Gestur þáttarins er Gyða Valtýsdóttir sem segir frá nýrri plötu sinni, Epicycle II, væntanlegu og langþráðu tónleikahaldi og enduruppröðun tilverunnar. Ýmislegt fleira ber á góma eins og vegan trítlar. Ekki má heldur gleyma allri fínu músíkinni sem hljómar í þættinum líka, en hún er fengin að láni úr stjörnumerki vináttunnar.

Malí, Brasilía og Íran eru áfangastastaðir í hugarflugi þáttarins. Gestur dagsins er Arnljótur Sigurðsson, sem bregður á fóninn tónlist sem tengist upptökustjóranum og bassaleikaranum Bill Laswell og verkum hans frá níunda áratugnum. Meðal annars er spekúlerað í því hvernig tónlist eldist.

Hátalarinn tekur kúfinn af splunkunýjum plötubúnkanum og bregður á fóninn tónlist úr ýmsum áttum. Meðal listafólks er Gregory Porter, Gyða Valtýsdóttir, Jonas Kaufmann, Ásgeir Ásgeirsson, Bill Frisell, Kristjana og Svavar Knútur, Kronos kvartettinn og Agnar Már Magnússon.

Gestur þáttarins er Hafdís Bjarnadóttir gítarleikari og tónskáld. Hún segir frá nýrri plötu sinni - Lighthouse, sem unnin er í samvinnu við Parallex tríóið frá Noregi. Einnig ræðir Hafdís tónlistarferil sinn og hvernig hún rataði þangað sem hún er stödd í músíkinni og hvernig ástand og horfur eru í tónlistarlífinu þessa dagana.

Í þættinum er rætt við Sigurð Flosason og Hauk Gröndal um ólík verkefni þeirra á Jazzhátíð Reykjavíkur sem hefst nk laugardag. Tónlistin í þættinum er tengd verkefnum þeirra auk þess sem fleiri dæmi hljóma um sitthvað af því sem er að vænta á þessari 30 ára tónlistarhátíð sem stendur í átta daga að þessu sinni.

Tónlist píanóleikarans og tónskáldsins Bunitu Marcus hljómar í þættinum og gluggað er í nýlegt viðtal við hana þar sem hún lýsir sambandi sínu við Morton Feldman, sem var leiðbeinandi hennar á níunda áratugnum.

Einnig hljómar tónlist eftir Jo Kondo, Ellen Fullman, Theresu Wong, Pauline Oliveros og Jesper Pedersen í þættinum sem er óvenju hljóðlátur að þessu sinni.

Þau eru mörg leyndarmálin sem hafa verið gerð skil í tónlist. Í þessum þætti hljóma nokkur þeirra. Kunnugleg rússnesk píanóhugleiðing og laumuleg kvikmyndatónlist í kapp við plöntulíf og mismunandi sjónarhorn munnhörpu og fransks horns. Og undir lokin er hugað að leyndarmálum spunans.

Philip Glass, Stevie Wonder, Jaco Pastorius, Ahmad Jamal, Bítlarnir, The Miracles, Art Ensemble of Chicago og fleiri koma við sögu.

Gömul og ný lög úr ýmsum áttum mynda syrpur sem vekja spurningar um uppruna, ártöl, fólkið á bak við tónlistina og ýmislegt fleira. Hátalarinn á frídegi verslunarmanna gefur hlustendum vísbendingar í músíkölskum spurningaleik.

Skoski gítarleikarinn Sean Shibe (frbr: Sjon Sjíbe) hefur vakið mikla athygli fyrir túlkun sína á lútu- og sembaltónlist eftir Jóhann Sebastían Bæjarfógeta. En hann er jafnvígur á rafgítarana og spilar einnig tónlist eftir David Lang, Steve Reich og marga fleiri. Dæmi um það hljóma í þættinum.

Breski píanistinn, tónskáldið og hljómsveitarstjórinn Thomas Adés er einn afkastamesti tónlistarmaður dagsins í dag. Nýr konsert hans fyrir píanó og hljómsveit virðist ætla að verða vinsælasta verkið á alþjóðlegum hljómsveitarpöllum klassískrar tónlistar næstu misserin. Í þættinum hljómar kafli úr þessum konserti auk fleiri tóndæma um list Tómasar Adés.

Halldór Smárason tónsmiður og píanóleikari heimsækir þáttinn og segir frá tónlistinni sem hann var að gefa út á plötunni STARA, en ameríska útgáfan Sono Luminus gekk í það verk með Halldóri.

Meðal flytjenda er strokkvartettinn Siggi, en við heyrum líka í þættinum af söngelskri fjölskyldu og hvernig íslensku sönglögin fléttast inn í vefnað nýrrar tónlistar.