Día a Día

O Rosal celebra mañá as Festas do Pilar e máis a XXIX edición da Romancha do Cabaqueiro, onde se pon en valor e se rememora o vello oficio dos cabaqueiros rosaleiros. Pero antes, hoxe mesmo, o Concello organiza un obradoiro de creación de tellas con torno na Praza do Calvario onde se instalou unha carpa por mor da chuvia. Está destinado para que os mais cativos vivan o oficio dos seus maiores. A chuvia non afecta aos obradoiros, pero si afecta a outros festexos programados. Cancélase a actuación da orquestra Marimba prevista para esta noite e o grupo de folk “Tanto Nos Ten” actuará no auditorio municipal.

Mañá mércores, a partires das 17:30, terá lugar o pregón a cargo de Serafín Dorado e durante todo o día produciranse exhibicións de oficios artesanais baixo a carpa da Praza do Calvario. Amais, o concello ten en marcha e de forma paralela dúas exposicións, unha de debuxos e pintura e outra titulada “enerxía, auga e máquinas”.

Máis de 41.500 persoas en toda Galicia sofren dunha enfermidade mental, realidade na que hoxe poñemos o aceno co gallo do Día Mundial da Saúde Mental. A asociación Avelaíña, con sede na Guarda e Baiona, organiza para hoxe, baixo o lema “Son coma ti pese a que aínda non o saibas”, unha xornada informativa en Ponteareas.

A desinformación e a falta de coñecemento sobre os trastornos mentais produce que en moitas ocasións a sociedade non comprenda, estigmatice, discrimine e rexeite ás persoas que teñen este tipo de problemas de saúde.

O próximo mércores, 12 de outubro, o Paseo da Corredoira, acollerá a I Feira Magosto Popular Solidario organizado polo Concello de Tui coa colaboración de PPartmin Creativas. Antigüidades, artesanía, produtos ecolóxicos, gastronomía... serán algúns dos produtos que atoparemos xunto a un amplo programa de actividades paralelas dos que nos falaron o concelleiro de Turismo, Laureano Alonso, e Belén Guisande de PPartmin.

Este domingo o Concello de Tui recibirá o premio AZOR 2016 pola súa defensa dos valores das Forzas Armadas e especialmente da Brilat. Será nunha cerimonia oficial na Alameda de Pontevedra onde o alcalde de Tui, Enrique Cabaleiro, recibirá o galardón persoalmente. Un premio que o Xeneral da Brilat, Luis Cebrián, xustificaba ao ser, nas súas palabras a cidade, xunto con Pontevedra, coa que este corpo do exército se sinte máis próximo.

O grupo de teatro Chévere abre esta noite a programación de outono no Teatro Municipal de Tui. Unha oferta integrada por dez espectáculos dos que hoxe falaba na nosa sintonía a concelleira de Cultura, María José González. Valorou positivamente a oferta cultural deste ano na que está a rexistrarse moita participación do público.

A coordinadora da aula da UNED de Tui, Margarita Pino, contounos coma se presenta o curso 2016/17

Os cursos de arte volven á Guarda da man de Gemma Marqué. Impartiranse dous cursos, un de carácter teórico titulado “Mulleres, artistas por descubrir”, no que os asistentes poderán coñecer a vida e obra de creadoras de tódolos tempos , e outro práctico de “Métodos de debuxo e pintura”. Serán na casa taller situada no porto guardés.

Dende o pasado 23 de setembro catro artistas internacionais están a traballar en Cerveira para dar forma a catro esculturas de 2 metros de altura. A búlgara afincada no Baixo Miño, Liliya Pobornikova, xunto co colombiano Fernando Pinto e os taiwaneses Lee Zih-Cing e Teng Shan-Chi, son os artistas que crearán as pezas escultóricas en marmol portugués. Unhas pezas das que nos da conta Pobornikova.

Este sábado ás 17h celébrase a III Andaina organizada pola Asociación Arume de Malvas cun percorrido pola ribeira do río Furnia, nas parroquias de Pexegueiro e Malvas. A saída será do torreiro de festas e a duración aproximada é dunha hora de dificultade doada. Ao remate, ofrecerase unha merenda tradicional composto por un bocadillo, castañas, sopas de burro cansado e viño. Todo amenizado por un concerto da Banda de Gaitas Arume de Malvas. O prezo é de 3€ máis 1€ de donativo para SOS Tomiño Baixo Miño. A inscrición pode facerse no teléfono 655 60 27 87 ou no email [email protected].

A Aula Uned de Tui organiza para este mes un curso de manipulador de alimentos no sector vitivinícola que ten como obxectivo formar as persoas que traballen neste sector para que sexan quen de desenvolver as súas actividades dun xeito correcto.