喺《中國哲學史大綱》入面，主要就講咗儒道墨法。喺呢四家當中，依家嘅人最唔熟悉嘅，應該就係墨家。但其實喺春秋戰國時期，墨家係非常著名，孟子形容：「天下之言，不歸楊，則歸墨。」意思係當今天下嘅言論，唔係討論楊朱，就係討論梗墨子，楊朱係為我主義，我哋有機會再講，今集我哋要講嘅，係為我主義嘅相反－－講兼愛嘅墨子。我哋喺EP38講儒墨之別嘅時候，有提過墨子就好似一盞照亮天下嘅聚光燈，大家有無諗過呢一盞燈點解要咁辛苦去照亮天下呢？點解要苦口婆心對天下人講「非攻」、喺春秋戰國嘅諸侯國互相兼併嘅時候去說服國君唔好打其他國家呢？

如果用政治光譜去理解墨子嘅兼愛，咁墨子就非常之左，甚至可能會左到被人稱為左膠，但呢個左膠有春秋時期諸子之間嘅最強動員能力，唔單止有理想，仲有實牙實齒嘅實力。「講機械叻過魯班、義字當頭、為人哋國家趕十日十夜路、用比喻說服楚王唔好打人、有能力同弟子去守一座城池，對抗一個國家嘅軍隊、靜靜做事唔張揚、談論天下，呢一個，就係墨子。」手下嘅弟子個個願意捨生取義，「墨子服役者百八十人，皆可使赴火蹈刃，死不還踵。」《淮南子・泰族訓》如果要我將墨子去類比金庸當中嘅角色，就會係郭靖，為咗天下放棄一切個人私利、兒女私情，頭也不回咁去襄陽抵禦蒙古南下，呢一種嘅「俠義」精神，就係墨子精神嘅體現。

即使墨家呢個名已經從我哋嘅日常當中消失，其實佢嘅內容、精神仍然一直流傳至今，只係我哋好易忽略咗。我哋就要用兩集嘅時間去為你講講墨家嘅關懷、動人之處，而墨家嘅哲學態度好重，去求出個分別。今集內容包括墨子嘅背景同埋墨子哲學中嘅應用主義：

・墨子嘅哲學係一一對應住儒家

墨子：

「......但宋國何罪之有？楚國明明有大把地但唔夠人，打仗就會令本身嘅唔夠人再減少（因為會戰死），爭奪一啲本來就有多嘅嘢，唔能夠話係有智（智慧）。宋國無罪但楚又打佢，唔能夠話係有仁。知道楚要打宋又唔阻止，唔能夠話係忠。試過阻止楚王但阻止唔到，唔能夠話係強。依家你嘅義話唔可以殺一個人但可以殺一個國家嘅人，咁唔能夠話係知類（知道分寸）。」 

「有朋友問墨子：「呢個天下嘅人都唔行義，你自己一個咁辛苦行義做咩啊？不如算啦。」墨子就話：「依家有十個人，九個喺度hea，一個喺度耕田，｛咁耕田嗰個應該點做？｝耕田嗰個就唔可以唔努力啲。點解？因為食嘢嘅人多，而耕田嘅人少。依家天下唔行義，你應該支持我去行義，點解要阻止我呢？」」