euroradio.fm

Аднойчы (насамрэч усяго крыху больш за год таму) дзве беларускі, якія даўно жывуць у ЗША, распачалі свой праект — відэападкаст “Ласкатухі”. Праект, які напрыканцы 2024-га Радыё Свабода ўключыла ў топ-10 самых важных беларускіх жаночых праектаў за год.

Як нарадзілася ідэя свайго відэападкаста і што ўкладаецца ў тэрмін “жаночы праект”? Якія тэмы абіраюцца і на якую аўдыторыю разлічваюць аўтаркі? Ці атрымліваецца выйсці за межы амерыканскай дыяспары і ці магчыма доўгі час рабіць сур’ёзны праект на энтузіязме? На гэтыя ды іншыя пытанні ў эфіры Еўрарадыё адказваюць сувядоўцы відэападкаста “Ласкатухі” актывістка беларускай суполкі Мічыгана Вольга Бромэн і навуковая супрацоўніца Арэгонскай нацыянальнай лабараторыі (Argonne National Laboratory), хімік Яна Карслян

У Белым доме не выключаюць заканчэння вайны ва Украіне ўжо на гэтым тыдні. І ўсё, безумоўна, дзякуючы намаганням і генію Дональда Трампа. Які, паводле яго асабістага пераканання, найлепшы з усіх амерыканскіх прэзідэнтаў. Лепшы нават за Джорджа Вашынгтана. А яшчэ ён верыць, што пераканае Пуціна і Сі Цзіньпіна ўдвая скараціць ваенныя выдаткі. І верне ў амерыканскі бюджэт 500 мільярдаў, нібыта патрачаныя на дапамогу Украіне (у названай суме нават Пентагон сумняваецца). А ў гэты час Германія вызначаецца з новым кіраўніцтвам. Прэзідэнт Польшчы Анджэй Дуда кажа пра неабходнасць “адцягнуць Трампа ад Масквы”, а Лукашэнка чакае працягу перамоў з Вашынгтонам…

Што стаіць за словамі Трампа пра хуткае заканчэнне вайны ва Украіне і на якіх умовах ён гатовы гэта рабіць? Ці сапраўды ў свеце адбываецца “правы паварот” і якія небяспекі гэта нясе? Ці сапраўды варта чакаць пагаршэння адносінаў паміж ЕС і ЗША і што ад гэтага выйграе Лукашэнка? Гэтыя ды іншыя тэмы абмяркоўваем у штотыднёвым жывым эфіры з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

Для беларускай моладзі Польшча застаецца адной з самых прывабных краін, дзе можна атрымаць вышэйшую адукацыю еўрапейскага ўзроўню. У 2022-2023 навучальным годзе тут вучылася 12 тысяч беларусаў — на 8,5% больш, чым год таму.

Гэта ўсё вельмі раздражняе рэжым Лукашэнкі, які ўсяляк спрабуе прыпыніць адыход студэнтаў. Польскі ўрад у сваю чаргу спрабуе спрасціць працэдуру паступлення для замежнікаў, але гэта не заўсёды ўдаецца.

Чаму беларускія студэнты дагэтуль сутыкаюцца з перашкодамі ў прызнанні атэстатаў і атрыманні навучальных віз? І як на працэс паўплывалі свежыя папраўкі ў заканадаўства пра замежнікаў, прынятыя прэзідэнтам Анджэем Дудам? Чаго чакаць і да чаго рыхтавацца беларускім абітурыентам у Польшчы ў гэтым навучальным годзе?

На гэтыя і іншыя пытанні ў стрыме Еўрарадыё адкажа Ліза Пракопчык, сяброўка Каардынацыйнай рады III склікання ад фракцыі “Моладзевы блок” і менеджарка праектаў.

Не толькі адукацыйныя, тэатральныя, музычныя ды іншыя гуманітарнай скіраванасці праекты паспелі за час у эміграцыі стварыць беларусы. Ёсць ужо і свае спартовыя клубы. Якія не толькі спартовым выхаваннем займаюцца, рыхтуючы спартоўцаў у тым ліку да ўдзелу ў міжнародных спаборніцтвах, але і дбаюць пра выхаванне нацыянальнай свядомасці. А таксама супрацьстаяць пранікненню на міжнародныя спаборніцтвы спартоўцаў, якія падтрымліваюць лукашэнкаўскі рэжым.

Чым адрозніваецца клуб VOLAT ад усіх астатніх польскіх спартовых клубаў і як на занятках па каратэ выхаваць беларускасць у беларусах? Ці сапраўды спорт наўпрост звязаны з палітыкай і як палітыка на спорт уплывае? Чаму для вольных спартоўцаў так важна не дапусціць да ўдзелу ў міжнародных спаборніцтвах спартсменаў, што падтрымліваюць Лукашэнку? На гэтыя ды іншыя пытанні ў жывым эфіры Еўрарадыё адказвае заснавальнік фізкультурна-спартыўнага клуба “Волат”, трэнер па каратэ з 23-гадовым стажам Віталь Рак

Тры гады вайны і новыя санкцыі супраць рэжыму — Еўразум за 24 лютага | Новости 24 февраля by Euroradio

Фізіка па-беларуску і сустрэча з бізнесам — Еўразум за 21 лютага | Новости Беларуси за 21 февраля by Euroradio

Беларускі алігарх Машэнскі і яго прысутнасць у Варшаве сталі не толькі прычынай для сваркі сярод чальцоў Каардынацыйнай рады, але і нагодай для пошукаў агентуры ў шэрагах гэтай структуры дэмсіл. І пошукі паказалі, што практычна ўсе чальцы КР альбо “прадажныя”, альбо сакрэтныя агенты. Як, у прынцыпе, і маніторынгавы праект “Беларускі Гаюн” выявіўся, калі верыць асобна апантаным выкравальнікам “агентуры”, не менш як праектам (відаць, усёмагутных у сусветным маштабе) лукашэнкаўскіх спецслужбаў.

Што не так з абмеркаваннем у КР “пытання Машэнскага” і што дэбаты па гэтым пытанні паказалі? Як змяніліся апошнім часам стасункі ўнутры дэмісл і беларускага грамадства і пры чым тут сітуацыя з “Беларускім Гаюном"? Чым адметныя пошукі ворагаў і агентаў у сваім асяродку і ці ўпершыню такое здараецца ў нашай гісторыі? На гэтыя ды іншыя пытанні ў жывым эфіры Еўрарадыё адказвае сябра Каардынацыйнай рады ад фракцыі “Воля”, экс-прадстаўнік “Паспалітага рушання” Сяржук Кедышка

Гаворым пра тое, чаму зняццё санкцый з Расіі не пойдзе на карысць беларускай эканоміцы і дзе мінская міліцыя шукае працоўныя рэзервы.

Лукашэнка дабраўся да буйнога бізнеса. Ён пасадзіў кіраўнікоў кампаній на працёрныя дупамі бясконцых чыноўнікаў крэслы і распавёў, каму і як яны мусяць "дапамагаць". І што атрымаюць наўзамен.

Пра гэта паразмаўляем з блогерам і палітыкам Аляксандрам Кныровічам. Таксама абмяркуем, як Лукашэнка ў снежні прадказаў зіму (без яго чыноўнікі напэўна яе б не чакалі), ці запаволіліся рэпрэсіі пасля выбараў, на каго Трамп можа памяняць беларускіх палітвязняў.

Сёння пад крытыку трапляюць практычна ўсе стуктуры дэмакратычных сіл. Каардынацыйная рада не выключэнне. І часам у адказ на крытыку можна пачуць словы пра тое, што, маўляў, крытыкаваць седзячы на канапе лёгка, а вось пайсці і самому хоць нешта зрабіць у такіх “крытыкаў” імпэту не знаходзіцца. Вось толькі часцяком крытыка гучыць і ад тых людзей, якія для стварэння гэтых самых структур зрабілі вельмі шмат…

Як выглядае дзейнасць Каардынацыйнай рады звонку і ці не на стадыі яе фармавання ўзнікла фатальная памылка? Ці здольная дыяспара самастойна фінансаваць свае структуры і што для такой самаарганізацыі патрэбна? Як на сітуацыю ў журналістыцы і НДА паўплывала новая палітыка падтрымкі ад Трампа? На гэтыя ды іншыя пытанні ў эфіры Еўрарадыё адказвае экс-старшыня камісіі па выбарах у Каардынацыйную раду, журналістка, валанцёрка і грамадская актывістка Алена Прыходзька