Siglt verður eftir mjólkarutuni á Skálafjørðinum hvønn dag í mentanarvikuni frá 23.-29. apríl. Jóhan Petersen og Sámal Petur í Grund vera ferðaleiðarar umborð.

Mjólkarutan hevði stóran týdning í økinum tá í tíðini. Sámal Petur í Grund sigldi sjálvur við mjólkarutuni fleiri ferðir sum smádrongur og greiðir morgunsendingin frá tíðini.

Flestu næmingar eru vanir at fáa eitt tal, sum vísir, hvussu støðið hjá teimum er í ávísum lærugreinum. Men karakterskipanin átti at verið endurskoðað, heldur Olav Absalonsen.

Summi foreldur vilja gera alt fyri børn síni. Tað kann vera ein bjarnatænasta, sigur Kala Rajani Hansen.

Tað hevur týdning, at børnini sleppa at royna seg sjálvi.

Og hetta skulu foreldur vera tilvitað um.

Skilagott er ikki at hava ov nógvan skund á morgni, men at brúka tíðina, sum barnið hevur tørv á.

Eisini verður tosað um spælið Fortnight, sum fleiri skúlanæmingar eru ógvuliga drignir at.

Foreldur skulu tora at siga, at nú sløkkja vit spælið, sigur Kala Rajani Hansen.

Sunnukvøldið var útgávukonsert í Kelduni í Skálabotni, og nógv fólk vóru komin at líða á, sigur vælnøgdi Eyðun Jacobsen.

Fløgan inniheldur 18 skeringar. Sangirnir vera sungnir av ymiskum bólkum og eistaklingum.

Tey sum luttaka á fløguni eru: Ólavur á Váli Olsen, Svein í Prestgarði, Kvartettin í Betesda, Petur Hans Hansen, Terje B Vestergaard, Tóra við Keldu, Oasubrøður, Hervør Sabina á Torkilsheyggi, Bill Justinussen, Pauli Høj, Torkil Mørkøre, Kristina N Hansen, Eyðun Jacobsen, Blátt Gras, Lisa Frederiksberg, Zamar, Vitin og Magni Cristiansen.

Kirstin Vang úr Havn tekur myndir av føroyska landslagnum og leggur tær javnan út á sína instagram-síðu. Føroyar eru eksotiskar fyri fleiri útlendingar, og tí hava fleiri enn 33.000 fólk valt at fylgja Kirstini á instagram. Talið av fylgjarum vaksur fyri hvønn dag.

- Eg noyðist í øllum førum at leggja myndir út annan hvønn dag, tí eg má hava eina rútmu í, nær eg leggi út. Tað er eisini týdningarmikið, at myndirnar hava góðan kvalitet og eina søgu aftanfyri. Tað sigur 22 ára gamla Kirstin Vang.

Hvat er depressión? Hvussu er tað at hava angist? Finst ein vegur burtur úr tí? Hetta eru spurningar, sum "Leitanin eftir at vera" roynir at varpa ljós á. Við leiki, myndum og tónleiki lýsir leikurin tilgongdina at koma fyri seg eftir depressión. At fara ígjøgnum tað at vera á botninum og einki kunna, til aftur at skapa sær eina tilveru. Leikurin er bygdur á egnar, persónligar upplivingar við sálarligari sjúku. Katarina G. Nolsøe, Gunnvá Zachariasen og Búi E. Dam hava skapt leikin út frá teksti og myndum eftir Katarinu G. Nolsøe.

Føroyar taptu fyrsta dystin móti Luksemburg tepurt 1-2.

Annar dysturin var ímóti Kosovo, og hann vann føroyska liðið 4-3.

Triði og seinasti dysturin, sum bleiv spældur fyrr í dag, var ímóti Norðurírlandi. Hann endaði við 0-5 tapi.

Eyðvør Jakobsen, hjálparvenjari, er væl nøgd við kappingina. Genturnar hava fingið nógv burtur úr, heldur hon.

Næsta avbjóðingin er EM-undankapping í Danmark í heyst.

20 prosent av teimum spurdu siga seg hava verið í vanda fyri at drukna.

Formaðurin í Svimjisambandi Føroya, Rókur í Jákupsstovu, er kløkkur av tølunum, sum koma fram í nýggju kanningini, ið Gallup hevur gjørt.

Aðrar kanningar benda á, at tað at detta av bryggjukanti er størsti vandin.

Vit eiga í størri mun at tryggja okkum, at bjargingarútgerð er tøk, vísir Rókur í Jákupsstovu á.

Tørvur er harumframt á eini hugburðsbroyting.

Alt ov ofta sæst, at fólk í báti ikki eru í bjargingarvesti.

Viðhvørt eru børn í vesti, men vanliga ikki tey vaksnu.

Fyri trimum árum síðan vóru tær umleið 80 kvinnur, sum meldaðu seg til heilsufótbólt hjá Magna Mohr.

Nú eru tær umleið 40, sum møta til vanligu venjingarnar.

Sunnudagin fara 17 teirra á ferð til Florida í USA, at vísa hvat tær gera í Føroyum.

Sólrun Gleðisheygg og Johild Dulavík siga, at umframt at bøta um heilsuna, hevur fótbólturin eisini knýtt vinarbond.

Ert tú fyrst komin inn í føroyska nevndarnetverkið, eru tað stór sannlíkindi fyri, at tú verður vald ella valdur at sita í øðrum nevndarsessum.

Hetta er ein av eygleiðingunum, sum Sveinur Tróndarson hevur gjørt í sambandi við eina stóra uppgáva á Setrinum um føroyska nevndarnetverkið.

- Tá hugt verður eftir, hvørji fólkini eru, sum sita í ymiskum nevndum, sæst eitt mynstur. Tað eru nøkuyr fólk, sum eru títtari í nevndum enn onnur, sigur Sveinur Tróndarson, ið lesur politikk og umsiting.