Eitt, sum altíð er afturvendandi páskahátíðina, eru eggini. Her verður hugsað um sjokolátaegg og eggini, sum børnini og barnsligar sálir rulla 2. páskadag.

Men hví eru egg ein partur av siðvenjuni á páskum?

- Eggini hava altíð verið eitt tekin upp á gróður. Lívið vellir úr egginum, tá skalið brotnar. Og eggið og skalið er eisini eitt súmbol upp á grøvina hjá Jesusi - har kemur lív úr, sigur Armgarð Arge, teologur.

Í morgunsendingini greiddi Armgarð Arge frá teimum ymsu siðvenjunum, sum eru í sambandi við páskáhátíðina.

Luttakarar: Heri Joensen, Marni Mortensen, Helgi Toftegaard, René Askham, Haraldur S. Hansen og Chrsitina Solmunde Michelsen.

Hoyr sendingina her.

FSF og FaroeSoccer hava gjørt eina nýggja stuðulsavtalu fyri 2019, sum umframt vanligan fíggjarstuðul, eisini fevnir um eina ætlan um at skráseta og talgilda gamlar føroyskar fótbóltsmyndir.

Fótbóltssamband Føroya hevur frá fyrsta degi stuðlað stóru verkætlanini FaroeSoccer, bæði við at lata tilfar og við beinleiðis fíggjarligum stuðli.

Hetta samstarvið, umframt góða samstarvið við dómararnar hevur verið grundarsteinurin undir hagtalsvirkseminum hjá FaroeSoccer.

Marni Mortensen, sum rekur síðuna, saman við einum forritara, arbeiðir á skrivstovu í Hoyvík.

Kirkjubømúrurin, Glasir og Christianskirkjan.

Hetta eru nakrir av Lego-bygningunum, sum teir báðir, Helgi Toftegaard og René Askham, hava bygt saman við tveimum dønum. Í hesum døgum ber til at síggja bygningarnar í sambandi við eina Lego-framsýning í SMS.

- Vit vóru fyri nøkrum mánaðum síðani í Føroyum og koyrdu runt fyri at finna útav hvørjar bygningar, vit skuldu byggja. Og so varð farið í gongd við at byggja, sigur René Askham og vísir á, at serliga Glasir-bygningurin hevur verið ein avbjóðing:

Týr er í løtuni á konsertferð í Europa saman við bólkunum Heidevolk og Dalriada.

22 konsertir vóru á skránni, men á trimum konsertum er Týr kortini ikki á pallinum. Orsøkin er, at spælistøðini, eftir trýst frá Sea Shepherd aktivistum, hava noktað Týr at spæla.

Seinast var í Hannover fríggjakvøldið. Har fór bólkurin kortini á pallin og spældi í hálvan annan minutt, áðrenn teir vístu troyggjur við tekstinum, Týr censored.

Okkara fjepparar eru vónbrotnir, og teir flestu vilja hava pengarnar fyri atgonumerki aftur, sigur Heri Joensen, sangari og gittaristur.

Gartnarin Haraldur Símunarson Hansen gav í morgun nøkur góð ráð um viðlíkahald av grasvølli, og hann svaraði spurningum frá lurtarum um ymiskt.

Epli skulu skjótt setast niður eisini, og Haraldur Símunarson Hansen heldur, at epli kundu verðið sett niður seinni enn 25. apríl, sum er dagurin, har vit seta epli niður sambært álmanakkanum.

Í tíðindunum í farnu viku frættist, at tilburðirnir av tvingsli á psykiatriska deplinum eru blivnir alsamt fleiri.

Í ársfrágreiðingini fyri 2018, sum Kærustovnur Føroya hevur gjørt, sæst, at frá 2017 til 2018 eru tilburðirnir av tvingsli øktir við næstum 50 prosentum. Í 2017 var talan um 57 tvingsilstilburðir, meðan hetta talið var 85 í fjør.

Hetta merkir tó ikki, at tað eru fleiri sjúklingar, sum uppliva tvingsilsinntriv.

Luttakarar: Sonni Larsen, Suni Merkistein, Rannvá Winkler, Tórarinn Niclasen á Rípuni, Heðin Egholm Skov, Georg L. Petersen og Theresa Turiidardóttir Kreutzmann.

Hoyr sendingina her.

Lurtarar høvdu í morgun møguleikan at gita fimm røddir úr kendu sjónvarpsrøðini Game of Thrones. Heðin Egholm Skov ringdi inn og gitti alt rætt beinanvegin. Heðin er sjálvur ein íðin Game of Thrones fjeppari, og hann hevur sæð alt fýra ferðir. Hann er sera spentur at síggja seinastu partarnar, og hann væntar, at onkur av høvuðspersónunum fer at doyggja tíðliga í nýggju sesongini.

Fyrsti partur í áttandu sesong kemur út kl. 02.00 mánanáttina føroyska tíð.

- Reytt sum blóð og fannahvítt og blátt sum havsins bylgja. Merkið 100 ár

Soleiðis eitur serframsýning, ið letur upp á Tjóðsavninum í sambandi við, at Merkið er 100 ár.

Rannvá Winkler, savnsvørður, og Tórarinn á Rípuni, greiða frá nøkrum fløggum, ið eiga sín lut í føroysku flaggsøguni.

Henda framsýning er tó vinklað eitt sindur øðrvísi, tí hon eisini tekur upp spurningin, hvat vit kunnu loyva okkum, og ikki kunnu loyva okkum, at brúka føroyska flaggið og litirnar til.