Día a Día

A Sala Félix Rodríguez da Área Panorámica acollerá este venres, 20 de xaneiro, ás 18h unha charla sobre a mediación. Os asistentes á charla poderán coñecer polo miúdo coma a mediación pode axudar na resolución de conflitos, sendo un medio alternativo ou complementario a un proceso xudicial aplicable no ámbito familiar, empresarial, de comunidades de veciños.

A concellería de Cultura de Tui vén de facer público o balance da actividade cultural desenvolvida no Teatro Municipal ao longo de 2016. A concelleira María José González, valorou positivamente os datos do pasado ano no que 20.000 espectadores pasaron polo Teatro Municipal, e avanzou que en breve presentarán a nova programación.

Este luns comeza na Aula Uned de Tui un curso de introducción á viticultura. O obxectivo do mesmo é introducir ao alumno no coidado e cultivo da viña, prestando atención ás variedades vitivinícolas galegas.

Esta noite a Asociación Cultural Betún comezará a festa co seu encontro mensual de música improvisada, a Jam Session. Será a partir das 21h. Pola súa parte, o sábado a cita será dobre. Pola tarde, de 17 a 20h celebrarase un obradoiro de Theremin. Contará cunha breve introdución a este instrumento único seguido de demostracións e explicacións de funcionamento. Ten un custe de entre 8 e 10€. Xa na noite do sábado, a partires das 22h chega o concerto de Modulador de Ondas, one-man-band que toca a guitarra e o theremin.

Unha semana e máis de 5.000 quilómetros polo deserto e o norte de África. Todo para levar mantas e material escolar aos habitantes da zona. Esa é a experiencia que mañá Piño Gómez, xunto a outros compañeiros de Conrazones, relatará nunha charla no Centro Cultural da Guarda. Hoxe o presidente da asociación pasou polos nosos estudios para contarnos a súa experiencia.

A Área Panorámica acolle ás seis desta tarde o cuarto Faladoiro de Educación organizado polo Concello de Tui e o Colexio Rural Agrupado Mestra Clara Torres.

Nesta ocasión a actividade consistirá nun obradoiro de relaxación a cargo de María Reboreda e Javier Cebada.

María Reboreda explicaba que no obradoiro desta tarde búscase establecer un protocolo de técnicas asociadas ao ioga para coñerse a un mesmo, dirixido tanto a pais coma a fillos. Será na Área Panorámica con entrada pola fachada principal na porta 4.

?

Aula da UNED de Tui inicia a actividade deste primeiro trimestre de 2017 cun curso de iniciación á viticultura que comeza o próximo luns. O obxectivo do mesmo é introducir ao alumno no coidado e cultivo da viña, prestando atención ás variedades vitivinícolas galegas.

Durante o ano 2016 un total de 54.466 persoas demandaron información turística na Oficina Municipal de Turismo de Tui, situada na praza de San Fernando, e no Punto de Información Turística, na praza da Inmaculada. Dende o Concello fan un balance moi positivo, xa que case duplica a cifra rexistrada en 2015, con 28.082 consultas, cando o período de cómputo foi menor abrindo a oficina só de abril a decembro.

65 expositores danse cita esta fin de semana na II Mostra da Camelia Cidade de Tui que se vai celebrar na Sala de Exposicións Municipal na Área Panorámica. Será inaugurada o sábado ás 12.30h e poderá visitarse o sábado de tarde e o domingo todo o día. Agárdanse centos de visitantes.

A campaña informativa posta en marcha pola Xunta, a través da Consellería de Economía, Emprego e Industria, para informar os consumidores sobre a última sentenza do Tribunal de Xustiza da Unión Europea relativa ás cláusulas chan chega a Vigo.