Hann er elsti borgarstjóri í Føroyum, hann er riddari av Dannebrog, hann hevur verið ÍSF forseti í 28 ár, hevur sitið í býráðnum í 48 ár, hann eigur 4 børn, 9 abbabørn, 3 langabbabørn, og so er hann serfrøðingur í turrum tvøsti og spiki og ger ein tiltiknan suðuroyarsperðil, fyri at nevna nøkur fá ting.

Heðin Mortensen fyllir 75 ár í dag. Morgunsendingin var við til føðingardagin.

Hvønn týdning hevur tað, at boða frá um broytingar í tínum bústaðarviðurskiftum?

Tað eru jú pør, sum búgva saman, men hava hvør sín bústað. Tað er ung lesandi, sum í roynd og veru búgva heima hjá foreldrunum, men hava uppgivið eina aðra adressu.

Tað er av alstórum týdningi, at tú uppgevur rættar upplýsingar um tíni bústaðarviðurskifti, tí hevur tú uppgivið ein annan bústað, enn hann, tú býrt á, er tað revsivert.

Í morgunsendingini greiddi Jógvan Páll Lassen, advokatur, frá hesum.

Harafturat svaraði hann spurningum frá lurtarum.

Staðsetingin ger, at tað hevði verið upplagt at havt eina eina sporingarstøð her, sum kann taka dátur niður frá fylgisveinum.

Eisini høvdu Føroyar verið vælegnaðar til at sent fylgisveinar í umferð kring knøttin.

Hetta eru David Arge Klevang Pedersen, frá DTU Space, og Johan Mortensen, ráðgevi hjá Føroya Teles, samdir um. Báðir síggja stórar møguleikar í rúmdarvirksemi í Føroyum.

Í dag klokkan 16 fer David at halda almennan fyrilestur í Kongshøll um sítt slóðbrótandi arbeiði við rúmdartøkni.

Gestir hesaferð:

Heðin Mortensen

David Arge Klevang Petersen

Jóhan Mortensen

Siggert Patursson

Jógvan Páll Lassen

Morgunsendingin, mikudagin 31. mars.

Gestir:

Bjørk Gudmundsen - øðrvísi sølubúð

Elisabeth Joensen og Hervør Hansen - pennavinir

Sólgerð Andreassen - bók um niðurseturfólkini á Oyrabakka

Gunnhild Helmsdal - kommunulækni

- Er tað tú, Hervør?

Soleiðis spurdi Elisabeth, tá ið hon sá eina javnaldrandi kvinnu koma úr einum bili uttan fyri Norðurlandahúsið.

Hóast Elisabeth og Hervør kennast ógvuliga væl og hava kenst síðan tær vóru 10 ára gamlar, hava tær ongantíð hitt hvørja aðra.

Hoyr samrøðuna við pennavinirnar, sum hittust á fyrsta sinni í gjár.

Miðskeiðis í 90'unum fór Sólgerð Andreassen undir at skriva bók um fyrstu niðursetufólkini á Oyrabakka.

Nú, eina fjórðingsøld seinni, er bókin loksins liðug.

Um verkætlanina verður skrivað: Bókin er um fyrstu niðursetufólkini á Oyrarbakka. Søgan hjá hesari lítlu bygdini er livandi og hendingarík.

Fólk komu ymsastaðni frá og kundu keypa sær eina trøð at velta og byggja sær hús á.

Tað var gott at búgva á Oyrarbakka, og hóast nógv merktu til lívsins hørðu avbjóðingar, hildu tey á at arbeiða fyri sær og sínum.

Heimagjørd smyrjisjokoláta, siroppur, súltað súrepli, brotbreyð og egg.

Hetta er nakað av tí, sum til ber at keypa í fitta, gula skápinum, sum stendur uttan fyri húsini á Nesavegi 1 á Giljanesi.

Tað er Bjørk Gudmundsen, sum eigur skápið á Giljanesi við vistfrøðiligum vørum, ið virkar sum ein sjálvtøka.

- Fólk velja sær vøruna, tey vilja hava, og so leggja tey pengar í krukkuna. Og tað riggar ordiliga væl, sigur Bjørk Gudmundsen, sum eisini hevur egg í sølubúðuni.

- Eggini verða rivin vekk alt fyri eitt, so tey eru sera populer, fortelur Bjørk Gudmundsen.

Ragnar Mouritsen, verkstaðsleiðari, sigur, at Williamsstova er ætlað myndlistafólki at brúka til skeiðs­virksemi, verkstovur og ikki minst til fram­sýningar.

Vit fara ikki at gera mun á teimum, sum hava list sum ítrív og teimum, ið liva av listini, leggur hann aftrat.

Williamsstova fekk heitið til heiðurs fyri listamanninum William Heinesen, 1900-1991.

Gallaríið, sum er í niðastu hædd á Niels Finsens Gøtu 16, letur upp leygardagin, 3. apríl, kl. 14.00.

Á Barnadeildini á Landssjúkrahúsinum fáa tey tvær ferðir um vikuna vitjan av tveimum sokallaðum spælihetjum.

Talan er um fysioterapeutar, sum skulu syrgja fyri, at børnini hóast sjúku og kanningar sleppa at stuttleika sær við rørslu og spæli.

Tí júst stuttleiki, rørsla og spæl hevur stóra og jaliga ávirkan á børn, sum hava sjúku at dragast við.

- Hetta gevur teimum eitt frírúm og ger, at tey eisini hava góðar og stuttligar upplivingar, tá tey skulu til onkrar kanningar, sum ikki altíð eru so stuttligar.

Tað sigur Elmar Ósá, sum er barnalækni.