我哋喺生活雜談EP5，講述《被隱藏的眾神》嘅時候，好簡單咁對比過亞伯拉罕諸教（Abrahamic religion）。所謂亞伯拉罕諸教，就係視亞伯拉罕為先祖，信奉一神——最著名嘅，自然係猶太教、基督教、伊斯蘭教。亞伯拉罕諸教流傳非常廣，世界上頭兩大嘅宗教，都係亞伯拉罕諸教（基督宗教、伊斯蘭教）；屈指一算，全球有一半人口以上，相信亞伯拉罕諸教。

由於亞伯拉罕諸教之間承認唔同經典，因而有唔同教義。而佢哋對同一個故事，會有唔同詮釋。最典型嘅例子，如果你問亞伯拉罕聽到神喻之後，獻祭嘅兒子係邊個，基督宗教教徒會答你係亞伯拉罕嘅妻子，撒拉所生嘅兒子，以撒。但多數穆斯林（伊斯蘭教徒）就會答你係亞伯拉罕嘅妾夏甲所生嘅易斯馬儀（亦即係《舊約》所稱嘅以實瑪利）。大家如果對呢個故事差異有興趣，可以話我知，我再出一集嚟講。

相比其他亞伯拉罕諸教（基督宗教、猶太教），伊斯蘭教明顯較為新興，當佢喺公元七世紀建立嘅時候，佢就要喺阿拉伯地區，選擇點樣承繼之前嘅猶太教、基督宗教嘅傳統同教義。喺穆斯林信仰嘅立場睇嚟，最後嘅先知穆罕默德就係要宣揚一種「獨一神」（Wahid）嘅倫理觀。穆斯林認為《古蘭經》係直接源自獨一神嘅話語，而基督宗教嘅《聖經》係經由耶穌之後嘅門徒，以及之後好幾代信徒所編、所抄寫，因而加咗唔少人為因素。

而伊斯蘭教同基督宗教對耶穌嘅睇法，亦有好大唔同。基督宗教對耶穌嘅睇法，大家日常都接觸到，而用歷史批判法去睇基督宗教對耶穌嘅睇法，我哋喺podcast提過。

今餐，我哋就要睇睇《古蘭經》眼中嘅耶穌。呢集，我建議你配合文稿閱讀，因為有唔少《古蘭經》經文。