Morgunsendingin, týsdagin 19. januar

Gestir:

Ole Wich

Jóna Ólavsdóttir

Bjarnheðin í Hoyvík

Karl Leonsson

Í eini høll á havnalagnum á Eiði stendur báturin Gæsa FD 343. Upprunaliga navnið var Brynhild.

Báturin, sum var bygdur í Vestmanna og keyptur til Norðragøtu, var millum fyrstu deksbátar í Gøtu. Hann var eitt stórt framstig í teimum døgum.

Í nøkur ár hevur verið arbeitt við at gera bátin í stand. Tað eru menn úr Gøtu og Leirvík, ið hittast hvørt mánakvøld í Gøtu og síðani koyra til Eiðis.

Arni Petersen, Tummas Jákup Thomsen og Eli Joensen eru harða kjarnan, men umframt teir eru eisini fleiri aðrir, sum eru við av og á.

Gestir hesaferð:

Petur Hans Dahl

Arni Petersen

Tummas Jákup Thomsen

Eli Joensen

Jónfinn Stenberg

Áhugin fyri boksing í norðoyggjum er so mikið stórur, at nú verður fyrsta boksifelagið í Klaksvík sett á stovn.

- Vit hava í langa tíð havt fitnessboksing, men eftir áheitan frá Tórshavn Boksing fara vit nú undir at gera eitt boksifelag. Umstøðurnar her eru góðar, vit hava útgerð, og vit vita, at sum nú er fara fólk til Havnar fyri at kunna venja boksing, sigur Unnur S. Fonn, ið saman við Sølvá J. Joensen eigur og rekur venjingarmiðstøðina Full Power í Klaksvík.

Svøvnur er ein grundleggjandi tørvur, ið er neyðugur fyri, at menniskju kunnu virka bæði kropsliga og sálarliga. Fáa vit ov lítið av svøvni, kann tað í byrjanini ávirka okkara vælveru, men manglar okkum svøvn í longri tíð, kann hetta hava neiligar fylgjur fyri heilsuna.

Kanning hjá Fólkaheilsuráðnum vísir, at 17 prosent av føroyskum monnum og kvinnum siga seg ongantíð ella næstan ongantíð sova nóg mikið, soleiðis at tey kenna seg úthvíld. Hetta er ein øking uppá næstan 10 prosent síðan 2015, tá líknandi kanning varð gjørd. Størsta orsøkin er skíggjanýtslan.

- Biit er nýggja ungdómstoymið hjá Kringvarp Føroya, sum strembar eftir at skapa áhugavert tilfar til ung, sum skal vera nútíðarhóskandi, nýtt og feitt!

Soleiðis sigur Rannvør Fríða Eyðunsdóttir, sum sjálv er partur av ungdómstoyminum.

Tilfarið fer at fevna um greinar, poddvarp, myndir, grafiskt arbeiði o.a. - alt hevur til endamáls at skapa áhuga og fokus á ungdómin og at gera gott tilfar til tey.

Biit er at finna á facebook, Instagram og á heimasíðuni www.biit.fo. Í løtuni riggar heimasíðan best á fartelefonini.

Morgunsendingin, fríggjadagin 15. januar

Gestir:

Rannvør Fríða Eyðunsdóttir

Bárður Petersen

Magni Mohr

Durid Johannesen

Unnur Sjúrðardóttir Fonn

Sølvá Jansdóttir Joensen

Í samstarv við Føroya Fuglafrøðifelag, fer morgunsendingin at varpa ljós á ymsu fuglasløgini í Føroyum. Talan verður um eitt innslag um vikuna. 

Tankin er at hava ein fastan tátt einaferð um vikuna, sum fer at snúgva seg um fuglalív í Føroyum sum heild. Tað skal bæði vera upplýsandi, men eisini fara vit at hoyra ymiskar øðrvísi søgur um nøkur fuglasløg. Tað verða Jórun Pólsdóttir og Silas Olofson, ið koma at leggja tilfarið tilrættis.

Í sendingini í morgun vitjaðu Jórun og Silas til eitt longri fuglaprát.

Morgunsendingin, hósdagin 14. januar

Gestir:

Kára Djurhuus

Rosa Johannesen

Silas Olofson

Jórun Pólsdóttir

– Eg haldi als ikki, at tað er ordiliga gingið upp fyri mær enn.

Soleiðis sigur Rosa Johannesen úr Søldafirði, sum í september í fjør bleiv omma at tríburum. Rosa Johannesen er mamma Ingu Thomsen, sum saman við Boga Thomsen er foreldur at tríburunum.

– Dagurin, tá vit fingu at vita, at tríburarnir vóru á veg, er tann besti dagurin í 2020. Tað var nakað so fantastiskt, sigur Rosa Johannesen.

Síðani oktober í fjør hevur hon arbeitt fyri kommununa sum húshjálp heima hjá Ingu og Boga Thomsen.