比論講『這個人講話真嗆』，tī chia這ê『嗆』to̍h是形容這ê人講話真囂俳、真chhio-tiô ê意思。其他閣有幾nā種相對應ê情境，tī節目內底攏會kā逐家說分明，請逐家做夥來參考看覓！感謝！

訂閱做工á人Youtube頻道：https://www.youtube.com/@chokangalang

完整ê漢羅／POJ對照文稿khǹg ti官方網站：https://cho-kang-a-lang.github.io/

漢羅全文：

華語ê『嗆』，台語是beh按怎講？

Ta̍k-ke平安，ta̍k-ke好，歡迎收聽做工á人phá-khé-su̍h-to͘h！我是主持人Bí-leng，今á日beh hâm ta̍k-ke輕鬆來開講！

前1-chām-á，tī網路頂有1句話真chhèng，講：「下晡下班，坐車到下營落車，tī樹á脚行棋。」這句話是beh表現講，tī華語內底ê kāng 1字漢字，tī台語--ni̍h其實是幾lo̍h字無kâng ê字。

像這款ê例其實koh bē少，今á日我beh the̍h來kah ta̍k-ê破豆--ê是另外1字：華語ê『嗆』，漢字ê寫法，倒手pêng是1字門口ê口，正手pêng是1字倉庫ê倉。『嗆』tī華語內底會使分做幾種意思，我有ka小整理--1-下，咱下面1-ê-á 1-ê來káng。

第1種，是teh講水a̍h是湯湯ê物件走ùi肺管 --入-去。Che tī台語，咱ē講「cha̍k」。比論講lim水ê時陣無細jī去cha̍k--tio̍h，a̍h是像A郎廣播劇內底，烏狗兄A明leh食A郎hō͘--伊ê秫米丸á，伊iau過頭，食kah siuⁿ雄soah去cha̍k--tio̍h。

第2種，ûn-á是物件走入去肺管，m̄-koh chit pái m̄是水，是氣，像講是燒燙燙ê水氣，火煙，甚至是化學藥劑。因為án-ne去傷--tio̍h，華語講號做『吸入性嗆傷』。咱台語有1字「chhèng」，to̍h是teh講：「因為蒸汽a̍h是ē爆炸ê物件，造成人燙--tio̍h，受tio̍h火傷」。咱ka the̍h來chia用，頂面ê情形咱to̍h會使講做：「肺管去hō͘火煙chhèng--tio̍h。」

第3種，是teh講氣味真刺激。Che tī台語，咱ē講「kàng」。可比講：「Oa-sá-bih ē kàng鼻」，a̍h是講：「Hit間工場排--出-來ê煙，臭kāⁿ-kāⁿ，真歹味，實在有夠kàng。」

這字「kàng」，我ē koh想beh ka發揮--1-下。伊ê範圍ē phēng華語ê『嗆』koh khah闊，會使講to̍h是teh形容刺激ê感覺，só͘-pái皮膚ê刺激mā會用「kàng」，親像講，痠痛藥布siuⁿ過涼，tah tio̍h chiok kàng。Iáu-Koh有1種「刺激」是無形--ê：「Kàng」mā會使the̍h來講「受氣ê時目睭kâng gîn」ê動作，像四季紅內底hit句：「肉吻笑，目睭kàng」，意中人ê嘴角bún-bún-á笑，koh假仙leh受氣兼使目尾kā你gîn，喔！是m̄是真刺激！！以上是我teh講笑--lah，to̍h sī藉in kāng音，來做1 ê心適ê聯想án-ne。

第4種，我先講我認為這ê用法to̍h是ùi台語ê「chhiàng(唱)」來--ê，因為「chhiàng」nā變調，tú好kah『嗆』kāng音。台語ê「chhiàng」，原底ê意思是「大聲hoah」，mā有「講ho͘明」ê意思，像講「chhiàng明」a̍h是講「明呼明chhiàng」，to̍h是話先踏頭前，ta̍k-ê講ho͘好án-ne。

後--來延伸--出來ê用法，「chhiàng」soah有「放刁」，a̍h是講tī網路、媒體公開kâng罵」ê意思，像「唱聲」，「唱注(chhiàng-tù)」。比論講「米國總統Trump chhiàng講beh kā對中國ê關稅giâ到100 pha。」這ê延伸ê意思，chŏaⁿ chiâⁿ做現此時台灣華語『嗆』ê用法。是án-chóaⁿ我ē講che是受台語影響，因為nā準是tī中國，kāng款ê意思，in一般ē講『揚言』，『放話』，『挑釁』，a̍h是in ê網路流行語『懟ㄉㄨㄟˇ』。Koh有，「chhiàng聲」chit ê詞，有時ē去hō͘中文ê使用者寫做『嗆聲』，m̄-koh咱自然tek to̍h ē ka讀做「chhiàng聲」，因為che確實to m̄是華語詞--lih。

上尾1種，是teh講1款煮食ê手路，號做『嗆鍋』，意思是tī料理beh起鼎進前，chūn大火，kā豆油，酒，醋chiah-ê佮味--ê ka摻--lòe，用iām火來kā芳氣逼--出-來。Che咱台語會當án-chóaⁿ講？Ah，我已經講--出-來-ah，to̍h是「逼芳氣」--lah！

Án-ne，咱今á日話仙to̍h話到chia！Ta̍k-ke聽了有siáⁿ-mih想法，lóng真歡迎lín留話hō͘--goán，咱做夥來開講！Á nā有kah意goán ê節目，mā誠心邀請lín來kā goán ê頻道chhi̍h讚，訂閱，分享，hō͘ goán有機會接觸tio̍h koh-khah chē對台語有趣味ê朋友！Ló͘-la̍t，再會~

POJ Choân-bûn:

Hôa-gí ê『嗆』,Tâi-gí sī beh án-chóaⁿ kóng?

Ta̍k-ke pêng-an, ta̍k-ke hó, hoan-gêng siu-thiaⁿ Chò-kang-á-lâng phá-khé-su̍h-to͘h! Góa sī chú-chhî-jîn Bí-leng, kin-á-ji̍t beh hâm ta̍k-ke khin-sang lâi khai-káng!

Chêng 1-chām-á, tī bāng-lō͘-téng ū 1 kù ōe chin chhèng, kóng: “E-po͘ hā-pan, chē chhia kàu Ē-iâⁿ lo̍h-chhia, tī chhiū-á-kha kiâⁿ-kî.” Chit kù ōe sī beh piáu-hiān kóng, tī Hôa-gí lāi-té ê kāng 1 jī hàn-jī, tī Tâi-gí--ni̍h kî-si̍t sī kúi-lo̍h jī bô-kâng ê jī.

Chhiūⁿ chit khoán ê lē kî-si̍t koh bē chió, kin-á-ji̍t góa beh the̍h-lâi kah ta̍k-ê phò-tāu--ê sī lēng-gōa 1 jī: Hôa-gí ê『嗆』, Hàn-jī ê siá-hoat tò-chhiú-pêng sī 1 jī mn̂g-kháu ê kháu, chiàⁿ-chhiú-pêng sī 1 jī chhng-khò͘ ê chhng. 『嗆』tī Hôa-gí lāi-té ē-sái hun-chò kúi chióng ì-sù, góa ū ka sió chéng-lí--1-ē, lán ē-bīn 1-ê-á 1-ê lâi káng:

Tē 1 chióng, sī teh kóng chúi a̍h sī thng-thng ê mi̍h-kiāⁿ cháu ùi hì-kńg --ji̍p-khì. Che tī Tâi-gí, lán ē kóng “cha̍k”. Pí-lūn-kóng lim-chúi ê sî-chūn bô-sè-jī khì cha̍k--tio̍h, a̍h sī chhiūⁿ A-lông kóng-pò͘-kio̍k lāi-té, O͘-káu-hiaⁿ A-bêng leh chia̍h A-lông hō͘--i ê chu̍t-bí-oân-á, i iau kòe-thâu, chia̍h kah siuⁿ hiông soah khì cha̍k--tio̍h.

Tē 2 chióng, ûn-á sī mi̍h-kiāⁿ cháu ji̍p-khì hì-kńg, m̄-koh chit pái m̄-sī chúi, sī khì, chhiūⁿ kóng sī sio-thǹg-thǹg ê chúi-khì, hóe-ian, sīm-chì sī hòa-ha̍k io̍h-che. In-ūi án-ne khì siong--tio̍h, Hôa-gí kóng hō-chò『吸入性嗆傷』. Lán Tâi-gí ū 1 jī “chhèng”, to̍h sī teh kóng: “in-ūi cheng-khì a̍h sī ē po̍k-chà ê mi̍h-kiāⁿ, chō-sêng lâng thǹg--tio̍h, siū tio̍h hóe-siong. Lán ka the̍h lâi chia ēng, téng-bīn ê chêng-hêng, lán to̍h ē-sái kóng chò: “Hì-kńg khì hō͘ hóe-ian chhèng--tio̍h.”

Tē 3 chióng, sī teh kóng khì-bī chin chhì-kek. Che tī Tâi-gí, lán ē kóng “kàng”. Khó-pí-kóng: “Oa-sá-bih ē kàng-phīⁿ”, a̍h sī kóng: “Hit keng kang-tiûⁿ pâi--chhut-lâi ê ian, chhàu kāⁿ-kāⁿ, chin pháiⁿ bī, si̍t-chāi ū kàu kàng.”

Chit jī “kàng”, góa ē koh siūⁿ-beh ka hoat-hui--1-ē. I ê hoān-ûi ē phēng Hôa-gí ê『嗆』koh khah khoah, ē-sái kóng to̍h sī teh hêng-iông chhì-kek ê kám-kak, só͘-pái phôe-hu ê chhì-kek mā ē-sái iōng “kàng”, chhin-chhiūⁿ kóng, sng-thiàⁿ io̍h-pò͘ siuⁿ kòe liâng, tah tio̍h chiok kàng. Iáu koh ū 1 chióng “chhì-kek” sī bû-hêng--ê: “kàng” mā ē-sái the̍h lâi kóng “siū-khì ê sî ba̍k-chiu kâng gîn” ê tōng-chok, chhiūⁿ Sù-kùi-hông lāi-té hit kù: “Bah-bún chhió, ba̍k-chiu kàng”, ì-tiong-jîn ê chhùi-kak bún-bún-á chhiò, koh ké-sian leh siū-khì kiam sái ba̍k-bóe kā lí gîn, o͘h! Sī m̄ sī chin chhì-kek!! Í-siōng sī góa teh kóng-chhiò--lah, to̍h sī chià in kāng im, lâi chò 1 ê sim-sek ê liân-sióng án-ne.

Tē 4 chióng, góa seng kóng góa jīn-ûi chit ê iōng-hoat to̍h sī ùi Tâi-gí ê “唱(chhiàng)” lâi--ê, in-ūi “chhiàng” nā piàn-tiāu tú-hó kah『嗆』kāng im. Tâi-gí ê “chhiàng”, goân-té ê ì-sù sī “tōa-siaⁿ hoah”, mā ū “kóng ho͘ bêng” ê ì-sù, chhiūⁿ-kóng “chhiàng-bêng” a̍h sī kóng “bêng-ho͘ bêng-chhiàng”, to̍h sī ōe seng tah thâu-chêng, ta̍k-ê kóng ho͘ hó án-ne.

Āu--lâi iân-sin--chhut-lâi ê iōng-hoat, chhiàng soah ū “pàng-tiau”, a̍h sī kóng tī bāng-lō͘, mûi-thé kong-khai kâng mē ê ì-sù. Chhiūⁿ chhiàng-siaⁿ, chhiàng-tù. Pí-lūn-kóng “Bí-kok chóng-thóng Trump chhiàng kóng beh kā tùi Tiong-kok ê koan-sòe giâ kàu 100 pha.” Chit ê iân-sin ê ì-sù chŏaⁿ chiâⁿ-chò hiān-chhú-sî Tâi-oân Hôa-gí 『嗆』ê iōng-hoat.

Sī án-chóaⁿ góa ē kóng che sī siū Tâi-gí éng-hióng, in-ūi nā-chún sī tī Tiong-kok, kāng-khoán ê ì-sù, in it-poaⁿ ē kóng 『揚言』,『放話』,『挑釁』, a̍h sī in ê bāng-lō͘ liû-hêng-gí 『懟ㄉㄨㄟˇ』。Koh ū, chhiàng-siaⁿ chit ê sû, ū-sî ē khì hō͘ Tiong-bûn ê sú-iōng-chiá siá chò 『嗆聲』, m̄-koh lán chū-jiân tek to̍h ē ka tha̍k chò “chhiàng-siaⁿ”, in-ūi che khak-si̍t to m̄-sī Hôa-gí-sû--lih.

Siōng-bóe 1 chióng, sī teh kóng 1 khoán chú-chia̍h ê chhiú-lō͘, hō-chò『嗆鍋』, ì-sù sī tī liāu-lí beh khí-tiáⁿ chìn-chêng, chūn tōa-hóe, kā tāu-iû, chiú, chhò͘ chiah-ê kah-bī--ê ka chham--lòe, iōng iām-hóe lâi kā phang-khùi pek--chhut-lâi. Che lán Tâi-gí ē-tàng án-chóaⁿ kóng? Ah, góa í-keng kóng--chhut-lâi-ah, to̍h sī “pek phang-khùi”--lah!

Án-ne, lán kin-á-ji̍t ōe-sian to̍h ōe kàu chia! Ta̍k-ke thiaⁿ liáu ū siáⁿ-mih siūⁿ-hoat, lóng chin hoan-gêng lín lâu-ōe hō͘--goán, lán chò-hóe lâi khai-káng! Á nā ū kah-ì goán ê chiat-bo̍k, mā sêng-sim iau-chhiáⁿ lín lâi kā goán ê pîn-tō chhi̍h chán, tēng-oa̍t, hun-hióng, hō͘ goán ū ki-hōe chiap-chhiok tio̍h koh-khah chē tùi Tâi-gí ū chhù-bī ê pêng-iú! Ló͘-la̍t, chài-hōe.

文稿／主持／人聲編輯︱柯王炳勳 Bí-leng

潤稿／校對︱蔡逸民 BuLuhSuh

配樂︱陳曉怡 Niau-tāu

字幕︱林于真 A-chin

圖︱AI製圖

影片︱陳姿樺 Ko͘-chiáu

--

Hosting provided by SoundOn