Die Suid-Afrikaanse Polisiediens (SAPD) is om al die verkeerde redes in die kollig. Personeel én die publiek is toenemend bekommerd oor die stand van die polisiediens en die veiligheid wat dit veronderstel is om te verseker. In hierdie week se episode gesels Dirk Hermann met Theunis van Staden oor die uitdagings waarmee die SAPD tans worstel, die gemoedstoestand onder personeel en die pad vorentoe. Is daar nog ʼn uitweg, of gaan transformasie steeds koning kraai?

In ʼn onlangse plasing op sosiale media is daar ʼn teiken op Dirk Hermann se voorkop geplaas ná afloop van ʼn artikel wat in Rapport verskyn het. In hierdie week se episode gesels Dirk oor die belangrikheid van eerlike gesprekke en dat ons mekaar se menings moet respekteer, selfs wanneer ons van mekaar verskil. Luister saam en lug jou mening.

Die afgelope week het Solidariteit ʼn hofbevel verwelkom ná ʼn dringende aansoek oor die onaanvaarbare vertragings met die uitreiking van rooiseëlsertifikate, wat ambagslui weerhou om hul kwalifikasies ten volle te benut. In hierdie week se episode gesels Dirk met Stef Pretorius, koördineerder van Solidariteit se Ambagnetwerk, oor die hofbevel, wat dit vir ambagslui beteken en Solidariteit se rol in die proses vorentoe.

Die afgelope week het Bokkieweek hewige debat ontlok. Kritici beweer dat die geleentheid rassisties is – maar wie is dié kritici, en waarop berus hul beskuldigings? Dirk Hermann gesels in hierdie week se episode van Die Solidariteit Wêreld met Kallie Kriel, uitvoerende hoof van AfriForum en een van Bokkieweek se borge, oor die omstredenheid en die rassedebat wat rondom die geleentheid ontstaan het. 

Die krag van Solidariteit lê in die gemeenskap. In hierdie week se episode van die Solidariteit Wêreld deel Dirk Hermann die gevoel van gemeenskap by Bokkieweek. Hy gesels oor die verskil wat dit maak wanneer almal saam staan en hoe jy nie moet wag vir die verskil nie, maar eerder self die verskil moet wees wees. Kom kyk saam en deel wat gemeenskap al vir jou beteken het.

Ons wil ons kinders beskerm; daarom moet ons ons skole beskerm. In hierdie week se episode van die Solidariteit Wêreld gesels Dirk Hermann met Werner Human oor die Solidariteit Beweging se aanbod vir volhoubare onderwys. Werner deel ook sy insigte oor die Solidariteit Skoleondersteuningsentrum (SOS) se jaarlikse Nasionale Kongres, wat verlede week plaasgevind het, en verduidelik hoe oplossings uit die gemeenskap voortvloei. Dit is die klein treë wat diep spore laat. Volg hierdie skakel om toegang tot die volledige aanbod te kry: https://beweging.co.za/onderwysaanbod/

Waar kom Solidariteit se krag vandaan? In hierdie week se episode van Die Solidariteit Wêreld gesels Dirk Hermann hieroor. Solidariteit se voete staan stewig in die gemeenskap en ons werk vanuit die gemeenskap. Ons doen dit vir elke mens daar buite wat hoop op ʼn beter toekoms, maar nie net agteroorsit en wag vir iets om te gebeur nie. Dit is vir elke mens wat wil opstaan en help bou om saam ʼn nuwe weg vir die volgende generasie te baan. So, waar kom Solidariteit se krag vandaan? Kyk hierdie week se episode en gesels saam.

Van stormagtige waters tot ʼn golf van vrede in die Straat van Hormoes – maar wat beteken dit vir ons? Die afgelope paar maande het die wêreldekonomie aansienlik verswak, met lande wat onder bykomende druk weens die oorlog in Iran gebuk gegaan het. Suid-Afrika was geen uitsondering nie. In hierdie week se episode gesels Dirk en Jaco oor die vredesooreenkoms, die uitwerking daarvan op brandstofpryse en wat dit vir ons in die toekoms kan beteken.

WerfNet is meer as net ʼn werwingsmaatskappy; dit is jou vennoot in die werwingsproses. In hierdie week se episode gesels Dirk Hermann met Dané Visser, direkteur van WerfNet, oor die belangrikheid van aanstellings op meriete. WerfNet het ʼn gaping in die mark gesien en is hier om jou deur die proses te lei. Kyk saam en deel jou mening oor aanstellings sonder meriete.

Terwyl die ANC politieke teater speel, word regte mense se lewens elke dag geraak. Vir die regering mag dit dalk net speel-speel wees, maar die gevolge is werklik: Duisende mense verloor hul werk en sukkel om vir hul gesinne te sorg as gevolg van die besluite wat geneem word. In hierdie week se episode gesels Dirk Hermann met Connie Mulder oor hoe rassewette teen 2030 beëindig kan word. Die rasbuffel moet val, en ons sal nie rus totdat dit gebeur nie.