Hans Jacobsen, eisini nevndur Hans á Bakka, var helst best kendur sum vinnulívsmaður. Men honum dámdi eisini væl at yrkja, og tað eru kanska ikki so nógv, ið kenna til ta síðuna av honum. Tað roynir versonurin, Terje B. Vestergaard, at gera nakað við.

Hans á Bakka andaðist fyri 10 árum síðani, men eftir honum liggja nógvar yrkingar. Terje er hugtikin av, hvussu væl verfaðir hansara dugdi at lýsa og seta orð á við m.a. vøkrum metaforum. Terje hevur gjørt lag til yrkingina 'Lívsins rósa', sum er ein kvøða til kærleikan. Íblásturin til lagið er sprottin úr sjálvari yrkingini.

Leygardagin skipar Stuðulsfelagið Grynnan í Hósvík fyri fiskikapping og fiskauppboðssølu í Hósvík.

Eftir fiskikappingina verður uppboðssøla við Kára P. Højgaard, har møguleiki verður hjá øllum at bjóða upp á heilan fisk og nýskorið flak.

Øll, ið hava hug, kunnu vera við. Tað er bara loyvt at nýta snøri, snellu ella tráðu sum veiðireiðskap, og av trygdarávum skulu í minsta lagi tvey fólk vera við hvørjum báti.

Møguleiki verður at fáa útflýggjað luttøkuskjøl og at leggja veiðuna upp bæði á Eiði og í Hósvík.

Herfyri søkti Eiðis kommuna eftir fólki at reka kampingøkið Niðri á Møl á Eiði.

Fleiri umsóknir komu, men tá avtornaði metti trivnaðarnevndin, at Kristjan Madsen var best skikkaður til uppgávuna.

Næstu fimm árini fer hann reka vælumtókta kampingøkið Niðri á Møl.

Nýggi leiðarin varðar sjálvur av inntøkum og útreiðslum hesa tíðina.

Sáttmáli er gjørdur við kommununa, sum skal tryggja, at ymisk mál verða framd so hvørt.

Morgunsendingin, fríggjadagin 7. mai

Gestir:

Kristjan Madsen - Kamping á Eiði

Terje B. Vestergaard - Lívsins Rósa

Marni Joensen - Fiskikapping í Hósvík

– Tað er ikki neyðugt at broyta matstovuna, hvørja ferð okkurt nýtt rák tekur seg upp. Bíðar tú nóg leingi, verður tað, sum tú hevur, modernað aftur.

Tað sigur Poul Rustin, sum seinastu 37 árini hevur rikið Muntra, ið hevur egið veitsluhøli, men eisini hevur sera nógvar cateringuppgávur, bæði til stór og smærri tiltøk, almenn, vinnulig og privat.

Matstovan hevur navn eftir horninum við gamla Piddasahandil, har fólk plagdu at hittast til góð prát.

Morgunsendingin, hósdagin 6. mai.

Á skránni:

Fuglatátturin

Laila á Lofti - um støðuna í India

Bjørk Sjóklett - nýggjur eletroniskur tónleikafestivalur

Poul Rustin - matstovan Mutra 50 ár

Fuglurin, sum verður umrøddur hesa ferð, er spógvi.

Tað hevur elvt til nógv kjak, at Jógvan Skeel Nolsøe var vertur í ítróttarsendingini 3-2, har hann umrøddi ein hondbóltslandsdyst, sum hann sjálvur var partur av sum dómari.

Georg L. Petersen, deildarleiðari í Kringvarpinum, ásannar, at tey í hesum førunum áttu at funnið ein annan vert mánakvøldið. 

Sveinur Tróndarson, blaðstjóri á Dimmalætting, eftirlýsir greiðari leiðreglur frá Kringvarpinum.

Hoyr hvat teir báðir høvdu at siga um evnið í innslagnum omanfyri.

Morgunsendingin, mikudag 5. mai.

Gestir:

Peter Bredsdorff-Larsen - nýggjur landsliðsvenjari í hondbólti

Sveinur Tróndarson og Georg L. Petersen - fleiri hattar

Gunn Hernes - NLH ynskir sær kykt og plast í føðingardagsgávu

Karl Leonson - ferðslupolitiið svarar spurningum

Bara 25 av teimum 1.351 starvsfólkunum innan eldraøkið í Føroyum, eru menn. Ein teirra er Svenn Martinsson.

– Eg trívist væl í hesum arbeiðinum, og mær dámar væl at kunna hjálpa fólki, sigur Svenn Martinsson, ið bleiv útlærdur fyri átta árum síðani og arbeiðir á Boðanesheiminum í Havn.

Sambært honum eru fleiri orsøkir til, at tað eru so fáir menn, ið velja at útbúgva seg og arbeiða innan eldraøkið.