Ikki allir føroyingar vóru ovurfegnir um, at bretar høvdu hersett Føroyar undir Seinna Veraldarbardaga.

Men so fekk herovastin, sum búði á prestagarðinum, eitt gott hugskot. Hann lat soninum hjá vágapresti í ein hermannabúna.

Tá føroyski pilturin, róptur Prest-Heini, kom marsjerandi við bretsku hermonnunum, tá bráðnaðu føroysku hjørtuni.

Búnin hjá Prest-Heina, sum gjørdist maskotturin hjá bretum, verður nú sýndur fram í nýggju hølunum hjá Krígssavninum í SOR-bygninginum.

Formaðurin í Krígssavninum, Karl Jóhan Nielsen, greiðir frá.

Í Føroyum verður mett, at á leið 1200 børn og ung vaksa í upp í heimum, har rúsur er ein trupulleiki. At vit øll skuldu halda okkum innandura, tá korona herjaði, merkti at fleiri av hesum børnunum vóru serliga útsett - bæði tí summi ikki kundu luttaka í teimum tilboðunum, sum vanliga lætta um teirra gerandisdag, og tí tey ikki vórðu avlastaði av skúla, frítíðarítrivum og øðrum familjulimum.

Á Bláakrossi merkja tey eina øking av fólkum, sum venda sær til teirra. Fyrsta stigið er, at vit fáa sett orð á tey tingini sum eru trupul, siga tey á Bláakrossi

Tað slept ikki undan, at vit órógva fugl nakað, tá vit ganga í náttúruni, sigur Jón Aldará, limur í Fuglafrøðifelagnum.

Hann vísir á, at tá er tað okkara skylda, at hava eina vitan um tað, sum fyriferst.

Um eitt nú ein fuglur nærkast tær og byrjar at láta, er tað helst ein roynd at gera vart við, at reiður er í nánd.

Tá eru hyggjuráðini at skunda sær burtur haðani.

Sjálvandi er eisini ein læra í tí at taka mynd av reiðri og á tann hátt duga at seta eggini í samband við ávísa fuglin.

Men skal mynd takast, so ræður um at gera skjótt av.

- Eg veit ikki annað enn, at eg flyti upp saman við liðnum. Tað tykist sum venjarin trýr upp á meg, sigur Jóan Símun Edmundson, sum kom til Bielefeld á sumri í 2018.

Hetta er ómetaliga stórt fyri felagið, og rómurin er øgiligur, sigur føroyski leikarin, sum nú helst verður fyrsti føroyingur í Bundesliguni.

Tað er eingin loyna, at tað er eitt stórt lop upp til bestu deildina, men eg meti tó, at Arminia Bielefeld fer at standa seg væl. Okkara spæl riggar væl har, væntar Jón Símun Edmundson.

Fyri júst 10 árum síðani var móttøka í Norðurlandahúsinum í sambandi við, at Hanus G. fylti 60 ár.

Rudolf Joensen, sum er góður vinmaður hjá Hanusi og eisini hevur spælt í bólki saman við honum, var biðin um at halda røðu.

Røðarin helst seg vita, at talan var um eina lutfalsliga lítla móttøku, men tá hann kom í Norðurlandahúsið, vísti tað seg, at fleiri av landsins kosnu vóru á staðnum, og  tað bleiv sent beinleiðis í útvarpinum.

Alt bleiv heldur formelt, hugsaði Rudolf Joensen, og tí setti han seg við einum pappírslepa at umskriva røðuna.

Gásadalur er seinasti goymistað fyri hótt djórasløg.

Seinasta føroyska kúgvin kom har frá.

Seinasti føroyski greðingurin - og nú faðirin at føroysku rossunum - kom har frá.

Og seinasta føroyska hønan kom eisini úr Gásadali, áðrenn hon bleiv slaktað, tí sjúka gjørdi um seg í Vágum.

Men nú er hønan komin heimaftur. Hon hevur verið í Íslandi at venda.

Gísli Hraunfjord eigur hønurnar, og hann er sannførdur um, at hetta hønuslagið kom til Føroya og Ìslands við víkingunum.

Fyrstu ferð flogmús varð skrásett í Føroyum var í 1987. Fleiri siga tó, at fyrsta flogmúsin varð sædd í Føroyum longu í fimtiárunum. Síðan aldarskiftið hevur tað verið styttri millum vitjanirnar, men seinastu fáu árini hevur flogmúsin verið at sæð á hvørjum ári.

Í síðstu viku legði ein føroyingur eina mynd av eini flogmús, sum hann hevði sæð í Vatnsoyrum, á Facebook. Tað vísti seg, at fleiri onnur høvdu eisini borið eygað við flogmús ymsa staðni kring landið.

Morgunsendingin týsdagin, 16. juni

Fólk flest brúka leitiskipanina Google hvønn dag.

Men nú verður ein annar møguleiki tøkur hjá almenninginum at nýta.

Gugla.fo eitur funkan, og hon leitar bara eftir føroyskum úrslitum.

Kasper Solberg arbeiddi fyri nøkrum árum síðani á skrivstouni hjá Jehova vitnum í Føroyum.

Í sambandi við skrivaða tilfarið, løgdu tey seg eftir at brúka gerandismál.

Tá ásannaði Kasper Solberg, at tað ofta var trupult at googla seg fram til, hvussu føroyingar orða seg, tí nógv útlendsk leitiúrslit komu eisini við.

Morgunsendingin mánadagin, 15. juni