Hjálmar H Ragnarsson tónskáld hefur samið nýja kantötu sem frumflutt er í Kristskirkju í kvöld - Laudem Domini, fyrir kór, einsöngvara og litla strengjasveit við biblíutexta á íslensku og forna latínutexta úr sönghefð kaþólskra. Hjálmar ræðir tónsmíðar sínar og músík almennt í þættinum.

Gítarleikarinn Björn Thoroddsen leit inn í Hátalarahljóðverið og spjallaði aðeins um það sem er á döfinni í hans tónlistarlífi.

Hátalarinn tók þátt í Agora spjalli með meistaranemendum í LHÍ á dögunum og ræddi i kjölfarið við Atla Ingólfsson um eitt og annað sem kemur upp á slíkum spjalltorgum.

Þá er brugðið upp lokamynd frá heimsókn á 12 Points tónlistarhátíðina í lok september. Meðal annars er rætt við stjórnanda hennar, Kenneth Killeen, en tónlistin er í boði hljómsveitarinnar No Tounges, sem er frá Nantes í Frakklandi.

Hátalarinn kemur sér fyrir í leðursófanum í Lucky Records og spjallar við tónlistarfólk og innanbúðarmannskap þar á bæ.

Viðmælendur eru Ingvar Geirsson, Jóhannes Birgir Pálmason, Áskell Másson, Tómas R Einarsson, Sóley Stefánsdóttir og Samúel Jón Samúelsson sem á einmitt afmæli í dag.

Það er eitt og annað sem ber á góma. Tilurð og dreifing tónlistarinnar og hvaðeina sem snýr að lífi og starfi þeirra sem gefa sig tónlistinni á vald.

Hátalarinn spjallar við Emilíu Rós Sigfúsdóttur og Helgu Björg Arnardóttur úr Elektra Ensemble um nýja plötu þess tíu ára gamla tónlistarhóps. Þar er að finna spennandi tónlist íslenskra tónsmiða, samin sértstaklega fyrir Eleketru.

Einnig er rifjað upp ársgamalt viðtal við Gyðu Valtýsdóttur sem heimsótti Hátalarann til að ræða plötur sínar Epicycle og Evolution, en einnig víddir í tónlist og ýmislegt fleira. Gyða fékk sem kunnugt er tónlistarverðlaun Norðurlandaráðs í síðustu viku.

Guðmundur Pétursson gítarleikari og tónsmiður var að senda frá sér á plötu konsert sinn fyrir rafgítar og hljómsveit. Hann segir frá aðdraganda verksins og frágangi þess, en Guðmundur samdi ekki aðeins verkið og spilaði á tónleikum, heldur hljóðritaði það líka. Hann ræðir í þættinum eitt og annað sem einkenndi þetta langa ferli, eins og muninn á því að vinna tónlist í stórum og litlum hópum.

Tóndæmi halda áfram að berast frá 12 Points hátíðinni írsku sem fór fram í Amsterdam á dögunum. Tríó Heinz Herbert frá Sviss og Katu Kaiku frá Finnlandi koma þar við sögu. Einnig er hugað að erindi Jorisar Roelofs um jafnvægi í listum með tilliti til heimspeki Nietzsche. Þeir goðabræður Díónísus og Aplló þar fremstir meðal jafningja.

Arnljótur Sigurðsson bregður upp tónlist sem tengist ljóst og leynt amerísku Vísindakirkjunni og æðstapresti hennar L Ron Hubbard.

Skyggnst aðeins í hljóðheim raftónlistarmannsins Philip Jeck, sem heimsækir Sequences hátíðina í vikunni. Einnig hljómar lag af nýrri plötu Halldórs Eldjárn sem kemur út í vikunni. Einnig heyrist sýnishorn af plötu Red Barnett, sem er væntanleg.

Nýtt lag frá Sonic Youth meðlimnum Kim Gordon fer líka á fóninn.

Hátalarinn heimsótti 12 Points tónlistarhátíðina í lok síðasta mánaðar og í þessum þætti heyrast tóndæmi frá Bretlandi, þar á meðal viðtal við hljómsveitina Family Band.

https://www.12points.ie/

Eiríkur Orri Ólafsson og Magnús Trygvason Elíasen eru gestur þáttarins og fylgja úr hlaði nýrri plötu tríósins sem þeir skipa með Róberti Reynissyni gítarleikara. Plata tríósins Hist og... heitir Days of Tundra. Rætt er við þá félagana um sköpun tónlistarinnar, útgáfumál og freðmýrar djassins.

Í lok þáttar hljómar svo nýtt lag með hinni mögnuðu Fire Orchestra, stórsveitar-spunamaskínu Norðurlanda.

Arnljótur Sigurðsson heimsækir Hátalarann með spennandi tónlist í farteskinu. Einnig hljóma ýmsar hugleiðingar um íhugula og melankólíska tónlist.

Sölvi Kolbeinsson saxófónleikari er gestur þáttarins, en hann býr og starfar í Berlín. Sölvi segir frá því hvernig hann hóf sinn saxófónleik í klassískri tónlist og leiddist út í jazz á unglingsárunum. Hann veltir líka fyrir sér áhrifavöldum og hvernig listafólk tileinkar sér mismunandi hluti í því sem það tekur sér fyrir hendur.