Farið yfir víðan völl eftir svekkjandi niðurstöðu úr leik Danmerkur og Frakklands sem þýða að Ísland leikur um 5. sætið á mótinu. Jákvæðir punktar frá Loga Geirssyni, gesti þáttarins, skoðum heildarmyndina og ræðum frammistöðu Íslands á mótinu hingað til. Ræðum framtíð Guðmundar Guðmundssonar með landsliðið, hvaða leikmenn komu mest á óvart, stærstu sigrarnir og súrustu töpin. Upphitun fyrir erfiðan leik gegn Noregi á morgun.

Umsjón: Gunnar Birgisson og Helga Margrét Höskuldsdóttir.

Karen Einarsdóttir eiginkona Björgvins Páls Gústavssonar, sem sjálf er fyrrverandi markvörður hjá Fram var gestur Íþróttavarpsins í dag. Hún ræddi við okkur um tapið grátlega fyrir Króatíu í gær, leikinn við Svartfellinga á morgun og um síðustu daga. Karen fór líka almennt yfir sviðið hvernig er að vera ein heima með fjögur börn meðan eiginmaðurinn er á stórmóti í næstum heilan mánuð. Það komi þó aldrei til greina að hennar hálfu Björgvin Páll fái ekki leyfi til að spila fyrir íslenska landsliðið, ekki einu sinni í fyrra þegar Björgvin fór frá fimm daga gömlu barni á HM í Egyptalandi. Karen hefur bullandi trú á því að leikirnir í lokaumferð riðlakeppninnar spilist vel á morgun, þannig Ísland komist í undanúrslit og þá sé aldrei að vita nema hún skelli sér til Búdapest á úrslitahelgina.

Umsjón: Þorkell Gunnar Sigurbjörnsson og Gunnar Birgisson.

Ísland vann ótrúlegan sigur á Frakklandi, 29-21 í milliriðlakeppni EM karla í handbolta í Búdapest í gærkvöld. Guðjón Valur Sigurðsson markahæsti landsliðsmaður sögunnar, næstleikjahæsti landsliðsmaður Íslands frá upphafi, fyrrverandi landsliðsfyrirliði og núverandi þjálfari Gummersbach í Þýskalandi er á línunni hjá okkur í Íþróttavarpi dagsins. Hann fer yfir leikinn við Frakka, spáir í spilin fyrir leikinn við Króata á morgun og fer vítt og breitt yfir sviðið.

Umsjón: Þorkell Gunnar Sigurbjörnsson og Gunnar Birgisson.

Patrekur Jóhannesson fyrrverandi landsliðsmaður í handbolta, fyrrverandi landsliðsþjálfari Austurríkis og núverandi þjálfari Stjörnunnar var gestur Íþróttavarpsins í dag. Patrekur ræddi leik Íslands við Danmörku í gær, stöðuna í íslenska liðinu með COVID vofandi yfir, og leikinn við Frakka á morgun. Hann talaði líka um Duranona, Alfreð Gísla, Jóa Pé, bróður sinn, Guðna Th. Jóhannesson forseta Íslands og margt fleira.

Umsjón: Þorkell Gunnar Sigurbjörnsson og Gunnar Birgisson.

Aukaþáttur: Kristjana Arnarsdóttir kom í Íþróttavarpið í dag og fór yfir tíðindi síðasta sólarhrings og þau skakkaföll sem orðið hafa á íslenska landsliðinu í handbolta á EM.

Umsjón: Þorkell Gunnar Sigurbjörnsson og Gunnar Birgisson.

Ólafur Stefánsson er að flestra mati besti handboltamaður Íslandssögunnar. Ólafur hefur farið á kostum í EM stofunni á RÚV núna það sem af er Evrópumóti. Ólafur mætti fullur eldmóðs í Íþróttavarpið í dag. Hann vill að strákarnir í landsliðinu láti sig dreyma um undanúrslit. Þá segir Ólafur að hann sé á góðum stað í lífinu eftir sjö ára ferðalag og vilji fara að tengjast handbolta aftur. Hann sé jafnvel spenntur fyrir að þjálfa á ný. Þáttur dagsins er eiginlega skylduhlustun.

Umsjón: Þorkell Gunnar Sigurbjörnsson og Gunnar Birgisson.

Óskar Bjarni Óskarsson sem var aðstoðarlandsliðsþjálfari Guðmundar Guðmundssonar á árunum 2008 til 2012 þegar silfrið í Peking vannst og bronsið í Austurríki var gestur Íþróttavarpsins í dag. Óskar Bjarni var líka aðstoðarlandsliðsþjálfari hjá Geir Sveinssyni 2016-2018 og þekkir vel til landsliðsins, auk þess að hafa þjálfað flesta leikmenn liðsins. Hann fór yfir sigurinn á Hollandi í gærkvöld, rýndi í leikinn framundan við Ungverjaland og rifjaði upp ýmislegt frá sínum tíma með landsliðinu. Þá lenti Óskar í spurningakeppni um ættar- og makatengsl landsliðsmanna.

Umsjón: Þorkell Gunnar Sigurbjörnsson og Gunnar Birgisson.

Logi Geirsson var gestur í Íþróttavarpinu í dag. Hann fór yfir sigur Íslands á Portúgal á EM í gærkvöld og spáði aðeins í spilin fyrir leikinn við Holland á morgun og um framhaldið á mótinu. Logi ræddi líka eigin landsliðsferil og það hve erfitt er að stjórna honum. Í seinni hluta þáttarins kom svo Helga Margrét Höskuldsdóttir og greindi handboltalög.

Umsjón: Þorkell Gunnar Sigurbjörnsson og Gunnar Birgisson.

Dagur Sigurðsson er gestur Íþróttavarpsins í dag. Dagur er eini Íslendingurinn sem hefur unnið EM karla í handbolta. Það gerði hann 2016 þegar hann stýrði Þýskalandi til sigurs. Dagur fór yfir víðan völl í þætti dagsins og rýndi meðal annars í mótherja Íslands á morgun, lið Portúgals. Í þættinum kom líka fram að Dagur bætist við sérfræðingahóp EM stofunnar á RÚV. Hann verður þar með Loga Geirssyni og Ólafi Stefánssyni undir styrkri stjórn Kristjönu Arnarsdóttur.

Umsjón: Þorkell Gunnar Sigurbjörnsson og Gunnar Birgisson.

Íþróttavarp RÚV er helgað EM karla í handbolta í janúar. Í þáttunum fá Gunnar Birgisson og Þorkell Gunnar Sigurbjörnsson til sín góða gesti til að fara yfir mótið og öllu því helsta sem því við kemur. Einar Örn Jónsson og Kristjana Arnarsdóttir komu í þennan þátt til að spá í spilin. Kristjana upplýsti meðal annars um að Ólafur Stefánsson verði með henni og Loga Geirssyni í EM stofunni í ár.