Morgunsendingin 21. september 2018

Við í sendingini eru, Petur Hans Dahl, Toni Dam, Allan Samuelsen og Kristian Joensen.

Helst størsta tilbúgvingarvenjing í Føroyum, Tjaldur 2018, var mikudagin.

Pallsetingin var, at eitt ferðafólkaflogfar bleiv í lending vrak eystan fyri flogbreytina oman móti vatninum. Bæði skaðastaðið og talið av luttakarum var stórt.

Nakrir av teimum umleið 400 statistunum og bjargingarfólkunum, sum Kringvarpið fekk orðið á aftaná venjingina hildu, at venjingina vera bæði áhugaverda og læruríka.

Vardi hálvan triðja tíma

23. umfar í landskappingini í fótbólti hjá monnum verður um vikuskiftið, og sunnudagin kann verða dagurin, tá føroyameistaraheitið verður avgjørt, tá KÍ tekur í móti HB í Klaksvík.

HB liggur so væl fyri í kappingini, at teir við einum javnleiki kunnu tryggja sær meistaraheitið í fótbólti, hóast fýra umfør eru eftir.

Kristian Joensen, KÍ'ari, væntar, at KÍ fer at megna at útseta meistaraheitið hjá HB, meðan Allan Samuelsen, HB'ari, vil hava HB at avgera alt beinanvegin, og ongantíð betur, um tað verður við Djúpumýru í Klaksvík.

Í dag, 21. september 2018, eru hálvtrýss ár síðani, at Fugloy fekk ravmagn.

Hendan dagin í 1968 var útvarpið tilstaðar, og vit hoyra brot úr upptøkum, sum vórðu gjørdar í sambandi við hátíðarhaldið í Fugloy. Formaðurin í SEV stýrinum tá - Dánjal Pauli í Búðini av Velbastað, var ein av fleiri, sum helt røðu.

Amalia í Frammistovu var 9 ára gomul, tá oyggin fekk ravmagn, og hon minnist afturá, hvussu gerandisdagurin varð kollveltandi broyttur.

Tað hevði verið fantastiskt, um hvør einstakur næmingur fann sína egnu ítróttargrein, sigur Toni Dam, sum heldur, at lærugreinin ítróttur í fólkaskúlanum eigur at verða dagførd.

Toni Dam hevur altíð verið ítróttarmaður. Seinastu árini er tað innirógvingin, sum hevur fylt mest, og úrslitini hava verið framúr.

Fleiri føroyameistaraheiti, Gull í EM og evropeiskt met, silvur í Heimsmeistarakappingni - umframt eina rúgva av øðrum heiðursmerkjum.

Men hugurin at kappast hvarv rættiliga knappiliga nakrar vikur áðrenn HM í Boston fyrr í ár.

Hoyr sendingina her

Víð í sendingina hesaferð eru: Regin Jespersen, Dennis Holm, Frans Jensen, Hallur Thorsteinsson, Elin Henriksen, Turið Kjølbro, Annika Skaalum.

Í Málteiginum hesaferð tosa vit um at benda nøvn. Elin Henriksen greiðir frá, hvussu, nær og um fornøvn, eftirnøvn, staðarnøvn, nøvn á fyritøkum ella virkjum og so framvegis skulu bendast.

Føroya Sjómansmissión byrjaði á Tvøroyri í 1918 og breiddi seg skjótt kring landið og eisini út um landoddarnar.

Sjómansmissiónin hevur fylgt fiskimonnum til Grønlands, Íslands, Bretlands og til Danmarkar.

Frants Jensen, journalistur, hevur skrivað bókina, Lívgað sjófólk í eina øld, sum er um virksemið hjá Sjómansmissiónini.

Fyri tíggju árum síðani byrjaðu Bókadeild Føroya Lærarafelags og Nám at geva krabbabøkur út.

Krabbabøkur eru lættlesiligar bøkur til børn í ymsum torleikastigum alt eftir, hvørjum stigi hvør einstakur er á.

Páll Fangi, Anna Frank, Kalt blóð og Tea og tjattið eru bert nakrar av teimum meira enn 300 bókunum, sum eru komnar út hesi árini.

Turið Kjølbro, ritstjóri og samskipari í Krabbabókatoyminum, sigur, at tað hevur verið ein avbjóðing at fáa bøkur út á upprunaføroyskum, men hon fegnast um, at tey í ár hava megnað at fáa seks upprunaføroyskar krabbabøkur út.

Andrass Joensen, báta- og skipasmiður, harmast um, at bátasmíð ikki longur er á tímatalvuni á tekniska skúla.

Eftirspurningurin eftir føroyska bátinum er nógv minkaður, og nú livir hann bara á mentanarligum og ikki handilsligum grundarlagi.

Tað er spell, tí føroyski báturin er størsta listaverk, vit eiga, sigur Andrass Joensen.

Í kvøld verður framsýning av bátatekningum, sum bátasmiðurin av Húsum hevur gjørt.

Harumframt verður framløga um tað søguliga um hesar bátar og um bátasmiðirnar, ið gjørdu bátarnar.