Í fréttum er þetta helst

Starfsmenn á þremur spítölum í Íran segja að fjöldi slasaðra og látinna mótmælenda sem streyma til þeirra sé slíkur að ekki þeir hafi ekki undan og ekki gefist tími til að veita þeim lífsbjargandi aðhlynningu. Ekkert lát er á gríðarlegum mótmælum sem staðið hafa yfir í landinu vikum saman. Bandaríkjaforseti segir Bandaríkin reiðubúin að hjálpa.

Þrjátíu til fjörutíu fasteignir sem urðu fyrir altjóni í jarðhræringum og eldgosi við Grindavík síðustu ár verða rifin niður á þessu ári. Þrjú hús verða rifin á næstu vikum. Forseti bæjarstjórnar segir um blendnar tilfinningar að ræða en niðurrifið markar upphaf endurreisnar bæjarins.

Grænlenski utanríkisráðherrann Vivian Motzfeldt segir afdráttarlaust að landið sé ekki til sölu. Í samtali við KNR segist hún ætla að koma þeim skýru skilaboðum til dansks og bandarísks kollega síns á fundi í næstu viku, þeirra Lars Løkke Rasmussen og Marco Rubio.

Ríkisráðsfundur hefur verið boðaður á Bessastöðum klukkan þrjú, síðdegis á morgun. Þar verður formlega gengið frá breytingum í ríkisstjórn.

Mikið atvinnuleysi á Suðurnesjum miðað við aðra landshluta er högg segir forseti bæjarstjórnar í Reykjanesbæ og fá störf auglýst. Unnið er að því að fjölga atvinnutækifærum í bænum til að bregðast við.

Ríkisútvarpið hefur tilkynnt lagahöfundum sem sent höfðu inn lag í Söngvakeppnina að það verði ekkert af keppninni. Um miðjan desember var tilkynnt að Ísland tæki ekki þátt í Eurovision í ár vegna þátttöku Ísraels í keppninni.

Hryðjuverkamálið svokallaða er komið á dagskrá Hæstaréttar. Málið verður tekið fyrir þann 11. febrúar næstkomandi en tæpt ár er síðan Landsréttur staðfesti sýknudóm Héraðsdóms Reykjavíkur.

Takk fyrir í dag, sjáumst á morgun.

Í fréttum er þetta helst

RÚV hefur ákveðið að hætta við að halda Söngvakeppnina 2026 í ljósi þess að forsendurnar sem lagt var upp með, að sigurlagið yrði framlag Íslands í Eurovision, séu brostnar. Ekki hefur verið tekin ákvörðun hvort og þá hvenær einhverskonar önnur söngvakeppni verður haldin í staðinn.

Héraðsdómur Reykjaness féllst ekki á gæsluvarðhaldskröfu héraðssaksóknara yfir manni sem hefur verið ákærður fyrir að nauðga tíu ára dreng í Hafnarfirði um miðjan september síðastliðinn.

Sigurjón Þórðarson verður formaður fjárlaganefndar og Ásthildur Lóa Þórsdóttir verður nýr þingflokksformaður Flokks fólksins eftir breytingar sem gerðar verða á ráðherraliði flokksins. Á móti tekur Lilja Rafney Magnúsdóttir við formennsku í atvinnuveganefnd af Sigurjóni. Stefnt er að því að Ragnar Þór Ingólfsson taki embætti félags- og húsnæðismálaráðherra á ríkisráðsfundi um helgina og þá tekur Inga Sæland alfarið yfir embætti mennta- og barnamálaráðherra eftir brotthvarf Guðmundar Inga Kristinssonar úr ráðherrastóli.

Magnús Eiríksson, texta- og lagahöfundur, er látinn 80 ára að aldri.

Danól, í samráði við Heilbrigðiseftirlit Reykjavíkur, hefur hafið innköllun á NAN Expert Pro HA 1 og NAN Pro 1 þurrmjólk með lotunúmerunum 51690742F4, 51180346AC og 51250346AC. Áður hafði verið tilkynnt sérstaklega að ekki væri ástæða til þess að innkalla þurrmjólkina hér á landi en þá hafði það verið gert í Noregi.

„Við viljum ekki vera Ameríkanar, við viljum ekki vera Danir, við viljum vera Grænlendingar,“ segir í sameiginlegri yfirlýsingu formanna þingflokka Grænlands sem birt var á síðu ríkisstjórnar landsins í dag.

„Nú erum við bara komin að mörkum. Þetta varðar ekki bara starfsfólkið, þetta varðar líka sjúklingana. Við erum með dæmi um sjúklinga sem geta ekki verið í meðferð af því þeir finna fyrir einkennum. Og það viljum við ekki; að fólk þurfi frá að hverfa af því það finni fyrir myglueinkennum,“ segir Svana Helen Björnsdóttir, forstjóri Reykjalundar í Mosfellsbæ. Hún segir að staða Reykjalundar sé erfið. Hallarekstur var upp á 280 milljónir í fyrra og er mygla í húsnæðinu sem kostar mikið að gera við, segir Svana.

Takk fyrir í dag, sjáumst á morgun.

Í fréttum er þetta helst

Guðmundur Ingi Kristinsson hefur tilkynnt að hann muni segja af sér sem mennta- og barnamálaráðherra vegna veikinda. Hann mun halda áfram sem þingmaður Flokks fólksins.

Inga Sæland ætlar að taka við mennta- og barnamálaráðuneytinu af Guðmundi Inga Kristinssyni sem hefur ákveðið að láta af embætti. Ragnar Þór Ingólfsson, þingflokksformaður Flokks fólksins, verður félags- og húsnæðismálaráðherra.

Tuttugu og fimm björgunarsveitamenn komu um tvö hundruð manns til bjargar þegar ofsaveður reið yfir á þjóðvegi 1 milli Jökulsárlóns og Skaftafells í dag. Unnið er að því að koma fólkinu af fjöldahjálparstöð á Hofi í Öræfum að Hnappavöllum, þar sem það fær að gista í nótt.

Meðalaldur hjúkrunarfræðinga, sjúkraliða og ljósmæðra hefur hækkað á síðustu árum samkvæmt nýjum Talnabrunni Landlæknisembættisins. Formaður Sjúkraliðafélags Íslands segir þetta áhyggjuefni en á næstu tólf árum muni um sjö hundruð sjúkraliðar hverfa úr stéttinni sökum aldurs.

Áfram halda ráðamenn í Washington að ítreka ósk sína um að eignast Grænland. Nú síðast JD Vance, varaforseti Bandaríkjanna, sem fór nokkuð hörðum orðum um Danmörku í viðtali við Fox News í nótt. Líkt og Trump-stjórnin hefur gert áður gagnrýnir Vance Dani fyrir að hafa staðið illa að vörnum Grænlands undanfarin ár. Vance segir Trump vera tilbúinn til að ganga „eins langt og nauðsynlegt er“ til að tryggja hagsmuni Bandaríkjanna.

Ungt barn á Landspítalanum greindist með mislinga en barnið kom heim erlendis frá síðastliðinn mánudag. Barnið var á bráðamóttöku Barnaspítala Hringsins daginn eftir og verður haft samband við alla sem hugsanlega voru útsettir fyrir smiti á spítalanum.

Sjö eru með réttarstöðu sakbornings í tengslum við brunann á stuðningsheimilinu Stuðlum í október 2024. Þetta segir E. Agnes Eide Kristínardóttir, yfirlögregluþjónn rannsóknarsviðs lögreglunnar á höfuðborgarsvæðinu.

Takk fyrir í dag, sjáumst á morgun.

Í fréttum er þetta helst

Bandaríski herinn tók yfir stjórn rússnesks olíuflutningaskips í íslenskri efnahagslögsögu fyrr í dag eftir tveggja vikna eftirför og tóku rússneska áhafnarmeðlimi um borð fasta.

Samkvæmt nýrri skýrslu umboðsmanns Alþingis hafa sumir þeirra sem vistaðir eru á lögreglustöðinni á Hverfisgötu neyðst til að gera þarfir sínar í klefum sínum. Klefarnir eru ekki endilega þrifnir strax í kjölfarið.

Ólöf Eiríksdóttir, formaður foreldraráðs leikskólans Funaborgar, segir ólíðandi að foreldrar þurfi að hafa leikskólabörn sín heima í einn og hálfan dag í hverri viku. Hún gagnrýnir skipulagða fáliðun leikskólans og kallar eftir betri aðgerðum af hálfu borgarinnar.

Útlendingastofnun hefur tilkynnt brot starfsmanns stofnunarinnar á persónuvernd og þagnarskyldu til lögreglunnar. Starfsmaðurinn deildi nöfnum skjólstæðinga í lokuðum hópi á Instagram.

Beinn kostnaður sem lendir á Bílaleigu Akureyrar - Hölds vegna innleiðingar kílómetragjalds er talinn nema 174 milljónum króna í ár, að sögn Steingríms Birgissonar, forstjóra bílaleigunnar.

Björg Magnúsdóttir, fjölmiðlakona og fyrrverandi aðstoðarmaður borgarstjóra Framsóknarflokksins, gefur kost á sér í oddvitasæti Viðreisnar í komandi borgarstjórnarkosningum.

Veðurstofan varar við norðaustan hríð á Suðurlandi og Suðausturlandi í kvöld og á morgun.

Takk fyrir í dag, sjáumst á morgun.

Í fréttum er þetta helst

Trump útilokar ekki að beita hernaðarlegu valdi, segir í yfirlýsingunni.

Danska ríkisstjórnin og landsstjórn Grænlands hafa sent sameiginlega beiðni til utanríkisráðuneytis Bandaríkjanna. Þau óska eftir fundi með Marco Rubio, utanríkisráðherra, sem fyrst.

Sigríður Margrét Oddsdóttir hefur verið ráðin forstjóri Bláa lónsins hf. frá 16. mars næst komandi. Hún hefur undanfarin ár verið framkvæmdastjóri Samtaka atvinnulífsins. Grímur Sæmundsen, sem verið hefur forstjóri Bláa lónsins frá stofnun þess 1992 lætur þá af störfum en tekur sæti í stjórn félagsins á næsta aðalfundi.

Hildur Björnsdóttir verður áfram oddviti framboðslista Sjálfstæðisflokksins í Reykjavík í borgarstjórnarkosningum 16. maí næstkomandi. Þetta kemur fram í tilkynningu frá Verði, fulltrúaráði sjálfstæðisfélaganna í Reykjavík.

Kristrún Frostadóttir forsætisráðherra segir sátt ríkja innan ríkisstjórnarinnar um að þingsályktunartillaga um þjóðaratkvæðagreiðslu vegna aðildarviðræðna við Evrópusambandið verði lögð fyrir á vorþingi.

Kvikusöfnun heldur áfram undir Svartsengi og áfram eru auknar líkur á kvikuhlaupi og eldgosi á Sundhnúksgígaröðinni. Þetta er meðal þess sem fram kemur í tilkynningu frá Veðurstofunni.

Forstöðumaður hjá Icelandair segir flugfélagið hafa greitt fjóra milljarða í kolefnisgjald fyrir árið 2025. Hún óttast að undanþága Íslands frá reglugerð Evrópusambandsins falli úr gildi í árslok og verði gjöldin þar af leiðandi mun hærri. Staðsetning Íslands skekkir samkeppnisstöðu íslenskra flugfélaga.

Takk fyrir í dag, sjáumst á morgun.

Í fréttum er þetta helst

Þorgerður Katrín Gunnarsdóttir utanríkisráðherra segir gott að finna að það ríki algjör samstaða um það að gæta að varðstöðu um íslenska hagsmuni. Fundur utanríkismálanefndar í morgun hafi verið mikilvægur og upplýsandi. Það hafi verið gott að ræða við þingmenn þvert á flokka og heyra þeirra mat á stöðunni. „Bara þannig að ég tali alveg skýrt, því þú nefndir Grænland. Við myndum aldrei heimila einhverja aðgerð héðan frá Íslandi sem að myndi ógna Grænlandi. Bara svo það sé alveg skýrt,“ segir Þorgerður Katrín.

Utanríkisráðherra telur alþjóðasamfélagið ekki hafa borið næga virðingu fyrir Alþjóðlega sakamáladómstólnum eftir aðgerðir Bandaríkjastjórnar um liðna helgi. Hún segir áríðandi að Íslendingar standi vörð um hagsmuni sína gagnvart Bandaríkjamönnum þó að „vinur sé sá er til vamms segir“.

Farið var að kólna í húsum og um tíma datt út fjarskiptasamband þegar rafmagnslaust var í þrettán tíma á Tálknafirði á gamlársdag. Íbúar eru langþreyttir á ótraustu rafmagni.

Þegar ungmenni á aldrinum 15 til 24 ára óskar sjálft eftir innlögn í afeitrun vegna ópíóíðafíknar og fær þau svör að ekkert pláss sé tiltækt, myndast tómarúm sem kerfið kýs að líta fram hjá. Í því tómarúmi ríkir ekki aðgerðaleysi, heldur taka við óformlegar, hættulegar og ólöglegar lausnir.

Þýsk kona sem smyglaði 15 kílóum af ketamíni og fimm kílóum af MDMA-kristöllum til landsins í september, í leynilegum hólfum undir framsæti bíls, hefur verið ákærð fyrir stórfellt fíkniefnasmygl.

Ekki hefur tekist að endurheimta lík íslensks karlmanns sem féll á vígvellinum í Úkraínu og óvíst er hvort hægt verði yfir höfuð að endurheimta jarðneskar leifar hans. Fjölskylda mannsins nýtur aðstoðar borgaraþjónustu utanríkisráðuneytisins vegna andláts mannsins sem hét Kjartan Sævar Óttarsson og var 51 árs.

Sérsveit Ríkislögreglstjóra aðstoðaði Lögregluna á höfuðborgarsvæðinu í aðgerð í Grafarvogi í kvöld. Aðgerðum á vettvangi er ekki lokið.

Takk fyrir í dag, sjáumst á morgun.

Í fréttum er þetta helst

Kristrún Frostadóttir forsætisráðherra tjáði sig um málefni Grænlands á samfélagsmiðlum í kvöld. „Grænland er hluti af danska konungsríkinu,“ skrifaði Kristrún og lét fylgja með enska þýðingu. „Ekkert um Grænland án Grænlands. Ísland stendur þétt með vinum sínum.“

Þingmaður Samfylkingarinnar segir að boðað hafi verið til fundar í utanríkismálanefnd Alþingis í fyrramálið til þess að fara yfir stöðuna í Venesúela og meta hvort ástæða sé til að hvetja til umræðu á vettvangi öryggisráðs Sameinuðu þjóðanna um loftárásir Bandaríkjanna í fyrrinótt.

Listamaðurinn Guðmundur Oddur Magnússon, eða Goddur, er látinn 70 ára að aldri. Goddur var líklega þekktasti listagagnrýnandi Íslands.

Forsvarsmenn áfengisverslunarinnar Smáríkisins íhuga að fara í mál við lögregluna þar sem hún hefur ítrekað lokað afhendingarstöðvum netverslunarinnar síðustu vikur. Forstjóri fyrirtækisins var í haust ákærður fyrir að hafa selt eina þriggja lítra belju af chardonnay.

Tveir ökumenn sem stöðvaðir voru við umferðareftirlit á höfuðborgarsvæðinu í dag eru grunaður um að dvelja ólöglega á landinu.

Það kom Eygló Fanndal Sturludóttur á óvart að hún skyldi vera valin sem íþróttamaður ársins 2025.

Allt tiltækt slökkvilið var kallað til eftir að eldur kviknaði í einbýlishúsi við Brúnastekk í Breiðholti í nótt. Rauði krossinn sá íbúum fyrir skjóli þar sem húsið var óíbúðarhæft eftir brunann.

Takk fyrir í dag, sjáumst á morgun.

Í fréttum er þetta helst

Eygló Fanndal Sturludóttir, lyftingakona úr Lyftingafélagi Reykjavíkur, var í kvöld kjörin Íþróttamaður ársins 2025 af Samtökum Íþróttafréttamanna en þetta var tilkynnt í hófi í Hörpu.

Einn er látinn eftir umferðarslys sem varð á Biskupstungnabraut skammt frá Þrastarlundi í dag. Tveir til viðbótar voru fluttir til aðhlynningar á Heilbrigðisstofnun Suðurlands.

Fylgi Sjálfstæðisflokksins í borgarstjórn jókst um tvö prósentustig milli mánaða og nemur nú 35 prósentum í könnun Gallup frá því í desember. Samfylkingin tapar þremur prósentustigum. Sjálfstæðismenn gætu myndað borgarstjórnarmeirihluta með Viðreisn og Miðflokknum. Sjálfstæðisflokkurinn hefur mest fengið um 34 prósenta kosningu frá því eftir hrun.

Donald Trump Bandaríkjaforseti fyrirskipaði í nótt loftárás á Venesúela þar sem Nicolás Maduro var tekinn höndum ásamt eiginkonu hans og þau flutt til New York þar sem þau verða að líkindum dregin fyrir dómstóla. Hjónin hafa verið ákærð af bandarískum yfirvöldum fyrir fíkniefnahryðjuverk og kókaíninnflutning.

Íslenski heilsuvöruframleiðandinn Kerecis mun auka framleiðslu sína til að aðstoða fórnarlömb sem brunnu í miklum eldsvoða í Sviss á dögunum.

Kristján Örn Kristjánsson hefur dregið sig úr landsliðshópi Íslands í handbolta og mun því ekki taka þátt á komandi Evrópumóti.

Nýrri rennibraut í sundlaug Þorlákshafnar, sem nefnist Drekinn, hefur verið lokað tímabundið vegna óhappa í rennibrautinni. Rúm vika er síðan rennibrautin var tekin í notkun.

Takk fyrir í dag, sjáumst á morgun.

Í fréttum er þetta helst

Íslenskur maður sem gekk í úkraínska herinn lést á víglínunni. Hann var 51 árs gamall og hafði verið í Úkraínu í tæpan mánuð. Bróðir hans staðfestir andlát hans.

Kona á fertugsaldri lést þegar vörubíl var ekið yfir hana á bílaplani Sláturfélags Suðurlands á Hvolsvelli að kvöldi 30. desember. Málið er rannsakað sem slys.

Árið 2025 var hlýjasta árið á Íslandi frá upphafi mælinga. Meðalhiti í byggðum landsins var 5,2 stig sem er 1,1 stigi yfir meðallagi áranna 1991 til 2020 og hefur aldrei verið hærri. Áður var árið 2014 hlýjasta árið á landsvísu.

Jeppaeigendur spara tugi þúsunda með tilkomu kílómetragjalds í stað bensíngjalds en eigendur sparneytinna bíla þurfa að greiða tugum þúsunda meira en áður. ASÍ telur þetta koma sér illa fyrir efnaminni og fara gegn markmiðum um að draga úr losun gróðurhúsalofttegunda.

Tvöfalt fleiri yfir sjötugu leituðu til Bjarkarhlíðar, miðstöðvar þolenda ofbeldis á nýliðnu ári en árið á undan. Dæmi eru um að uppkomin börn neyði foreldra til að selja ofan af sér og svíki út lyf þeirra.

Stjórnvöld í Sviss hafa lýst yfir fimm daga þjóðarsorg vegna eldsvoðans á barnum Le Constellation í skíðabænum Crans-Montana, þar sem 40 létu lífið og að minnsta kosti 115 særðust. Unnið er að því að bera kennsl á látnu.

Vólódímír Selenskí Úkraínuforseti hefur skipað nýjan starfsmannastjóra í stað Andríjs Jermak. Sá síðarnefndi sagði af sér eftir að hafa verið bendlaður við umfangsmikið spillingarmál.

Takk fyrir í dag, sjáumst á morgun.

Í fréttum er þetta helst

Eldsneytisverð lækkaði um í kringum þrjátíu prósent þegar nýtt ár gekk í garð á miðnætti og ný lög um kílómetragjald tóku gildi.

Pétur Marteinsson, rekstrarstjóri og fyrrverandi knattspyrnumaður, ætlar að gefa kost á sér í oddvitasæti Samfylkingarinnar í Reykjavík fyrir næstu borgarstjórnarkosningar. Þar fer hann á móti Heiðu Björg Hilmisdóttur, núverandi oddvita og borgarstjóra.

Fimmtán manns leituðu á bráðamóttöku Landspítalans í Fossvogi í Reykjavík vegna flugeldaslysa í gærkvöldi og í nótt. Þar af voru átta sem leituðu á spítalann vegna áverka á augum.

Skjálfti af stærðinni 4,2 mældist í Bárðarbungu rétt fyrir klukkan níu í morgun, nýársdag.

Fjórtán Íslendingar – sjö karlar og sjö konur – voru sæmd heiðursmerki hinnar íslensku fálkaorðu á Bessastöðum í dag.

Halla Tómasdóttir, forseti Íslands, segir það vera sameiginlega ábyrgð Íslendinga að tryggja að öll börn og ungmenni, óháð kyni og bakgrunni, fái tækifæri, finni tilgang og meti sig að verðleikum. „Með sameiginlegu átaki og hlýju getum við skapað framtíð þar sem öll börn finna styrk og von í eigin lífi. Líðan barna nú mun móta sögu og styrk Íslands á næstu árum og áratugum.“

Albert Haagensen, umhverfis- og byggingarverkfræðingur hjá Kaldalóni, er látinn, 48 ára að aldri. Hann lést eftir skammvinna baráttu við krabbamein og lætur eftir sig eiginmann sinn Sindra Sindrason og dóttur þeirra Emilíu Katrínu.

Takk fyrir í dag, sjáumst á morgun.