euroradio.fm

Заробак астрафізіка і складаныя падлеткі — Еўразум за 28 сакавіка | Новости Беларуси за 28 марта by Euroradio

Падчас сваёй "інаўгурацыі" Лукашэнка паабяцаў захаваць сацыяльна арыентаваную мадэль эканомікі і працягнуць барацьбу з карупцыяй. А таксама пацвердзіў арыенцір на рэалізацыю маштабнай праграмы даступнага арэнднага жылля.

Тым часам у Магілёўскай вобласці рыхтуюць пляцоўкі для будаўніцтва майнінгавых ферм, пры гэтым курс долара ў Беларусі стаў ніжэйшым.

Больш падрабязна пра тое, што адбываецца ў эканоміцы нашай краіны, размаўляем з эксперткай у сферы дзяржаўнага кіравання і міжнароднага развіцця, магістрам эканомікі Алісай Рыжычэнка.

Голы кароль і школа без тэлефонаў — Еўразум за 27 сакавіка | Новости Беларуси за 27 марта by Euroradio

27 сакавіка ў эфіры Еўрарадыё — краязнавец, грамадскі дзеяч Алесь Юркойць.

Чым часцей беларусы будуць жадаць адно аднаму “залацістага, яснага дня”, тым больш усмешак будзе на нашых тварах. І будзе больш жадання стварыць нешта пазітыўнае, што ўсіх будзе задавальняць. Беларуская дэмакратычная нацыянальная ідэя гатовая ўсіх прыгарнуць, яна не адштурхоўвае так, як ідэя лукашэнкаўскага рэжыму з турмой, вошамі і выгнаннем за мяжу нязгодных. Але толькі светлая і пазітыўная ідэя дасць нам нашу светлую Беларусь будучыні, перакананы Алесь Юркойць.

Пра тое, як захаваць сябе і сваю беларускасць у выпрабаваннях рэпрэсій і эміграцыі, чаму беларусы дагэтуль не завяршылі сваё нацыябудаўніцтва і ці сапраўды ў нас “кароткі пантэон нацыянальных герояў”, мы і разважаем у праграме “Ідэя Х” з Алесем Юркойцем.

Перформанс-мастак Пан Лекс, які ладзіў секс-вечарынкі ў Мінску, пераехаў у Польшчу. Цяпер таямнічыя і відовішчныя мерапрыемствы, падчас якіх можна папрактыкавацца ў звязванні, лупцоўцы, фут-фетышы ці, напрыклад, гульнях з воскам, праходзяць у Варшаве.

Мерапрыемствы закрытыя, але трапіць на іх можа кожны ахвочы, гатовы прыняць умовы гульні.

Наколькі складана давалася арганізацыя вечарынак у Беларусі і што змянілася пасля пераезду? Ці ўплывае нацыянальнасць на сексуальную разняволенасць і ці такія беларусы сарамлівасці, як пра нас часам кажуць? Ці дапамагаюць лупцоўка і звязванне змагацца з трывогай і як рэагуюць блізкія арганізатараў і ўдзельнікаў на іх зацікаўленні?

Пра гэта і не толькі гаворым у эфіры Еўрарадыё з самім Панам Лексам.

Марудны Пуцін і нізкае беспрацоўе — Еўразум за 26 сакавіка | Новости Беларуси за 26 марта by Euroradio

Пакуль дзеці скардзяцца на высокую нагрузку ў школах і абавязак наведваць "непатрэбныя" прадметы (асабліва ў старэйшых класах), чыноўнікі прыдумляюць, як бы яшчэ натхніць маладое пакаленне атрымліваць новыя веды.

Варыянтаў — мора.

Напрыклад, ужо ў бягучым годзе школьнікаў з нездавальняючымі паводзінамі ў базавай школе могуць не дапусціць да здачы іспытаў у старэйшыя класы гімназіі і нават сярэдняй школы.

Акрамя таго, ходзяць чуткі, што ў школах абмяжуюць выкарыстанне смартфонаў.

Падрабязней пра ўсё гэта і не толькі ў эфіры Еўрарадыё гаворым з настаўніцай, а таксама заснавальніцай афіцыйнай беларускамоўнай школы ў Грузіі Аксанай Акуневіч.

Перамовы паміж прадстаўнікамі ЗША, Расіі і Украіны працягваюцца, але вынік апошняга раўнда застаўся не агучаным. Так, нейкія агульныя словы прагучалі, пра канструктыўнасць ці нешта такое… Карацей, дэлегацыі ЗША і Расіі “сядзелі на перамовах 12 гадзін, усё ўзгаднілі, але не змаглі прыняць сумеснай заявы праз пазіцыю Украіны”. Магчыма, таму, што ўзгаднілі тое, што не задавальняе Украіну. У той жа час у Еўропе, якую пакінулі на гэтым этапе за дужкамі перамоў, абмяркоўваюць рост пагрозы для краін ЕС з боку Расіі і, насуперак меркаванню Уолтца, не імкнуцца верыць абяцанням Пуціна пра ненапад на Еўропу.

Якія вынікі на сёння ў перамовах паміж ЗША, Расіяй і Украінай і ці сапраўды ЗША стаіць на пазіцыях Крамля? Ці сапраўды ў ЕС асцерагаюцца хуткага гарачага канфлікту з Расіяй і чаму еўрапейцы адмаўляюцца верыць абяцанням Пуціна? Якое месца ў супрацьстаянні Еўропы і Расіі адводзіцца Беларусі і што мяняе “інаўгурацыя” Лукашэнкі ў стаўленні да яго на Захадзе? На гэтыя ды іншыя пытанні ў эфіры Еўрарадыё адказвае эксперт Фінскага інстытута міжнародных спраў Рыгор Ніжнікаў

У адрозненне ад 2020 года з яго падпольнай інаўгурацыяй, калі нават запрошаныя госці дакладна не ведалі, куды і чаго іх вязуць, інаўгурацыю ў годзе 2025-м правялі пафасна: з вялікай колькасцю гасцей, урачыстым праездам па праспекце, з натоўпамі бюджэтнікаў і БРСМаўцаў, прывезенымі для дэманстрацыі народнай любові “ўсенародна абранаму” пасярод працоўнага дня і трансляцыяй усяго пералічанага на ўсіх тэлеканалах. Такое ўражанне, што нарэшце галоўны герой, дзеля якога ўсё і рабілася, паверыў у сваю перамогу над пратэстамі 2020 года…

Пра што сведчыць пафаснасць мерапрыемства і ці дасягнулі арганізатары пастаўленых мэтаў? Ці варта чакаць, што цяпер пачнецца перазагрузка адносінаў паміж Захадам і лукашэнкаўскім рэжымам? Якое месца ў супрацьстаянні Еўропы і Расіі адводзіцца Беларусі і ці чакаць пачатку вялікай вайны? Гэтыя ды іншыя тэмы абмяркоўваем у штотыднёвым жывым эфіры Еўрарадыё з кіраўніком варшаўскага Цэнтра палітычнага аналізу і прагнозу, доктарам палітычных навук, сябрам “Вольнай Беларусі” Паўлам Усавым

Ад самага пачатку панавання Лукашэнкі святкаванне беларусамі Дня Волі сустракала шалёны супраціў рэжыму. Разганяць шэсце ў гэты дзень і затрымліваць людзей пачалі ўжо ў 1996 годзе — калі беларусы ўпершыню зладзілі масавае шэсце ў Мінску з нагоды свята. І так працягвалася штогод. Выключэннем стаў 2018 год, калі быў атрыманы дазвол на арганізацыю святочнага канцэрта каля Тэатра оперы і балета. Што праўда, кропкавыя затрыманні па-за межамі агароджанай пляцоўкі ўсё адно былі і ў той год. А ў 2025 годзе Лукашэнка ўвогуле 25 сакавіка прызначыў сваю “інаўгурацыю”…

Чым для беларусаў адметны дзень 25 сакавіка і чаму лукашэнкаўскі рэжым так ненавідзіць гэтае свята? Ці атрымаецца ў Лукашэнкі “адабраць” у беларусаў Дзень Волі і што мяняе для дэмсіл гэтая “інаўгурацыя”? Ці варта дэмсілам усур’ёз заняцца зменамі ў сваёй стратэгіі і ці гатовы Захад змяніць сваё стаўленне да рэжыму? На гэтыя ды іншыя пытанні ў эфіры Еўрарадыё адказвае экс-кандыдат у прэзідэнты, былы кіраўнік руху “За свабоду”, заснавальнік і кіраўнік Вольнага беларускага ўніверсітэта, пазаштатны дарадца Святланы Ціханоўскай у пытаннях еўрапейскага выбару Беларусі Аляксандр Мілінкевіч.