18 жніўня 2020 года Уладзімір Гарох быў затрыманы ў Навагрудку ў межах так званай “Карэліцкай справы” — аб нібыта планаваных масавых беспарадках у Карэлічах і Навагрудку пасля прэзідэнцкіх выбараў. Мужчыну абвінавацілі ў падрыхтоўцы да іх, а таксама ў публічнай абразе Лукашэнкі, пасадзіўшы за краты на 7 гадоў. Месяц таму беларуса вывезлі з краіны разам з іншымі экс-палітзняволеннымі, якіх выпусцілі на свабоду пасля здзелкі Лукашэнкі і Трампа. Цяпер ён жыве ў Варшаве.

У эфіры Еўрарадыё Уладзімір Гарох раскажа пра ўмовы у беларускіх турмах і калоніях, нечаканае вызваленне і свае першыя крокі да сацыялізацыі за мяжой.

"Можа быць і выгарэў", "зразумеў, што не яго гэта" — так Лукашэнка казаў 15 студзеня пра Аляксандра Субоціна, адпраўленага ў адстаўку з пасады старшыні Віцебскага аблвыканкама. Але без працы Субоцін не застанецца — хутка яму падшукаюць нешта новае, "на знешнім контуры". А кіраваць Віцебшчынай замест яго будзе Аляксандр Рагожнік, які таксама на сваёй папярэдняй пасадзе — амбасадара Беларусі ў Расіі — не справіўся.

Абмяркоўваем усё гэта, а таксама раптоўныя вайсковыя вучэнні ў Беларусі і перадачу Дональду Трампу Нобелеўскага медаля (што цяпер будзе?) з блогерам Аляксандрам Кныровічам.

Цыклон і вяртанне салідарнасці — Еўразум за 15 студзеня | Новости Беларуси за 15 января by Euroradio

Размяшчэнне Беларусі азначае, што яна адыгрывае ключавую ролю ў забеспячэнні рэгіянальнай бяспекі. Наша краіна можа альбо служыць платформай для расійскіх пагроз у адрас Украіны і краін NATO ва Усходняй Еўропе, альбо выступаць у якасці "буфера", які дапамагае знізіць напружанасць у рэгіёне. Але дзеянні Лукашэнкі паказваюць, што ў Захаду няма іншага выбару, акрамя як разглядаць Беларусь у якасці патэнцыйнага "расійскага плацдарма" для нанясення ўдараў па NATO. Аднак жа гэта сітуацыя не падабаецца не толькі суседзям Беларусі, але і самому Лукашэнку…

Як Беларусь успрымаецца сёння ў свеце, і чаму гэта не падабаецца не толькі нашым суседзям і большасці беларусаў, але і Лукашэнку? Ці магчымае яшчэ “Ператварэнне Беларусі з расійскага актыву ў буферную дзяржаву для еўрапейскай бяспекі” і што для гэтага неабходна зрабіць? Якую ролю ў змене пазіцыянавання Беларусі іграе Трамп, перамовы Мінска з Вашынгтонам і Масква? На гэтыя ды іншыя пытанні ў жывым эфіры Еўрарадыё адказвае дырэктар “Беларускай ініцыятывы” Chatham House Рыгор Астапеня

Мінулы 2025 год скончыўся з інфляцыяй у 6,8% — вышэйшай, чым прагназавалі чыноўнікі, але і ніжэйшай, чым чакалі незалежныя эканамісты. Што да коштаў на харчовыя тавары, то іх чыноўнікі і ў гэтым годзе абяцаюць рэгуляваць. Праўда, незразумела, ці не прывядуць іх высілкі да супрацьлеглых вынікаў. Ці наадварот — зразумела, бо здаралася такое не раз. Хапае ў эканоміцы і іншых праблем — ад недахопу працоўных рук да нараджальнасці, — якія таксама хочуць вырашыць адміністрацыйна-загадным метадам.

Ці здолеюць чыноўнікі выканаць сёлетнія прагнозы па інфляцыі, і ад чаго гэта будзе залежаць? Што адбываецца на рынку працы і ці паедуць у Беларусь працоўныя мігранты? Чаму ў Лукашэнкі не атрымліваецца навесці парадак у сельскай гаспадарцы, і ці палепшыцца сітуацыя з гандлем з Расіяй? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, магістаркай эканомікі, прадстаўніцай па эканоміцы і фінансах Аб’яднанага пераходнага кабінета Алісай Рыжычэнка.

15 студзеня ў эфіры Еўрарадыё былы палітвязень, каардынатар кампаніі “Еўрапейская Беларусь”, адзін з заснавальнікаў руху супраціву “Зубр” Яўген Афнагель.

“У беларускай нацыі велічэзны патэнцыял, назапашаны за вякі нашай гісторыі, які мы так і не здолелі рэалізаваць. Я кажу пра наш творчы патэнцыял, арганізацыйны, стваральны, культурніцкі — патэнцыял ва ўсіх сферах, які вырваўся вонкі ў 2020 годзе”. Ён, гэты патэнцыял, у нас ёсць, але прыхаваны, і прыйдзе час, калі беларусы здолеюць яго рэалізаваць, перакананы Яўген Афнагель.

Пра тое, ці патрэбныя беларусам свабода, незалежнасць і нацыянальная дзяржава, ці гатовыя беларусы змагацца за сваю будучыню і ці ёсць у нас патэнцыял, каб зрабіць з нашай краіны рэгіянальнага лідара, мы і разважаем у праграме “Ідэя Х” з Яўгенам Афнагелем.

Беларуская палітычная рэчаіснасць усё часцей выглядае як танная тэатральная самадзейнасць: цыклоны падаюцца як катастрофы, кіраўнік краіны дэманстратыўна кідае снег перад камерамі і ўсё “ратуе” беларусаў, а прапаганда змагаецца з абмеркаваннем праблем. Але за гэтымі карцінкамі праступае тое, што ўжо немагчыма схаваць — стомленасць сістэмы, нервовасць улады і пытанні, ад якіх залежыць занадта шмат.

У эфіры пагаворым пра тое, як здароўе Лукашэнкі паступова становіцца палітычным фактарам і што гэта можа значыць для ўнутраных рашэнняў, знешніх кантактаў і магчымых сцэнарыяў транзіту ўлады. Абмяркуем і больш шырокі кантэкст: сувязі Беларусі з Іранам і Венесуэлай, размовы пра “вялікую ўгоду”, рызыку ўнутраных расколаў і межы лаяльнасці сілавікоў.

А калі паспеем — пагаворым і пра чарговы сімвал закрытай сістэмы: што там з “Арэшнікам”?

У гасцях Еўрарадыё — палітычны аналітык ІА “Позірк” Аляксандр Класкоўскі.

Ці час змяняць лідараў і на каго? — Еўразум за 14 студзеня | Новости Беларуси за 14 января by Euroradio

Мінулы 2025 год для беларускага грамадства (як мінімум той яго часткі, якая знаходзіцца ў эміграцыі) адзначыўся шэрагам даволі гучных кейсаў сексуалізаванага гвалту альбо харасменту. Вынікі гэтых кейсаў былі розныя. Але часам здавалася, што ніякія дзеянні, словы альбо ўчынкі “злачынцы” не прынясуць яму прабачэння грамадства.

Ці існуе і як працуе сістэма “адмены” чалавека, які быў абвінавачаны ў харасменце альбо сексуалізаваным гвалце? Ці мае беларускае грамадства інстытут рэпутацыі і як гэта працуе? Навошта патрэбны “Прынцыпы антыхарасменту” і што ў іх самае галоўнае? Пра гэта і шмат што іншае мы і разважаем у жывым эфіры Еўрарадыё з фемактывісткай і гендарнай эксперткай Настай Базар

Палітзняволеныя з апошняй групы дэпартаваных з краіны вязняў актыўна абжываюцца ў новых краінах, куды іх закінуў лёс і помслівасць Лукашэнкі, — у Польшчы і Літве. Дзякуючы падтрымцы валанцёраў з дабрачынных і праваабарончых арганізацый і ініцыятыў, палітычных структур дэмсіл і мясцовым уладам пытанні легалізацыі атрымліваецца вырашаць дастаткова хутка. Але не ўсе, і не адразу. А ў некаторых выпадках нявырашаныя пытанні і нявыкананыя абяцанні тычацца і вязняў з папярэдняй групы.

Якія пытанні, звязаныя з легалізацыяй палітвязняў, патрабуюць асаблівай увагі, і чаму не ўсё атрымліваецца вырашыць? З якімі міграцыйнымі і легалізацыйнымі выклікамі апошнім часам сутыкаюцца беларусы і ці атрымліваецца ў юрыстаў дапамагчы ім? Як змяняецца міграцыйнае заканадаўства ў Польшчы і якіх сюрпрызаў варта чакаць бліжэйшым часам? Пра гэта і шмат што іншае мы і разважаем у жывым эфіры Еўрарадыё з юрысткай, сузаснавальніцай дабрачыннай ініцыятывы “Партызанка” Ганнай Маціеўскай