書接上回，我哋講到葛雷高向門外嘅經理say no。一聲「唔得」之後，成間屋陷入一片靜默。只係從右邊嘅房間傳嚟妹妹嘅啜泣聲。大家都好擔心葛雷高，唔知佢喺房入面搞乜。

不過，如果葛雷高打開門，咁會發生咩事？

今次，我哋就要揭曉當好想打開門嘅家人們，遇上好唔想打開門嘅葛雷高，呢場矛盾大對決嘅寫實結果。

依家，講返妹妹嘅啜泣聲先。

點解妹妹會喊呢？係因為擔心葛雷高唔開門畀經理入嚟，會畀人炒魷魚？定係驚父母啲陳年舊債會畀人追數？但呢啲都係無謂嘅操心，葛雷高無打算放棄家人。葛雷高只係諗緊之後可以點樣搵個藉口，同經理解釋，照道理係可去推搪過去，唔會即刻畀人炒。

葛雷高諗，與其喺門口又喊又勸，倒不如等佢靜下。不過，門外嘅人根本唔知道葛雷高嘅情況，佢哋有咁嘅反應，都可以算係情有可原。

呢個時候，門外傳嚟經理把聲……