euroradio.fm

У новы год Каардынацыйную раду суправаджаў шэраг скандалаў, непаразуменняў і нават канфліктаў. Часам здавалася, што гэтая структура нежыццяздольная і яе прасцей распусціць, чым спрабаваць выратаваць ці неяк рэфармаваць. Нават па першым часе актыўны чат КР заціх і амаль не падаваў прыкмет жыцця. Але жыццё працягваецца. І для КР таксама. Чальцы гэтай структуры нават наведваюць розныя міжнародныя саміты ды канферэнцыі, плануецца ўдзел у пасяджэнні ПАСЕ…

Ці будуць праводзіцца публічныя слуханні па справе Кабанчука і ці будзе справаздача “міністраў” Аб’яднанага пераходнага кабінета перад КР? Чым адметны удзел дэлегацыі КР у пасяджэнні Парламенцкай асамблеі Савета Еўропы і што гэта дасць шараговым беларусам? Што для беларускіх дэмсіл і Беларусі зменіцца з прыходам Трампа ў Белы дом і ці варты даверу пашпарт Новай Беларусі? На гэтыя ды іншыя пытанні ў эфіры Еўрарадыё адказвае спікерка Каардынацыйнай рады Анжаліка Мельнікава

Любімага беларускага міністра Аляксандра Кныровіча — Аляксея Багданава — адправілі амбасадарам у Казахстан. Аляксандр рады за Аляксея, маўляў, яму там будзе цікава. Але Аляксандра цікавіць вось што: як жа няскончаныя справы на радзіме? Багданаў у свой час радасна кінуўся ажыццяўляць дырэктыву пра стрымліванне цэн, праз што некаторыя нават буйныя кампаніі вымушаныя былі закрыцца. Напрыканцы года ўлады прызналі неэфектыўнасць старой сістэмы кантролю над цэнамі і абяцалі наўзамен "формулу справядлівых цэн". Але эксперыментаваць будуць ужо без міністра Багданава. І не факт, што і гэты эксперымент атрымаецца.

Гэта, а таксама айчынны матацыкл для Лукашэнкі і яго перадвыбарчую рыторыку абмяркоўваем з Аляксандрам Крыновічам у традыцыйным пятнічным стрыме на Еўрарадыё

На супрацу з адміністрацыяй новага прэзідэнта ЗША Дональда Трампа разлічвае не толькі Лукашэнка, але і прадстаўнікі беларускіх дэмакратычных сіл. Насамрэч ад таго, ці атрымаецца такую супрацу наладзіць, залежыць даволі шмат. Прычым як для лукашэнкаўскага рэжыму, так і для дэмсіл. Адпаведна, абодва бакі шукаюць каналы і кантакты, каб мець магчымасць данесці і агучыць свае пазіцыі ў Вашынгтоне.

Якое значэнне маюць добрыя стасункі з Трампам і яго адміністрацыяй для дэмсіл і чаму гэта няважна для Лукашэнкі? Якія шляхі ў Белы дом намацваюць прадстаўнікі Офіса Ціханоўскай і ці атрымліваецца ў іх наладзіць кантакт? Ці зменіцца стаўленне заходніх палітыкаў да Ціханоўскай пасля 26 студзеня і ці пойдзе Захад на перамовы з Лукашэнкам? На гэтыя ды іншыя пытанні ў эфіры Еўрарадыё адказвае дарадца Святланы Ціханоўскай па пытаннях дыпламатыі Дзяніс Кучынскі

Рэзкі абвал і соль, якая псуе абутак — "Раніца з Еўрарадыё" за 17 студзеня by Euroradio

Падарунак Трампу і фішка выбараў — Еўразум за 16 студзеня | Новости Беларуси за 16 января by Euroradio

Напярэдадні інаўгурацыі Дональда Трампа на лукашэнкаўскім тэлебачанні нечакана паказалі (альбо анансавалі паказ) трох палітвязняў — Андрэя Кузнечыка, Ігара Лосіка і Ігара Карнея. Здавалася б, прычым тут Трамп? Але рэч у тым, што ўсіх пералічаных палітвязняў яднае іх праца на амерыканскім Радыё Свабода. Дарэчы, ёсць яшчэ адзін чалавек, “інтэрв’ю” з якім прапагандысты паказалі некалькі месяцаў таму, — Юрась Зяньковіч. Ён і ўвогуле з’яўляецца грамадзянінам ЗША.

Што азначае дэманстрацыя прапагандысцкіх фільмаў з гэтымі людзьмі менавіта цяпер і ці варта рэжыму разлічваць, што Трамп пагодзіцца на пачатак дыялогу з Мінскам? Якую чарговую “размазню” знайшоў Лукашэнка ў сваім МЗС і ці здольны ён выканаць сваё перадвыбарчае абяцанне наладзіць адносіны з Захадам? Ці пачулі еўрапейскія лідары словы генеральнага сакратара NATO Марка Рутэ наконт расійскай пагрозы і ці здолее ЕС пераканаць Трампа не “сыходзіць з краіны”? Гэтыя ды іншыя тэмы абмяркоўваем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Жыллёва-камунальная гаспадарка Беларусі сутыкнулася з нечаканай праблемай — крытычным недахопам супрацоўнікаў. І, як высвятляецца, прычына не толькі ў невялікіх заробках, але і ў банальным недахопе людзей і працоўных рук ва ўсёй краіне. Дарэчы, калі казаць пра кошт паслугаў і тарыфаў ЖКГ, то, імаверна, яны чарговы раз вырастуць і ўдараць па кішэнях беларусаў. Калі ўжо казаць пра кватэрнае пытанне, дакладней, пра імкненне зарабіць на здачы сваёй кватэры арандатарам, то і тут беларусаў напаткалі непрыемнасці...

Што пайшло не так з айчыннай ЖКГ і ці выратуе сітуацыю рост коштаў паслуг і мігранты? Ці чакаць зменаў палітыкі рэжыму Лукашэнкі пасля выбараў — ці выканае ён перадвыбарчае абяцанне наладзіць адносіны з Захадам? Ці моцна па беларусах ударыць скасаванне Літвой дамовы ад падвойным падаткаабкладанні і што адбываецца з курсамі валют? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, магістаркай эканомікі Алісай Рыжычэнка

На сёння ў Польшчы знаходзіцца 31 тысяча беларускіх школьнікаў і выхаванцаў дзіцячых садкоў. І пытанні захавання і пашырэння беларускай мовы сярод беларусаў, якія выехалі з краіны, пытанні ўмацавання беларускай ідэнтычнасці з’яўляюцца важнымі як для шараговых беларусаў, так і, адпаведна, для лідараў дэмсіл. Гэтыя пытанні ўзнімаліся падчас сустрэч Святланы Ціханоўскай і сябраў АПК падчас яе візіту ў Варшаву, гэтую тэму актыўна працягвае прасоўваць і пасля заканчэння візіту Павел Латушка. Іншая справа, што такія праекты патрабуюць значных фінансавых выдаткаў…

Якія галоўныя выклікі паўстаюць сёння перад дэмсіламі і ці варта звяртаць увагу ў такі час на моўныя пытанні і пытанні захавання ідэнтычнасці? Ці ёсць цікавасць у саміх беларусаў да гэтых праблем і дзе на вырашэнне такіх задач знайсці грошы? Ці пойдзе Трамп і яго адміністрацыя на наладжванне адносін з Лукашэнкам і ці будзе месца для прадстаўніка Мінска на перамовах па Украіне? На гэтыя ды іншыя пытанні ў эфіры Еўрарадыё адказвае лідар спіса “Каманда Латушкі і рух “За свабоду”, кіраўнік Народнага антыкрызіснага ўпраўлення і намеснік кіраўніцы Аб’яднанага пераходнага кабінета Павел Латушка

Падчас чарговага “выбарчага рытуала”, які ладзіцца для перапрызначэння Лукашэнкі на пасаду кіраўніка дзяржавы, не будзе назіральнікаў ні ад БДІПЧ АБСЕ, ні асобна ад нейкіх заходніх краін. Калі з ЕС і даедуць нейкія асобныя назіральнікі, то гэта будуць прадстаўнікі нейкіх маргінальных палітычных структур. Але, як паказвае практыка, рэжыму абыякава як рэакцыя міжнароднай супольнасці на іх (не)выбары, так і наяўнасць нейкага прызнання з іх боку вынікаў гэтага электаральна-буфетнага мерапрыемства.

Якое значэнне мае прысутнасць ці адсутнасць міжнародных назіральнікаў на выбарах і чаму гэта няважна для Лукашэнкі? Якія парушэнні за час электаральнай кампаніі былі заўважаныя і наколькі яны значныя? Чаму варта вучыцца дэмакратыі ўжо сёння і як гэта можна зрабіць? На гэтыя ды іншыя пытанні ў эфіры Еўрарадыё адказвае эксперт па выбарах, спецыяльны дарадца Святланы Ціханоўскай па выбарах Аляксандр Шлык

16 студзеня ў эфіры Еўрарадыё — палітолаг, былы баец палка імя Кастуся Каліноўскага, кіраўнік дабрачыннага фонду “Асацыяцыя беларускіх ветэранаў”, сябра Каардынацыйнай рады ад фракцыі “Еўрапейскі выбар” Павел Мар’еўскі.

Калі нават сітуацыя складзецца так, што полк імя Каліноўскага, іншыя беларускія вайсковыя структуры вымушаныя будуць зайсці ў Беларусь, то толькі для таго, каб зламаць супраціў тых сілавых структур, якія кормяцца з рукі Лукашэнкі і паспрабуюць яго ўладу абараніць. Але ніякай хунты вайскоўцы ўсталёўваць не будуць. Як толькі супраціў рэжымных сілавікоў будзе зломлены, уся ўлада будзе перададзеная палітычным структурам дэмакратычных сіл, перакананы Павел Мар’еўскі.

Пра тое, якія сцэнары змены ўлады ў Беларусі выглядаюць найбольш імавернымі, ці гатовыя беларусы змагацца за сваю будучыню і чаму беларуская мова — гэта сексуальна, мы і разважаем у праграме “Ідэя Х” з Паўлам Мар’еўскім.