Andrés Þór Gunnlaugsson gítarleikari og tónsmiður er gestur þáttarins, en hann hljóðritaði kvartettplötu sína Paradox í Brooklyn í New York í mars 2018. Hann segir frá tónlistinni á plötunni og mótsögnum í jazzlífinu (ef einhverjar eru).

Einnig hljómar tóndæmi af nýrri plötu Danska Strengjakvartettsins - Prism II, en hún kom út hjá ECM á dögunum.

Ingi Bjarni Skúlason píanóleikari er gestur þáttarins á afmælisdegi sínum, en ný plata með tónlist hans er komin út. Tenging heitir hún og Ingi Bjarni segir frá gerð hennar og tónlistarfólkinu sem kemur þar við sögu.  Einnig er hugað að arabískri tónlist í tengslum við tónleika sem fara fram í Fríkirkjunni um næstu helgi.

Vernharður Linnet segir frá íslenskri jazzsögu, sem hann hefur skrifað fyrir nýja bók sem nýkomin er út alþjóðlega og geymir frásagnir af jazzlífi Evrópu og hvernig það hefur þróast í hverju landi fyrir sig. Vernharður mun halda fyrirlestur um þetta efni á komandi jazzhátíð Reykjavíku sem hefst í vikunni.

Arnljótur Sigurðsson teflir fram tónlist sem tengist skáklistinni í þessum þætti. Mekaníski tyrkinn og Guðmundur Helgmundur Alexandersson eru meðal þeirra sem þar koma við sögu.

Einnig er hugað að nýrri finnskri tónlist. Hljómsveitirnar Vilda og Pauanne eru nýjar af nálinni en byggja þó sína músík á hefbundinni finnskri alþýðutónlist.

Kaija Saariaho er meðal merkstu skálda nýrrar finnskrar tónlistar í dag. Í þættinum hljómar lag úr sönglafaflokki hennar - True Fire, sem var að koma út.

Eðvarð Lárusson gítarleikari spjallar um uppvaxtarár sín á Akranesi, fyrstu skrefin í tónlistinni og músíkina sem hafði áhrif á hann.

Eðvarð var bæjarlistamaður Akraness síðastliðið ár og hélt tónleika í Gamla Kaupfélaginu á Akranesi við lok þess tímabils, tónleika sem Rás 1 hljóðritaði og sendi út.

Í þessum þætti hljóma sýnishorn af ýmsu fleiru sem Eðvarð hefur snert á, auk tóndæma um áhrifavalda á gítarleik hans.

Uppáhaldslitur Hátalarans er brúnn. Brúnaljós og baráttusöngvar. Mismunandi tónar þessa jarðarlitar koma fyrir í lagaheitum þáttarins. Flytjendur eru fjölmargir og ólíkir. Clausen, Ellington, Basie, Zimmerman, Presley, Pepper, Gröndal, Stranglers, Morrison og Marley - svo einhverjir séu nefndir.

Jelena Ciric tónlistarkona frá Serbíu segir frá tónlist heimahaganna og tónleikum sem hún mun halda í Mengi nk fimmtudag. Hún syngur tóndæmi fyrir þáttinn og nýtur fulltingis Margrétar Arnardóttur harmonikuleikara.

Einnig heimsækir Arnljótur Sigurðsson þáttinn og bregður upp tónmyndum af sálarfullum hláturtrega og íslensku tónlistar og myndlistarhóstakasti.

Í þættinum er rætt við listræna stjórnendur Sumartónleika í Skálholti, þau Pál Ragnar Pálsson og Tui Hirv, sem spjalla um arfleifð Helgu Ingólfsdóttur og tónlistarstarfið í Skálholti.

Einnig er rætt við þá Sigurgeir Agnarsson og Odd Arnþór Jónsson um komandi Reykholtshátíð auk þess sem komið er inn á eitt og annað sem tónlistarfólk horfist í augu við, eins og hrifningu og höfnun.

Guðmundur Steinn Gunnarsson tónskáld segir frá óperu sinni ,,Einvaldsóður“ og ræðir við Hátalarann um eitt og annað sem tengist tónsköpun, eins og muninn á tjáningu og sköpun. Einnig er rætt um Wagner, bæði á réttunni og röngunni.

Gestur þáttarins er Kristín Björk Kristjánsdóttir - Kira Kira. Þrjár nýjar plötur með tónlist hennar eru nýkomnar út. Sumarbörn, Una og Motions Like These.

Hún ræðir við Hátalarann um sköpunarferlið og allt það sem kemur inn í það - óttann, áhyggjunrnar, ástina og hvaðeina- ekki síst það að vera ekki fyrir sjálfum sér.