今集，先會略略引述立場新聞就黎智英、鄒幸彤、何桂藍未經批准集結全部罪成嘅記錄。

然後繼續《25座二戰紀念碑教我們的事》，上集講大洋國，今集講英國，同埋意大利、韓國、日本。本來呢本書嘅第一部係講英雄，講到英國同意大利就完咗第一部，但係我嘅貪心，偷偷地寫多個韓國，再忍唔住講埋日本，就係咁，呢集比較長。

喺講英國嘅轟炸機司令部紀念碑嘅時候，我哋會發現一個政府會將一啲醜惡嘅現況隱藏，就好似唔透露轟炸機以炸平民為目標，而不斷話轟炸機係結束戰爭嘅方法、只攻擊軍事目標。到底英國社會點睇轟炸機，而退伍嘅軍人又點睇呢？理應作為主角嘅退伍軍人，係咪好似雕像上嘅英雄一樣，昂首闊步呢？

然後我哋會講講意大利嘅陣亡者神龕，陣亡者神龕同呢一部嘅其他紀念碑唔同，陣亡者神龕係由民眾自發去建立，再被政府承認為一個永久嘅紀念碑。喺陣亡者神龕，你唔會見到一個個體代表全體嘅雕像，而會見到二千幅反法西斯嘅英雄嘅遺照。係咩驅使到民眾咁團結去自發起呢個紀念碑？呢個紀念碑象徵嘅意思，同二戰時候嘅意大利軍隊有咩關係？

我哋可以喺整個第一部當中，發現英雄具有好多唔同嘅面向，「實際上，英雄可以係舊時代嘅眼淚、鎮壓者、國家嘅靈魂、人造嘅再世基督、被遺忘但俾人擺上檯嘅軍人、同埋烈士、受害者，但我哋好多時忘記/忽視咗呢啲身份，全部統稱為英雄。」

我諗呢一部最值得我哋去記住嘅，係每一個英雄紀念碑象徵住某某意底牢結，而某某意底牢結具有一啲目的，想去說服人民一啲嘢，當我哋深入去搵呢個意底牢結嘅根源，我哋會發現故事比我哋想像嘅，往往要複雜，面對複雜嘅世界唔容易，但我相信比起用簡單嘅思維去面對複雜嘅世界，最終嚟得要無咁痛苦。

跟住，我哋講講第二章──烈士，先講嘅係韓國嘅和平少女像，睇睇一個咁簡樸柔弱嘅紀念碑，背負住一個幾沉重嘅歷史，而呢個歷史點樣借由紀念碑將舉國嘅憤怒壓喺日本身上。

最後，講講日本靖國神社點解會帶嚟咁多嘅爭議。

我會同大家一齊思索一下，受害者、加害者同政府之間嘅關係，希望大家唔會，亦唔需要成為歷史嘅囚徒。

歷史會被某啲人視為鼓勵、勇氣嘅泉源，但對我嚟講，歷史係會令人受傷，每個人都係歷史嘅受害者，因為今日嘅一切，源於過去嘅唔文明所建構，歷史嘅鮮血，造就今日嘅我，無論係多面嘅英雄，定係如恆河沙數嘅烈士，如今都一一逝去，踐踏住佢哋屍骨嘅我，要做啲咩先唔會辜負呢啲亡靈呢？

下集，會延續烈士嘅話題，去同大家繼續面對歷史。