5 сакавіка ў эфіры Еўрарадыё — магістарка сацыялогіі і антрапалогіі Маргарыта Тарайкевіч.

Таталітарныя рэжымы вельмі любяць, каб усе людзі прытрымліваліся адной ідэалогіі, кіраваліся адной ідэяй і імкнуліся да адзінай мэты. Але беларусы гэтага ўжо маюць аж занадта, і сёння нам неабходна свабода. Тая свабода, якая дае магчымасць пачувацца ў сваёй краіне камфортна і якая дазваляе рабіць усё, каб ты, твая сям’я і твая Бацькаўшчына развіваліся. Гэта база, якая дае магчымасць развівацца і нацыянальнаму складніку. Які, найперш, выяўляецца ў культуры, пераканана Маргарыта Тарайкевіч.

Пра тое, чаму для грамадства важна, але і небяспечна мець агульную нацыянальную ідэю, навошта быць беларусам па-за Беларуссю, і наколькі беларусы насамрэч талерантная нацыя, мы і разважаем у праграме “Ідэя Х” з Маргарытай Тарайкевіч.

Словы Трампа пра Лукашэнку і сітуацыя на Блізкім Усходзе — Еўразум за 4 сакавіка | Новости Беларуси за 4 марта by Euroradio

Па словах Трампа, у яго “добрыя адносіны з кіраўніком Беларусі”. Што праўда, прэзідэнт ЗША не прыгадаў (ці адмыслова не сказаў) ні імя, ні пасаду таго, з кім у яго “добрыя адносіны”. Адны зрабілі з гэтага выснову, што Трампу і Лукашэнка, і Беларусь “да далёкай зоркі”, іншыя ўспрынялі як доказ, што дыялог паміж Мінскам і Вашынгтонам актыўна працягваецца. У той жа час ЕС працягнуў дзеянне санкцый у дачыненні да рэжыму Лукашэнкі. Але ўвядзенне 20-га пакета было заблакіравана. І не таму, што рэжым у Мінску спыніў рэпрэсіі і дапамогу расійскай арміі…

Як з дыпламатычнай мовы перакласці адказ Трампа на пытанне пра Беларусь і Лукашэнку, і чаму Лукашэнка так доўга маўчаў наконт сітуацыі ў Іране? Чаму ЕС не ўхваляе 20-ы пакет санкцый, і ці не прымусяць апошнія падзеі ў Іране змяніць еўрапейскую палітыку адносна Мінска? Ці не знікла патрэба ў існаванні Каардынацыйнай рады, і чым варта займацца дэмсілам — выбудоўваннем унутранай кааліцыі ці фарміраваннем Добраахвотніцкага корпуса? На гэтыя ды іншыя пытанні ў эфіры Еўрарадыё адказвае лідар спіса “Каманда Латушкі і рух “За свабоду”, кіраўнік Народнага антыкрызіснага ўпраўлення і намеснік кіраўніцы Аб’яднанага пераходнага кабінета Павел Латушка.

У Беларусі працягваецца расці захворвальнасць на грып і вострыя рэспіраторныя інфекцыі, асабліва сярод дзяцей. З канца студзеня колькасць хворых павялічылася на 18–23%, і хоць пікавы перыяд прыпадаў на другую палову лютага, вірусы ўсё яшчэ актыўна цыркулююць па краіне: грып A (H3N2), рынавірусы, адэнавірусы, метапнеўмавірусы, вірусы парагрыпу і SARS-CoV-2.

У эфіры Еўрарадыё педыятрка Мая Церакулава раскажа, як адрозніць грып ад прастуды і COVID-19, якія вірусы найбольш небяспечныя, і падзеліцца простымі спосабамі абароны сябе і блізкіх ад ускладненняў.

Таксама паразмаўляем пра прышчэпкі.

У лютым Святлана Ціханоўская наведала заняткі дзіцячага хору Беларускай школы мастацтваў імя М. Равенскага ў Варшаве. Разам з Галінай Казіміроўскай, заснавальніцай гэтай школы і кіраўніцай легендарнага Вольнага хору. Хору, які не так даўно запісаў і выдаў на CD новы альбом харавых песень. Большасць якіх Галіна Казіміроўская адшукала ў архівах лонданскай бібліятэкі імя Скарыны. І сёння перад школай імя Равенскага, Вольным хорам (як і ў выпадку з большасцю беларускіх культурніцкіх і адукацыйных ініцыятыў за мяжой) паўстаюць пытанні фінансавання і памяшкання. Вырашыць якія сваімі сіламі ў дыяспары не атрымліваецца.

Чым жыве сёння школа Равенскага, і ці карыстаецца яна папулярнасцю? З якімі праблемамі сутыкаецца школа і ад каго залежыць вырашэнне гэтых праблем? Што новага ў Вольнага хору, што такое праект “Пагружэнне” і што яшчэ цікавага хаваюць архівы лонданскай “скарынаўкі”? На гэтыя ды іншыя пытанні ў эфіры Еўрарадыё адказвае мастацкая кіраўніца і дырыжорка калектыву “Concordia Chor”, заснавальніца “Вольнага хору” і Беларускай школы мастацтваў імя М. Равенскага ў Варшаве Галіна Казіміроўская.

Ваенную аперацыю ў Іране Трамп плануе скончыць за месяц. А можа, і хутчэй. Бо там, пасля ліквідацыі кіраўніцтва, і сярод прадстаўнікоў улады ёсць жадаючыя дамаўляцца з ЗША, і народ гатовы ў зручны момант узяць уладу ў свае рукі. Вось толькі ў тым, што ўсё пойдзе па такім “заходнім сцэнары”, ёсць вялікія сумневы. Усё ж гэта Усход, які, як вядома, “справа тонкая”…

Чаго чакае ад ваеннай аперацыі ЗША і ці варта Трампу спадзявацца на пажаданы вынік? Чаму Іран актыўна абстрэльвае ўсіх сваіх суседзяў, і якія пагрозы нясе такая стратэгія? Што ваенная аперацыя ў Іране мяняе для Масквы, і ці будзе пастаўлены Лукашэнка перад неабходнасцю рабіць выбар паміж двума “дзядамі”? Гэтыя ды іншыя тэмы абмяркоўваем у штотыднёвым жывым эфіры Еўрарадыё з кандыдаткай гістарычных навук, эксперткай па міжнароднай палітыцы Розай Турарбекавай.

Сітуацыя на Блізкім Усходзе закране беларусаў? — Еўразум за 3 сакавіка | Новости Беларуси за 3 марта by Euroradio

Бізнесмены бываюць розныя: і сумленныя, і махляры, і тыя, якія аддаюць перавагу крымінальным схемам. Але здараецца, што такім бізнесменам-крымінальшчыкам, які першым хапаецца за любыя крымінальныя схемы і прапановы, становяцца цэлыя дзяржавы. Бо там да ўлады прыходзяць кіраўнікі з бізнес-падыходам злодзея. І тады на дзяржаўным узроўні ва ўсе бакі ідзе кантрабанда ці скупляецца ў злодзеяў імі раней скрадзенае ў іншых людзей ці дзяржаў. Так, размова пра новае расследаванне BELPOL, якое раскрывае, як скрадзенае расіянамі ва Украіне збожжа становіцца “беларускім”, а потым трапляе на еўрапейскі рынак.

Якім чынам збожжа з акупаваных тэрыторый Украіны трапляе ў Беларусь, і наколькі гэта законна? Ці ёсць доказы, што сланечнікавы алей з маркіроўкай “Зроблена ў Беларусі”, які ідзе ў Еўропу, вырабляецца з крадзенага сланечніка? Ці магчыма ў сённяшніх умовах узмацняць ціск на Лукашэнку, і чаго чакаць ад выбараў у КР? Пра гэта і шмат што іншае мы і разважаем у жывым эфіры Еўрарадыё з прадстаўніком ініцыятывы BELPOL Уладзімірам Жыгарам.

Хоць палітвязні і выходзяць паступова на свабоду, як у выніку перамоў з ЗША, так і па заканчэнні тэрміну зняволення, але агулам сітуацыя з рэпрэсіямі ў Беларусі не паляпшаецца. І рэлігійныя арганізацыі ды вернікі не выключэнне ў гэтым працэсе затрыманняў, прысудаў ды катаванняў. Актыўнасці па-за межамі звычайных службаў не вітаюцца. Калі гэта не актыўнасці сумесна з сілавымі структурамі ці аддзеламі ідэалогіі выканкамаў. А яшчэ дазволеныя “гуманітарныя місіі дапамогі” расійскім акупацыйным войскам.

Што фіксуе маніторынг рэпрэсій, і якія тэндэнцыі панавалі ў лютым? Ці ёсць тлумачэнне, чаму менавіта частку штурмавікоў-крымінальнікаў абралі “валанцёры” са Свята-Елісавецінскага манастыра для дапамогі? Ці магчыма ў сённяшніх умовах святарам заставацца па-за дзяржаўнай палітыкай і пазбягаць ідэалогіі? Пра гэта і шмат што іншае мы і разважаем у жывым эфіры Еўрарадыё з тэалагіняй, эксперткай у галіне рэлігіі, палітыкі і абароны правоў Наталляй Васілевіч.

Ваенная аперацыя ЗША і Ізраіля супраць Ірана прыводзіць да чаканага выніку — росту коштаў на газ і паліва. Паводле інфармацыі Bloomberg, кошты на газ у Еўропе вырастуць на 130%. Адначасова BILD паведамляе пра павелічэнне кошту паліва і вялізныя чэргі на аўтазапраўках Германіі. Як гэтая сітуацыя паўплывае на беларускую эканоміку і звычайных беларусаў, пакуль ніхто сказаць не можа, але Турчын ужо прапаноўвае рэгуляваць заробкі.

Чаго чакаць ад вайны ў Іране для еўрапейскіх спажыўцоў газу і паліва? Ці ўплывае ваенная аперацыя ў Іране на эканоміку Беларусі, і якім чынам? Што Лукашэнка прывёз з Масквы, і чаму Турчын вырашыў рэгуляваць заробкі? На гэтыя ды іншыя пытанні ў эфіры Еўрарадыё адказвае аўтар і вядоўца праграмы “Оптымум” на канале “Беларусы і рынак”, эканамічны аглядальнік Андрэй Махоўскі.