euroradio.fm

Хлуслівы міністр і бразільскія планы — Еўразум за 2 лютага | Новости Беларуси за 2 февраля by Euroradio

Беларусам прапануюць новы каляндар. Ну, не тое каб зусім новы, але пэўныя святочныя даты нам прапанавалі перагледзець і пераасэнсаваць — нешта святкаваць перастаць, а нешта, наадварот, пачаць. Да прыкладу, 2 лютага прапануецца святкаваць як Дзень Нязломнасці. І адзначаць такім чынам дзень народзінаў Кастуся Каліноўскага. Але не толькі гэта, а яшчэ і нязломнае імкненне нашага народа быць вольнымі на сваёй зямлі.

У чым карані беларускай нязломнасці, і ці сапраўды наша гісторыя — гэта толькі гісторыя параз? Ці азначае беларуская справа па змоўчанні боль і пакуты без гарантаванага галівудскага фіналу, і як нацыя здольна ацаляцца пасля чарговага яе гвалтавання захопнікамі? Наша нязломнасць — гэта прыкмета загартаванага духу нацыі або простая сялянская ўпартасць? Пра гэта і шмат што іншае мы дыскутуем і разважаем у жывым эфіры Еўрарадыё з пісьменніцай Святланай Курс, прадстаўніком Аб’яднанага пераходнага кабінета па нацыянальным адраджэнні, кандыдатам філасофскіх навук Паўлам Баркоўскім і доктаркай гуманітарных навук, гісторыкам Настай Ільіной

Не толькі цэментныя заводы, дрэваапрацоўка ды шматлікія сілавыя структуры — знайшлася і яшчэ адна галіна, куды, як у бездань, і з такім жа вынікам, шмат гадоў уліваюцца грошы з бюджэту. Гэта меліярацыя. Пра важнасць якой няспынна кажа Лукашэнка. Вось толькі, як і ў выпадку з вышэй узгаданымі сферамі, тут толькі страты. Як, дарэчы, і ў выпадку з пошукамі ў беларускіх нетрах нафты. Не быць якой не можа ў беларускай зямлі. Як высвятляецца — можа.

Што не так з праектамі па меліярацыі, і ці вінаваты чыноўнікі ў стратах з-за гэтых праектаў? Што насамрэч прымусіла Лукашэнку адмовіцца ад ідэі пошукаў беларускай нафты, і пры чым тут Мадура? Чаму беларускія чыноўнікі выгараюць, прадпрыемствы ўсё часцей банкруцяцца, а заробкі перасталі расці? На гэтыя ды іншыя пытанні ў жывым эфіры Еўрарадыё адказвае аўтар і вядоўца праграмы "Оптымум" на канале “Беларусы і рынак”, эканамічны аглядальнік Андрэй Махоўскі

Паводле даклада амерыканскай разведкі для Кангрэса ЗША, Беларусь ператварылася ў практычна паўнапраўную частку расійскай вайсковай інфраструктуры ва Усходняй Еўропе. Цяпер Мінск трэба разглядаць не проста як партнёра, а як перадавы вайсковы плацдарм Расіі. Еўракамісія падпісала пагадненне з Радай Еўропы аб выдзяленні 10 мільёнаў еўра на стварэнне групы STAT, якая мае падрыхтаваць трыбунал у справе ваенных злачынстваў супраць Украіны. Гэта датычыць і Беларусі як краіны-суагрэсара. А ў Кіеве і Офісе Ціханоўскай вызначаюцца з датай сустрэчы кіраўніцы Аб’яднанага пераходнага кабінета і прэзідэнта Украіны.

Чым небяспечны для Пуціна і Лукашэнкі трыбунал, на стварэнне якога Еўракамісія выдзяляе неабходныя сродкі, і якія змены адбываюцца ў рэгіянальнай палітыцы Украіны? Ці будзе Кіеў і надалей “злаваць дзеда”, і чаго чакаць ад сустрэчы Ціханоўскай і Зяленскага? Што засталося ад суверэнітэту Беларусі, і як можа даклад амерыканскай разведкі паўплываць на перамовы Вашынгтона і Мінска? Пра гэта і шмат што іншае мы і разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

Новая міграцыйная стратэгія ЕС і змена рыторыкі — Еўразум за 30 студзеня | Новости Беларуси за 30 января by Euroradio

Зварот да беларускай тэмы прэзідэнта Украіны Уладзіміра Зяленскага шмат для каго стаў нечаканасцю. Для кагосьці прыемнай, для пэўных асоб — не вельмі. Бо гаварыў Зяленскі пра пагрозу з тэрыторыі Беларусі і з боку Лукашэнкі і яго рэжыму, пра барацьбу за свабоду беларускага народа, пра палітвязняў. І яшчэ больш нечакана асабіста запрасіў Святлану Ціханоўскую наведаць Кіеў. Што спарадзіла размовы пра “вокны магчымасцей” для дэмсіл і беларусаў, пра змены стаўлення Кіева да Лукашэнкі і нават пра магчымасць стварэння беларускай вызвольнай арміі на базе Палка імя Каліноўскага!

Што насамрэч стала прычынай змены стаўлення Зяленскага да беларускай тэмы і дэмсіл, і чаму была ініцыявана сустрэча з Ціханоўскай? Чаму Кіеў раптоўна асмялеў і перастаў баяцца раззлаваць Лукашэнку? Ці будзе супраца Банкавай і дэмсіл працяглай, і якая Украіне ад такой супрацы карысць? На гэтыя ды іншыя пытанні ў эфіры Еўрарадыё адказвае былы надзвычайны і паўнамоцны амбасадар Украіны ў Беларусі, экс-амбасадар па асаблівых даручэннях па Беларусі МЗС Украіны Ігар Кізім.

Перамовы наконт падпісання мірнага пагаднення паміж Расіяй і Украінай працягваюцца, але такое ўражанне, што ўвага прэзідэнта ЗША Дональда Трампа пераключылася з гэтай вайны на сітуацыю ў Іране. Што ўжо казаць пра Беларусь — на гэтым “перамоўным трэку” і ўвогуле цішыня другі месяц. Што праўда, беларуская тэма актуалізавалася на рэгіянальным узроўні. Найперш дзякуючы прэзідэнту Украіны. Які не толькі палохаў пагрозай з Беларусі, выступаючы ў Давосе, але і нечакана для ўсіх асабіста запрасіў Святлану Ціханоўскую наведаць Кіеў.

Чым Трампу цікавы Іран, і ці можна казаць, што ён забыўся пра Беларусь? Ці пойдзе ЕС на змену сваёй палітыкі адносна Лукашэнкі і ці надоўга хопіць іх прынцыповасці? Чаму Зяленскі змяніў сваё стаўленне да Ціханоўскай, і як гэтым можна скарыстацца дэмсілам? На гэтыя ды іншыя пытанні ў эфіры Еўрарадыё адказвае палітычны аналітык Віталь Цыганкоў.

На мерапрыемствах, прысвечаных гадавіне паўстання 1863 года, прэзідэнт Польшчы Караль Наўроцкі казаў, у тым ліку, пра сённяшнюю барацьбу беларусаў за сваю свабоду і пра палітвязняў. Пра тое, што іх неабходна выцягваць з лукашэнкаўскіх турмаў. З іншага боку, мы чуем заклікі да ЕС распачаць перамовы з Лукашэнкам, каб наўзамен санкцый вызваляць людзей з-за кратаў.

Чым цікавыя выказванні прэзідэнтаў Польшчы, Літвы і Украіны ў адрас Беларусі і беларусаў, якія прагучалі апошнімі днямі? Ці гатова Польшча пайсці на ўступкі Лукашэнку дзеля вызвалення важных для яе палітвязняў і ці пойдзе ЕС на змену сваёй палітыкі адносна Лукашэнкі? Чаму Зяленскі змяніў сваё стаўленне да дэмсіл, і якіх новых пагроз з боку Лукашэнкі і Пуціна варта чакаць суседзям Беларусі? На гэтыя ды іншыя пытанні ў эфіры Еўрарадыё адказвае палітолаг, старшы навуковы супрацоўнік Цэнтра ўсходніх даследаванняў у Варшаве Каміль Клысіньскі (Kamil Kłysiński).

Пра тое, што беларускую прамысловасць выратаваў Лукашэнка, беларусам вядома даўно. Ну, ён жа яшчэ да абрання прэзідэнтам, падчас дэбатаў са сваім канкурэтнам Кебічам, абяцаў “запусціць заводы”. Запусціў! І гэта добра відаць сёння. Таму жывуць беларусы лепш за сваіх суседзяў. Тых жа літоўцаў, пра што ўжо не першы раз нагадвае грамадзянам Літоўскай Рэспублікі міністр замежных спраў Беларусі Рыжанкоў. І даказвае перавагі “лукашэнкаўскай мадэлі эканомікі” на фактах. Прыгожа даказвае — у такой краіне хочацца жыць. І вярнуцца туды. Праўда, спачатку трэба папрацаваць над яе “вяртаннем да нармальнасці”…

Што не так з аргументацыяй у звароце Рыжанкова да літоўцаў, і чаму беларусы не цэняць свайго шчасця? Ці праўда, што Лукашэнка “запусціў” не толькі заводы, але і сельскую гаспадарку? Ці здольны рэжым “вярнуцца да нармальнасці”, і што з той нармальнасцю не так? Пра гэта і шмат што іншае мы і разважаем у жывым эфіры Еўрарадыё з блогерам Аляксандрам Кныровічам.

Не паспела знікнуць з навін інфармацыя пра сустрэчы і гучныя заявы, у тым ліку і адносна сітуацыі ў Беларусі, як беларуская тэма ізноўку з’явілася на парадку дня. Але цяпер пляцоўкай стала Вільня, дзе адзначаліся чарговыя ўгодкі паўстання 1863 года — паўстання Кастуся Каліноўскага. Прэзідэнты Украіны, Літвы, Польшчы ўзгадвалі беларусаў і Беларусь. А вечарам Уладзімір Зяленскі яшчэ і сустрэўся асобна са Святланай Ціханоўскай. І ўсё гэта адбывалася на фоне новай хвалі дыскусіі пра перамовы і дыялог з рэжымам Лукашэнкі.

Чым адметны сёлетні Эканамічны форум у Давосе, і якія яго вынікі для Беларусі і беларусаў? Як рыхтавалася сустрэча Ціханоўскай і Зяленскага, і чаму пра яе не паведамляюць афіцыйныя рэсурсы адміністрацыі прэзідэнта Украіны? Чаму Зяленскі звярнуўся да тэмы Беларусі і навошта яму сустрэча з Ціханоўскай? На гэтыя ды іншыя пытанні ў эфіры Еўрарадыё адказвае дарадца Святланы Ціханоўскай па пытаннях дыпламатыі Дзяніс Кучынскі.