposición que a Escola Superior Gallaecia, ESG, de Vila Nova de Cerveira presenta en Tui dende o pasado mes de xaneiro. Gilberto Carlos, director do curso de arquitectura e urbanismo da ESG; deunos conta desta proposta.

Ángela Vidal foi das primeiras arquitectas na comarca en abrir o seu propio estudo independente. Hai 26 anos que comezou a traballar nun sector, o da construción, dominado polos homes. Nestas case tres décadas de traballo avanzouse positivamente no seu campo na igualdade da muller aínda que tamén recoñecía que ten notado un retroceso no trato cara a muller nas novas xeracións.

No Betún hoxe venres celebran a tradicional Jam Session de cada primeiro venres de mes que foi aprazada até esta noite. Boa música e improvisación total é a idea chave desta noite. Pola súa parte, tamén ás 22h pero mañá, a cantautora Miriam Sandoval interpretará a mellor música arxentina coa súa gran riqueza poética coincidindo co Bicenenario da Declaración de Independencia do país.

1.200 ciclistas participarán este domingo na VI BTT Eurocidade que sairá ás 9h dende o Paseo da Corredoira, a onde volverá sobre ás 10h. O participantes elixirán entre unha ruta de 46 quilometros e outra de 73 Km.

A tudense Zaida Diz Méndez, enxeñeira mecánica que traballa na empresa Utingal, foi hoxe a nosa convidada na rolda de entrevistas da campaña "Pola igualdade real". Considera que é moi importante o papel da educación na igualdade de xénero, ao tempo que destacaba que se deberían apoiar políticas de incorporación da muller ao mundo laboral, facilitando a conciliación da vida laboral e familiar.

Hoxe repasamos os petiscos que ofrecen o bar Antoxo e o Vello Cabalo Furado co gallo do Saborea Tui que se celebra entre as 19h e as 23h dos venres e sábados no mes de marzo.

O 19 de marzo, o Balenario de Caldelas acollerá un acto de homenaxe ao que fora director do IES San Paio de Tui, Constantino Fernández Rodríguez, Tanto, quen finou neste pasado mes de xaneiro. O acto terá lugar ás 18:00 horas e busca converterse nun evento de lembranza ao querido mestre, con música e baile para celebrar a súa figura.

Muller, deportista e nai. Coa triatleta Aída Valiño comezamos hoxe rolda de conversas con mulleres dentro da campaña “Pola igualdade real”. Ela falounos da súa experiencia coma deportista profesiona, pero tamén da súa percepción da situación da muller na sociedade.

Un centenar de persoas viuse afectada polo peche repentino e sen explicacións dun establecemento de coidado e estética situado en Tui. Trátase de Conlaser, unha empresa con sede en León e que conta con centros en diferentes provincia españolas. Os afectados, que compraran bonos de depilación a longo prazo por adiantado, viron como dun día para outro o establecemento pechaba e se lles suxería que deberían completar o tratamento en Portugal.

Este venres continúan as xornadas do programa Enredos no Espazo Xove de Tui. Esta terceira xornada está destinada ao asesoramento para a participación en programas xuvenís. e nomeadamente no Iniciativa Xove da dirección xeral de Xuventude. Neste programa, facilítase a posibilidade de subvención do 100% de proxectos presentados por asociacións e grupos informais.