Halldór Eldjárn segir frá tónverki sínu Tímaeining, sem flutt var í Ásmundarsal með viðkomu í Hallgrímskirkju í gegnum Efstaleiti á dögunum, en Halldór byggir verk sitt á hljóðlist Finnboga Péturssonar, sem einmitt sýnir verk sín í þessum sölum. Einnig er rætt við Víking Heiðar Ólafsson um nýliðna tónlistarhátíð - Reykjavik Midsummer Music - um hápunkta og lægðir hátíðarhaldsins og framtíð þess í samfélagi okkar.

Ný tónlist frá Holly Herndon rammar inn þátt dagsins.

Brugðið er upp hljóðmynd af ferðalagi til Ítalíu. Þar kemur meðal annars við sögu japanski raftónlistarmaðurinn Ryoji Ikeda og innsetning hans á Feneyjatvíæringnum.

Óskar Guðjónsson ræðir við umsjónarmann um áheyrendur og væntingar þeirra til tónlistarfólks.

Einnig fer Hátalarinn í Frúin í Hamborg með Arnljóti Sigurðssyni sem kemur í heimsókn með skemmtilega tónlist.

Mikael Máni Ásmundsson gítarleikari og tónsmiður fagnar nýrri plötu sinni “Bobby“ með útgáfutónleikum í Kaldalóni Hörpu nk sunnudag. Hann ræðir við umsjónarmann um tónlistina á plötunni, skákina í tónlistinni og líf og starf jazzgítarleikarans.

Mánudagur 27.maí 2019 - 68

Gestur þáttarins er Strokkvartettinn Siggi, en hann skipa fiðluleikararnir Una Sveinbjarnardóttir og Helga Þóra Björgvinsdóttir, Þórunn Ósk Marinósdóttir víóluleikari og Sigurður Bjarki Gunnarsson sellóleikari.

Þau ræða við umsjónarmann um um strokkvartettinn sem fyrirbæri og nýja plötu sína - South of the Circle, sem var að koma út hjá Sono Luminus útgáfunni. Platan geymir hljóðritanir fimm íslenskra verka fyrir strokkvartett.

Höfundarnir eru Mamikó Dís Ragnarsdóttir, Valgeir Sigurðsson, Una Sveinbjarnardóttir, Haukur Tómasson og Daníel Bjarnason.

Rætt er við Arngunni Árnadóttur klarinettuleikara um Johannes Brahms og tónleika hennar með Ben Kim nk sunnudag. Einnig hittir Hátalarinn meðlimi hljómsveitarinnar ADHD - hvern í sínu lagi - og ræðir við þá um músíkina og lífið sjálft.

Arnljótur Sigurðsson heimsækir þáttinn með sýnishorn af tónlist ólíkra hljómsveita.

Einnig hljóma brot úr taktföstum lögum frá ýmsum tímum.

Stjarfaklofi búlemíubítsins kemur við sögu og lag um skrímsli í sprengjubyrgi.

Er rapp list? Spurning sem vart verður svarað með einum útvarpsþætti.

Gestur þáttarins er Bjarni Frímann Bjarnason tónlistarmaður sem ræðir við umsjónarmann um tónlistina sem er að gefa út á sinni fyrstu sólóplötu - Chateau.

Þar kennir margra grasa í tónlist sem varð til án nokkurra fyrirfram ákveðinna hugmynda um hvernig hún ætti að vera.

Bjarni kemur víða við í spjallinu og meðal annars er rætt um notkun tónlistar í umhverfinu og hvernig þögnin verður fyrir barðinu á'enni.

Gestir þáttarins eru þau Anna Guðný Guðmundsdóttir, Sigurður Ingvi Snorrason og Snorri Sigfús Birgisson, sem öll koma að tónlistinni sem var að koma út á plötunni ,,Við verkalok", en hún geymir tónlist Atla Heimis Sveinssonar við ljóð Stephans G Stephanssonar, sem samin var 2012 og er með því síðasta sem Atli Heimir samdi á ferli sínum.

Rætt er um tónsmíðar Atla og persónuna sem eru og voru bæði litríkar og stormasamar.

Einnig er komið inná þjóðlagaútsetningar Snorra Sigfúsar, sem heldur afmælistónleika sína í Fríkirkjunni í kvöld ásamt Hönnu Dóru Sturludóttur söngkonu.

Gestur þáttarins er Arnljótur Sigurðsson sem kynnir fyrir hlustendum tónlist úr fortíðinni sem fjallaði þá um framtíð sem er jafnvel orðin fortíð í dag.

Einnig heyrist í þættinum í söngfuglinum Anohni sem flytur nýtt lag sem samið var til að vekja athygli á fíknivanda ungs fólks.

Hátalarinn heimsækir Hafnarfjarðarkirkju og ræðir við Guðmund Sigurðsson organista og kórstjóra. Hann hefur nýverið spilað inn íslensk og erlend verk á plötuna Haf, en á henni hljóma tvö orgel kirkjunnar, sem eru hvort um sig fulltrúar mismunandi tíma tónlistarinnar.

Meðal höfunda verkanna eru fyrsti organisti Hafnarfjarðarkirkju - Friðrik Bjarnason, Hugi Guðmundsson, Jóhann Johannsson og Smári Ólason. Ekki má heldur gleyma Jóhanni Pachelbel, Jóhanni Sebastían Bach og George Shearing, sem allir koma við sögu á umræddri plötu.

Þá er líka skotið inn einu lagi með húskór Hafnarfjarðarkirkju - Barbörukórnum.

Guðmundur ræðir líka starf organistans og hvernig það hefur breyst í tímans rás.

Tónlist:

Melodía í As dúr - Friðrik Bjarnason

Toccata í d moll BWV 538 - J S Bach

Prelúdía í e moll - Friðrik Bjarnason

Haf - Hugi Guðmundsson

Glíma - Jóhann Jóhannsson

Ég byrja reisu mína-Hallgrímur Pétursson/Ísl þjóðlag- Barbörukórinn

Was Gott tut, das ist wohlgetan-Johann Pachelbel

Greinir Jesús um græna tréð - Smári Ólason