Í løtuni er gongustjørnan sera sjónlig og bjørt á kvøldhimlinum. Sigrun Skálagarð, stjørnufrøðingur, greiðir frá, at tað í grundini ikki er Venus sjálv vit síggja, men lofthavið á Venus. 

– Rundan um Venus er eitt tætt og tjúkt lofthav. Uttasta lagið er gjørt úr svávulsýru, so rundan um gongustjørnuna eru svávulskýggj. Tá sólarljósið lýsir á skýggini, so reflektera tey ljósið ímóti okkum - og av tí, at Venus er so tætt við Jørðina í løtuni, so er hon ógvuliga bjørt at síggja, sigur Sigrun.

Fleiri altjóða miðlar skriva, at Pentagon nú hevur leysgivið tríggjar sonevndar UFO-upptøkur. Á hesum upptøkum síggjast ókend flúgvandi fyribrigdi.

Jónfinn Stenberg hevur stóran áhuga í UFO-fyribrigdinum. Hann er annar verturin í poddvarprøðini, UFO-kjallarin. Hin verturin vil vera dulnevndur.

Í samrøðu við morgunsendingina siga teir sína hugsan um upptøkurnar, sum nú eru almennar.

Tað mest áhugaverda við teimum, er, at amerikanska stjórnin nú viðurkennir, at upptøkurnar eru til, og at tað ikki ber til at staðfesta, hvat sæst á teimum.

Morgunsendingin 29. apríl, 2020

Morgunsendingin týsdagin, 28. apríl

Gunnvá Patursson er handilsleiðari í 'Sheep'. Fleiri ferðir um mánaðin skal hon standa andlit til andlits við fólk, sum royna at stjala úr handlinum.

- Vit eru ofta bilsin av, hvør tað er, sum stjelur. Aldursbólkurin, ið stjelur, er heilt niður í 12 ár og upp til fólk, sum eru um 70 ára aldur.

Gunnvá greiðir frá, at tað eisini kann vera fólk, ið eru peningaliga væl fyri - fólk við góðari útbúgving og góðum starvi, sum kunnu finna uppá at stjala.

Fyrsti el-drivni bussurin hjá Strandferðsluni er komin til landið.

Bussurin, sum skal røkja bygdaleiðir í Sandoy, fer ikki í rutu fyrrenn fyrsta mei; men kortini fór Finnur Koba við Teistanum til Skopunar at vita, um eigarin - Jákup Fróði Djurhuus - kundu lokkast at koyra ein royndartúr.

Ein mikroifluensari er ein vanligur persónur, sum leggur gott tilfar á sosialu miðlarnar og hevur nógv samskifti við sínar fylgjarar, sigur Rannvá Lützen, online ráðgevi.

Tað áhugaverda við hesum fólkunum, er, at tey hava hægri trúvirði, og tað er lættari at identifisera seg við tey, enn tað kann vera, tá talan er um influensararnar við nógvum fylgjarum.

Ein annar fyrimunur við mikroinfluensarum, er, at hetta er ein bíligari máti at koma í samband við viðskiftafólkini.

Nýggi mentanar- og ungdómsleiðarin í Vestmanna Kommunu, Durita Fagradal Augustinussen, prátaði um nýggja bil-biografin í Vestmanna. 28 stuttfilmar og 3 longri filmar. Allir føroyskir.

Morgunsendingin mánadagin, 27. apríl

Søguna um Ova og íbúgvarnar í Aith ber nú til at hoyra á enskum í einum parti av Unfictional sendirøðini hjá útvarðsstøðini KCRW í USA. Røðin sigur søgur um fólk kring allan heimin, ið gera tingini øðrvísi, ella sum sjálvi eru øðrvísi.

Tað er danski útvarpsjournalisturin Rikke Houd, sum hevur sett saman søguna um Ova í Hetlandi við samrøðum og upptøkum, hon hevur funnið í Aith.