Góðan morgun Føroyar, mánamorgunin 27. januar.

27. januar minnast vit Holocaust. Henda dag í 1945 fríaði Reyði herurin hjá Sovjettsamveldinum jødarnar og onnur kúgað fólk úr týningarleguni Auschwitz.

Tað var undir seinna heimsbardaga, at umleið 6 milliónir jødar umframt fólk frá øðrum minnilutabólkum, so sum samkynd, vórðu dripin.

Í januar og februar í ár bjóða Nám og Amnesty International Føroyar skúlum til dupulttíma við fyrilestrum um Holocaust og fólkadráp.

Leygarkvøldið varð sangleikurin Cabaret frumframførdur í Glasir.

GMF sendi tvey umboð til frumframførsluna at ummæla leikin:

Jóannes Lamhauge, sum spældi høvuðsleiklutin í Jósef & Litfagra Dreymakotið, og Jóhanna Norðberg Niclasen, sum hevur spælt við í bæði Audition, Grease og Feitar Tíðir.

Tá boð komu frá løgmanni um landsstýrissessin í mentamálum, var Rigmor Dam avbrotin í einum kanningararbeiði, sum hon var farin undir.

Hon kannaði, tað, sum fyri ikki so nógvum árum síðani, var ein ógvuliga vandamikil uppgáva - at eiga børn.

Mín kanningarferð kom ikki longur enn til nakrar fyribils samrøður og eina lítla blaðgrein, men allastaðni var undirtøkan góð, tí øll kenna onkra lagnu.

Rigmor Dam vil fegin hitta fólk, sum hava eina søgu at fortelja.

- Tey eru vælkomin at seta seg í samband við meg, sigur hon.

Góðan morgun Føroyar fríggjamorgunin 24. januar.

Ung í Føroyum er ein listastevna fyri ung í Føroyum millum 13 og 19 ár. Stevnan er tríggir dagar og er skipað sum ein lega. Tveir teir fyrstu dagarnir eru verkstovur um dagin og innanhýsis framførslur um kvøldið. Triðja dagin eru fyrireikingar til framførsluna og stevnan endar við, at tey luttakandi vísa fram tað, sum tey hava skapt.

Bjørk Sigurdsdóttir Lamhauge hevur verið til listastevnuna tvær ferðir áður. Hon sigur, at hon millum annað lærdi sera nógv um seg sjálva. Eisini fekk hon fleiri nýggj vinfólk, sum hon enn hevur samband við.

- Tað er ófatiligt, at tað hevur borið til, sigur Preben Hansen, nevndarformaður í Lindini. 1,7 miljónir skulu til rakstur á hvørjum ári.

Kristiliga útvarpsrásin hevur nú sent í 20 ár, og tað er við góðum treysti, at hildið verður fram.

Skráin er heilt øðrvísi í dag í mun til fyri 20 árum síðani, og vit hava fleiri góð hugskot at brúka í framtíðini, sigur Preben Hansen.

Tór Arni Samuelsen, ið er einasti personur í fulltíðarstarvi á rásini, sigur, at fleiri enn 50 fólk eru knýtt at Lindini. Tey flestu arbeiða púra sjálvboðið.

Eitt virus ger nú um seg, ið er eitt slag av koronavirus. Virusið varð staðfest í Wuhan í Kina 31. desember, og síðani tá eru 24 fólk deyð og fleiri hundrað fólk eru smittað. Virusið hevur í minni mun breitt seg til Tailand, Japan, Taivan, Suðurkorea og USA.

Hoyr Shahin Gaini, yvirlækna, greiða frá.

Luttakarar: Hannes Gislason, Vivian Sjóðklett, Rógvi Dam, Kaisa Vourinen og Elin Henriksen.

Hoyr sendingina her.

Ein spurnakanning, sum Fróðskaparsetrið gjørdi í fjør, vísti, at áleið 11% av føroyskum næmingum siga seg ofta verða happað. Eisini ganga áleið helvtin av næmingunum við einum ótta fyri happing og ótta fyri at verða hildin uttanfyri.

Vivian Sjóðklett og Rógvi Dam eru í løtuni á skúlum kring landið, fyri at varpa ljós á trivna og happing. Tey siga, at tað er vánaligur trivnaður í einum flokki, sum førir til, at børn byrja at happa. Tey arbeiða miðvíst í flokkunum millum ein og tveir mánaðir, fyri at basa happingini.