Лукашэнка працягвае сустрэчы з кіраўнікамі свайго ўзроўню — губернатарамі расійскіх рэгіёнаў. Гэтым разам у Мінск завітаў кіраўнік Самарскай вобласці. Здавалася б, нічым не адрозная сустрэча з шэрагу такіх жа сустрэч з губернатарамі іншых рэгіёнаў. Калі б не атметнасць тых галінаў, у якіх Лукашэнка хацеў бы наладзіць супрацу з самарцамі: самалёта- і ракетабудаўніцтва, рамонт і вытворчасць бронетэхнікі. І вішанька на крывавым торце — будаўніцтва ў Беларусі завода па вырабе беспілотнікаў. Тых, якія потым расійскія акупацыйныя войскі будуць выкарыстоўваць для атак на ўкраінскія гарады.

Як ва Украіне ацэньваюць узровень уцягнутасці беларускай прамысловасці ў працу на расійскі ваенна-прамысловы комплекс? Ці стане расійскі завод па вытворчасці беспілотнікаў у Беларусі законнай цэллю для ўкраінскіх ваенных альбо выраб любой прадукцыі — суверэннае права краіны? Чаму Лукашэнка не баіцца ісці на ўсё больш шчыльную супрацу з расійскім ВПК? На гэтыя ды іншыя пытанні ў эфіры Еўрарадыё адказвае ваенны аналітык, намеснік дырэктара ўкраінскага Цэнтра даследавання войска, канверсіі і раззбраення Міхаіл Самусь

Пакуль усе абмяркоўваюць як на эканоміку краіны і шараговых беларусаў паўплывае 18-ы пакет еўрапейскіх санкцый, у самой Беларусі нечаканыя змены “валютных трэндаў”. Калі апошнія як мінімум два месяцы попыт на валюты быў меншы за прапанову, то цяпер сітуацыя адваротная і ўсім жадаючым долараў не хапае. Можна было б спісаць усё на сезон земежных тураў і адпачынкаў, але ў экспертаў ёсць сумневы наконт гэтага тлумачэння. З іншага боку, гэта ўсё робяць на фоне той вайны, якую вядзе Лукашэнка, — вайны за ўраджай. А як без вайны дасягнуць пастаўленых мэтаў і сабраць 11 мільёнаў тон збожжа?!

Чаму ў Беларусі ўсе гады не збіраюць ураджай, а ідуць на бой за яго і ў чым сакральнасць лічбы 11 мільёнаў тон? Ці адчуе рэжым Лукашэнкі ўдар ад 18-га пакета санкцый і ці быў у гэтах новых санкцыях сэнс? Што адбываецца на рынку валют і навошта беларусам раптам спатрэбіліся долары і еўра? На гэтыя ды іншыя пытанні ў жывым эфіры Еўрарадыё адказвае аўтар і вядоўца праграмы "Оптымум" на канале “Беларусы і рынак”, эканамічны аглядальнік Андрэй Махоўскі

Апошнім часам з боку рэжымнай прапаганды пачалі гучаць словы пра “раскол нацыі” і неабходнасць “нацыянальнага дыялогу”, каб дасягнуць нейкага “прымірэння”. Пры гэтым, пагрозы ў бок прыхільнікаў пераменаў і апанентаў Лукашэнкі з боку як самога Лукашэнкі, так і яго карнікаў і прапагандыстаў не спыняюцца. Але (насуперак логіцы) спадзяванні на нейкі “круглы стол”, накшталт таго, які зладзілі камуністычныя ўлады Польшчы і прадстаўнікі апазіцыйнай “Салідарнасці”, ёсць і ў прадстаўнікоў дэмсіл.

Ці існуе сёння ў Беларусі “раскол нацыі” і ці магчымымы нейкі “нацыянальны дыялог” пры жывым Лукашэнку? Чаму тэма прымірэння жыве побач з імкненнем пакараць усіх ворагаў рэжыма ў галовах Лукашэнкі і яго карнікаў і не выклікае дысанансу? Ці ёсць у сусветнай гісторыі прыклады прымірэння з дыктатарскімі рэжымамі праз “круглыя сталы” і пры чым тут realpolitik? Пра гэта і шмат што іншае мы і разважаем у жывым эфіры Еўрарадыё з кандыдатам гістарычных навук, аглядальнікам Яўгенам Красуліным

У эпоху, калі свет змагаецца за дэмакратыю, а Беларусь працягвае жыць пад цяжарам аўтарытарнага рэжыму, мы вяртаемся да галоўнага пытання: ці магчымыя палітычныя перамовы з Лукашэнкам? За 31 год яго кіравання было нямала спроб — як адкрытых, так і кулуарных — але ці прынеслі яны плён?

Разбіраем факты, вынікі і падманутыя надзеі, а таксама вызначаем, дзе праходзяць чырвоныя лініі ў справе палітвязняў — і ці магчымы дыялог без іх вызвалення?

Ці можа Канферэнцыя Новая Беларусь стаць рэальным крокам наперад, а не чарговай сімвалічнай падзеяй? Што трэба змяніць у фармаце і падыходах, каб падобныя мерапрыемствы давалі канкрэтны вынік? Пра гэта ды іншае — у жывым эфіры Еўрарадыё размаўляем з палітыкам Анатолем Лябедзькам.

Дыпламатыя з шотам гарэлкі і ў Еўропу "на закупы" з беларускай карткай — Еўразум за 21 ліпеня | Новости Беларуси за 21 июля by Euroradio

18 ліпеня Еўрасаюз ухваліў 18-ы пакет санкцый супраць Расіі і Беларусі. Перад ухваленннем гэтага пакета эксперты найперш разважалі пра тое, як на эканоміцы краіны і на шараговых грамадзянах адаб’ецца “банкаўская” частка санкцый, звязаная з абмежаваннямі па транзакцыях. Але гэтым санкцыйны ўдар не абмяжоўваецца: пад санкцыі патрапілі 8 беларускіх прадспрвемстваў, якія працуюць на ваенна-прамысловы комплекс і абслугоўваюць расійскую армію. Нюанс у тым, што такіх прадпрыемстваў, якія атрымліваюць заказы ад расійскага ВПК, не адна сотня.

Ці сапраўды 18-ы пакет санкцый такі балючы для Масквы і Мінска, як пра яго гавораць прыхільнікі санкцыйнага ціску? Чаму пад санкцыі трапілі толькі 8 беларускіх прадпрыемстваў з таго вялікага спісу, што падрыхтаваў BELPOL і ў якім маюцца доказы працы беларускіх вытворцаў на карысць расійскіх акупацыйных войскаў? Ці магчыма сумясціць ціск і перамовы з рэжымам у спробах вызваліць палітвязняў з-за кратаў? Гэтыя ды іншыя тэмы абмяркоўваем у жывым эфіры Еўрарадыё з прадстаўніком ініцыятывы BELPOL Мацвеем Купрэйчыкам

Прэзідэнт Турцыі Эрдаган прапанаваў зрабіць усё неабходнае для правядзення трохбаковай сустрэчы Пуціна, Зяленскага і Трампа для перамоў па дасягненні міра ва Украіне. Правесці новы раўнд перамоў у Турцыі прапанаваў расіянам і новы міністр абароны Украіны Умераў. І ўсё гэта на фоне нядаўніх заяў прэзідэнта ЗША пра расчараванне Пуціным, аднаўленне ваеннай дапамогі Украіне і выстаўленага Маскве 50-дзённга ультыматума перад увядзеннем санкцый і ўсталяваннем падаткаў. Здавалася б, прычым тут Беларусь, Лукашэнка, дэмсілы і беларускія палітвязні…

Ці сапраўды Трамп гатовы распачаць “тарыфную вайну” з Расіяй і яе патрнёрамі і як гэта можа адбіцца на адносінах ЗША і Кітая? Як пагаршэнне стасункаў паміж Вашынгтонам і Масквой паўплывае на перамоўны трэк ЗША з Лукашэнкам і ці сапраўды гэты трэк існуе? Ці пачуе Трамп заклікі Ціханоўскай пра неабходнасць пакараць Лукашэнку? На гэтыя ды іншыя пытанні ў эфіры Еўрарадыё адказвае амерыканіст, дарадца Агенцтва еўраатлантычнага супрацоўніцтва Антон Пянькоўскі

Джон Коўл, намеснік спецпрадстаўніка Трампа Кіта Келага, нечакана падзяліўся пікантнымі падрабязасцямі візіту ў Мінск і сустрэчы з Лукашэнкам. Як вынікае са слоў амерынскага юрыста, паляцець да Лукашэнкі і там яго зачараваць было наўпрост заданнем Дзярждэпа. Прычым, зрабіць гэта трэба было з адзінай мэтай — выцягнуць з-за кратаў пэўных вязняў. Амаль адначасова з гэтым прызнаннем Коўла, у нямецкай прэсе з’явілася інтэрв’ю з Карлсанам. Тым, які жыве ў ЗША, але лепш за ўсіх разбіраецца ў прычынах вайны ва Украіне, геніяльнасці Пуціна і ведае пра блізкі крах Нямеччыны і Еўропы ўвогуле. Так, таго генія з Крамля, які здолеў з Азербайджана зрабіць ворага Расіі і сябра Украіны.

Ці сапраўды Трамп накіраваў Келага і Коўла да Лукашэнкі выключна з мэтай вызвалення вязняў з лукашэнкаўскіх турмаў і чаму ўвогуле гэты аповед з’явіўся менавіта цяпер? Ці варта на фоне прызнанняў Коўла чакаць працягу перамоваў Вашынгтона з Мінскам і пры чым тут перамовы ў Турцыі? Чаму прэзідэнт Азербайджана пайшоў на канфрантацыю адносін з Расіяй і што стаіць за нападкамі Карлсана на Нямеччыну і ЕС? Гэтыя ды іншыя тэмы абмяркоўваем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Чыноўнікі то хваляцца самым нізкім беспрацоўем ў краіне, то наракаюць на недахоп працоўных рук. Чаму гэтых рук раптоўна стала катастрафічна не хапаць, чыноўнікі не прызнаюцца, але выйсце знайшлі — з дапамогай міліцыі “ўладкоўваць” на працу беспрацоўных дармаедаў. Ну і працягваюць ваяваць з яшчэ адным даўнім ворагам беларускай эканмікі — сэканд-хэндамі. Тымі, за якія так перажываў Кныровіч, але якія ніякія заходнія санкцыі забіць не змаглі.

Што адбываецца на рынку працы і чаму чыноўнікам не даюць спакою нешматлікія “прынцыповыя” беспрацоўныя? Ці сапраўды сэканды ўяўляюць пагрозу айчыннай лёгкай прамысловасці і чаму запаволіўся рост ВУП і заробкаў? Чаму працоўныя мігранты не спяшаюцца ехаць у Беларусь і навошта Алісе Рыжычэнка пасада ў АПК? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, магістаркай эканомікі Алісай Рыжычэнка.

Кім ты хочаш быць, калі пасталееш? Чаму ўпалі кошты на авакада (а на яблыкі — не) — Еўразум за 18 ліпеня | Новости Беларуси за 18 июля by Euroradio