Калій у абмен на Бяляцкага і Бабарыку — Еўразум за 15 снежня | Новости Беларуси за 15 декабря by Euroradio

Вакол перамоў прадстаўнікоў Трампа з Лукашэнкам шмат палітычнай барацьбы. Асабліва калі ўлічыць той факт, што яны маюць практычны вынік. З аднаго боку на свабоду выходзяць палітвязні, з іншага — з рэжыму здымаюцца санкцыі ЗША. Адныя палітычныя сілы кажуць, што менавіта да іх парадаў амерыканскія перамоўшчыкі прыслухоўваюцца, іншыя называюць першых хлусамі і кажуць, што кансультуюцца з імі, хтосьці трэці выскачыў з ценю і заяўляе, што ён на ўсё ўплываў. А вызваленыя і дэпартаваныя з краіны маюць патрэбу ў падтрымцы, дапамозе і вырашэнні пытанняў з дакументамі, яшчэ большая колькасць чакае вызвалення.

Ці былі кансультацыі амерыканскага боку з прадстаўнікамі дэмсіл і на якім узроўні яны адбываліся? Чаму гэтым разам дэпартацыя адбылася ва Украіну і наколькі нечаканым стаў гэты кірунак? Ці будзе аказаная падтрымка па легалізацыі для новых дэпартаваных вязняў і што змяняецца для Офіса пасля апошняга вызвалення? Гэтыя ды іншыя тэмы абмяркоўваем у жывым эфіры Еўрарадыё з першым дарадцам Святланы Ціханоўскай Франкам Вячоркам

Вынікам перамоў спецпрадстаўніка Трампа па Беларусі Джона Коўла з Лукашэнкам стала зняццё з беларускага калію санкцый ЗША, накладзеных яшчэ ў 2021 годзе. Адметна, што нічога не прагучала наконт еўрапейскіх санкцый, без зняцця якіх беларускі калій наўрад ці патрапіць да патэнцыйных заходніх пакупнікоў. Праўда, прагучала заява, што Лукашэнка нібыта паабяцаў спыніць залёты “шарыкаў” з кантрабанднымі беларускімі цыгарэтамі ў Літву. Але тут шмат пытанняў, пачынаючы ад таго, ці здолее спыніць і ці адкрые гэта дарогу ў порт Клайпеды.

Ці было рашэнне аб зняцці санкцый узгодненае з Літвой і Еўрасаюзам ці Трамп не лічыць патрэбным з імі нешта ўзгадняць? Чаму Лукашэнка не захацеў дэпартаваць палітычных вязняў у нейкую з краін ЕС і чаму быў абраны менавіта ўкраінскі напрамак для дэпартацыі вызваленых закладнікаў? Ці можна верыць абяцанням Лукашэнкі спыніць эскалацыю з Літвой? На гэтыя ды іншыя пытанні ў эфіры Еўрарадыё адказвае дырэктар даследчых праграм Усходняга партнёрства і Расіі Фінскага інстытута міжнародных адносін, адзін з аўтараў кнігі "Belarus's Relations with Russia: Is the Balancing Act Ending?" Аркадзь Мошас

Візіт у Мінск спецпрадстаўніка Трампа па Беларусі Джона Коўла чакана скончыўся вызваленнем палітвязняў і анансаваннем новых санкцыйных саступак з боку ЗША. Але ёсць нюанс. І не адзін. Найперш, на волі выйшлі не 150 чалавек, як ад пачатку анансавалася прэзідэнтам ЗША, а толькі 123 вязні. І як выглядае, не ўсе яны — палітвязні. Па-другое, асноўная частка вызваленых нечакана была перанакіраваная ва Украіну. Што да “плюшак”, то наўзамен Лукашэнка атрымаў зняццё санкцый з беларускага калію. Санкцый, накладзеных ЗША, — еўрапейскія застаюцца, і гэта таксама цікавы момант. Тым не менш ужо ідуць размовы пра працяг перамоў і намер вызваліць не менш за тысячу вязняў з-за кратаў.

Ці будзе ўспрынята Трампам як абраза з боку Лукашэнкі тое, што колькасць вызваленых зменшылася, і наколькі раўназначны абмен паміж ЗША і Мінскам адбыўся? Чаму быў абраны менавіта ўкраінскі кірунак для дэпартацыі вызваленых закладнікаў і якім можа быць працяг гэтай гісторыі? Ці адкрые зняццё санкцый дарогу для беларускага калію на Захад і якіх змен чакаць дэмсілам? Пра гэта і шмат што іншае мы разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

ЗША знялі санкцыі, накладзеныя на беларускі калій. Пра гэта паведаміў спецпрадстаўнік прэзідэнта ЗША Трампа Джон Коўл па выніку перамоў, якія прайшлі Мінску 12 і 13 снежня. Гэта стала галоўнай навіной для лукашэнкаўскай прапаганды. Вось толькі адказу на пытанне, як гэта дапаможа пастаўляць калійныя ўгнаенні з Беларусі ў тыя ж ЗША альбо Еўропу без магчымасці доступу да порта ў літоўскай Крайпедзе, няма. Нічога не чуваць і пра нейкія дамоўленасці паміж Літвой і Беларуссю адносна дээскалацыі сітуацыі на мяжы. Хоць Літва ўжо і заявіла пра гатовасць да палітычных перамоў на ўзроўні спецпасланніка МЗС Літвы, які можа паехаць у Мінск.

Ці сталі б ЗША здымаць санкцыі з беларускага калію без папярэдняй дамоўленасці на гэты конт з Літвой і ці здыме цяпер Літва свае санкцыі з беларускай калійкі? Чаму Вільнюс змяніў стаўленне адносна ўзроўню перамоў з Мінскам і ці дапаможа гэты крок зняць напружанасць на мяжы і ў адносінах паміж нашымі краінамі? Ці гатовая Літва прыняць новую групу беларускіх палітвязняў і ці магчыма абысці Дублінскі рэгламент? На гэтыя ды іншыя пытанні ў эфіры Еўрарадыё адказвае літоўскі палітычны філосаф, прафесар кафедры філасофіі ўніверсітэта Вітаўта Вялікага Гінтаўтас Мажэйкіс (Gintautas Mažeikis)

Вызваленне палітвязняў — стрым / Освобождение политзаключённых 13 декабря by Euroradio

Калі ўжо святкаваць беларускія народныя святы, то каб у іх быў свой, адметны беларускі вайб. А якія ж Каляды без калядных спеваў ды пачастункаў, а Раство — без батлейкі? Менавіта таму, беларусы ЗША ўласнымі намаганнямі зладзілі гастрольны тур для двух выбітных дзеячаў: спевака Сяржука Доўгушава і акцёра Аляксандра “Маляваныча” Ждановіча. Тыя ж у сваю чаргу падрыхтавалі адмысловыя праграмы для гэтай паездкі.

Чым адметны для Доўгушава і Маляваныча гэты, ужо не першы, тур у ЗША і якія цікавосткі яны падрыхтавалі? Як арганізоўвалася паездкі і з якімі складанасцямі давялося сутыкнуцца арганізатарам? Ці застаецца цікавасць да беларускай тэматыкі ў беларусаў ЗША і як гэтую цікавасць працягваць падтрымліваць? На гэтыя ды іншыя пытанні ў эфіры Еўрарадыё адказваюць экспертка па беларускай дыяспары, лідарка суполкі беларусаў Сан-Францыска, сябра Асацыяцыі беларусаў у Амерыцы (АБА) Надзея Нортан, спявак, кіраўнік гурта Kasary, заснавальнік “Дома творцаў” у Варшаве Сяржук Доўгушаў і акцёр ды вядоўца Аляксандр “Маляваныч” Ждановіч

Пад польска-беларускай мяжой знайшлі тунэль — Еўразум за 12 снежня | Новости Беларуси за 12 декабря by Euroradio

Метэазонды з кантрабанднымі беларускімі цыгарэтамі практычна штодзень спыняюць працу аэрапорта Вільні, а з беларуска-польскай мяжы апошнімі днямі некуды таемным чынам зніклі ўсе жадаючыя нелегальна трапіць у Еўрасаюз. Па перамоўным трэку паміж Мінскам і Вашынгтонам, кажуць, працягваюцца нейкія ўзаемныя імпульсы, а вось на трэку еўрапейскім адбываецца нешта дзіўнае. Да прыкладу, быў прызнаны экстрэмісцкім сайт… Савета Еўропы. Еўрапарламент выказваецца ў падтрымку дэмакратычных сіл Беларусі і кажа пра ціск на рэжым Лукашэнкі, а з Літвы далятаюць чуткі пра пераезд з Вільні ў Варшаву Офіса Святланы Ціханоўскай. А Лукашэнка чакае прыезду ў Мінск Мадуры з Венесуэлы. Ну а яшчэ беларусы чакаюць Калядаў і прыезду Коўла ў Мінск…

Чаму затармазілі перамовы Мінска з Вашынгтонам і ці варта разлічваць на вызваленне новай групы палітвязняў да канца года? Як на Беларусь уплывае канфрантацыя з Літвой і чаго чакаць ад новага санкцыйнага пакета ЕС? Ці чакаць пераезду Офіса Ціханоўскай з Вільні і што гэта змяняе для дэмсіл? На гэтыя ды іншыя пытанні ў эфіры Еўрарадыё адказвае палітычны аглядальнік Радыё "Свабода" Юрый Дракахруст

Ахвярай чарговага карупцыйнага скандалу ва Украіне стаў кіраўнік прэзідэнцкай адміністрацыі і лепшы сябар Зяленскага Андрэй Ярмак. Здавалася б, пры чым тут Беларусь, Лукашэнка, Ціханоўская альбо беларускія добраахвотнікі? Але калі слухаць каментары наконт карупцыі ва Украіне ад Лукашэнкі, то ўзнікае думка, што ён не толькі пра пэўныя карупцыйныя “схемкі” ведаў, але і меў да іх дачыненне. А ў такім выпадку, лагічным пачынае выглядаць і насцярожанае стаўленне ўкраінскага кіраўніцтва і да беларускіх дэмсіл, і нават да беларускіх добраахвотнікаў.

Чаму нават ва ўмовах вайны не атрымліваецца збіць хвалю карупцыі і ці маюць пад сабой глебу падазрэнні пра агульныя “схемкі” з Лукашэнкам? Які кампрамат на ўкраінскіх палітыкаў мае Лукашэнка і ці ўплывае гэты факт на нежаданне Кіева мець дачыненні з Ціханоўскай? Чаму не вырашаюцца праблемы з легалізацыяй нават тых беларусаў, якія ваявалі за Украіну і ці пойдзе Зяленскі на падпісанне мірнага плана Трампа? На гэтыя ды іншыя пытанні ў эфіры Еўрарадыё адказвае былы кіраўнік інфармацыйнага аддзялення партыі “Правы сектар”, экс-дэпутат Вярхоўнай Рады Украіны і сябра ўкраінскай дэлегацыі ў ПАСЕ, палітычны актывіст і экс-баец Узброеных сіл Украіны Барыслаў Бярэза