euroradio.fm

Як нявестка Лукашэнкі стрыжэ грошы з беларусаў — Еўразум за 4 лютага | Новости Беларуси за 4 февраля by Euroradio

Міграцыйная палітыка становіцца больш жорсткай практычна паўсюль — у Еўропе ў тым ліку. Ёсць і лагеры для ўцекачоў, і дэпартацыі, і Дублінскі рэгламент… Але ў краінах ЕС няма ICE, агенты міграцыйнай службы не забіваюць людзей на вуліцы, а музыкі падчас музычнай прэміі не скандзіруюць: “ICE, пайшлі прэч!” І людзі не вымушаны баяцца выходзіць з дому, нават калі ў ЗША яны знаходзяцца законна. Так, гэта ўсё пра ЗША, а не пра Беларусь, як магло здацца беларусам. Але ў нашых землякоў, якія некалі з’ехалі з краіны, ратуючыся ад лукашэнкаўскага рэжыму, тое, што сёння адбываецца ў ЗША, выклікае дэжавю.

Што сёння адбываецца ў горадзе, дзе агенты ICE застрэлілі двух чалавек, і ці гэтак жа, як у Мінеапалісе, на дзеянні агентаў ICE рэагуюць у іншых гарадах ЗША? Ці можна параўноўваць дзеянні агентаў ICE з дзеяннямі лукашэнкаўскіх АМАПа альбо ГУБАЗіКа, і ці гатова амерыканскае грамадства да такіх змен? Што прымушае Святлану валанцёрыць і ездзіць ва Украіну, і як беларусы дапамагаюць адзін аднаму ў сітуацыі пагрозы? На гэтыя ды іншыя пытанні ў жывым эфіры Еўрарадыё адказвае беларуска з грамадзянствам ЗША з Мінеапаліса, валанцёрка Святлана Волд

29 студзеня яшчэ адзін суд па “Дубліне” скончыўся перамогай для беларускага палітвязня Алеся Папковіча — яму дазволілі застацца ў Польшчы, хоць ён і быў эвакуяваны з Беларусі па літоўскай візе. Але не толькі Дублінскі рэгламент з’яўляецца пагрозай для асобных беларусаў. Часам і Інтэрпал можа папсаваць нервы апанентам Лукашэнкі. А ёсць яшчэ пытанні з банкаўскімі рахункамі, падарожнымі дакументамі і гэтак далей.

Чым адметная справа Алеся Папковіча і чаму гэтая перамога такая важная? Ці можна спадзявацца, што польскія (і не толькі) суды будуць інакш разглядаць справы па Дублінскім рэгламенце, і што, апроч некалькіх выйграных спраў у судах, для гэтага трэба? Што рабіць, калі трапіў у базу вышуку Інтэрпала, і якія праблемы з дапамогай палітвязням застаюцца па сёння не вырашанымі? Пра гэта і шмат што іншае мы і разважаем у жывым эфіры Еўрарадыё з юрысткай, сузаснавальніцай дабрачыннай ініцыятывы “Партызанка” Ганнай Маціеўскай і адвакаткай Марыяй Колесавай-Гудзілінай

Канкрэтная дата сустрэчы прэзідэнта Украіны Уладзіміра Зяленскага са Святланай Ціханоўскай яшчэ не вызначана, а ўжо пачалося актыўнае абмеркаванне таго, якія пытанні падчас гэтай сустрэчы неабходна ўзняць. І адно з іх — стварэнне на падмурку беларускіх вайсковых структур і фарміраванняў Беларускай вызвольнай арміі. Ідэя на першы погляд падаецца нерэальнай і невыканальнай. Але справа ў тым, што яшчэ ў 2023 годзе падчас канферэнцыі “Шлях да волі” шэраг беларускіх мілітарных і парамілітарных арганізацый сумесна сфарміравалі Часовую вайсковую камісію. Якая ў сваю чаргу займаецца фарміраваннем Беларускай вызвольнай арміі…

Якім чынам Часовая вайсковая камісія плануе сфарміраваць Беларускую вызвольную армію, і ці магчыма гэта зрабіць ва Украіне? Ці варта гэта пытанне ўздымаць падчас сустрэчы Ціханоўскай і Зяленскага, і ці былі ўжо на гэты конт размовы з Офісам? Якія праблемы зараз ёсць у беларускіх добраахвотнікаў з Палка Каліноўскага і не толькі, і ці рэальна рэкрутаваць дастатковую для стварэння арміі колькасць ахвотных? На гэтыя ды іншыя пытанні ў жывым эфіры Еўрарадыё адказвае старшыня Часовай вайсковай камісіі Беларускай вызвольнай арміі Мікіта “Аксон” Забуга

Жонка Дзмітрыя Лукашэнкі Ганна знаёмая беларусам як паэтка, аўтарка тэкстаў да песень пад псеўданімам Ганна Сялук. Папраўдзе, знаёмства беларусаў з творчасцю Ганны вымушанае, бо за яе графаманскімі тэкстамі стаіць чарга з “зорак” беларускай эстрады. І гэта не дзіўна, бо Ганна не толькі аўтарка тэкстаў да песень, але і заснавальніца “Музычнай медыякампаніі”. Адпаведна, адкрывае магчымасць выхаду на сцэну для выканаўцаў. А для “сям’і” Лукашэнкі жонка Дзмітрыя — аўтарка ідэальнай схемы па перамяшчэнні грошай з дзяржаўнага бюджэту ў кішэню гэтай самай сям’і.

Ці законна Ганна Лукашэнка атрымлівае бюджэтныя грошы на свае праекты, і ці можна казаць пра іх як пра “схемы па выкачванні грошай”? Чаму “Музыкальную медыякампанію” расследавальнікі лічаць манаполіяй, і ці законна гэта? Ці магчыма ў Беларусі зарабіць на музыцы, і пра якія сумы ідзе размова? На гэтыя ды іншыя пытанні ў эфіры Еўрарадыё адказвае журналістка-расследавальніца "Бюро Медыя" Ксенія Вязнікоўцава

Як дэмсілам дамовіцца з Лукашэнкам — Еўразум за 3 лютага | Новости Беларуси за 3 февраля by Euroradio

Міністр абароны Германіі Пісторыус заклікаў Берлін і яго саюзнікаў “не паддавацца песімізму” і падтрымліваць Украіну, нават калі гэта будзе вымагаць павелічэння ваенных выдаткаў. Што праўда, аргументаваў ён свой заклік дастаткова арыгінальнай прымаўкай пра… “туалетныя здольнасці” сумнага асла. І рашуча абышоў тэму ракет Taurus, пра пастаўкі якіх Украіне пытанне не можа вырашыцца не першы год. А можа, акурат гэта і дапамагло б Трампу ўжо скончыць вайну Расіі з Украінай. Але ёсць у Вашынгтона яшчэ сакрэтная зброя ў выглядзе Лукашэнкі…

Ці пачуе Еўропа міністра абароны Германіі, і як мяняецца ацэнка расійскай ваеннай пагрозы ў краінах ЕС? Як сітуацыя з Іранам уплывае на бяспеку ў рэгіёне, і як сустрэча Зяленскага з Ціханоўскай мяняе стаўленне да беларускага пытання? Ці магчыма сёння паўтарыць гісторыю стварэння Арміі Андэрса, і ці здолее Украіна засудзіць Лукашэнку? Гэтыя ды іншыя тэмы абмяркоўваем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

У 2026 годзе мы чакаем працягу працэсу, які пачаўся ў годзе мінулым як вынік перамоў Вашынгтона з Мінскам, — вызвалення палітвязняў. Хай сабе і з дэпартацыяй: не ўсе могуць абняць сваіх родных і блізкіх, аднак яны, прынамсі, больш не ў лукашэнкаўскіх катавальнях за кратамі. Але, размаўляючы пра “вяртанне да нармальнасці”, немагчыма забыць пра рэпрэсіі, якія не спыняюцца ў Беларусі, пра адсутнасць законнасці.

Чым дэмсілы могуць дапамагчы (ці перашкодзіць) перамоўшчыкам з Вашынгтона ў працэсе вызвалення палітвязняў, і як схіліць да саўдзелу ў гэтым працэсе Еўропу? Што з сябе можа ўяўляць “вяртанне да нармальнасці”, і чаму заявы Калеснікавай і Бабарыкі выклікаюць настолькі негатыўную рэакцыю? Як стварэнне “берлінскага цэнтра сілы” паўплывае на дэмакратычны рух за мяжой, і чаго чакаць ад сёлетніх выбараў у Каардынацыйную раду? На гэтыя ды іншыя пытанні ў жывым эфіры Еўрарадыё адказвае былая палітзняволеная, дэлегатка Каардынацыйнай рады (фракцыя “Моладзевы наступ”), менеджарка ініцыятывы politzek.me Алана Гебрэмарыям

Супольная малітва з прадстаўнікамі розных канфесій аб адзінстве хрысціян аказалася для праваслаўнага духавенства пад негалоснай забаронай. І так ужо трэці год запар. Такая выбарачная актыўнасць сведчыць, што няўдзел БПЦ у малітве аб еднасці абумоўлены рашэннем “зверху” і не з’яўляецца вынікам выпадковых абставін. Што не замінае кіраўніцтву БПЦ ухвальна ставіцца да дэманстратыўна мілітарысцкай дзейнасці Свята-Елісавецінскага манастыра і “праваслаўнага пісьменніка” Гаўрылава. На гэтым фоне і ў першы месяц 2026 года рэпрэсіі ў дачыненні да святароў і вернікаў у Беларусі працягваліся. А ў дыяспары, сярод вернікаў у тым ліку, пашыраліся размовы пра “вяртанне да нармальнасці”.

Чым не задавальняе БПЦ імкненне да адзінства хрысціян і якія “вярхі” забараняюць удзел у такой малітве? Што штурхае БПЦ на падтрымку мілітарысцкіх дзеянняў Свята-Елісавецінскага манастыра і што не так з “валанцёрствам” Гаўрылава? Чаму лаяльнасць царкоўнага кіраўніцтва не ратуе святароў ад рэпрэсій, і ці магчыма па-хрысціянску прабачыць злачынствы рэжыму і “вярнуцца да нармальнасці”? Пра гэта і шмат што іншае мы і разважаем у жывым эфіры Еўрарадыё з тэалагіняй, эксперткай у галіне рэлігіі, палітыкі і абароны правоў Наталляй Васілевіч

Ці пачуе Еўропа (а найперш Германія), што ёй спрабуе данесці Марыя Калеснікава праз еўрапейскія СМІ наконт неабходнасці размаўляць і дамаўляцца з Лукашэнкам і пра “вяртанне да нармальнасці”, як гэта ўжо пачулі лукашэнкаўскія прапагандысты. І адрэагавалі. Але неяк неадэкватна: захейцілі Марыю, як кажуць яе абаронцы і прыхільнікі. Амаль як Зяленскага пасля яго выступаў у Давосе і Вільні ды сустрэчы з Ціханоўскай.

Як у Германіі рэагуюць на заклікі дамаўляцца з Лукашэнкам і якую пазіцыю займае Альтэрнатыва для Германіі ў гэтым пытанні? Як на беларусах, што шукаюць у Германіі прытулку, могуць адбіцца заклікі Калеснікавай “вярнуцца да нармальнасці”, і ў які бок змяняецца еўрапейскае міграцыйнае заканадаўства? Ці паедуць актывісты з Варшавы ды Вільні ў Берлін, каб далучыцца да новага цэнтра сілы, і дзе прапаганда знаходзіць матэрыялы са станоўчай ацэнкай дзеянняў Лукашэнкі? На гэтыя ды іншыя пытанні ў жывым эфіры Еўрарадыё адказвае паліталагіня, экспертка стратэгіі і аналітыкі, міжнародная сакратарка Задзіночання беларускіх студэнтаў Аліна Харысава