Gestir í sendingini: Claus Rasmussen, Heri Joensen, Gunnar Thomsen, Poul Jákup Thomsen, Súsanna Vang og Amy Hansen.

Hoyr sendingina her.

Í farnu viku vóru setanarsamrøður í Listasavninum á Sandi. Tríggir væl skikkaðir umsøkjarar vóru til samrøðu. Tá avtornaði valdi setanarbólkurin at seta Eir í Ólavsstovu sum savnsvørð.

Eir er búsitandi á Sandi. Hon hevur arbeitt við myndlist í nógv ár, og hevur sera stóra vitan og áhuga innan økið.

Ein av hennara størstu styrkjum eru evnini at miðla list til bæði børn og vaksin. Hetta kemur nú savninum til góðar. Eir hevur drúgvar royndir úr Kringvarpinum, har hon m.a. hevur gjørt mentanarsendingar.

Hilda Viderø úr Klaksvík hevur í fleiri enn 30 ár arbeitt við hjálpararbeiði uttanlands.

Fyri góðum ári síðan stovnaði hon sín egna hjálparfelagsskap undir heitinum Mirjam, ið er ein felaskapur, sum hjálpir kvinnum í Afrika við íverksetan. Tær fáa eina upphædd frá felagsskapinum fyri at koma í gongd, og um tær prógva í verki, at tær eru arbeiðssamar, verða tær hjálptar við víðari menning av sínum virksemi.

Vit hava hitt Hildu, sum í løtuni er í Kenya, har fleiri av kvinnunum búgva, ið hon hjálpir.

Hoyr Hildu greiða frá.

Børn og ung ganga ofta til fleiri ítróttargreinir og ítrív. Men tað er eisini týdningarmikið, at tað er pláss til annað enn ítrótt og ítriv, sigur heilsufrøðingurin, Bjørghild Djurhuus.

Tað ræður um at tosa við barnið og tryggja sær, at tað trívist í tí, sum tað ger.

Heilsufrøðingurin ásannar eisini, at tað hevur stóran týdning, at børn og ung gera ítrótt.

Ovurfiti, eisini millum ung, er ein veruleiki, sum skal takast í álvara.

Hoyr sendingina her.

Um vikuskiftið vóru 16 føroyskir sangskrivarar á skeiði á Musikkskúlanum í Havn. Endamálið var at menna sangskrivaraevnini hjá luttakarunum.

Morgunsendingin hittir Torleik Mortensen, formann í Føroya tónleikarafelag, Ilanguaq David Lumholt, umboðandi Koda og Marcus Winther-John, professionellan sangskrivara.

Marcus Winther-John, sum byrjaði sína starvsleið sum sangskrivari og sangari í danska bólkinum, Inside The Whale, hevur síðani skrivað sangir til útgávur hjá eitt nú Tim Christensen, Sanne Salomonsen, Mads Langer, Christopher og New Kids On The Block.

Sigert Patursson, bóndi, er uppkallaður eftir oldurabbabeiggjanum.

Hann sigur, at føroyski ævintýrarin, eins og hini systkini, javnan var umrøddur heima hjá teimum.

Samtíðin hevði ilt við at góðtaka henda mannin, sum var so grundleggjandi øðrvísi enn fólk flest tá á døgum.

Hann ferðaðist um stóran part av knøttinum.

Eitt nú búði hann fleiri ár í Sibiria og skrivaði bók um forvitnisliga staðin. Bókin hjá Sigerti, Sibirien i vore dage, er nýliga útkomin í Russlandi.

Hon var almannakunngjørd á bókmentafestivali í Irkutsk.

Luttakarar: Sigert, Patursson, Elisabeth Larsen, Hallur Holm, Tórbjørn Jacobsen, Torlek Mortensen, Ilanguaq David Lumholt, Marcus Winther-John og Frida Andersson.

Hoyr sendingina her.

Mánamorgnar er Petur Hans Dahl í morgunsendingini og greiðir frá veðrinum næstu dagarnar. Hann endar altíð við einum veðurtekni. Í morgun umrøddi hann ein serstakan veðurstein, ið veit bæði eitt og annað um veðrið.

Í sambandi við verkætlanina ABC fyri sálarliga heilsu hevur Fólkaheilsuráðið ment nýtt tilfar, ið skal virka sum amboð til at tosa um sálarliga heilsu millum bæði børn, ung og vaksin.